Пратеничката група на Собранието за соработка со Парламентите на: Република Казахстан, Киргистанска Република, Република Таџикистан, Република Узбекистан и Туркменистан, оствари средба со казахстанскиот амбасадор, Сатибалди Буршаков.

Како што соопштија денеска од собраниската прес-служба, претседателот на Групата, Никола Коњановски, информира за традиционалното формирање ваква група за соработка со земјите од Кавказот, со што се покажува заинтересираноста за востановување и јакнење на меѓупарламентарната соработка.

- Нашата Амбасада во Астана е отворена во 2014 година, а од друга страна, Бурашов е првиот резидентен амбасадор на Казахстан во Скопје, назначен на оваа функција годинава, и во таа насока му беше упатена честитка и посакан успешен мандат. Коњановски изрази задоволство што билатералните односи меѓу нашата земја и Казахстан се карактеризираат со пријателство, меѓусебно разбирање и заеднички интерес за натамошно проширување и продлабочување. Иницијативите на Казахстан во меѓународните организации се поддржани, а соработката на мултилатерален план е особено изразена во рамките на ОН и ОБСЕ, стои во соопштението.

Амбасадорот Буршаков, се посочува, изрази чест што е гостин во Собранието токму денеска, на Денот на Република Казахстан, и во тој контекст ја искористи можноста да ја запознае Групата со својата земја, која е независна од 1991 година, кога се оддели од Советскиот Сојуз. Оттогаш, Казахстан е земја која динамично се развива во Централна Азија, а има изградено одлични стратешки партнерства и со соседите и со глобалниот свет. ЕУ е најголемиот партнер на Казахстан, но тука се и Русија и Кина. Казахстан е држава најголема во светот без излез на море и деветта според својата површина, која има богата историја и располага со многу ресурси, особено позната по извозот на нафта.

-Покрај тоа што броиме исто години независност излезени од едни поранешни системи, двете земји се слични и како мултиетнички општества, со тоа што Казахстан брои 130 етнички малцинства, се посочува во соопштенето.

Соговорниците, се додава, ги поздравиле меѓусебните односи и потпишувањето значајни договори, но биле едногласни дека постои простор и огромен потенцијал за натамошно унапредување на соработката меѓу двата парламента и меѓу двете држави на многу полиња, како економија, трговија, енергетика, бизнис, образование, здравство, култура... За зацврстување на пријателството, тие оставиле отворена врата за меѓусебни посети за размена на идеи и искуства.

Следната година ќе се заокружат 30 години од воспоставувањето билатерални односи со Казахстан, па Групата и амбасадорот се согласија да се одбележат на пригоден начин, се наведува во соопштението.

The post Унапредување на парламентарната соработка со Казахстан appeared first on Република.

Руската агенција за безбедност на храна одби да даде дозвола за увоз на овошје и зеленчук од Казахстан, а аналитичарите велат дека вистинската причина е одбивањето на властите во земјата да се приклучат на БРИКС.

Иако агенцијата соопшти дека одлуката е донесена поради „одбивањето на релевантните власти од Казахстан да обезбедат фитосанитарна безбедност“, овој потег е направен само неколку дена откако властите во Астана одбија да се приклучат на БРИКС.

Инаку, Казахстан е најголемата економија во Централна Азија, а 11 отсто од вкупниот извоз на земјата се „трошат“ за испраќање стоки во Русија, која е нивни трет најголем надворешно трговски партнер.

Властите во Казахстан го испратија своето одбивање за членство во БРИКС неколку дена пред големиот самит на оваа организација, каде домаќин ќе биде Русија.

Во моментов и најверојатно во догледна иднина, Казахстан ќе се воздржи од аплицирање за БРИКС, изјави портпаролот на казахстанскиот претседател, Берик Уали, во интервју за локалните медиуми во средата.

Уали додаде дека претседателот Касим-Жомарт Токаев постојано ја нагласувал својата поддршка за Обединетите нации како „универзална и незаменлива меѓународна организација“ и рече дека Советот за безбедност на ОН треба да се реформира за да ги земе предвид интересите на регионалните сили.

Одлуката на Казахстан е удар за рускиот претседател Владимир Путин, кој се обидува да го означи БРИКС како сојуз на „глобалното мнозинство“ и дел од напорите на Москва да го оспори доминантниот Запад и да ги оспори санкциите поврзани со руската агресија врз Украина.

Портпаролот на Путин, Дмитриј Песков изјави дека БРИКС не ги заменува ОН, напротив, „ја надополнува и не се спротивставува на нејзината меѓународна природа“.

-Казахстан е наш пријател, наш стратешки партнер, наш сојузник. Ги цениме нашите односи. Тоа е првата работа. Затоа, се разбира, самиот Казахстан носи одлуки за форматот на своето учество во одредени организации, рече Песков.

The post Казахстан одби да се приклучи на БРИКС, Русија веднаш го забрани увозот на овошје и зеленчук appeared first on Република.

Казахстан е земја во Централна Азија каде се вкрстуваат Западот и Истокот, со најбрз економски развој во регионот. Оваа држава, најголема во светот без излез на море и деветта според својата површина, има население од околу 20 милиони жители, а својот брз растеж го должи на експлоатацијата на нафта и гас која започнува по распадот на Советскиот сојуз и стекнувањето на независноста во 1991 година. Но, динамичниот развој и модернизација на земјата оди заедно со силната посветеност за зачувување и негување на нејзиниот културен идентитет вкоренет во богатата повеќевековна номадска традиција, обичаи и вредности.

Иако, на прв поглед, се чини далеку од Европа, со последните геополитички и геостратешки поместувања, (војната во Украина) и поместувањето на фокусот на глобалните движења кон Азија, Казахстан се повеќе се профилира како значаен меѓународен играч и како важен партнер за ЕУ. Со својата долга традиција на соработка и дијалог како дел од Патот на свилата, денес е на траекторијата на кинеската развојна иницијатива „Пат и појас“ која има силно влијание врз регионалната економија.

Астана покажа интерес и за зајакнување на врските со земјите од европскиот континент, како и со регионот на Западен Балкан, преку отворањето на амбасади во регионот во последните две децении. Неодамна, годинава, беа отворени амбасадите на Казахстан во Скопје, Албанија, Словенија и Генералниот конзулат во Црна Гора.

Во Казахстан денеска се одржува референдум за изградба на нуклеарна централа, на кој граѓаните на земјата ќе го кажат својот став за оваа важна одлука за државата. За неговото одржување државата ќе издвои 33 милиони долари.

