Лидерите на институциите на Европската Унија во објави на социјалните мрежи упатија остра осуда на иранските напади врз Израел.

– Остро го осудуваме нападот што Иран го започна врз Израел. Мора да се направи се за да се спречи понатамошна регионална ескалација. Мора да се избегне натамошно крвопролевање, напиша претседателот на Советот на ЕУ, Шарл Мишел во објава на Икс.

Мишел воедно најави дека ЕУ заедно со своите партнери ќе продолжи внимателно да го следи развојот на ситуацијата во регионот на Блискиот Исток.

Белгискиот премиер Александар де Кро, кој е актуелен претседавач со Европскиот совет, исто така Икс наведе дека Иран е познат спонзор на тероризмот и неговиот директен напад врз Израел претставува опасна ескалација на насилството на Блискиот Исток.

– Го осудувам овој голем напад врз Израел и ги повикувам сите страни да покажат воздржаност. Веднаш треба да се постигне итен прекин на огнот, порача Де Кро.

Претседателката на Европската комисија, Урсула фон дер Лајен на Икс објави дека силно го осудува „бесрамниот и неоправдан“ напад на Иран врз Израел.

– Го повикувам Иран и неговите претставници веднаш да ги прекинат овие напади. Сите актери сега мора да се воздржат од понатамошна ескалација и да работат на враќање на стабилноста во регионот, додаде Фон дер Лајен во објавата.

Високиот претставник на ЕУ за надворешна политика и безбедност Жосеп Борел наведе дека Унијата ЕУ силно го осудува „неприфатливиот ирански напад врз Израел“.

– Ова е невидена ескалација и сериозна закана за регионалната безбедност, наведе Борел на Икс.

Со осуда на нападот се приклучи и еврокомесарот за соседство и проширување Оливер Вархеји.

– Најостро го осудувам нападот на Иран врз Израел. Нападот врз Израел значи напад врз регионот и неговата безбедност. Се молиме за оние кои се нападнати, додаде Вархеји.

The post Лидерите на ЕУ го осудија иранскиот напад врз Израел, апелираат на воздржаност и прекин на огнот appeared first on Република.

Денеска во Хаг продолжува судењето на поранешните водачи на ОВК Хашим Тачи, Кадри Весели, Јакуп Красниќи и Реџеп Селими, пренесува Газета експрес.

Денеска ќе биде сослушан петтиот сведок кој сведочеше минатата недела, делумно приватно, делумно јавно.

Судскиот совет изрази загриженост што речиси сите докази досега во овој судски случај се изведуваат на приватни или затворени седници и потсетија дека од јавен интерес е овој процес, колку што е можно, да се води јавно.

Тачи, Весели, Селими и Красниќи се обвинети за воени злосторства и злосторства против човештвото, убиства, прогон на политичка и етничка основа, незаконско апсење и приведување и други нехумани дела.

Кривичните дела се оквалификувани, во шест точки, како злосторства против човештвото, а во четири како воени злосторства.

Судењето започна на 3 април, а Тачи, Весели, Селими и Красниќи се во притвор во Хаг од октомври 2020 година.

The post Денеска во Хаг продолжува судењето на поранешните водачи на ОВК Хашим Тачи, Кадри Весели, Јакуп Красниќи и Реџеп Селими appeared first on Република.

Кралицата Елизабета Втора почина попладнево на 96-годишна возраст, по што реагираа голем број светски лидери, изразувајќи жалење поради нејзината смрт но и восхит за нејзиниот живот и долговечно владеење.

Американскиот претседател Џо Бајден и првата дама Џил Бајден издадоа изјава за смртта на кралицата, опишувајќи ја како „повеќе од монарх“. Во соопштението на Белата куќа се вели: „Во свет на постојани промени, таа беше постојано присуство и извор на утеха и гордост за генерации Британци, вклучително и многумина кои никогаш не ја познавале својата земја без неа. „Постојаното восхитување за кралицата Елизабета Втора ги обедини луѓето ширум Комонвелтот. Седумте децении од нејзиното владеење на создавање историја сведочеа за доба на невиден човечки напредок и напреден марш на човечкото достоинство.

„Таа беше првиот британски монарх со кој луѓето ширум светот можеа да почувствуваат лична и непосредна врска – без разлика дали ја слушаа на радио како млада принцеза како зборува со децата на Обединетото Кралство или се собираа околу нивните телевизори за нејзиното крунисување, или го гледаа нејзиниот последен божиќен говор или нејзиниот платинест јубилеј на нивните телефони. Таа, пак, целиот свој живот го посвети во нивна служба“, посочија Џо и Џил Бајден.

„Нејзиното височество кралицата Елизабета Втора го отелотворуваше континуитетот и единството на британската нација повеќе од 70 години. Ја паметам како пријателка на Франција, љубезна кралица која остави трајна трага на својата земја и својот век“, напиша францускиот претседател Емануел Макрон.

„Со најтешка болка ја примивме вестта за смртта на најдолготрајниот канадски суверен, нејзиното височество кралицата Елизабета Втора. Таа беше постојано присуство во нашите животи – и нејзината услуга за Канаѓаните засекогаш ќе остане важен дел од историјата на нашата земја“, вели канадскиот премиер Џастин Трудо.

„Жалиме за смртта на кралицата Елизабета Втора. Таа беше пример и инспирација за милиони луѓе, исто така овде во Германија. Нејзината посветеност на германско-британското помирување по ужасите на Втората светска војна ќе остане незаборавна. Ќе нѝ недостига, а посебно нејзиниот прекрасен хумор“, вели германскиот канцелар Олаф Шолц.

„Белгија упатува сочувство до британското кралско семејство и до британскиот народ. Нека нејзиното височество, кралицата Елизабета Втора почива во мир. Повеќе од 70 години таа беше светилник на стабилност и достоинство за британскиот народ“, истакна белгискиот премиер Александер де Кро.

„Со тага ја примивме веста за смртта на нејзиното височество кралицата Елизабета Втора. Нејзиното 70-годишно владеење ја одбележа британската историја од Втората светска војна. Моето искрено сочувство до кралското семејство и до народот на Обединетото Кралство“, напиша португалскиот премиер Антонио Коста

The post Реакции од светски лидери по смртта на кралицата Елизабета Втора appeared first on Република.