Амбасадорката на САД во земјава Кејт Мери Брнс во своето вечерашно гостување во „Емисија 200“ на Алсат, говорејќи за стратешкиот дијалог помеѓу Македонија и САД, што треба да се одржи на 2 јуни во Вашингтон, претстави дел од темите коишто се очекува да се најдат на агендата на состанокот.

Агендата е сѐ уште во подготовка, но идејата е да се опфатат повеќе теми од економски просперитет, јакнење на демократските институции, одбраната и безбедноста, како и донесување експерти кои би разговарале за приоритетите на секоја страна. Министерот за надворешни, Османи, ќе ја предводи делегацијата од Македонија, листата за останатите претставници сѐ уште се финализира. Од наша страна, помошникот секретар, Карен Донфрид, која неодамна ја посети Македонија, ќе биде официјален домаќин, но ќе има можности за средби и со други официјални лица, рече амбасадорката Брнс.

Стратешкиот дијалог е добра можност за континуирана соработка помеѓу двете земји и е одличен патоказ за продолжување на партнерството помеѓу САД и Македонија, рече амбасадорката одговарајќи на прашањето – каква порака би ѝ пренела на нејзината наследничка во Скопје.

Намерата за Стратешкиот дијалог е да се разгледаат областите коишто сѐ уште ги немаме потполно истражено. Сѐ уште има простор да се работи на прашања од областа на одбраната и безбедноста, но и на многу други области како економија, енергетика, климатски промени, работа со младите, културна размена, едукација… мислам дека Стратешкиот дијалог нуди интересни можности за во иднина и испраќа сигнал дека САД сакаат уште повеќе да вложат во него. Тоа може да е добар патоказ двете земји да продолжат да го градат своето партнерство, рече амбасадорката Брнс.

The post Брнс: САД и Македонија имаат широки можности за проширување на партнерството appeared first on Република.

Амбасадорката на САД во земјава, Кејт Мери Брнс, во своето вечерашно гостување во „Емисија 200“ на Алсат, нагласи два сегмента во државата коишто бараат посебно внимание и ангажман од власта.

Има некои области во Македонија коишто нѐ загрижуваат и причината поради која сме особено гласни за тие работи е дека сакаме да помогнеме и да бидеме поддршка. Две од нив се најважни. Под број еден е корупцијата. Тоа не е проблем којшто го има само во Македонија…, но треба да биде приоритет, бидејќи демократските институции сѐ уште се во развој и нивно постојано поткопување со корупција е закана за идната безбедност, стабилност и просперитет на државата.

Втората работа, којашто заслужува внимание, е состојбата со младите. Нѐ загрижува фактот што младите се разочарани од можностите тука. Разочарани се кога не гледаат дека владата работи за граѓаните. Младите треба да бидат охрабрени да ја видат својата иднина тука, a борбата против корупцијата е моќен начин да се излезе во пресрет на нивната загриженост, рече амбасадорката Брнс.

The post Брнс: Две работи се посебно загрижувачки во Македонија – корупцијата и состојбата на младите appeared first on Република.