Присуството на 5. Светски номадски игри - своевидна олимпијада на номадските спортови, што се одржаа во главниот град Астана од 8 до 13 септември, беше можност одблизу да се согледаат неверојатниот раст и развојот на земјата, но и да се слушне за плановите во кој правец ќе се движи, кои се економските приоритети и надворешно-политичките релации и предизвици.

Светските номадски игри како домаќин ги отвори претседателот на Казахстан, Касим - Жомарт Токаев на спектакуларна свеченост одржана на стадионот Астана Арена. Во присуство на шефови на држави и високи претставници од регионот, како и од повеќе меѓународни и регионални организации, тој укажа на важноста на оваа меѓународна манифестација и потсети на придонесот на номадската цивилизација во светската историја.

-Номадите од Големата степа ја населувале Евроазија уште од античко време. Со иновативни технологии за своето време, тие придонесоа за глобален напредок. Пред пет илјади години, номадите го припитомиле коњот и формирале култура на јавачи која се проширила низ целиот свет. Степските занаетчии правеле напредно оружје и прекрасен накит. Живописен доказ за тоа е пронајдениот „златен човек“ од периодот Сака. Казахстан му даде на светот извонредни личности како Ал Фараби и Хоџа Ахмед Јасави, кои дадоа значаен придонес во развојот на науката и хуманистичките идеи. Нашите предци создадоа силни држави и подигнаа средновековни градови во Големата Степа кои беа импресивни по својата големина и убавина, вклучувајќи ги Отрар, Туркестан, Тараз и Сараишик. Работејќи како мост меѓу Западот и Истокот, номадите придонеле за зближување на различни култури. Хунските империи и турските каганати, Златната орда и Казахстанскиот хан цветаа во овие огромни области во различни времиња, рече Токаев.

Тој нагласи дека Номадските игри, кои прв пат се одржаа пред 10 години, во организација на Киргистан, се посебен проект чија цел е да се заштити бесценетото наследство на номадската култура за да се пренесе на идните генерации.

- Ова е најголемото спортско натпреварување од ваков вид во светот, така да се каже, Олимпијада на номадите. Овие игри ја промовираат номадска цивилизација на глобално ниво. Самиот спорт е симбол на почит и солидарност. Неговата клучна цел е да го зајакне пријателството меѓу народите. Казахстан на сите им е познат како земја на мирот и соживотот. Навистина, тука мирно коегзистираат разни етнички и религиозни групи. Имаме воспоставено блиски врски и со соседните и со далечните земји. Сакаме да видиме и други држави да живеат во хармонија една со друга. Уверен сум дека Номадските игри ќе помогнат да се поттикне меѓународната солидарност, порача Токаев.

Игрите имаат и културна и научна димензија. Во Етно селото изградено од традиционалните номадски шатори - јурти, наречено „Универзумот на номадите“ се одржуваа дневни културни програми - концерти, саем за занаетчиство, изложби. Беа претставени различни региони на Казахстан, а свои јурти основаа и УНЕСКО и УНИЦЕФ. Ова бесценето културно богатство на номадските земји заслужува и ќе биде презентирано во посебна сторија.

Реформи, развој и предизвици

Казахстан е Република со претседателски систем на владеење. Од населението 70,4 проценти се Казаци, 15,5 проценти Руси, а имаат 130 етнички малцинства. Официјален јазик е казашкиот кој е дел од туркиската група на јазици, а во службена употреба е и рускиот јазик.Од стекнувањето независност од Советскиот Сојуз во 1991 година, земјата ја одбележува политичка стабилност и мошне динамичен економски развој и модернизација. До 2019 година речиси три децении со земјата раководеше Нурсултан Назарбаев кој се смета за татко на нацијата. По него раководството го презема Касим-Жомарт Токаев, кој како шеф на државата иницира реформи насочени кон зајакнување на политичкиот плурализам и решавање на социјалните прашања.

На почетокот од септември, претседателот Токаев во своето годишно обраќање за состојбата на нацијата насловено „Праведен Казахстан: Закон и ред, економски раст, оптимизам на јавноста“ ќе ги истакне клучните цели за развојот на нацијата, фокусирајќи се на одржливиот социо-економски напредок.

Тој ќе се осврне и на претстојниот сенароден референдум што ќе се одржи денеска, на 6 октомври за изградба на нуклеарна централа, посочувајќи го како „уште една манифестација на широк национален дијалог и жив пример за имплементација на концептот на „држава што слуша“ клучни државни одлуки.

Токаев повикува и на континуиран развој на индустрискиот потенцијал на Казахстан, со фокус на големите проекти во петрохемиската индустрија и снабдувањето со гас. Развојот на инфраструктурата, особено во енергетскиот и транспортниот сектор, е идентификуван како клучен приоритет.

- Локацијата на Казахстан во срцето на Евроазија е наша конкурентска предност. Инвестициите што ги правиме во транспортната инфраструктура секако ќе се исплатат, нагласи тој истакнувајќи ја важноста од модернизацијата на енергетскиот и комуналниот сектор, подобрувањето на состојбата на автопатиштата и развојот на воздушните центри.

Дигитализацијата е уште една централна тема, со планови за интегрирање на вештачката интелигенција во платформата за е-влада и формирање Национален центар за вештачка интелигенција во Астана, следната година.

- Казахстан треба да стане земја каде што вештачката интелигенција широко се користи и дигиталните технологии се развиваат, рече тој, укажувајќи дека оптичката линија преку Каспиското Море треба да биде завршена до 2025 година.

Во надворешната политика, претседателот Токаев ја потврди посветеноста на Казахстан за мирен и избалансиран пристап, нагласувајќи дека „Казахстан убедливо ја покажува својата посветеност на широка мултилатерална соработка во целосна согласност со Повелбата на ОН“.

На средбата со дел од новинарите акредитирани за следење на 5. Светски номадски игри, заменик министерот за надворешни работи Роман Василенко се осврна повеќе за релациите на Казахстан со соседите, регионот и пошироко и огромните економски потенцијали на земјата.

- Заедно со нашите соседи во Централна Азија и пошироко, како и со партнерите како ЕУ, Казахстан ја користи својата географска локација и гео-економскиот потенцијал за да ги подобри копнените врски меѓу Азија и Европа. Нашата нација нуди можности за критични суровини, вклучувајќи огромни резерви на есенцијални минерали како бакар, цинк, олово, сребро и алуминиум. Ние сме најголемиот светски производител и извозник на природен ураниум, со речиси 45% од глобалното производство и извоз. Овие ресурси се клучни за секторите како енергетската транзиција и електричните возила, позиционирајќи го Казахстан во првите редови на индустриите кои ја обликуваат иднината на одржливата глобална економија, вели Василенко.

