Победата на ГЕРБ-СДС е дефинитивна, се обврзавме да формираме влада, изјави лидерот на ГЕРБ Бојко Борисов вечерва на прес-конференцијата што ја одржаа во седиштето на партијата. Тој им се заблагодари на сите негови колеги и на сите Бугари кои го подигнаа одѕивот на гласачите.

Можеме да прифатиме многу компромиси, но не можеме да го замениме гласот на народот, изјави лидерот на ГЕРБ.

Тој рече дека нивната програма ќе биде основна за сите што сакаат да бидат во влада, но нема да се борат со невозможното, бидејќи некои од партиите уште вечерва започнале да им поставуваат услови.

Собранието е математика, бројот на партии е од големо значење. Ако влезат сите партии во влада, нема да има влада, предупреди Борисов.

Во 51. Национално собрание ќе влезат осум формации, според паралелното пребројување на „Галуп интернешнл“, направено со 90%.

ГЕРБ-СДС продолжува да води со повеќе од 10 проценти разлика. Во вториот има промена – засега „Вазраждане“ е пред ПП-ДБ со 2 процентни поени. „ДПС – Нов почеток“ и „Aлијанса за права и слободи“ се рангирани на четврто и петто место со разлика помала од процент. По нив се БСП и „Има таков народ“.

ГЕРБ-СДС – 25%
ПП-ДБ – 14,2%
„Преродба“ – 14%
„ДПС – Нов почеток“ – 10,3%
Алијанса за права и слободи – 8,6%
„БСП – Обединета левица“ – 8,1 отсто
„Има таков народ“ – 6,9%
МЕЧ – 4,8%

The post Борисов прогласи победа и тврди дека овојпат ќе формира влада appeared first on Република.

Победник на најновите предвремени парламентарни избори е партијата на поранешниот премиер Бојко Борисов – ГЕРБ со 26,4 отсто, покажуваат првите излезни анкети.

Според податоците на агенцијата Алфа Рисрч, на второ место е коалицијата Продолжуваме со промените – Демократска Бугарија со 14,9 отсто од гласовите, а по неа е Препород со 12,9 гласови.

Во парламентот влегува и ДПС – Нов почеток со 8,9 отсто, потоа Алијансата за права и слободи со 8,7 отсто, БСП-Обединета левица со 7,8 отсто од гласовите и Има таков народ со 6,2 отсто од гласовите, покажуваат излезните анкети.

The post Борисов води на изборите во Бугарија appeared first on Република.

И со маркетингот се претера:

The post Бугарски маркетинг appeared first on Република.

Во Бугарија попладнево заврши обработката на сите протоколи на Секторските изборни комисии во Регионалните изборни комисии (РИК) за вчерашните парламентарни избори, соопшти Централната изборна комисија (ЦИК) на својата Интернет-страница, а победник на овие петти избори во последните две години е коалицијата „ГЕРБ-СДС“,  предводена од поранешниот бугарски премиер Бојко Борисов.

Според податоците на ЦИК, коалицијата ГЕРБ-СДС освоила  669.361 глас или 26,51 отсто од избирачите кои го остварија своето право на глас, а потоа следи коалицијата „Промените продолжуваат (ПП) - Демократска Бугарија (ДБ)“ со 619.592 гласа или 24,54 отсто.

На трето место е „Преродба“ со 357.167 гласови или 14,15 отсто, а на четврто е „Движење за права и слободи“ со 346.437 гласови или 13,72 отсто. „БСП за Бугарија“ го зазеде петтото место со 225.814 гласови или 8,94 отсто, а зад неа, како шеста партија која ќе влезе во новиот бугарски Парламент, е партијата „Има таков народ“ на шоуменот Слави Трифонов со 103.641 глас или 4,11 отсто.

Партијата „Бугарски подем“ со 77.804 гласови или 3,08 отсто и „Левица!“ со 56.453 гласа или 2,24 отсто остана под цензусот за влез во парламентот - четири отсто.

На овие избори 108.842 избирачи се одлучиле за опцијата „Не поддржувам никого“ .

Излезноста на вчерашното изјаснување во Бугарија беше 40,63 отсто.

The post Коалицијата „ГЕРБ-СДС“ е победник на изборите во Бугарија, со речиси два отсто поголема доверба од „ПП-ДБ“ appeared first on Република.

