„Домаќинство за почетници” по сценарио и во режија на Горан Столевски, а во продукција на Лист Продукција, освои две златни арени на филмскиот фестивал во Пула, кој започна на 11 јули, а се затвора денес, со прикажување на победничките филмови.

„Домаќинство за почетници” беше дел од натпреварувачката програмата за малцински копродукции и ја освои златната арена за најдобра хрватска малцинска ко-продукција, а хрватскиот актер Владимир Тинтор доби златна арена за најдобра споредна машка улога за своето остварување во филмот.

„Домаќинство за почетници” е финансиски поддржан од Агенцијата за филм на Република Македонија, а меѓу останатите финансиери е и Хрватскиот аудиовизуелен центар, чија поддршка е реализирана преку хрватски ко-продуцент Кинорама од Загреб.

Златните арени се деветта и десетта награда за награда за Домаќинство, кој досега е прикажан на повеќе од 70 фестивали ширум светот, а е дистрибуриан во кината во Америка, Австралија, Холандија, Хрватска, Полска и Македонија.

Светската премиера на “Домаќинство за почетници” се одржа во 2023 на филмскиот фестивал во Венеција, а македонската премиера беше на отворањето на Интернационалниот фестивал на филмската камера, „Браќа Манаки“. Филмот беше избран за македонски кандидат за наградата „Оскар за најдобар долгометражен интернационален филм“ за 2023 година, а беше дел и од селекцијата за Европските филмски награди, каде доби една номинација.

Дистрибутер на филмот на територија на САД е Focus Features, Universal Pictures е интернационален дистрибутер за останатите територии, а продажните агенти на филмот New Europe Film Sales од Полска го застапуваат филмот на територија на југоисточна Европа.

„Домаќинство за почетници“ може да се погледне на 19ти и 20ти јули во Кинотеката на РСМ од 20:30ч.

The post Две златни арени за „Домаќинство за почетници” на Горан Столевски на Пулскиот филмски фестивал appeared first on Република.

Македонскиот филм „Домаќинство за почетници“ во режија и по сценарио на Горан Столевски, кој неодамна ја имаше својата светската премиера на филмскиот фестивал во Венеција, влезе во групата на филмови кои ја комплетираат годинашната селекција за 36. издание на Европските филмски награди, соопшти денеска Европската филмска академија (ЕФА).

Избрани се 19 играни филмови, а во потесниот избор се додадени уште 21 филмски остварувања, па финалната селекција содржи 40 европски филмови од вкупно 31 европска држава. Од денеска до 7 ноември членовите на Европската филмска академија ќе имаат можност да гласаат за избраните филмови, по што врз основа на гласовите, ќе бидат објавени номинациите во категориите: најдобар европски филм, режисер, актер, актерка, сценарист и европски документарен филм.

Избраните филмови дополнително ќе бидат земени во предвид и за наградите во категориите за најдобра кинематографија, монтажа, продукциски дизајн, костимографија, шминка и фризура, оригинална музика, звук и визуелни ефекти. Тие ќе бидат избрани од осумчлено жири составено од претставници на различни уметности и професиии, се наведува во соопштението на ЕФА.

Свеченото доделување на наградите, познати како европски Оскари, е закажано за 9 декември 2023 во Берлин.

„Домаќинство за почетници“ е избран и за годинашен македонски кандидат за наградата „Оскар за најдобар долгометражен интернационален филм“, а во скопските кина ќе почне да се прикажува од 12. октомври. Филмот е финансиски поддржан од Агенцијата за филм, а преку компанијата Focus Features ќе биде дистрибуриран на територијата на САД.

The post „Домаќинство за почетници“ на Горан Столевски избран за Европските филмски награди appeared first on Република.

Филмот „Домаќинство за почетници“ зборува за универзалната хуманост и емпатија. Важно ми беше да се долови енергијата на ликовите во одреден момент, а мое да се адаптирам на таа енергија. Целта беше да пренесеме приказна која што е интересна и ќе има силно значење за гледачите, рече на денешната прес-конференција во Битола режисерот Горан Столевски.

Како што јави известувачот на МИА од Битола, вчера со премиера на овој филм беше отворен Фестивалот за филмска камера „Браќа Манаки“.