Како најголема економија во регионот на Централна Азија, посочува тој, посветена на олеснување на трговијата и инвестициите од корист на сите страни, Казахстан останува сигурен партнер за глобален раст и развој. Меѓународниот финансиски центар Астана (AIFC) ја игра клучната улога во воспоставувањето на Казахстан како регионален бизнис центар. Од 2018 година, повеќе од 12 милијарди долари инвестиции се собрани преку платформата AIFC. Тој оценува дека овие импресивни достигнувања го одразуваат смелиот пристап на Казахстан за создавање конкурентна, фелксибилна економија и атрактивна средина за привлекување инвестиции.

Од 1993 година, Казахстан привлекува вкупно 441 милијарди долари странски директни инвестиции (СДИ). Најголемите 10 инвеститори во земјата од 2005 година се Холандија, САД, Швајцарија, Кина, Русија, Франција, Велика Британија, Белгија, Република Кореја и Јапонија. Во 2023 година, бруто приливот на СДИ во Казахстан изнесува 23,4 милијарди долари, а во првиот квартал од 2024 година – 5,7 милијарди долари.

ЕУ во Казахстан и земјите од регионот ќе вложи 10 милијарди долари во проекти за јакнење на конективноста со централна Азија.

Неодамна, ЕУ и Казахстан лансираа нова платформа за координација за транс-касписката рута која има за цел да ја подобри безбедноста и еластичноста на овој коридор. Прашан за функционирањето на оваа платформа и што прави Астана за да го зголеми капацитетот на транскаспискиот коридор, Василенко нагласува дека за Казахстан како континентална земја и најголемата во свет која не излегува на море, сите иницијативи кои помагаат да се надмине овој недостаток или да се претвори истиот во предност се важни и добредојдени и тие ги антиципираат сите нив.

-Од 2022 година Западот повторно ја откри Централна Азија, важноста на регионот и на Казахстан како извор на традиционални енергетски ресурси, но и како извор на нетрадиционални енергетски ресурси како што е зелениот водород (green hidrogen) и на критички суровини, нешто што Западот го прави како што е зелената транзиција и дигиталната транзиција. Брисел навистина ја забрза и ја зајакна работата со нас развивајќи ја оваа рута во веродостојна и потребна алтернатива која ја поврзува Централна Азија со Европа, а со тоа и Кина преку Централна Азија со Европа, бидејќи 85 проценти од јагленот на копно кој се транспортира во Европа и во Кина поминува преку Казахстан, па со овие рути транспортот ќе стане побрз, поевтин и поефикасен, појаснува Василенко.

ЕУ ја унапредува оваа глобална порта - иницијатива под која е воспоставена платформата за координација во Астана во јуни, која обединува пет централно - азиски земји, три земји од јужен Кавказ, ЕУ, Турција, ОК и САД со цел да се работи на координиран начин на унапредување на оваа, како што вели, заедничка визија претворајќи ја транс-касписката меѓународна транспортна рута (Trans-Caspian International Transport Route - TITR), позната и како среден коридор во остварлива опција.

Како дополнение на овие напори, додава тој, Казахстан заедно со Азербејџан, Грузија и Турција, ги координираат нивните напори како четири базични држави во овој среден коридор. Она што е направено по неколку состаноци на министерствата за транспорт и за надворешни работи резултирало со потпишување на роадмап (патоказ) за развој на овој коридор до 2027 година. Заедничките напори вклучуваат меѓу другото и заеднички вложувања меѓу трите државни железници на Казахстан, Азербејџан и Грузија, во компанија чија главна цел е да нуди услуги на бродски компании за поуспешен транспорт на стоките.

-Како резултат на овие разновидни напори кои имаат иста цел, транспортот на средниот коридор е зголемен експоненцијално за последните 2-3 години. Ако во 2011 година транспортот на нафта низ средниот коридор изнесувал 860.000 тони, во 2022 тој бил 1,7 милиони тони, а во 2023 година 2,7 милиони тони, што значи дека пораснал за три пати, но, овој раст не запира тука, бидејќи само во првите шест месеци од 2024 година изнесува 2,6 милиони тони и се очекува до крајот на годината да достигне 4,2 милиони тони нафта што ќе бидат транспортирани преку коридорот. Нашата крајна цел е до почетокот на 2030 година да испорачаме 10 милиони тони нафта. Мојата порака до европскиот партнер е дека посакуваме на ЕУ и на нејзините финансиски институции да делуваат побрзо, истакнува Василенко.

Појаснува дека во 2022 година ЕУ нарачува студија, која е готова една година подоцна и се однесува на прашањата на конективноста во централна Азија. Потоа на ЕУ и требале 7-8 месеци да организира инвестициски форум во Брисел, во јануари годинава каде различни стејкхолдери од Унијата и нејзините финансиски институции заедно со земјите од централна Азија постигнаа договор за вложувања во вредност од 10 милијарди евра од страна на ЕУ во проекти  за јакнење на конективноста со централна Азија. Во исто време на овој форум Казахстан потпиша Меморандум за разбирање со европските финансиски институции за заеми во вредност од 1,5 милијарди евра наменети за инфраструктурни проекти.

Од зајакнувањето на односите меѓу Казахстан и ЕУ бенефит има секоја од страните – и Казахстан и ЕУ и земјите членки, вели Василенко на новинарско прашање. Казахстан е еден од најголемите снабдувачи на ЕУ со нафта – со учество од 11 проценти во вкупната потрошувачка на Унијата и со 21 процент во однос на потрошувачката на ураниум. Најголем бенефит од зајакната политичка соработка, според него, сепак, е можноста за воспоставување и развивање на комуникација и поблиско запознавање на народите од централна Азија со тие од Европа. Според Василенко, тоа ќе помогне за меѓусебно разбирање, бидејќи за жал, вели, кај повеќето од луѓето во Европа кога ќе се спомне земјата и регионот, постои стереотип дека е тоа таму некаде во задниот двор на Русија, што е вели исклучително некоректно да се користи.