Бугарските конзервативци и либералите, се чини, и овој пат ќе имаат изедначени резултати на вонредните парламентарни избори, што навестува нова загатка за формирање стабилна влада во земјата, забележува Франс прес.

Ова беа петти избори во Бугарија за две години, додава агенцијата.

Според различни излезни анкети, коалицијата предводена од поранешниот проевропски премиер Кирил Петков и конзервативната партија ГЕРБ на поранешниот премиер Бојко Борисов имаат речиси еднаков резултат. Уште еднаш, излезноста на гласачите беше многу мала (38,49 проценти), додава агенцијата.

Далеку од надежите што ги поттикна бранот антикорупциски демонстрации од летото 2020 година, Бугарија, каде што инфлацијата е висока и која е најсиромашна во ЕУ, е заглавена во скапа политичка криза, додава агенцијата. Од падот од власта на експремиерот Бојко Борисов различни политички формации не можеа да формираат стабилна владина коалиција.

Франс прес, исто така, посочува дека кризата се влоши и поради конфликтот во Украина и дека постои неединство во општеството во однос на помошта што треба да му се обезбеди на Киев.

Прорускиот табор забележа раст на популарноста и на резултатот на овие избори, додава Франс прес, посочувајќи на младата партија „Препород“, која ја дефинира како ултранационалистичка. Таа одбива какво било снабдување со оружје за Киев и отворено ја брани идеологијата на Кремљ, како и социјалистите на БСП, наследници на поранешната Комунистичка партија, која некогаш владееше со земјата, истакнува Фрас прес.

Пред гласањето, Лукаш Мачек, вонреден истражувач во Институтот Жак Делор за Централна и Источна Европа, кажа дека е скептичен за можниот исход доколку Бојко Борисов не се повлече.

-Го наоѓаме истиот модел како и во другите централноевропски земји - поранешен лидер се држи за власт, додека другите партии одбиваат да се здружат со него, без да имаат многу заедничко едни со други во секој случај, вели Мачек.

Меѓутоа, самиот Борисов предупреди дека доколку Бугарија се доведе во ситуација да организира и нови шести по ред избори тоа ќе биде самоубиствено, бидејќи повеќето луѓе сакаат крај на нестабилноста, потсетува Франс прес.

Агенцијата потсетува и дека имиџот на Борисов како човек од народот бил нарушен поради сомневањата за корупција, а по претходните избори тој не успеал да формира влада поради недостиг од сојузници, иако тогаш бил на прво место.

Франс прес го цитира Кирил Петков, противкандидатот на Борисов, кој вели дека сака Бугарија конечно да го живее животот на нормална европска земја и нејзините граѓани да престанат да емигрираат.

Агенцијата Франс прес додава дека доколку по овие избори не се формира влада, повторно ќе има привремен кабинет назначен од претседателот Румен Радев, кој и самиот е жестоко против испраќање оружје во Украина.

Реформистичката коалиција предводена од поранешниот премиер Кирил Петков е веројатниот победник на изборите во Бугарија, според резултатите од излезната анкета, забележува Асошиетед прес.

Меѓутоа, агенцијата забележува дека може да поминат денови додека се објават конечните официјални резултати од гласањето. Доколку ги потврдат резултатите од излезната анкета, коалицијата на Петков ќе добие мандат за формирање влада, соопшти агенцијата, повикувајќи се на излезната анкета на Галуп.

Но, се чини дека таа ќе има тешка задача да најде сојузници за да формира владина коалиција во фрагментиран парламент. Според политичките аналитичари во Бугарија, не е исклучена можноста за други избори, но може да се постигне и остварлива коалиција.

Прозападниот реформски блок освои најмногу места на парламентарните избори во Бугарија, наведува Ројтерс, повикувајќи се на излезните анкети на Галуп и Тренд.

Ова беа петти избори во две години, бидејќи личната антипатија меѓу лидерите на двата главни политички блока го спречи формирањето на стабилна коалициска влада, додава агенцијата, мислејќи на коалицијата предводена од Кирил Петков и ГЕРБ на Бојко Борисов. Коалицијата предводена од Петков конкретно ги обвинува Борисов и неговата партија ГЕРБ за неконтролираната корупција во Бугарија за време на нивното 10-годишно владеење, кое заврши во април 2021 година. Борисов ги отфрла овие обвинувања.