Дури кога отидов во Австралија и се вратив од таму, сфатив колку Ромите се различно третирани, а и јас бев различно третиран во Австралија. Но, приказната произлезе самата од себе. Глумците, ликовите во приказните се секогаш во сегашно време. Важно е да се долови енергијата на ликот во одреден момент, а мое да се адаптирам на таа енергија и да придонесам сите да го гледаат филмот, рече Столевски на прес-конференцијата.

Тој порача дека за време на снимањето важно беше да се долови моментот се да изгледа спонтано, да се чувствуваат глумците дека се во реална ситуација и самите односи да делуваат спонтано и природно.

За тоа да може да функционира, како што рече, треба да се создаде добра средина во која таа екипа ќе може да се адаптира на сите услови. Тој напомена дека филмот зборува за универзалната хуманост и емпатија меѓу луѓето.

Мене ми беше важно да пренесеме приказна која е интересна и која што силно ќе им значи на луѓето. Во филмот важно беше да ја видиме сличноста со ликовите и како можеме да се поврземе. Тоа е нешто што е инстиктивно, додаде режисерот.

Продуцентката Марија Димитрова на прес-конференцијата денеска рече дека беше голем предизвик да може целата финансиска конструкција заедно со сите ограничувања кои што фондовите ги носат да се состави и да може да се истера до крај. Но, сепак, како што потенцираше, задоволна е од исходот.

Многу сум задоволна од исходот што го направивме затоа што секако, мислам дека завршивме одлична работа. Рабаотевме со извонредни актери, со извонредна авторска и техничка екипа, рече Димитрова.

Таа најави дека филмот продолжува со фестивалите, следат Бусан во Јужна Кореја и Лондон.

Директор на фотографија Наум Доксевски посочи дека со Столевски соработувал брзо и едноставно.

Лесно беше да се разбереме со Горан. Дури сега од оваа дистанца кога ќе размислам дури е и малку чудно но ние размислувавме и на сличен начин и целото искуство ми беше прилично забавно, додаде Доксевски.

Сценограф на филмот е Ана Жежничек, Роза Трајческа Ристовска е костимограф, Александара Чевреска арт директор, Горан Игњатовски и Леонора Мехмети Хоџа – маскери, кастингот е на Милка Анчевска, Ален Синкауз и Ненад Синкауз композитори, Зоран Максимовиќ – снимател на звук и Ема Бортињон, дизајнер на звук.

Македонскиот кандидат за Оскар „Домаќинство за почетници“ ќе има кинопремиера во Скопје на 12 октомври во киното Синеплекс.

The post Горан Столевски, режисер на „Домаќинство за почетници“: Ми беше важно да пренесеме приказна која е интересна и која што силно ќе им значи на луѓето appeared first on Република.

Македонскиот филм „Домаќинство за почетници“ во режија на Горан Столевски е годинашниот македонски кандидат за наградата „Оскар за најдобар долгометражен интернационален филм“. Одлуката денеска ја донесе Комисијата за избор при Друштвото на филмските работници на Македонија, прифатена и одобрена од Американската Академија за подвижни слики, уметност и наука, во состав: Игор Иванов – режисер и претседател на Комисијата, Кастриот Авдили – продуцент и режисер, Ана Стојановска – актерка, Марина Колоска – камера оператор, Лидија Мојсовска – режисерка, Емилија Ивановска-Атанасовска – костимографка, Ебру Мусли – актерка и Раде Василев – костимограф. Во конкуренција за кандидатурата беа и филмовите: „М“ во режија на Вардан Тозија и „Преекспонирано“ режиран од Елеонора Венинова.

„Домаќинство за почетници“ во режија и по сценарио на Горан Столевски, а во продукција на Лист Продукција - Скопје неодамна ја имаше светската премиера на 80. издание на филмскиот фестивал во Венеција, каде ја доби 17. Queer Lion награда, во конкуренција од 16 филмови, меѓу кои и филмовите на Dog Man на Лук Бесон и Maestro на Бредли Купер. Филмот е финансиски поддржан од Агенцијата за филм на РСМ, а продуцент е Марија Димитрова од Лист продукција - Скопје. Главните улоги ги толкуваат: Анамариа Маринка (позната по филмот „4 месеци 3 недели 2 дена“ (2007) на Кристиан Мунгиу) и Алина Сербан од Романија, Владимир Тинтор од Хрватска, Самсон Селим, Миа Мустафа и Џада Селим од Македонија.