-Напротив, Казахстан и земјите од регионот се гледаме како браќа, како на кохерентен регион, како активен учесник во меѓународната арена, регион кој минува низ своевидна ренесанса. Тоа ќе придонесе за зголемување на соработката во делот на енергетиката и тоа во однос на извозот на нафта, на ураниум и на зелен водород. Другата нишка се критичните суровини и тука Казахстан има огромни потенцијали, бидејќи поседува резерви на 18 од вкупно 34 критични суровини што во перспектива значи и нови странски инвестиции, дециден е заменик министерот.

Што се однесува до ставовите на Русија и Кина, во однос на ваквата зајакната соработка со Брисел, вели,  ја развиваме соработката со овие два наши непосредни соседи со иста динамика како што тоа го правиме од порано. Тие се наши најголеми соседи и наши најголеми трговски партнери. Кина е трговски партнер бр.1, Русија е на второ место по обем на трговска размена, делиме најдолги гранични линии со нив – со Русија 7500 км, со Кина 1800 км.

- Тие се и најголеми инвеститори, исто така. Ние сме исто така членки на многу организации кои ги имаме заеднички основано. Така што овие односи ќе продолжат, и според нас, тие се дел од една прагматична, избалансирана и храбра надворешна политика. Всушност, можеме да кажеме дека нашите односи со Русија, нашите односи со Кина, нашите односи со Западот и нашите односи со муслиманскиот свет вклучително и Турција се четирите столба на кои ја темелиме нашата надворешна политика, заклучува Василенко.

ЕУ од своја страна ангажманот во регионот значително го проширува од раните 1990-ти. ЕУ и петте централноазиски држави - Казахстан, Република Киргистан, Таџикистан, Туркменистан и Узбекистан - воспоставија дипломатски односи во 1991 година, а во 2005 година ЕУ ја воведува функцијата - специјален претставник на Унијата за Централна Азија. Фокусот е ставен на континуираната и сеопфатна соработка на ЕУ со земјите во регионот, бидејќи споделуваат силни заеднички интереси за просперитет, поврзување, енергија и безбедност.

Во 2019 година, Брисел усвои Стратегијата на ЕУ - Централна Азија „ЕУ и Централна Азија: Нови можности за посилно партнерство“ која нуди рамка за засилен ангажман на ЕУ со земјите од регионот во текот на годините што доаѓаат. Таа се фокусира на промовирање на одржливост и просперитет и регионалната соработка во Централна Азија и ги надополнува договорите за засилено партнерство и соработка, што во комбинација со помошта што ја даваат земјите-членки на ЕУ поединечно, ја прави Европската унија број еден давател на развојна помош во регионот, стои на веб страница на специјалниот претставник на ЕУ за регионот амбасадорката Терхи Хакала.

Астана најавува повеќе посети и повеќе трговија со Република Македонија

Дипломатските односи меѓу Република Македонија и Република Казахстан се воспоставени на 1 јуни 1995 година. Досега двете земји имаат потпишано повеќе договори за соработка во различни области. Протоколот за редовни консултации помеѓу МНР-а на двете држави е потпишан во Скопје, ноември 2017 година, а македонската Амбасада во Астана официјално е отворена септември 2021 година за време на првата посета на тогашниот министер за надворешни работи Бујар Османи. Амбасадата на Казахстан пак, официјално почна со работа оваа година во мај. Меѓу двете земји постојат амбициозни планови за соработка, за која се смета дека би била поинтензивна со укинување на постојниот визен режим меѓу двете земји и поедноставување на административните процедури, како и зајакнување на правната заштита до пристап до поголеми пазари и можност за меѓународни бизниси.

Заменик министерот за надворешни работи Василенко, прашан за потенцијалите на билатералната соработка со Скопје ќе посочи дека Казахстан досега во регионов има отворено амбасади со Србија, Хрватска, Словенија, а од оваа година и во Македонија, како и конзулат во Црна Гора.

- Нашата перцепција е дека ова е регион во подем, со многу потенцијал. Некои земји се дел од ЕУ, некои се кандидати за членство и ние им посакуваме среќа на тој пат. Ние гледаме потенцијал во трговијата, рударството, земјоделството и во фармацевтската индустрија. Македонската компанија Алкалоид порано оваа година отвори свое претставништво овде. Мислиме дека нашите односи со овие земји во кои само што ги отворивме нашите амбасади беа некако заспани и сега повторно ги будиме. Во наредниот период ќе видиме повеќе посети, повеќе трговија и повеќе контакти меѓу луѓето, рече Василенко.

Инаку, во однос на трговската размена меѓу двете земји, според Заводот за статистика увозот од Казахстан само за првите седум месеци за 2024 година е 7.764.981 евра и е зголемена споредбено со 2023 за 2.227.472 евра, а извозот од Македонија за Казахстан во првите седум месеци е 261.033 евра.

Казахстан и Македонија планираат наскоро да организираат бизнис форум во Скопје, на кој се очекува присуство на казахстански компании од различни сектори и потенцијални македонски компании.

Македонски натреварувачи дел од 5.Светски номадски игри во Астана

Петтите Светски номадски игри во Астана се одржаа под мотото „Собирот на големата степа“. Нивното официјалното лого вклучува важен елемент на идентитетот, тоа е соларен коњаник, кој е присутен во сите логоа на Светските номадски игри. Тие се најголемиот натпревар во етно-спортови во светот денес. Околу 2500 учесници од 89 земји ги одмерија силите во текот на шестдневните натпревари во 21 спорт. Тие вклучуваа коњички трки, национални видови борење, традиционални интелектуални игри, натпревари во боречки вештини, традиционално стрелаштво, национални видови лов со птици, трки со коњи, народни игри во спортски арени и културна и научна програма.

Меѓу учесниците на оваа смотра на етно-спортови што се одржува на секои две години покрај земји со номадска традиција, учествуваа и земји кои немаат таква традиција. На свеченото спектакуларно отворање во Астана Арената продефилираа претставници од земјите од централно-азисикиот регион - наследниците на номадската цивилизација, но и од САД, Русија, Канада, Франција, Италија, како и од повеќе европски земји и од речиси сите држави од Балканот, меѓу нив и од нашата земја.

Од дисциплините најголем впечаток оставија борењето меѓу јавачи на коњи, стрелањето во мета од коњаници во кас, како и ловот со птици – со златниот орел, јастреби и соколи. Ловот со птици во дамнешни времиња се применувал како начин да се дојде до храна или крзно во тешките и сурови услови во Алтајските планини. Денес се практикува како спорт кој е вистинска сензација за туристите, но начинот на кој се тренираат птиците е ист како и во минатото. Орлето се зема од гнездото пред да почне да лета и потоа минуваат неколку години во обука. При тоа се гради една посебно блиска врска меѓу ловецот и птицата, која се третира со исклучителна грижа и посветеност. По десеттата година птицата се пушта на слобода. Она што е интересно е што се обучуваат само женки. Овој вид на ловење со птици е внесен и во листата на нематеријално културно богатство на УНЕСКО.