Неуспехот во напорите за формирање стабилна влада сега може да ги поткопа надежите на Бугарија за приклучување кон еврозоната во блиска иднина и да може ефикасно да ги користи европските фондови за закрепнување од пандемијата на коронавирус, додава агенцијата.

Ројтерс ги наведува останатите партии кои, според излезните анкети, ќе влезат во парламентот, вклучително и Препород, дефинирана од агенцијата како националистичка партија со симпатии за рускиот претседател Владимир Путин во војната во Украина. Позицијата на „Препород“ како трета партија, според анкетата на Галуп, исто така ја става во потенцијална улога како партија со влијание врз одлуките што ќе се носат во новиот Парламент.

Извор: МИА

The post Светските агенции за исходот од изборите во Бугарија appeared first on Република.

Според првичните резултати од излезната анкета на агенцијата „Алфа Рисрч“ на денешните петти парламентарни избори во Бугарија во поледните две години, повторно не се наѕира јасен победник, бидејќи двете најсилни коалиции изборниот ден го завршуваат речеиси изедначено. Коалицијата „Промените продолжуваат – Демократска Бугарија“ освоила 26,4 отсто од гласовите на Бугарите, додека ГЕРБ-СДС имаат 25,5 отсто од гласовите.

Според очекувањата, и денешниот изборен ден мина со исклучително лоша излезност од само 38, 49 отсто.

Според првичните резултати на „Алфа Рисрч“, претставени на Бугарската национална телевизија, По „ПП-ДБ“ и ГЕРБ-СДС“, на трето место е ДПС со 13,9 отсто, „Препород“ има 13,5 отсто а „БСП за Бугарија“ 9,2 отсто

Се уште е нејасно дали во новиот бугарски Парламент ќе влезат пет или шест партии, бидејќи до прогласувањето на конечните резултати нема да се знае дали „Бугарски подем“ или „Има таков народ“, ќе успеат да го минат изборниот цензус. Засега првата има 3,6 отсто од гласовите, додека партијата на Слави Трифонов е со 3,5 отсто освоени гласови

Околу клучното прашање во моментов – дали партиите и коалициите ќе успеат да состават стабилно мнозинство во парламентот и ќе изберат функционална влада, Борјана Димитрова од агенцијата „Алфа Рисрч“ изјави дека „единствен можен модел за влада е широка коалиција меѓу првите две партии.

-Тоа што во овој момент го набљудуваме е фотофиниш меѓу првите две партии, изјави Борјана Димитрова при презентацијата на резултатите од излезните анкети од изборите денеска на БНТ.

Според нејзини проценки, треба да се почека паралелното пребројување на гласовите за да има поголема јасност, а „многу е веројатно дека ќе треба да го чекаме целосното пребојување од ЦИК, заедно со резултатите од странство“.

-Гледаме тесни резултати меѓу третата и четвртата партија, а не е исклучено и шеста партија да влезе во Народното собрание, рече Димитрова.

Таа смета дека коалиција меѓу една од големите и една од помалите изборни коалиции не е можна, ниту е можна меѓу една од првите две партии заедно со две од другите помали партии, поради зацртаните идеолошки разлики. Затоа, смета таа, единствен модел е коалиција меѓу првите две победнички партии, а дали тоа ќе биде прифатено, допрва ќе треба да се види“.

The post Според првичните анкети за излезноста повторно нема видлив победник на изборите во Бугарија appeared first on Република.

Изборен молк во Бугарија пред утрешните петти вонредни избори за неполни две години.

Никаков вид политичка и изборна пропаганда не е дозволена на денот на изборниот молк и на самиот ден на гласање. Согласно Изборниот закон, 24 часа пред изборите и на денот на изборите апсолутно е забрането да се рекламираат резултати од  истражувања кои на кој било начин би ја откриле распределбата на политичките сили, за граѓаните мирно да одлучат кои од 15-те регистрирани партии и 7 коалиции  би ги поддржале.

Дополнително значење на изборниот молк му дава и тоа што околу 7 до 14 отсто од гласачите одлучуваат кого ќе поддржат во последен момент.

Според социолозите, процентот на такви гласачи е доволно голем за да се променат резултатите од прелиминарните испитувања на јавното мислење.

Во комбинација со очекуваниот низок одѕив од околу 40 отсто и речиси еднаква поддршка за првите две партии, одлуките на бугарските гласачи во последен момент би можеле значително да ја свртат вагата, а победникот на изборите најверојатно ќе биде решен во последен момент.