Членовите на Комисијата за избор на македонски кандидат за наградата „Оскар за најдобар долгометражен интернационален филм”, според Статутот на Друштвото на филмските работници на Македонија ги избира претседателот на друштвото, Игор Иванов, а изборот на членови го одобрува Американската Академија за подвижни слики, уметност и наука (Academy of Motion Picture Arts and Sciences – AMPAS).

Друштвото на филмските работници на Македонија е задолжено за избор на македонски кандидат за наградата „Оскар за најдобар долгометражен интернационален филм” од самото осамостојување на Република Македонија, кога од Американската Академија за подвижни слики (AMPAS) беше препознаено како единствена релевантна институција за комуникација, селекција и кандидатура на македонски претставник за наградата.

96-та церемонија за доделување на Оскарите ќе се одржи на 10. март 2024 година, во Dolby театарот во Лос Анџелес.

The post „Домаќинство за почетници“ во режија на Горан Столевски е македонски кандидат за Оскар за долгометражен интернационален филм appeared first on Република.

Со македонска премиера на „Домаќинство за почетници“ на македонско-австралискиот режисер Горан Столевски ќе се отвори годинешното 44. издание на Интернационалниот фестивал на филмска камера (ИФФК) „Браќа Манаки“ кој ќе се одржи од 23 до 29 септември во Битола. Годинашен добитник на наградата за животен опус на „Браќа Манаки“ е оскаровецот Питер Бижу, соопшти директорот на Фестивалот Сименон Мони Дамевски на денешната прес-конфренција. Претседателот на Друштвото на филмски работници (ДФРМ) Игор Иванов-Изи кажа дека актерката и продуцентка Лабина Митевска е лауреат на наградата Голема ѕвезда на македонскиот филм.

Филмот на Столевски, кој е и автор на сценариото ќе ја има светската премиера на Фестивалот во Венеција на 6 септември. „Домаќинство за почетници“ е во продукција на Лист Продукција, а директор на фотографија e Наум Доксевски.

„Домаќинство за почетници“ се занимава со универзалните вредности на семејството - она во кое сме се родиле и она кое самите сме го избрале. Дита никогаш немала намера да биде мајка, но сега околностите ја присилуваат да ги згрижи малата немирна Миа и бунтовната тинејџерка Ванеса, ќерки на нејзината девојка. Гледаме битка помеѓу три своеглави жени кои полека прераснуваат во семејство и ќе сторат сѐ за да останат заедно.

Главните улоги ги толкуваат: Анамариа Маринка (позната по филмот “4 месеци 3 недели 2 дена” на Кристиан Мунгиу) и Алина Сербан од Романија, Самсон Селим, Миа Мустафа и Џада Селим од Македонија и Владимир Тинтор од Хрватска. Во споредните улоги се: Сара Климоска и Ајше Усеини од Македонија и Розафа Челај од Косово.

Продуцент на филмот е Марија Димитрова, а остатокот од авторската екипа ја сочинуваат: Ана Жежничек - сценограф, Роза Трајческа Ристовска – костимограф, Александара Чевреска - арт директор, Горан Игњатовски и Леонора Мехмети Хоџа - маскери, Ален Синкауз и Ненад Синкауз - композитори, Зоран Максимовиќ - снимател на звук и Ема Бортињон - дизајнер на звук.

Добитникот на Златна камера 300, Бижу, е кинематографер на „Мисисипи гори“, „Трумановото шоу“, „Во името на таткото“, „Штета“, „Пинк Флојд: Sидот“, „Животот на Брајан“, „Временски бандит“, „9 и пол недели“, „Ричард III“ и редица други антологиски филмски остварувања.

Бижу има работено со бројни звучни режисерски имиња од светот на филмот како Алан Паркер, со кого се закитија со Оскар во 1988. за драмата „Мисисипи гори“ со актерскиот тандем Џин Хекман и Вилем Дефо, а со Џим Шеридан, Питер Вир и Луј Мал ги снимија антологиските филмови „Во името на таткото“ со Дениел Деј Луис, „Трумановото шоу“ со Џим Кери и „Штета“ со Џереми Ајронс и Жилиет Бинош. Тандемската соработка меѓу Бижу и Паркер започна во 1976. година со филмот „Багзи Мелоун“, кога беше лансиран талентот на подоцнежната актерска sвезда Џоди Фостер, а заедно работеа и на антологиското дело од 1982. „Пинк Флојд: Sидот“, кажа Дамевски.