Најпопуларна од игрите кои се одвиваа на најдобрите спортски терени во Астана, сепак, е т.н. номадско рагби – кој е присутен во две верзии како кокпар и кокбору. Кокпар се смета за една од најстарите номадски игри во Казахстан, која се игра многу стотици години. Се смета за своевидна симбиоза на рагби и јавање коњи, а суштината на играта е во тоа што јавачите на коњи се борат за труп без глава на коза, земајќи го од ривалите и постигнувајќи „гол“ во специјална порта.

Современиот кокпар се игра на специјален терен со димензии 220 на 75 метри. Натпреварот трае вкупно 40 минути и е поделен во две полувремиња. Играчите се поделени во два тима од 10-12 луѓе, а само четворица од секој тим играат во исто време. Овој спорт бара многу физичка издржливост, бидејќи куклата која го замнеува трупот од коза е тешка 20 килограми и е многу тешко да се подигне од земја. Особено важна во играта не е само обуката на јавачот, туку и атлетската форма на коњот, заради што се одгледуваат посебни коњи кои вкрстуваат различни раси. Во Казахстан постои федерација кокпар, а натпреварите се одржуваат секоја година во многу градови и места во земјата. Годинава на Номадските игри тимот на домаќинот Казахстан го освои златото во тензичен натпревар со нивните најголеми ривали екипата на Киргистан.

Македонските бои на Номадските игри во Астана ги бранеа борачите Стефан Зашков (20) и Александар Миланов (18). Двајцата се членови на боречкиот клуб „Олимпија“ од Штип, каде тренираат веќе шест години. Последните две години покрај борењето во слободен стил паралелно се обучуваат и во вештините на пеливанството во пеливанскиот клуб на Ацо Крстев, воедно и нивен тренер. Иницијативата да учествуваат на игрите во Астана била на тренерот и на претседателот на Федерацијата за Пеливанско борење на Македонија Хамид Бакија, која е членка на Европската ацоцијација за традиционални игри и спорт.

Тие се натпреварувале во дисциплината аба-ѓуреш, борење специфично за номадската традиција со кое првпат имале можност да се запознаат во Астана.

-Ова беше преубаво искуство. Во пеливанството ние се бориме во каспети, (посебни панталони) намачкани по телото со масло што ја отежнува борбата, а кај овој вид на борење натреварувачите носат шорцеви и елек изработен од волна со појас. Во борбата борачите се држат за појасот со едната рака, а со другата се борат. Пред почетокот на секоја борба се фрла паричка и ако ти се падне твојата боја ти го фаќаш противникот за појасот од горната страна, ако не од долната страна. Секоја од двете позиции има одредени предности, зависно каква техника користиш. Нивното борење е многу поразлично. Во двата спорта се користат различни техники. Кај нив се важни зафати со нозете и обично вежбаат џудо и џиуџицу, додека во пеливанството се оди на сила и кондиција, вели во изјава за МИА борачот Зашков.

И Стефан и Александар се воодушевени од Астана, можноста да се натреваруваат и дружат со повеќе млади споритисти од разни земји од светот, да се запознаат со културата на Казахстан и да воспостават нови пријателства. Им се допаднале традиционалните јадења на домаќините, специјалитети од коњско месо. Но најголем впечаток им оставиле волонтерите и луѓето од организацијата на игрите со нивната љубезност и посветеност.

На Игрите беа доделени 97 комплети медали, а според освоените одличја прва е земјата домаќин - Казахстан со 112 награди, потоа Киргистан и Русија. Меѓу првите десет репрезентации се и земји како Турција, Унгарија, Полска и Романија.

Првите Светски Номадски игри се одржани во Киргистан, во градот Чолпон-Ата во 2014 година, кој ќе биде домаќин и на игрите во 2016 и 2018 година. Во 2020 година ова меѓународно натпреварување не се одржа поради ковид пандемијата. Следеа Светските номадски игри во 2022 година во Изник, Турција. Секоја година бројот на спортисти и на држави учеснички на игрите се зголемува. На игрите во Астана учествуваа спортисти од рекордни 89 држави. Следните шести номадски игри во 2026 година ќе се одржат во Киргистан.

The post Запознајте го Казахстан одблиску appeared first on Република.

Дипломатските односи меѓу Република Македонија и Република Казахстан се воспоставени на 1 јуни 1995 година. Досега двете земји имаат потпишано повеќе договори за соработка во различни области. Протоколот за редовни консултации помеѓу МНР-а на двете држави е потпишан во Скопје, ноември 2017 година, а македонската Амбасада во Астана официјално е отворена септември 2021 година за време на првата посета на тогашниот министер за надворешни работи Бујар Османи. Амбасадата на Казахстан пак, официјално почна со работа оваа година во мај.

Меѓу двете земји постојат амбициозни планови за соработка, за која се смета дека би била поинтензивна со укинување на постојниот визен режим меѓу двете земји и поедноставување на административните процедури, како и зајакнување на правната заштита до пристап до поголеми пазари и можност за меѓународни бизниси.

Заменик министерот за надворешни работи на Казахстан Роман Василенко, прашан за потенцијалите на билатералната соработка со Скопје ќе посочи дека Казахстан досега во регионов има отворено амбасади со Србија, Хрватска, Словенија, а од оваа година и во Македонија, како и конзулат во Црна Гора.

Нашата перцепција е дека ова е регион во подем, со многу потенцијал. Некои земји се дел од ЕУ, некои се кандидати за членство и ние им посакуваме среќа на тој пат. Ние гледаме потенцијал во трговијата, рударството, земјоделството и во фармацевтската индустрија. Македонската компанија Алкалоид порано оваа година отвори свое претставништво овде. Мислиме дека нашите односи со овие земји во кои само што ги отворивме нашите амбасади беа некако заспани и сега повторно ги будиме. Во наредниот период ќе видиме повеќе посети, повеќе трговија и повеќе контакти меѓу луѓето, вели Василенко.

Инаку, во однос на трговската размена меѓу двете земји, според Заводот за статистика увозот од Казахстан само за првите седум месеци за 2024 година е 7.764.981 евра и е зголемена споредбено со 2023 за 2.227.472 евра, а извозот од Македонија за Казахстан во првите седум месеци е 261.033 евра.

