Заменик омбудсманот на Македонија Јован Андоновски одговорајќи на новинарско прашање во врска со случајот Леонид Индов најави дека оваа недела ќе почне да се работи на иницијатива со која се предвидуваат измени на законски и подзаконски акти на Фондот за здравствено осигурување (ФЗОРСМ), кои ќе бидат во насока да се цени секој случај индивидуално, а не да се категоризираат предметите.

Тој посочи дека засега немаат никаква реакција од Фондот, во врска со најавената иницијатива.

Засега немаме никаква реакција од страна на ФЗОРСМ. Ние најавиме иницијатива. На таа иницијатива ќе почне да се работи оваа недела. Со неа предвидуваме измени на Законот и на подзаконските акти, особено на подзаконските акти на ФЗОМ коишто се застарени и антидатирани. Измените би биле во насока на тоа да се цени секој случај индивидуално, значи не може да се категоризираат предметите само дали станува збор за лекување или рехабилитација, особено за оние случаи кога станува збор за животозагрозувачка состојба на пациентите, изјави денеска Андоновски по учество на конференцијата „Украина – две години хероизам“ во Скопје.

Тој потврди дека случаите со Леонид Индов и Јани Иванов од Неготино не се единствени, туку постојат повеќе случаи на кои ФЗОМ на осигурениците не им овозможува соодветен третман.

Од нашето практично работење, можам да кажам дека не е само случајот Леонид Индов или Јани Иванов од Неготино. Станува збор за дузина случаи со коишто ФЗОМ на осигурениците не им овозможува соодветен третман, а притоа нивната состојба или останува иста или се влошува, за жал, додаде Андоновски.

Андоновски посочи дека на семејството на Леонид им е даден правен совет во која насока треба да се однесува нивната жалба до второстепена комисија и очекува дека комисијата ќе излезе во пресрет на нивното барање.

Ние стапивме во контакт со семејството на Леонид, им дадовме правен совет во која насока треба да се однесува нивната жалба до второстепената комисија и навистина очекувам дека комисијата ќе излезе во пресрет на нивното очекување и барање, додаде Андоновски.

Претходно првостепената комисија на ФЗОРСМ го одбила барањето за лекување на младиот Леонид Индов во болница во Австрија затоа што според Правилникот на ФЗОРСМ за начинот на користење здравствени услуги на осигурените лица во странство „медицинска рехабилитација“ не е на товар на Фондот. По приемот на решението од Првостепената комисија, семејството на Леонид има право на жалба во рок од 15 дена до Второстепена комисија. Младиот Леонид Индов во јули минатата година се повреди на летување во Грција. На 6-ти овој месец тој беше транспортиран со хеликоптер во здравствена установа во Австрија, на иницијатива на неговото семејство.

The post Случаите со Леонид Индов и Јани Иванов не се единствени, ФЗОМ не им овозможува третман, а нивната состојба се влошува, вели Андоновски appeared first on Република.

Oсумнаесетгодишниот Јани Иванов од Неготино, познат во градот како голем вљубеник во планинарењето и велоспиедизмот, заврши со тешки повреди во соседна Грција и моментално е хоспитализиран на клиника во Солун.

Како што раскажува неговиот другар Петар Манев за „Фокус”, Јани заминал на еднодневно патување во Паралија со другарi, а при водени игри се здобил со тешки повреди на ‘рбетот.

Итно бил префрлен во болница, каде му биле извршени две комплицирани хируршки интервенции, а во наредниот период го очекувале најмалку уште две. Појаснува дека неговите родители заминале во Грција и се покрај него, а трошоците за лекувањето, кои според првичните проценки требало да изнесуваат околу 50.000 евра, се испоставило дека ќе бидат многу повисоки.

Токму поради тоа, решивме да побараме помош од сите хумани граѓани. Можат да донираат средства на сметката на Јани, во тек е процедурата за отворање на телефони за донации. Организираме низа на хуманитарни настани во градот, за кои граѓаните навремено ќе бидат информирани. Ова е период кога треба да му помогнеме на нашиот другар и неговото семејство, бидејќи се работи за долго лекување, кое е доста скапо, вели Манев.

Сите хумани граѓани и општествено одговорни компании кои се можност, можат да донираат средства на 200 0038945580 43, Јани Иванов, Стопанска банка, со назнака донација.

Периодов ќе бидат поставени кутии за донации на повеќе локации во градот.

The post Тешко повреден 18-годишниот Јани од Неготино: Бил на еднодневно капење во Грција, сега итно е потребна помош за лекување appeared first on Република.