[caption id="attachment_672998" align="alignnone" width="1600"] Директорот на ИФФК „Браќа Манаки“ Мони Дамевски и Игор Иванов Изи, директор на ДФРМ/Фото: ИФФК „Браќа Манаки“[/caption]

Во плодната кариера на Бижу специфична е соработката и со прославената актерско-сценаристичко-режисерка група Монти Пајтон со чиј култен режисер Тери Гилијам во 1979. Бижу го сними „Животот на Брајан“, бурлескна комедија / пародија за животот на Исус од Назарет, а во 1981. „Временски бандити“.

Дамевски најави многу гости и богата програма на „Браќа Манаки“. Шестдневната програма на фестивалот „Браќа Манаки“ ќе биде соопштена на наредните прес-конференции, како и добитниците на специјалните награди „Камера 300“.

Директорот на ИФФК Дамевски рече дека годинава во претселекција и со објавен отворен повик имале „огромен наплив на филмови’ во четирите програми, а селекторите, како што рече, го избрале кремот од поголемите фестивали. Годинава има нова програма, надвор од натпреварувачките - „Special selection“ со гости од филмски екипи и четири македонски копродукции кои не можеле да бидат вклучени во натпреварувачката програма која има 12 филмови.

На наредната прес-конференција ќе ги соопштиме сите наслови. Имаме 71 филм кои ќе одат во две киносали во Битола. Мораше да ги молиме селекторите да отфрлат понекој филм зашто нема каде да ги прикажеме. Фестивалот ќе има огромен број мастеркласови и неверојатни филмски професионалци – од најѕвездени, до оние кои сега се пробиваат во светот на филмот, рече директорот на ИФФК.

https://republika.mk/vesti/kultura/labina-mitevska-e-godinashna-dobitnichka-na-nagradata-golema-zvezda-na-makedonskiot-film/

The post „Браќа Манаки“ се отвора со македонска премиера на „Домаќинство за почетници“ на Горан Столевски, Оскаровецот Питер Бижу добитник на Златна камера 300 за животен опус appeared first on Република.

Македонскиот филм „Домаќинство за почетници“ во режија и по сценарио на Горан Столевски, а во продукција на Лист Продукција – Скопје ќе биде дистрибуриран на територија на САД, преку компанијата Focus Features. Universal Pictures ќе биде интернационален дистрибутер на филмот за останатите територии, додека продажните агенти на филмот New Europe Film Sales од Полска ќе го застапуваат филмот на територија на југоисточна Европа.

Веста за склучените договори за дистрибуција на филмот доаѓаат пред неговата светска премиера, која ќе се одржи на 6-ти септември 2023 година, на 80. издание на филмскиот фестивал во Венеција. „Домаќинство за почетници” ќе биде дел од натпреварувачката програма „Orizzonti“ и ќе биде во конкуренција за наградите за најдобар филм, најдобра режија, најдобро сценарио, специјална награда од жирито и најдобра машка и женска улога.

Ова е третиот долгометражен филм на режисерот Столевски и прво негово македонско мнозинско остварување. Неговиот дебитантски филм „Нема да си сама“ (You won’t be alone) беше премиерно прикажан на Sundance Film Festival во 2022 година, а истата година, неговиот втор филм „Доволно возрасни” (Of an Age) го отвори Melbourne International Film Festival. И двата филма беа интернационлано дистрибуирани од страна на Focus Features и Universal Pictures.

Focus Features е дел од Universal Pictures, и е компанија за филмска продукција и дистрибуција, чиј фокус при дистрибуцијата се независни и странски (не-англиски говорни) филмови во САД и на меѓународно ниво. Focus Features и Universal Pictures заедно се дел од NBCUniversal, една од водечките светски компании за продукција, маркетинг, забава, вести и информации за глобална публика.

