Потпретседателот на бугарското Собрание, Кристијан Вигенин денеска ги повика властите и партиите во земјава да се воздржат од изјави кои не водат кон решавање на проблемите меѓу Македонија и Бугарија.

Ги повикуваме властите во  Македонија, како и водечките политичари и партии, да се воздржат од изјави и постапки кои не водат кон решавање на проблемите, туку до неприфатлива ескалација, која долгорочно може да го влоши дијалогот меѓу двете земји - изјави Вигенин, кој е потпретседател на Бугарската социјалистичка партија (БСП).

Тој најави дека неговата партија ќе инсистира за инцидентот од четвртокот во Охрид да бидат информирани Советот на Европа и Организацијата за безбедност и соработка во Европа (ОБСЕ).

Настаните од последните денови во односите меѓу Македонија и Бугарија ја потврдуваат исправноста на ставот на БСП да не поддржи укинувањето на ветото за преговорите за членство на Република Македонија во Европската Унија - изјави Вигенин на брифинг со новинарите, по одолжувањето на точката од дневниот ред на денешната седница на бугарското Собрание по која требаше да се расправа за односите на Софија со земјава.

Расправата, иницирана од националистичката партија Преродба и на собраниската Комисија за политики за Бугарите во странство, беше одложена затоа што на седница не дојде шефот на бугарската дипломатија Николај Милков, поради, како што беше соопштено, службено патување надвор од државата.

Милков вчера во обраќање на состанок на министрите за надворешни работи на земјите членки на ЕУ во Брисел, говорел за најновиот развој на настаните во односите меѓу  Македонија и Бугарија.

Како што соопшти бугарското МНР, Милков ги информирал своите колеги „за влошената состојба во Република  Македонија во однос на граѓаните на земјата со бугарско национално чувство“, со акцент на „тешкиот инцидент со претепувањето на Кристијан Пендиков во Охрид“.

Милков, при тоа, изразил жалење што овој „сериозен инцидент е дел од повеќето слични настани во последните месеци со антибугарски карактер“.

Беше нагласена потребата Скопје активно и целосно да се заложи за заштита на правата на Бугарите во земјата, како и за исполнување на обврските преземени во рамките на процесот на европска интеграција на земјата, се додава во соопштението на бугарското МНР.

Шефот на државата Стево Пендаровски вчера по завршувањето на седницата на Советот за безбедност, на која се разговараше за најновиот развој на настаните во односите се Бугарија, најави дека Советот ќе предложи до Владата да се забрани влез во земјава на еден европратеник и неколку други лица, бидејќи постојат сомневања дека дека дел од овие лица се поврзани со руската разузнавачка служба.

Претседателот на државата рече и дека се очекува на 4 февруари организирана група од Бугарија да пристигне во земјава на одбележување на годишнината од раѓањето на Гоце Делчев. Групата, како што посочи Пендаровски, ќе има цел нарушување на безбедноста и дестабилизација на земјата и на односите со Бугарија. Претседателот додаде дека ќе бидат преземени сите потребни безбедносни мерки од границата, се до гробот на Гоце Делчев.

Бугарскиот европратеникот Ангел Џамбаски, пак и денеска продолжува со провокациите на адреса на  Македонија. Тој денеска на Фејсбук објави: „Македонија била и е бугарска. Македонија е нешто друго – тоа е заслуга на Тито. Со забрани за влез во земјата, нема да ја избришете вистината“.

Џамбаски неодамна беше во Скопје, на одбележување на панихидата за Мара Бунева, при што упати провокативни пораки за територијални претензии и изјавувајќи дека македонските политичари се „србомани кои вршат геноцид врз Бугарите“, а земјава ја нарече „бугарска“.

Бугарското МНР тогаш се огради од ваквите ставови и нагласи дека тие не кореспондираат и не се став и на Бугарија како држава.

The post Вигенин: Политичарите во Скопје да се воздржат од изјави кои не водат кон решавање на проблемите appeared first on Република.

Потпретседателот на 47. Народно собрание на Бугарија и поранешен министер за надворешни работи Кристијан Вигенин на Фејсбук напиша дека коалицискиот договор за владеење меѓу „Промената продолжува“, БСП, „Има таков народ“ и Демократска Бугарија има јасен став за европската перспектива на Република Македонија.

Како што јави дописникот на МИА од Софија, тој пишува дека оваа тема останува еден од најголемите предизвици за Бугарија и бугарската влада во областа на надворешната и европската политика.

Според Вигенин, одржувањето на широк политички договор и соработка меѓу институциите во земјата е клучот за успешна одбрана на бугарскиот интерес. Тој смета дека Советодавниот совет за национална безбедност свикан од претседателот на Бугарија е добра можност да се добијат нови информации и да се споделат политичките ставови за следните чекори.

На крајот од својот пост, Вигенин заклучи дека секој збор е важен, и затоа се надева дека импровизираните изјави во оваа фаза ќе бидат сведени на минимум за да не се создаде лажна претстава за пукнатини во позицијата на Бугарија или меѓу коалиционите партнери

The post Потпретседателот на бугарскиот парламент потврди дека новата власт има единствен став за Македонија appeared first on Република.