Социјалдемократската партија на Германија (СПД) на канцеларот Олаф Шолц денеска ја започна својата изборна кампања, речиси три месеци пред предвремените парламентарни избори, а канцеларот во својот прв голем предизборен говор пред околу 500 членови на партијата во Берлин рече дека претстојните избори ќе претставуваат фундаментална одлука за иднината на Германија, наведувајќи дека безбедноста, напредокот и работните места се загрозени.

Сега е време решително да продолжиме со обновата на Германија, изјави Шолц, кој е кандидат на СПД за канцелар, објави германскиот портал Тагешау.

Тој рече дека СПД е „гласот на вредните и пристојните“.

Шолц предложи четири точки за извлекување на Германија од економската криза, а тоа се обезбедување работни места во индустријата, особено автомобилската индустрија, евтина енергија за економијата, зголемени инвестиции во инфраструктурата и зголемување на бројот на квалификувани работници.

Тој посочи дека Германија се соочува со различни закани, како војна во Европа, економски превирања, растечки екстремизам.

Во такви сериозни времиња, на нашата земја и треба сериозна, одговорна политика, рече Шолц.

Според последните анкети, СПД има поддршка од 14 отсто од гласачите.

СПД се залага за безбедни пензии, поволни кирии, поволно здравство, како и зголемување на минималната плата, потсетува порталот.

Предвремените парламентарни избори во Германија се закажани за 23 февруари, откако владејачката коалиција се распадна овој месец, затоа што не успеа да се договори за политиката за излез од економската криза.

The post Шолц: Претстојните избори ќе претставуваат фундаментална одлука за иднината на Германија appeared first on Република.

Докторот кој беше уапсен во август во Берлин, сега е осомничен дека убил осум пациенти, а во некои случаи се обидел да ги прикрие доказите со палење пожари, соопштија денеска германските истражители.

Неидентификуваниот лекар, кој бил дел од тимот за палијативна нега, во моментот на апсењето бил осомничен дека убил четворица постари пациенти во јуни и јули, а потоа со помалку или повеќе успех се обидел да ги запали нивните станови.

Полицијата и обвинителството денеска соопштија дека се појавиле дополнителни случаи кога ги прегледале досиејата на пациентите и извршиле форензички прегледи на жртви, од кои две биле ексхумирани.

Во првиот случај тој е осомничен дека во јануари на 70-годишникот му дал смртоносна мешавина на лекови. Во сличен случај на почетокот на април, жртвата била 61-годишна жена. Неколку недели подоцна, тој убил 83-годишен маж во својата соба во хоспис во Берлин со мешавина на лекови. Во четвртиот случај во јуни убил 70-годишна жена во нејзиниот стан, а потоа го запалил. Пожарникарите успеале да спречат пожарот да се прошири на останатиот дел од зградата.

Четириесет-годишниот лекар првично беше уапсен поради сомнение за убиство од небрежност, подметнување пожар и обид за подметнување пожар. Обвинителите рекоа дека сега ги третираат случаите како убиства бидејќи се чини дека осомничениот немал друг мотив освен да ги убие пациентите.

Името на осомничениот не е објавено, во согласност со германските правила за приватност. Обвинителите велат дека тој засега се брани со молчење.

The post Уапсен германски лекар кој убил осум пациенти appeared first on Република.

Германија се соочува со сериозен недостиг на кадар во областа на социјалните услуги, бидејќи бројот на луѓе на кои им е потребна грижа е речиси двојно зголемен во изминатите години, додека бројот на негуватели расте релативно бавно. Тоа го објави ДПА, цитирајќи информации дадени од Министерството за труд како одговор на барањето на претставникот на Алтернатива за Германија, Рене Спрингер.

Многу луѓе кои работат во секторот за социјални услуги се имигранти. Во 2022 година околу 30 отсто од работната сила во секторот за нега на стари лица беше од странско потекло, процени Експертскиот совет за интеграција и миграција.

Податоците на германското Министерство за труд покажуваат дека во 2015 г имало 2,9 милиони луѓе кои имаат потреба од нега, а до крајот на 2023 г тие веќе биле 5,6 милиони. Во истиот период, бројот на вработени во болниците и домовите за стари лица пораснал од околу 1,5 милиони на само околу 1,85 милиони, или околу 23 отсто.

