Италијанската полиција минатата недела го уапсила најбараниот бегалец во Америка. Тој носел три скриени ножеви на преполниот плоштад Свети Петар пред Ватикан, изјави денеска судски извор.

Бегалецот, кој сега е во притвор, се вика Мозес Техада и е опишан од истражната единица на Државната затворска служба на Њујорк како насилен поединец. Тој е на листата на најбарани во одделот. Италијанскиот весник „Република“ прв објави дека Техада е уапсен, а тоа го потврди и извор од правосудството. Го привлекол сомнежот кај полицијата која го привела. Кај него биле најдени ножеви долги 20 сантиметри. Плоштадот Свети Петар бил исполнет со верници и туристи додека папата Франциско држел говор тој ден, среда, 10 април.

Засега не е познато дали Техада, кој е осуден за грабеж и киднапирање, претставувал закана за папата Франциско. Инспекторите откриле дека тој неодамна пристигнал во Рим од Молдавија, а претходно престојувал во Украина.

На истражителите им рекол дека во Украина е од 2022 година, каде се борел против руските сили, пренесе „Република“.

Италијанските власти сега чекаат американските власти да одлучат дали ќе бараат негова екстрадиција.

The post Италијанската полиција го уапси најбараниот американски бегалец appeared first on Република.

Италијанската полиција уапси 55 лица осомничени за врски со сицилијанската мафија во голема операција против организираниот криминал, јави ДПА.

Осомничените се обвинети за изнуда, трговија со дрога и поседување оружје и експлозиви, соопшти италијанската полиција.

Рациите беа извршени главно во областа на сицилијанскиот град Калтанисета, но и во други делови на Италија.

Во големата операција учествуваа околу 500 службеници за спроведување на законот.

„Денешната операција е од особена важност, не само во однос на количината, туку и во однос на квалитетот“, изјави за новинарите Салваторе Де Лука од обвинителството во Калтанисета.

Коза Ностра е најпознатата и најактивна мафијашка организација на италијанскиот медитерански остров. Има и помали криминални организации како што е Стида. Фокусот на операцијата беше на градот Гела на Сицилија. Таму две големи мафијашки семејства склучија сојуз со Стида за да го организираат бизнисот со дрога.

Се тврди дека мафијашките семејства користеле незаконски стекнати добивки за да изградат неколку оранжерии за одгледување канабис. Има извештаи дека дрогата била продавана во областа или користена како средство за размена со калабриската мафија Ндрангета за да се добие кокаин.

Според Де Лука, оружјето што го поседуваат осомничените е особено загрижувачко: „Резултатот е Коза ностра која работи, тргува со дрога, има значителен арсенал оружје и е подготвена да убива и да ја демонстрира својата моќ“.

The post Италијанската полиција уапси 55 осомничени за врски со сицилијанската мафија appeared first on Република.