Министерот за внатрешни работи Панче Тошковски денеска одржа работен состанок со Лаура Лунгароти, субрегионален координатор за Западен Балкан на Меѓународната организација за миграции (ИОМ) и Соња Божиновска Петрушевска, шеф на канцеларијата на ИОМ во Македонија.

Како што соопштија од МВР, претставниците на ИОМ му честитаа на министерот Тошковски за изборот и му изразија поддршка за најавените реформи во Министерството за внатрешни работи. Лунгароти го истакнала значењето на добрата соработка помеѓу МВР и ИОМ, особено во делот на граничното управување.

За време на состанокот, Лунгароти го информирала Тошковски дека во моментот ИОМ е фокусиран на областа поврзана со доброволно враќање на мигранти, како еден од главните приоритети на Европската Унија и очекува успешна соработка и поддршка од страна на Министерството за внатрешни работи во овој дел.

Претставниците на ИОМ нагласиле дека досегашната материјална и техничка помош што му беше пружена на МВР преку проекти финансирани од страна на ЕУ ќе продолжи и понатаму, како и дека ваквата поддршка може да биде зголемена во блиска иднина.

За време на состанокот министерот Тошковски им се заблагодари на Лунгароти и Божиновска Петрушевска за поддршката која што Меѓународната организација за миграции ја дава на Министерството за внатрешни работи.

Министерот Тошковски истакна дека министерството за внатрешни работи ќе работи кон јакнење на капацитетите за обезбедување на државните граници особено во делот за интегрираното гранично управување,а во исполнување на оваа цел ќе биде потребна поддршка и од страна на ИОМ.

The post Работен состанок на министерот Тошковски со претставници на Меѓународната организација за миграции appeared first on Република.