Бројките, исто така, покажуваат дека слободните работни места во болниците и домовите за стари лица се пополнуваат подолго, и покрај зголемената невработеност кај медицинските сестри и негуватели.

Според Федералната агенција за вработување, во октомври имало околу 34.000 слободни работни места во социјалните служби.

The post Во Германија има сериозен недостиг на кадар во домовите за стари лица appeared first on Република.

Откако во хрватската јавност се отвори прашањето за враќањето на мигранти од земји-членки на ЕУ наводно со „тајни авионски летови“ и предупредувањата дека Хрватска станува своевиден „hot spot“, Дојче Веле (DW) пишува дека Германија има план да врати повеќе од 16.000 мигранти во Хрватска, согласно со Уредбата Даблин III.

Даблинската уредба предвидува дека за конкретно барање за азил е одговорна таа земја членка на Европската Унија каде што лицето за првпат влегло на територијата на ЕУ, односно каде што првпат било регистрирано.

Споменувајќи примери за одредени летови со мигранти кон Загреб, DW наведува дека овие летови не се тајни. На пример, кон средината на јуни бил организиран еден таков Даблин-лет е организиран за Штутгарт.

„Тогаш беше официјално потврдено дека авионот бил целосно исполнет, а во Загреб, меѓу другите, била префрлена и една личност против која во Баварија била покрената истражна постапка поради сомнежи за екстремистичка активност. Тој странец директно од истражен затвор бил префрлен на аеродромот во Штутгарт и вратен во Република Хрватска“, пишува DW.

Во текстот се истакнува дека Германија има намера да го забрза протерувањето на лица кои немаат право на заштита. Додава дека во 2023 година, согласно Даблин III, Германија сакала да депортира 74.622 лица во други земји на ЕУ.

„Најмногу барања за преземање на баратели на азил Германците во минатата година испратиле до Хрватска (16.704) и Италија (15.749), но најчесто без успех. Иако некои други земји на ЕУ се согласиле да преземат околу 55.000 од овие „Даблин-случаи“, во текот на целата 2023 година од Германија биле депортирани само 5.053 лица“, потврдил Сојузниот завод за миграции и бегалци (БАМФ), пренесува DW.

Според DW, во првата половина на минатата година Германија испратила барања до други членки на ЕУ за прифаќање на околу 40.000 мигранти. Во 25.000 случаи, тие се согласиле да ги прифатат овие лица, но во практика, во првите два квартали на тековната година, биле депортирани само околу 3.500 лица.

Италија, на пример, генерално се противи на прифаќањето на лица депортирани од Германија. Рим очигледно нема намера да го смени овој став до стапувањето во сила на новиот Пакт на ЕУ за миграции и азил во 2026 година, чија цел е подобра заштита на често премногу пропустливите надворешни граници на Унијата.

„Хрватските власти очигледно се покооперативни од италијанските. За враќањето на азилантите во Хрватска, на пример, неколку пати разговарал баварскиот министер за внатрешни работи Јоаким Херман (ЦСУ) со својот хрватски колега Давор Божиновиќ (ХДЗ)“, се наведува, меѓу другото, во извештајот на DW.

The post Германија планира да врати повеќе од 16.000 мигранти во Хрватска appeared first on Република.

Портпаролот на германското Министерство за надворешни работи, изјави дека Германија не ја затворила канцеларијата на руската телевизија Канал 1, а двајцата новинари на кои им било наредено да ја напуштат земјата не ги исполнувале законските услови за престој во земјата.

Руските новинари можат слободно и непречено да известуваат за вести во Германија. Голем број руски новинари се акредитирани од Федералната канцеларија за печат и информации, рече портпаролот.

Тој нагласи дека канцеларијата за медиуми во Берлин не е затворена.

Претходно, руското Министерство за надворешни работи соопшти дека ќе протера дописник и снимател од германската телевизија А-Ер-Де како одмазда за затворањето на канцеларијата на Канал 1 во Берлин и протерувањето на двајца руски новинари.

Портпаролот на германската влада посочи дека правото на престој во земјата е работа со која се занимаваат државните органи.