Гласачите се надеваат дека новоизбраниот парламент ќе формира стабилна влада која ќе почне да ги решава наталожените проблеми во државата, инфлацијата, безбедноста, реформите во важните сектори како правосудството, здравството итн.

The post Бугарите повторно на гласање: Петти вонредни избори за неполни две години appeared first on Република.

Поранешниот бугарски премиер се соочува со тешкотии во формирањето коалиција, објави „Фајненшл тајмс“ коментирајќи ги резултатите од изборите во Бугарија, одржани во неделата.

Изданието наведува дека централно-десничарската партија ГЕРБ на поранешниот премиер Бојко Борисов е во водство на четвртите парламентарни избори во Бугарија во последната година и половина, но партијата не успеа да го освои потребното мнозинство за формирање владина коалиција во најсиромашната држава во ЕУ.

Изданието наведува кои партии влегуваат во парламентот и колку проценти добиваат ГЕРБ и второпласираната партија „Продолжување на промените“ на поранешниот премиер Кирил Петков. Весникот додава дека ПП и другите водечки политички сили ја отфрлиле можноста за коалицирање со ГЕРБ, што ги зголемува шансите за нови избори во блиска иднина.

Борисов, кој по една деценија на власт беше сменет во 2021 година по масовните антикорупциски протести, се претстави себеси како оној што може да ја води Бугарија низ нејзината политичка и економска криза. Под власта на Петков, земјата остро се сврте против Русија, која традиционално беше нејзин близок партнер, коментира весникот.

Изданието го цитира Борисов кој вели дека е важно земјата да продолжи да го следи евроатлантскиот курс, за и Русите да не почитуваат. Им се допаѓаат оние кои се силни, одлучни и јасни. Борисов, исто така, сака да ја внесе земјата во еврозоната, да спроведе реформи во судството и да продолжи да го диверзифицира снабдувањето со гас од Русија.

Петков, прозападен дипломец на Харвард, кој вети дека ќе се бори против корупцијата, го загуби гласањето за недоверба во јули поради споровите околу буџетот и проширувањето на ЕУ по седум месеци на функцијата што доведоа до изборите во неделата.

Весникот забележува и дека новоформираната партија „Бугарски подем“ го поминала прагот за влез во парламентот, а проруската партија „Преродба“ ја удвоила поддршката на околу 10 отсто.

Доколку не се формира одржлива коалиција, претседателот Румен Радев би можел да продолжи со преодните влади и да одреди датум за нови избори за неколку месеци. Сепак, политичката нестабилност ќе предизвика дополнителна економска штета на земјата и ќе ја одложи нејзината цел за влез во еврозоната во 2024 година, предупредуваат аналитичарите.

Весникот го цитираше и Димитар Бечев, предавач на Оксфордската школа за глобални и територијални студии, кој ги опиша изборните резултати како „ќорсокак“, но кој смета дека едно од решенијата за овој ќорсокак е „експертскиот кабинет“ во кој доминира ГЕРБ и центристичката етничка турска партија ДПС. „Но, овој кабинет би бил краткотраен“, рече тој.

Весникот, исто така, коментира дека популистичката партија на пејачот Слави Трифонов „Има таков народ“, која го порази Борисов на изборите во јули 2021 година, сега ја изгубила наклонетоста на гласачите и нема освоено ниту едно пратеничко место.

The post „Фајненшл тајмс“: Поранешниот бугарски премиер се соочува со тешкотии во формирањето на владината коалиција appeared first on Република.

Мал број на Бугари во Македонија вчера изглегоа на избирачките места за да го остварат своето право на глас. Според податоците на 4NEWS.mk само 461 гласач отишле до избирачките места и го дале својот глас.

Најголем број на гласачи имало во Скопје (172), па следува Кавадарци (68), Струмица (67), Охрид (56), Битола (53), Прилеп (33) и во ново-отвореното гласачко место во Велес најмалку односно само 12.

The post Само 461 Бугари гласале на изборите во Македонија за Бугарија appeared first on Република.

Ништо нема да се промени во политиката на бугарските институции - како што се Собранието и Владата, ниту пак ќе се смени граѓанската перцепција кон Македонија, вели поранешниот амбасадор во Бугарија Марјан Ѓорчев, коментирајќи ги за „Фокус” вчерашните четврти по ред парламентарни избори во Бугарија во само 18 месеци.