Казахстан и Македонија планираат наскоро да организираат бизнис форум во Скопје, на кој се очекува присуство на казахстански компании од различни сектори и потенцијални македонски компании.

The post Казахстан најавува повеќе посети и повеќе трговија со Македонија appeared first on Република.

Во Грција уапсени се 13 туристи од Казахстан бидејќи со огномет предизвикале пожар на островот Хидри, во Аргосаронскиот залив на Егејското Море, меѓу Атина и Пелопонез.

Одземена е и изнајмената јахта од која во петокот вечерта беше испланиран огнометот, објави вечерва грчката комерцијална РТВ СКАИ.

Според информациите, тие биле уапсени благодарение на извештаите на сведоците и навигацискиот надзор набрзо по избувнувањето на пожарот во боровата шума, на Хидра, каде што паднале ракетите од нивниот огномет. Пожарникарите го изгаснале пожарот истата вечер.

Уапсените Казахстанци во недела наутро по итна, задолжителна постапка ќе бидат изведени пред кривичниот обвинител во Пиреја.

Хидра е една од главните точки на туризмот за богатата клиентела во Грција, особено наутичкиот туризам. Името го добила затоа што има невообичаено голем број на извори на вода, а е многу пошумена. За да се зачува природата, на островот нема моторни возила. Плажите на островот се меѓу светски познатите плажи.

The post Бетер од Англичани: Туристи од Казахстан запалија грчки остров appeared first on Република.

Шеснаесет рудари загинаа во несреќа во рудникот Костенко во Караганд, Казахстан, изјави шефот на администрацијата на регионот Караганда во Казахстан, Ермаганбет Булекпаев.

-Во рудникот денеска беше предизвикан пожар, кој, на наше големо жалење, доведе до смрт на 16 лица, а 18 лица се пренесени во болница со различен степен на повреди, напиша шефот на регионот на својата Фејсбук страница.

Тој прецизира дека на местото на несреќата има 40 спасувачи и 10 единици опрема.

Засега се водат како исчезнати 31 други рудари.

Претходно прес-службата на компанијата Арселормитал Темиртау, што е оператор на рудникот, информираше дека  во моментот на несреќата имало 252 лица. На површина излегоа 205 рудари. Се претпоставува дека дошло до експлозија на гас метан.

Казахстанскиот претседател Касим-Жомарт Токаев и нареди на својата влада денеска „да стави крај на инвестициската соработка“ со глобалниот челичен гигант Арселор Митал, по уште една фатална несреќа во еден од рудниците на групацијата.

The post Загинаа 16 рудари, 18 повредени во несреќа во Казахстан appeared first on Република.

Казахстан до крајот на 2023 година ќе ја отвори најавената Амбасада во Скопје.

Ова беше потврдено на разговорите што Министерот за надворешни работи, Бујар Осмни ги имаше со претседателот на Казахстан, Касум-Јомарт Токајев и министерот за надворешни работи, Мурат Нуртлеу, во Астана.

Оваа одлука на казахстанската Влада покажува дека Казахстан ја смета Македонија како партнер од доверба во овој дел од Европа и е реализирање на конкретната заложба од декларацијата која министрите за надворешни работи на двете земји ја потпишаа минатата година.

Казахстан важи за двигател на економијата во Централна Азија и отварањето Амбасада во Скопје ќе придонесе кон продлабочување на пријателските односите меѓу двете земји, развој на економскта соработка и унапредување на договорната рамка. Воедно, ова би била прва резидентна амбасада од земја од Централна Азија во Северна Мaкедонија.

The post МНР: Казахстан до крајот на 2023 година ќе отвори Амбасада во Скопје appeared first on Република.

Во рамки на посетата на Централна Азија во својство на Претседавач со ОБСЕ, министерот за надворешни работи, Бујар Османи утре ќе престојува во Астана, Казахстан, соопштија од кабинетот на министерот.

Османи ќе се сретне со Касим Јомарт Токајев, претседател на Казахстан, а со вице-премиерот и министер за надворешни работи на Казахстан, Мурат Нуртлеу, покрај средба ќе имаат и заедничка прес-конференција.

Покрај тоа, Претседавачот Османи ќе има средба и со министерката за екологија и природни ресурси, Зулфија Сулеименова и со претседателот на Сенатот на Парламентот на Казахстан, Маулен Ашимбаев.

Османи во Астана ќе се сретне и со претставници на граѓанските организации, а ќе ја посети и Програмската канцеларија на ОБСЕ во Астана за одблиску да се запознае со активностите и проектите што ОБСЕ ги спроведува во Казахстан.

Посетата на Казахстан и на регионот на Централна Азија претставува еден од приоритетите на Претседавањето на Македонија со ОБСЕ. Покрај тоа, при посетите, Претседавачот Османи има можност за директна размена на мислења за актуелните и важни прашања за функционалноста на ОБСЕ, како и за запознавање со работата на теренските мисии на ОБСЕ и нивната програмска и проектна соработка со земјите од Централна Азија.

The post Османи во Казахстан: Средби со државниот врв и претставници на граѓанските организации appeared first on Република.

Претседателот на Казахстан, Касим-Жомарт Токаев му наложи на премиерот Алихан Смаилов да го разгледа прашањето за национализација на проблематичниот енергетски имот.

Одлуката уследи откако илјадници жители на Екибастуз, северен Казахстан останаа без греење на минус 30 степени Целзиусови, по несреќата во електраната.

Токаев наведе дека лошото менаџирање на тие енергетските компании „е причина за несреќи и дефекти во снабдувањето со електрична енергија“.

За време на владеењето на Нурсултан Назарбаев, кој беше на власт три децении, енергетскиот сектор во Казахстан беше либерализиран и премина во рацете на олигарсите.

The post Казахстан размислува за национализација на енергетските компании по откажувањето на греењето на минус 30 степени appeared first on Република.

Шефот на дипломатијата Бујар Османи утре ќе биде домаќин на казахстанскиот вицепремиер и министер за надворешни работи Мухтар Тлеуберди, кој ќе престојува во официјална посета на земјава.

Како што информираат од МНР, во фокус на разговорите ќе бидат билатералните односи, особено мултилатералната соработка на двете држави, со посебен акцент во Организацијата за безбедност и соработка на Европа (ОБСЕ), со која Македонија ќе претседава по две месеци, а ќе бидат разменети мислења и за други актуелни прашања во надворешната политика.