„Домаќинство за почетници” е финансиски поддржан од Агенцијата за филм на Република Македонија, а продуцент на филмот е Марија Димитрова од Лист продукција – Скопје.

Филмската приказна на Столевски се занимава со универзалните вредности на семејството – она во кое сме се родиле и она кое самите сме го избрале. Дита никогаш немала намера да биде мајка, но сега околностите ја присилуваат да ги згрижи малата немирна Миа и бунтовната тинејџерка Ванеса, ќерки на нејзината девојка. Гледаме битка помеѓу три своеглави жени кои полека прераснуваат во семејство и ќе сторат сѐ за да останат заедно.

Главните улоги во филмот ги толкуваат: Анамариа Маринка (позната по филмот “4 месеци 3 недели 2 дена” (2007) на Кристиан Мунгиу) и Алина Сербан од Романија, Владимир Тинтор од Хрватска, Самсон Селим, Миа Мустафа и Џада Селим од  Македонија. Во споредните улоги се: Сара Климоска и Ајше Усеини од Македонија и Розафа Целај од Косово и многу други професионални и непрофесионални актери од Македонија.

Македонски автори кои работеа на филмот се Горан Столевски, кој покрај тоа што е режисер, се појавува и во улога на сценарист и монтажер, Наум Доксевски – директор на фотографија, Роза Трајческа Ристовска – костимограф, Александра Чевреска – арт директор и Горан Игњатовски – маскер. Покрај нив, авторската екипа на филмот ја сочинуваат: Ана Жежничек од Полска како сценограф, Леонора Мехмети Хоџа од Косово како дополнителен маскер, Ален Синкауз и Ненад Синкауз од Хрватска како композитори, Зоран Максимовиќ од Србија како снимател на тон и Ема Бортињон од Австралија како дизајнер на звук.

Филмот дополнително е поддржан и од Полскиот филмски институт, Филмскиот центар на Србија, Хрватскиот аудиовизуелен центар, Косовскиот кинематографски центар. Останатите партнери се: Madants (Полска), Kinorama (Хрватска), Sense Production (Србија), Industria Film (Косово), Tango (САД), Film I Väst и CommonGround Pictures (Шведска), Causeway Films и Adelaide Film Festival (Австралија).

New Europe Film Sales од Полска ги има светските права за продажба на филмот.

Повеќе информации на следниот линк:

https://variety.com/2023/film/global/focus-features-goran-stolevski-venice-housekeeping-for-beginners-1235695774/

The post Focus Features и Universal Pictures ќе го дистрибуираат филмот „Домаќинство за почетници“ на Горан Столевски appeared first on Република.

Вториот игран филм на Горан Столевски, „Доволно возрасни“ (Of an Age), вечерва ќе ја има својата македонска премиера во рамките на гала програмата на Синедејс во киното Фросина во Младински културен центар (МЦК) во 21,15 часот).

Лани, на „Синдејс“ беше прикажан неговиот дебитанстски филм „Нема да си сама“.

За разлика од „Нема да си сама“, во кој глумеа и македонски актери, „Доволно возрасни“ е целосно австралиска продукција. Дејството се случува во летото 1999, двајца тинејџери, повлечениот Никола, по потекло од Србија, и енергичната Ебони, се партнери на натпревар по танцување. На денот на натпреварот, Никола добива вознемирувачки повик од Ебони, која го моли да ја спаси од другата страна на градот, па тој бара помош од нејзиниот постар брат, шармантниот Адам. Додека се возат натаму, меѓу гужвата во сообраќајот и пријателското перчење, двајцата млади мажи откриваат искра меѓу нив… Но Адам ја напушта земјата за 24 часа.

The post „Доволно возасни“ на Горан Столевски вечерва на „Синедејс“ appeared first on Република.

Дебитантскиот долгометражен филм на австралискиот режисер Горан Столевски „Нема да си сама“ е австралиски кандидат за најдобар странски филм за Оскар. Столевски е роден во Македонија, но живее и работи на релација Австралија-Велика Британија.

Во филмот, чие дејство се случува во изолирано планинско село во Македонија во 19. век, играат и македонските актерки Сара Климоска, Верица Недеска и Камка Тоциновски.

The post „Нема да си сама“ на Горан Столевски австралиски кандидат за „Оскар“ appeared first on Република.