Според него вековната бугарска стратегија чии што фундаменти се науката, образовниот систем, социјалниот инженеринг, не дозволива маневарски простор кај било кој политички субјект во Бугарија кон т.н. „македонското прашање”.

Сè додека ние во Македонија не разбереме дека попуштањето од наша страна води само кон се поголем притисок од бугарска страна, нема да има подобрување во двонасочниот бугарско-македонски дијалог. Без рамниправност и симетрија, нема да има взаемна почит и меѓусебна доверба помеѓу бугарската и македонската држава, заклучува тој.

The post Ѓорчев: Сè додека Македонија не разбере дека попуштањето води кон поголем притисок од бугарска страна, нема да има промени appeared first on Република.

Поранешниот премиер Зоран Заев по долго време се обрати преку социјалните мрежи за да му ја честита победата на неговиот поранешен колега од Бугарија, Бојко Борисов.

Честитки на сите граѓани на Бугарија за успешните избори.
Честитки на ГЕРБ и на мојот добар пријател Боико Борисов за победата и освоената најголема доверба од бугарскиот народ. Посакувам успешни разговори за составување на новата влада која ќе донесе стабилност на нашиот источен сосед и просперитет на Бугарија. Стабилноста на Бугарија и просперитетот на бугарскиот народ е добра за македонскиот народ како и за граѓаните на целиот Балкан, напиша Заев.

The post Заев се јави по долго време: Честитки на мојот добар пријател Бојко Борисов appeared first on Република.

Магазинот „Политико“ и агенцијата Блумберг очекуваат дека ќе биде тешко да се формира нова влада во Бугарија по вчерашните предвремени парламентарни избори. И според двата американски медиуми, на долготрајната политичка криза во оваа балканска земја не и се гледа крај, јави БТА.

На изборите победи партијата ГЕРБ на поранешниот премиер Бојко Борисов, но се уште е многу нејасно дали поранешниот карате шампион со нарушен имиџ ќе успее да формира влада, забележува Политико. Тоа беа четврти парламентарни избори во Бугарија за 18 месеци и сега Борисов ќе треба да се обиде да формира владина коалиција во многу фрагментиран политички пејзаж. Сепак, потребата за формирање влада само ќе биде комплицирана од „токсичната репутација“ на поранешниот премиер, коментира „Политико“ и потсетува на протестите против неговата влада во 2020 година.

И покрај неговата често пријатна врска со Кремљ и руските енергетски компании, поранешениот бодигард се обидува на овие избори да се претстави како проевропски атлантист, забележуваат американскиот медиум кој ги гледа природните сојузници на ГЕРБ во второпласираната проевропска и про-НАТО коалиција „Продолжување со промените“, предводена од поранешниот премиер Кирил Петков и во антикорупциската формација „Демократска Бугарија“. И двете политички сили, сепак, сметаат дека Борисов е персонификација на проблемите на земјата и е многу мала веројатноста да се согласат да соработуваат со ГЕРБ доколку тој не се повлече од политиката.

Доколку поранешниот премиер не успее да најде излез од ќорсокакот, претседателот Румен Радев најверојатно ќе назначи преодна влада до одржување на нови предвремени избори за неколку месеци. Сепак, сопствената позиција на Радев за Русија се смета за двосмислена, забележува Политико.

Според агенцијата Блумберг, се појавува политичка парализа и покрај првото место на партијата на Борисов. Коалицијата предводена од Петков беше втора, но и таа нема јасен пат до мнозинство. Долготрајната неизвесност може да ја доведе во тешка позиција најсиромашната земја од ЕУ, предупредуваат американскиот медиум.

The post „Политико“ и „Блумберг“: ГЕРБ победи, ама пак тешко ќе оди формирањето на влада во Бугарија appeared first on Република.

Според излезната анкета на агенцијата „Алфа Рисрч“, коалицијата ГЕРБ-СДС предводена од Бојко Борисов победи на предвремените парламентарни избори во Бугарија, јавува дописникот на МИА од Софија.

ГЕРБ-СДС, според резултатите на агенцијата во 19 часот, покажуваат дека ГЕРБ-СДС добила 25,5 отсто од гласовите. Втора политичка сила е „Продолжуваме со промената“ на Кирил Петков и Асен Василев со 19,9 отсто. Движењето за права и слободи добило 14,4%, БСП 10,2%, националистичката „Преродба“ 10%, „Демократска Бугарија“ 7,9%.