Во рамки на неговиот престој во Скопје, Тлеуберди се очекува да се сретне и со шефот на државата Стево Пендаровски, како и со претседателот на Собранието, Талат Џафери.

The post Mинистерот за надворешни работи на Казахстан утре во официјална посета на Скопје appeared first on Република.

Рускиот претседател, Владимир Путин, пристигна во главниот град на Казахстан, Астана, каде што во следните два дена ќе учествува на три мултилатерални самити, пренесува ТАС С.

Конференцијата за интеракција и мерки за градење доверба во Азија (CICA) се одржува во Астана денеска, а на неа учествуваат 27 земји-членки кои сочинуваат околу 90 отсто од територијата на Азија и речиси половина од светското население.

Планирано е на настанот, покрај претседателите на Русија и Казахстан, да учествуваат и лидерите на Азербејџан, Ирак, Иран, Катар, Киргистан, Палестина, Таџикистан, Турција и Узбекистан.

The post Путин учествува на три меѓународни самити во Казахстан appeared first on Република.

Властите во Казахстан го отфрлија барањето на Русија за протерување на амбасадорот на Украина поради неговите коментари и барање за убивање на Руси и ја прекорија Москва за, како што велат, несоодветен тон меѓу „еднакви стратешки партнери“.

Тензиите се зголемија откако украинскиот амбасадор во Астана, Петро Врублевски, во интервју за локален блогер за војната во Украина во август изјави дека „колку повеќе Руси убиваме сега, толку помалку од нив ќе ги убијат нашите деца подоцна“. Како одговор, Русија побара од Казахстан да го протера дипломатот, но Астана наместо тоа побара од Киев да го замени, велејќи дека неговите коментари се неприфатливи за земја со големо етничко руско малцинство.

Портпаролката на руското Министерство за надворешни работи, Марија Захарова, вчера изјави дека Москва е „огорчена“ поради тоа што Врублевски се уште е во Астана и го повикала амбасадорот на Казахстан.

Портпаролот на Министерството за надворешни работи на Казахстан, Ајбек Смадјаров, денеска изјави дека тонот на Захарова е „спротивен на суштината на сојузните односи меѓу Казахстан и Русија како рамноправни стратешки партнери“ и додаде дека и рускиот амбасадор ќе биде повикан во казахстанското Министерство. Смадјаров рече дека Врублевски ќе го напушти Казахстан откако на негово место ќе пристигне новиот украински амбасадор.

Казахстан традиционално одржува блиски економски и безбедносни врски со Русија, но се дистанцираше од Москва откако таа ја почна воената операција во Украина во февруари.

The post Казахстан не ја послуша Русија за протерување на украинскиот амбасадор appeared first on Република.

Контраразузнавачката служба на Казахстан спречила атентат врз претседателот на државата Касим-Жомарт Токаев.

Според соопштението на Комитетот за национална безбедност (КНБ), државјанин на Казахстан, кој работел за странски разузнавачки служби планирал да го нападне претседателот и бројни високи функционери, но бил уапсен кон крајот на март.

При претресот, кај уапсениот била пронајдена снајперска пушка од странско производство со придушувач, наркотици и поголема сума пари. Оружјето било внесено во Казахстан расклопено на делови во професионално камуфлирана пратка.

Државјанинот на Казахстан, при прелиминарната истрага призна дека наведените дела ги извршил по упатство и во интерес на странската држава - се додава во соопштението.

Против него е поведена кривична постапка според членот „Подготовка за кривично дело и обид за кривично дело“, како и „Терористичко дело“.

The post Во Казахстан спречен атентат врз претседателот нарачан од странски разузнавачки служби appeared first on Република.

Во Казахстан деновиве се случуваат големи немири поради високата цена на горивото но што всушност знаеме за оваа држава. Станува збор за богата земја со просечна плата околу 400 долари.

Цените во продавниците се претежно слични на нашите или нешто пониски. На пример, шеќерот чини околу 35 денари, маслото 90, лебот 20, говедското месо 350.
Горивото е исто така евтино и не чини повеќе од 15 денари за литар но и таа цена беше пово за протести на улиците.

Етнички, поранешната советска република е подеднакво разновидна, при што Казахстанците сочинуваат речиси две третини од населението, етничките Руси нешто помалку од една четвртина и малцинствата. Потисната под советска власт, главната религија, исламот, оживува ..

Од стекнувањето независност по распадот на Советскиот Сојуз во 1991 година, големите инвестиции во нафтениот сектор донесоа брз економски раст и ублажија некои од големите празнини во богатството во 1990-тите.

Касим-Жомарт Токаев, долгогодишен колега на основачот на независен Казахстан, Нурсултан Назарбаев, го презеде претседателството кога неговиот ментор ненадејно поднесе оставка во март 2019 година.

Токаев тогаш беше претседател на Сенатот и рече дека ќе ја продолжи политиката на својот претходник и ќе се потпира на неговото мислење за клучните политички прашања.

Тој победи на предвремените претседателски избори во јуни 2019 година со цел да ја зајакне својата позиција.

Новиот претседател беше на различни високи позиции од независноста во 1991 година, вклучително и како премиер и министер за надворешни работи.

Долгото авторитарно владеење на Нурсултан Назарбаев се соочи со неколку предизвици од слабите опозициски партии и тој успеа постепено да ја пренесе власта, гарантирајќи му ја идната улога на доживотен претседавач на новозајакнатиот Совет за безбедност.

Покрај тоа, неговата ќерка Дарига го наследи Токај на чело на Сенатот, што го подигна нејзиниот профил како потенцијален наследник.

На медиумскиот пазар доминираат државни и провладини медиуми.Телевизијата е најпопуларниот медиум. Владата управува со националните мрежи.Властите редовно блокираат веб-страници, а пристапот до социјалните медиуми и апликациите за пораки е намален неколку пати.

Факти за Република Казахстан

Главен град - Нур-Султан
Население - 18 милиони
Површина од 2,7 милиони квадратни километри
Главни јазици - казахстански, руски
Главни религии - исламот, христијанството
Валута - тенге

The post Што знаеме за Казахстан: Богата држава со гас и нафта која го смени името на главниот град appeared first on Република.

Руското Министерство за одбрана соопшти дека сите војници, кои биле дел од мировните сили испратени во Казахстан за да помогнат во смирувањето на ситуацијата по насилните немири во земјата, се вратиле во Москва.

