Во Министерството за труд и социјална политика денеска се изврши примопредавање на функцијата министер за труд и социјална политика, при што новоименуваната министерка Јованка Тренчевска ја презеде функцијата од досегашната министерка Јагода Шахпаска.

Со тоа министерката за труд и социјална политика Тренчевска и официјално го започнува управувањето со овој сектор.

Чест и задоволство ми претставува да го предводам секторот во кој со години наназад активно учествував во креирањето на социјалните политики насочени кон граѓаните, а особено кон најранливата категорија. Приоритет ќе ми бидат, унапредување на правата од социјалната заштита, обезбедување на редовни и сигурни пензии, заштита и почитување на работничките права како и грижа за најмладите. Продолжуваме заедно да градиме едно општество за сите. Родовата еднаквост останува и понатаму високо на мојата и на агендата на Министерството за труд и социјална политика, истакна Тренчевска.

Досегашната министерка за труд и социјална политика Шахпаска на нејзината наследничка Тренчевска и посака успешна и плодна работа. Таа ја информираше за тековните проекти на кои работи Министерството, за предвидената динамика за нивна реализација и за евентуалните пречки со кои се соочуваат.

Тренчевска доаѓа од раководната позиција на Државниот инспекторат на труд, а претходно ја извршуваше функцијата државна секретарка во Министерството за труд и социјална политика. Таа е дел од ова Министерство 19 години со нејзино активно учество во креирањето на политиките за родовата еднаквост на жените и мажите, сектор во кој има водечка позиција.

Нејзината досегашна кариера е во насока на унапредување на правата на работниците како и родовата еднаквост меѓу мажите и жените. Министерката Тренчевска е магистер по социолошки науки.

The post Тренчевска ја презеде од Шахпаска функцијата министер за труд и социјална политика appeared first on Република.

Министерството за труд и социјална политика е ресор со многубројни предизвици, кои пандемијата на Ковид-19 ги направи уште поголеми и токму затоа мојата одговорност беше уште поголема да се одговори на предизвиците и на вистинскиот начин и навреме да се адресираат потребите на граѓаните, оцени министерката за труд и социјална политика Јагода Шахпаска во своето обраќање преку социјалните мрежи, сублимирајќи дел од проектите од својот мандат.

Во целиот период на пандемија, преку доследно почитување на Протоколите, обезбедивме безбедно згрижување на дечињата од предучилишна возраст во градинките. За 16 месеци изградивме и отворивме 16 нови градинки, а дополнителни осум се завршени и до почетокот на пролетта ќе бидат ставени во функција. За полесно премостување на пандемијата со Ковид-19, спуштајќи ги критериуми го олеснивме влезот на ранливите категории граѓани во системот на социјалната заштита, со што нови 9.000 домаќинства користат гарантирана минимална помош, информираше таа.

Министерката Шахпаска нагласи дека, со цел полесно да се преброди здравствената и економската криза, обезбеден е додаток за енергенси за 36.000 приматели на гарантирана минимална помош и за 9.300 корисници на државна социјална пензија во текот на целата година во висина од 1.000 денари месечно.

Како социјалдемократ, битката за работничките права ми беше еден од врвните приоритети. Затоа, усвојувањето на Законот, кој предвидува дека „Недела е ден на неделен одмор“ за над 92 проценти од работниците, на кој интензивно работев со работниците и работодавците, ме прави особено горда. Искрено верувам во концептот „Едно општество за сите“ и затоа Законот за спречување и заштита од дискриминацијата го поднесов во процедура на петтиот ден од мојот мандат и беше консензуално изгласан и од власта и од опозицијата, вели Шахпаска.

Таа посочи дека борбата за спречување и заштита од насилство врз жените и семејно насилство е нејзина мисија во политиката.

Преку процесот на усвојување на Законот за спречување и заштита од насилството врз жените и семејното насилство ги обединив, пред сѐ, жените и од власта и од опозицијата во македонското Собрание. Насилството врз жените е натпартиско прашање, кое ги обединува сите жени затоа што тоа не препознава политичка, верска, религиска, интелектуална или образовна припадност. И од оваа борба не се откажувам, порача министерката Шахпаска.

Таа додава дека најтешкиот дел од процесот на деинституционализацијата е во тек, односно дека се отворени седум куќи за живеење со поддршка за 35 лица со тешка и најтешка интелектуална попреченост од Специјалниот завод во Демир Капија.

Со поддршка од ЕУ, во тек е трансформацијата на Заводот за рехабилитација на деца и младинци во Скопје, во современ центар за дневни услуги во заедницата за лицата со попреченост, отворен е и дневен центар за лица со посебни потреби во Липково, а веќе почнува изградба на нов дневен центар во општина Чашка.

Го креиравме и го ставивме во функција аудиочитачот на македонски јазик „Кико“ и на албански јазик „Хана“, кој пишаниот текст го трансферира во говорна порака наменет за слепите лица и за лицата со оштетен вид. На овој начин ги зголемуваме независноста и самостојното функционирање на овие лица. Правото за користење лични асистенти го спуштивме на шестгодишна возраст. Ги донесовме измените на законите за социјална и за детска заштита, со кои обезбедуваме нов пристап на процена на попреченост според Меѓународната класификација на функционалноста (МКФ), информираше министерката Шахпаска.

Во своето обраќање пред крајот на мандатот, таа се осврна и на процесот на децентрализација на социјалните услуги – помош и нега во домот за стари лица и лица со попреченост, со што 900 корисници добиваат нега на дневно ниво од страна на 300 лиценцирани негуватели, кои добиваат паричен надомест за испорачаните услуги.

Во тој контекст е и информацијата дека бројот на лиценцирани даватели на социјални услуги од 23 е зголемен на 62, со што е овозможена плурализација на давателите на социјалните услуги.

Дополнително отворени се два центри за поддршка на згрижувачки семејства, и тоа во Скопје и во Битола, со цел да се поттикнат што поголем број згрижувачи да даваат квалитетна грижа за децата без родители како облик најблизок до биолошките семејства.

Ние сме социјална држава и грижата за граѓаните во социјален ризик – маргинализираните лица, лицата со попреченост, тешко вработливите – преку социјалното претприемаштво добива организирана форма. Го отворивме првиот центар за поддршка на социјалните претпријатија. Со последниот Закон за стечајци обезбедивме материјална сигурност за дополнителни 1.100 стечајци, а го донесовме и Законот за пензионирање со 64 години возраст за да овозможиме вклучување млади на пазарот на трудот, потсети Шахпаска.

Во однос на проектите што се во тек, таа информираше дека во финална фаза е подготовката на новото мени за правилен и здрав начин на исхрана на децата во градинките, кое е изработено во согласност со современите стандарди за правилен начин на исхрана на децата од предучилишна возраст.

Подготвена е нацрт-верзија на системскиот Закон за работните односи, кој предвидува нов пристап во делот на породилното отсуство, со воведување родителско отсуство на таткото, ги скратува договорите за работа на определено време, ја регулира работата од далечина и од дома…

Министерката Шахпаска на крајот им се заблагодари на граѓаните за искажаната доверба, но и поддршка во текот на целиот период додека им служела чесно, одговорно, транспарентно и посветено – вложувајќи ја својата енергија во служба на граѓаните, а благодарност изрази и до премиерот Зоран Заев за можноста да биде дел од неговиот тим.

The post Шахпаска: Oсобено сум горда на недела неработен ден и на апликацијата за слепи лица appeared first on Република.