Според излезната анкета партијата на Слави Трифонов „Има таков народ “, исто така, е под прагот со 4,2 отсто, како и „Бугарскиот подем“ на поранешниот вршител на должноста премиер Стефан Јанев со 2,9 отсто, „Исправи се Бугарија“ на националниот правобранител Маја Манолова – 1,1 отсто и ВМРО – 0,9 отсто.

Под прагот за влез во новото Народно собрание на Бугарија остануваат „Исправи се Бугарија“ (1,2 отсто) и ВМРО (0,9 отсто).

Со „не поддржувам никого“ гласале 3,3 отсто од гласачите.

The post ГЕРБ на Бојко Борисов победи на предвремените парламентарни избори во Бугарија appeared first on Република.

Излезноста на гласачите на предвремените парламентарни избори што се одржуваат во Бугарија до 16 часот по локално време изнесува 25,58 отсто. Највисока е во еден од регионите во Софија – 33,95 отсто, а најниска – во Карџали – 19,72 отсто, објави Централната изборна комисија.

Како што јави дописникот на МИА од Софија, ист процент излезност беше и на изборите на 14 ноември минатата година – 25,58 отсто и покрај тоа што бројот на гласачите тогаш и сега е различен. До 17 часот и 30 минути се примени 66 дојави за агитација, од кои најголем дел за агитација на социјалните мрежи. Констатирани се прекршоци на три сајтови за објавување на првични резултати.

Прекинато е гласањето со машини на уште неколку изборни места. Во овој момент има вкупно 32 избирачки места кои преминале на гласање на хартија. Од нив 11 се поради тоа што не работел читачот на паметни картички.

Изборниот ден во Бугарија треба да заврши во 20 часот по локално време, кога се очекува да бидат објавени првите излезни анкети.

The post Излезноста на парламентарните избори во Бугарија до 16 часот е 25,58 отсто appeared first on Република.

Поранешниот бугарски премиер, Кирил Петков, кој е копретседател на партијата „Промените продолжуваат“, откако го даде својот глас на вонредните парламентарни избори изјави дека денешното гласање во Бугарија е многу важно.

Изборот е меѓу враќање во годините на транзицијата и нова и изменета Бугарија, рече Петков.

Како што јави дописникот на МИА од Софија, Петков кажа дека верува дека сите Бугари во овој момент ќе го направат изборот земјата да тргне напред. Тој кажа дека освен зголемување на приходите на пензионерите, ќе има и зголемување на просечната плата во Бугарија.

Сите Бугари се надеваат дека секој млад Бугарин ќе ја избере Бугарија за свој дом, дека многу Бугари ќе се вратат од странство, дека ќе имаме просперитетна, способна, земја без корупција, додаде Петков.

Тој кажа дека очекува „Промените продолжуват“, со јасна коалиција околу себе, да управува со бугарскиот народ.

The post Петков: Изборот во Бугарија е меѓу враќање назад во минатото и нова Бугарија appeared first on Република.

Бугарите кои утре ќе одат на четвртите избори за помалку од две години, претпоставуваат дека зимава ги чека неизвесност поради зголемената инфлација предизвикана од војната во Украина и затоа многумина се надеваат на добра влада и стабилност по неколкуте години на политички превирања.

Клучното прашање е дали новата влада ќе успее да го реши проблемот со вртоглавото зголемување на цените на енергијата и да обезбеди снабдување со гас по пристапни цени, откако Русија го прекина гасот во април, бидејќи Бугарија одби да плати во рубљи по руската инвазија на Украина.

Но, жестоките коалициски разговори се очекува да траат долго по изборите на 2 октомври поради длабоката поделеност во политичката елита околу тоа како да се искорени длабоко вкоренетата корупција и неуспехот на помал број нови партии да изградат одржлива база на гласачи, пишува хрватски „Индекс“.

„Се плашам дека нема да имаме влада“

Како и многу Бугари, државниот службеник Захаринка Кокалова стравува дека нема да има крај на хаосот што започна со неубедливите избори во април 2021 година и се протегаше на следните два предвремени циклуси, што на крајот доведе до пад на реформската влада во јуни.

„Се плашам дека нема да имаме влада“, рече Кокалова (62), седејќи на каучот во нејзината кујна во Давидково, сиромашно село во планинскиот венец Родопи на југот на земјата.

