Лондонската полиција (МЕТ) е институционално расистичка, мизогена и хомофобична и не може да ги контролира своите вработени.

Ова е заклучокот на независната ревизија, предводена од членката на Горниот дом на парламентот, Луиз Кејси, со која таа сакаше да изврши притисок врз новиот шеф на МЕТ да ги реформира најголемите британски полициски сили, пренесоа британските медиуми.

Прегледот беше нарачан во 2021 година од тогашниот шеф на Мет, Кресида Дик, откако полицаец беше осуден на доживотен затвор за силување и убиство на млада жена. Овој шокантен случај ја стави полицијата во центарот на вниманието на јавноста.

Кејси денеска изјави дека е потребна радикална реформа откако беа откриени сериозни пропусти во МЕТ, во кој се вработени повеќе од 43.000 службеници и персонал.

„Наидовме на широко распространето малтретирање, дискриминација, институционална хомофобија, мизогенија и расизам“, се наведува во извештајот на Кејси, додавајќи дека „жените и децата не ја добиваат заштитата и поддршката што ја заслужуваат“.

Во извештајот се додава и дека жените во полициските сили не сакале да зборуваат поради страв од последици по нивните кариери.

The post Лондонската полиција е расистичка, сексистичка и не може да ги контролира вработените appeared first on Република.