Четири авиони со руски припадници на мировните сили, испратени од Организацијата на Договорот за колективна безбедност (ОДКБ), слетаа на аеродромот во Москва - соопштија од руското министерство.

ОДКБ го одобри испраќањето на контингент со повеќе од 2.000 војници на 5 јануари, на барање на казахстанскиот претседател Касим-Жомарт Токаев, откако избија насилни немири. Една недела по пристигнувањето на силите, Токаев на 13 јануари изјави дека ја завршиле мисијата и најави нивно постепено повлекување.

Истовремено, претседателот на Казахстан го сменил министерот за одбрана Мурат Бектанов, критикувајќи го за наводно „отсуство на раководство“.

Не успеавме да го искористиме потенцијалот на армијата во критична ситуација поради несигурноста на раководството и бевме принудени да прибегнеме кон странска помош - изјави Токаев.

Протестите почнаа на 2 јануари во градот Алмати поради наглото зголемување на цените на горивото, но брзо се проширија низ целата земја и прераснаа во демонстрации проследени со немири во кои загинаа повеќе од 220 луѓе.

The post Руските војници заминаа од Казахстан, а претседателот го отпушти министерот за одбрана appeared first on Република.

Руски воени транспортни авиони евакуирале повеќе од 2.000 руски и странски државјани од Казахстан.

Во соопштение на руското Министерство за одбрана се наведува дека од Казахстан во Русија се донесени вкупно 2.241 лице.

Поради настаните во Казахстан и затворањето на меѓународниот аеродром во Алмати, странците кои престојуваа таму не можеа сами да ја напуштат земјата. Тие апелираа до раководството на рускиот контингент мировници за помош и транспортирање во Русија.

The post Русија од Казахстан евакуирала повеќе од 2.000 руски и странски државјани appeared first on Република.

За два дена треба да почне повлекувањето на војниците на контингентот на Организацијата на Договорот за колективна безбедност (ОДКБ) од Казахстан.

Обидот за државен удар не успеа, ситуацијата во сите региони на земјата е стабилна, главната мисија на ОДКБ е завршена - изјави претседателот на Казахстан, Касам-Жомарт Токаев.

Прес-службата на шефот на државата соопшти дека Претседателот го назначил Алихан Смаилов за премиер. Смаилов беше првиот вицепремиер и вршител на должноста премиер, откако Токаев ја прифати оставката на владата предводена од Аскар Мамин на 5 јануари, поради протестите.

https://republika.mk/vesti/svet/izbran-nov-premier-na-kazahstan/

The post Повлекувањето на странските војници од Казахстан ќе почне за два дена appeared first on Република.

Казахстанскиот претседател Касим-Жомарт Токаев го номинираше Алихан Смаилов за премиер во вторникот, а Долниот дом на парламентот гласаше за него за време на седницата.

Смаилов (49) беше првиот вицепремиер во претходната влада, која Токаев ја смени минатата недела поради насилните немири во централноазиската земја богата со нафта.

Безбедносните сили на Казахстан уапсија вкупно 7.939 лица, соопшти Министерството за внатрешни работи, за време на протестите кои се претворија во најголемото насилство во постсоветската историја на оваа централноазиска земја.

Владините згради беа накратко окупирани или запалени во неколку градови минатата недела, откако мирните протести против поскапувањето на горивото прераснаа во насилни.

Властите ги обвинија „екстремистите“ и „терористите“ за насилството, од кои некои велат дека се странци.

The post Избран нов премиер на Казахстан appeared first on Република.

Казахстанските безбедносни сили досега приведоа 7.939 лица во врска со минатонеделните немири, соопшти казахстанското Министерство за внатрешни работи.

Минатата недела централноазиската држава ја доживеа најсериозната криза од распадот на Советскиот Сојуз. Владини згради беа нападнати или запалени во неколку градови, откако првично мирните протести поради поскапувањето на горивото прераснаа во судири меѓу демонстрантите и полицијата. Казахстанските власти соопштија дека за насилствата се одговорни „екстремистички“ и „терористички“ елементи, од кои некои се странци. Советот за национална безбедност на Казахстан денеска соопшти дека ситуацијата во поранешната советска република е стабилизирана и дека терористичките групи се неутрализирани.

Државните медиуми објавија дека 164 луѓе биле убиени за време на судирите, цитирајќи владина објава на социјалните мрежи. Но, здравствените и полициските власти не ја потврдија бројката и објавата на социјалните мрежи потоа беше избришана.

Мислам дека имаше некаков заговор во кој беа вклучени домашни и одредени странски деструктивни сили, изјави државниот секретар Јерлан Карин за државната телевизија денеска, без да именува осомничени.

The post Во Казахстан приведени 7.939 лица поради минатонеделните немири appeared first on Република.

Во немирите во Казахстан загинаа 16 припадници на безбедносните сили, јави ТАСС, повикувајќи се на прес-службата на Министерството за внатрешни работи.

Прес-службата соопшти за повеќе од 1.300 ранети полицајци, војници и борци од Националната гарда.

Во немирите се приведени повеќе од 5.100 луѓе. Полицијата приведе околу 300 луѓе кои се обиделе да го напуштат Казахстан“, соопшти Министерството за внатрешни работи.

Казахстанското Министерство за трговија истакна дека нема проблем со снабдувањето со храна. Сепак, на берзите им се советува да не продолжуваат со работа додека не се стабилизира ситуацијата во земјата.

Ситуацијата во главниот град Нур Султан е мирна, јавниот превоз се движи и вратена е кабелската интернет конекција, но не и мобилниот интернет, јави ТАСС.

Во Алмати, најнаселениот град во Казахстан, кој стана епицентар на немирите, супермаркетите повторно ќе бидат отворени, но со намалено работно време.

Воздушниот транспорт во Казахстан постепено се воспоставува. Денеска е планирано да се реализираат 38 меѓународни летови, а 29 се откажани, соопшти Министерството за индустрија и развој на инфраструктурата.

„Аеродромот Алмати како целина сега е технички подготвен да продолжи со работа. Но, тоа ќе се случи кога ќе се стабилизира состојбата во градот“, велат од Министерството за индустрија.

На 2 јануари во голем број населени места во Казахстан започнаа протести против поскапувањето на горивата. Неколку дена подоцна тие се претворија во масовни немири и напади врз владата во многу градови.

Државната телевизија вчера објави за повеќе од 40 жртви.

The post Во Казахстан загинаа 16 полицајци, а приведени се 5.100 луѓе appeared first on Република.