„Се плашам дека работите ќе се влошат. Без владата, цените растат и животот станува постресен“.

Во обид да се прилагодат на порастот на инфлацијата низ Европа, Кокалова и нејзиниот сопруг планираат да ги намалат порциите храна и да користат поевтини дрва за да се стоплат оваа зима.

Но, нема да ја смени партијата за која вообичаено гласа, односно социјалистите кои ветуваат повеќе државни субвенции.

Анкетите покажуваат предност на ГЕРБ на Борисов

Анкетите покажуваат дека централно-десничарската партија ГЕРБ на поранешниот премиер Бојко Борисов (63), која победи на пет избори од 2009 до април 2021 година, најверојатно повторно ќе доминира со околу 24 отсто од гласовите.

ГЕРБ, како и другите традиционални бугарски партии како што се социјалистите, турската МРФ и Демократска Бугарија, уживаат речиси иста поддршка од гласачите како и на последните избори.

Излезноста на гласачите веројатно ќе биде околу 40 отсто, што го нагласува растечкото разочарување на Бугарите од ендемичната корупција и нефункционалните политички конфликти во најсиромашната членка на ЕУ.

„Две третини од Бугарите велат дека треба да се формира влада по изборите, а во исто време речиси две третини од нив не веруваат дека тоа ќе се случи“, вели Борјана Димитрова, аналитичар на независното истражување на јавното мислење, Aгенција Алфа Рисрч.

Политичките партии оставаат впечаток на беспомошност кога станува збор за формирање влада.

Неуспехот да се спречи инфлацијата и да се контролира фискалниот дефицит може да ја принуди Бугарија да ги одложи плановите за усвојување на еврото во 2024 година.

Идните односи на Бугарија со Русија се исто така доведени во прашање, бидејќи Софија се откажа од својот традиционално топол пристап кон Москва поради руската инвазија на Украина.

Се очекува Борисов да има проблеми да формира функционална коалиција ако неговата партија биде на прво место, како што покажуваат анкетите, бидејќи многу политичари од целиот политички спектар го обвинуваат дека дозволил да цвета корупцијата во земјата.

Поддршката за ПП (Промената продолжува), предводена од Кирил Петков, чија реформска влада падна во јуни по само шест месеци на власт, е под 20 отсто според анкетите, а центристичката партија се очекува да биде втора во недела.

И ГЕРБ и ПП веруваат дека Бугарија треба да ги продлабочи врските со евроатлантските партнери, да вети поддршка за Украина, да вети дека ќе ги заштити граѓаните и бизнисите од високите трошоци за енергија и да сака да го подигне животниот стандард.

„Кога ќе ги видам како се расправаат, јас лично немам желба да гласам“

Кабинетот на Петков ги зголеми пензиите и платите во јавниот сектор, но неговата четиричлена коалиција беше кревка и многу гласачи беа разочарани од немањето јасни резултати во борбата против корупцијата на високо ниво.

Христо Гаџалов (78), наставник во пензија од Давидково, вели дека покачувањата на пензиите се премали за да се анулира инфлацијата која во август изнесувала 17,7 отсто на годишно ниво, што е рекорд во последните 24 години.

„Не очекувам ништо од изборите. Очекувам втори и трети избори по овие“, рече тој.

„Кога ќе ги видам како се расправаат, јас лично немам желба да гласам“.

The post Бугарите стравуваат од политички хаос по изборите в недела appeared first on Република.

Бугарската социјалистичка партија (БСП) објави дека утре ќе го врати нејзиниот мандат за формирање влада што значи дека распуштањето на парламентот е неминовно и Бугарија ќе оди на уште едни избори, кои ќе бидат четврти по ред за 15 месеци.

Се очекува претседателот Румен Радев да го распушти парламентот идната недела, а изборите да се одржат на 2 октомври.

Ваквиот развој на настаните дојде откако во средата пропадна последниот обид на лидерката на БСП, Корнелија Нинова, да најде парламентарно мнозинство. Таа доби поддршка од 119 пратеници, 106 беа против, а еден пратеник се воздржа од гласање. Социјалистите вчера најавија дека доколку се реализира нивната идеја, односно предлогот добие 121 глас „за“, тие веднаш ќе ја отпочнат постапката за избор на нова влада, со Асен Василев како кандидат за премиер.

– Со оглед дека нашето сценарио не успеа, ние утре ќе го вратиме мандатот – изјави координаторот на пратеничката група на БСП, Георги Свиленски.

The post БСП го враќа мандатот, Бугарија ќе оди на четврти избори во 15 месеци appeared first on Република.

Бугарската социјалистичка партија, која го доби третиот последен мандат за формирање нова влада на земјата, останува на ставот дека премиерот треба да биде од најголемата партија застапена во Парламентот – „Продолжуваме со промената“, изјави Корнелија Нинова откако „БСП за Бугарија“ го доби третиот мандат, јави дописникот на МИА од Софија.

Се уште не е познато името на кандидатот за следен премиер на Бугарија, но останува барањето на бугарските социјалисти нов премиер да не биде Кирил Петков.

Преговорите за формирање нова влада почнуваат утре со најголемата партија во Народното собрание – „Продолжуваме со промената“. Програмата за управување потпишана пред неколку недели меѓу тројцата учесници во владината коалиција „Продолжување на промените“, БСП и „Демократска Бугарија“ ќе биде основа за разговорите со сите политички сили.

Бугарските социјалисти ќе преговараат со партијата на Слави Трифонов „Има таков народ“ како и со независните пратеници кои се одвоија од нив.

Лидерот на БСП рече дека нема да се водат консултации со ГЕРБ, ДПС и „Преродба “.

Според Нинова, најтешко во преговорите ќе биде враќањето на добриот тон меѓу „Продолжуваме со промената“ на Кирил Петков и партијата на Слави Трифонов „Има таков народ“.

Таа наведе дека во програмата што е потпишана имало договор да се направат дипломатски напори да се средат односите на Бугарија со Русија и да не се прекинуваат и да не се затвори Амбасадата.

Нинова истакна дека, според нејзината партија, членовите на бугарската влада треба да бидат политички личности, за да биде јасно кој ја сноси одговорноста во сложените времиња во кои се наоѓа нејзината земја.

The post Бугарските социјалисти бараат да не се нарушуваат односите со Русија appeared first on Република.

Бугарија се наоѓа пред нови парламентарни избори откако партијата Продолжуваме со промената не успеа да обезбеди поддршка од 121 пратеник за формирање нова владина коалиција. Асен Василев, кој беше предложен за нов премиер, нема да формира влада и му го врати мандатот на претседателот Румен Радев.

Откако ГЕРБ на Бојко Борисов ја одби понудата, Радев уште еднаш може да го додели мандатот, но бугарските медиуми веруваат дека шансите за формирање влада без нови избори сега се многу мали.

По неколку избори кои не решија ништо, Кирил Петков беше избран за премиер во декември минатата година, но на неговата влада неодамна ѝ беше изгласана недоверба во парламентот по повлекувањето на Има таков народ од владејачката коалиција.

The post Бугарија пред нови избори, партијата на Петков го врати мандатот appeared first on Република.

Дали Македонија ќе биде причина за пад на бугарската влада?. Како што стојат работите сосема е извесно дека владата на Кирил Петков ќе остане без коалицискиот партнер „Има таков народ“ откако шоуменот Слави Трифонов најави дека ја напушта владата. Причина-Македонија.

Двајца министри од партијата „Има таков народ“ – министерката за надворешни работи Теодора Генчовска и министерот за енергетика Александар Николов денеска најавија дека ќе поднесат оставки.

Според Слави Трифонов, кој ги повлече министрите на „Има таков народ“, има две причини за распадот на четирикратната коалиција – темата Македонија и непочитувањето на коалицискиот договор и тоа што Трифонов повеќе нема пари во земјата. Тој ја оцени како погрешна и штетна финансиската политика што ја водат министерот за финансии Асен Василев и премиерот Кирил Петков.

Ова се уште не значи дека ќе падне владата на Петков и таа може да функционира се додека некој не побара гласање за недоверба поради тоа што власта нема мнозинство во парламентот.

Како што најавуваат од партијата на Петков тие ќе направат се да спречат нови избори.

Подготвени сме за нови избори, но пред тоа ќе направиме се за да спречиме таков развој на настаните, изјави во Јамбол Лена Бориславова, шеф на политичкиот кабинет на премиерот Кирил Петков.

The post Македонија ѝ пресуди на бугарската коалиција, дали следен е Петков? appeared first on Република.