Работата како новинар не ви прави ништо добро ако не ги исполнувате условите за престој, додаде тој.

Портпаролот додаде дека германското министерство за надворешни работи останува во близок контакт со германските новинари во Москва поради загриженоста дека Русија презема многу „тешки акции“ против претставниците на медиумите.

The post Германија негира дека го затворила бирото на руската телевизија Канал 1 во Берлин appeared first on Република.

Германија може да го одржи својот просперитет само со помош на имиграцијата. Во спротивно, како што покажува студија, на пазарот на трудот му се заканува голем пад. Во наредните години годишно ќе бидат потребни околу 288.000 странски работници.

На долг рок, германскиот пазар на труд секоја година „во значителна мера“ зависи од имигрантите - ова е заклучокот од анализата нарачана од фондацијата Бертелсман.
„Со цел да се задоволат потребите за работна сила и да се обезбеди благосостојба на Германија, имиграцијата на странски работници, особено од трети земји, станува сe поважна.

Според студијата, без дополнителни имигранти, бројот на работници ќе се намали до 2040 година од сегашните 46,4 милиони на 41,9 милиони. До 2060 година, тој број, без дополнителна имиграција, може да се намали за една четвртина, на само 35 милиони.

„Демографските промени, кои во наредните години поради пензионирањето на генерациите кои моментално работат, ќе претставуваат големи предизвици за германскиот пазар на труд, бараат и имиграција“, вели Сузане Шулц, експерт за миграција од фондацијата Бертелсман.

„Се разбира, првиот приоритет е да се развие домашниот потенцијал на работната сила - и локалните жители и луѓето кои веќе се населиле - како и да се зголеми нивното учество на пазарот на трудот. Сепак, идните потреби до 2040 година не можат да се задоволат сам на овој начин“, вели Шулц.

Реформираниот закон за имиграција за квалификувана работна сила дава нови можности за работниците заинтересирани за Германија. Сепак, според студијата, тие нема да дојдат без изразена „култура на добредојде“ во институциите, фирмите и заедниците, како и долгорочни изгледи за престој.

До 2024 година, нема да бидат подеднакво погодени сите германски сојузни покраини од недостатокот на имиграција.

Според студијата, најголем пад на работната сила ќе биде забележан во Тирингија, Саксонија-Анхалт и регионот Сар, со повеќе од десет проценти. Помал пад, под десет проценти, се очекува во Хамбург, Берлин и Бранденбург.

Нивото на потребите за имиграција во германските провинции зависи од проекцијата на потребната работна сила до 2040 година.

Со оглед на тоа што структурните промени се рефлектираат поинаку, најмногу странски работници ќе бидат потребни во оние провинции каде што до 2040 година зголемувањето на потребите за работна сила ќе биде поголемо од намалувањето. Ова особено важи за Баден-Виртемберг, Баварија, Хесен,

The post На Германија годишно и се потребни 288.000 странски работници appeared first on Република.

До крајот на октомври, 8.263 лица кои добија финансиска помош преку програмите за финансирање на федералните и државните влади ја напуштија Германија, според одговорот на германската влада на барањето на членот на Бундестагот и екстремно десничарски член на Алтернатива за Германија (АфД), Леиф-Ерик Холм. .

Преку Програмата за реинтеграција и репатријација за баратели на азил во Германија/Програма за репатријација со помош на владата (REAG/GARP), сиромашните мигранти можат да добијат пари за авионски и автобуски билети или медицинска помош.

Одговорот на Владата покажува дека одобрените средства за програмата годинава изнесуваат над 8,2 милиони евра.

Во моментов не е можно да се одреди колкав дел од трошоците се на товар на федералните и државните влади. Тоа е затоа што Европската унија покрива најголем дел од трошоците за заминување во одредени околности, а федералните и државните влади треба да покријат само 5 отсто од трошоците.

Депортациите обично се значително поскапи од доброволните заминувања.

„Треба да ја искористиме секоја можност да ги убедиме одбиените баратели на азил и другите странци кои треба да ја напуштат земјата да го направат тоа“, рече Холм.

Тој додаде дека тоа ќе биде поевтино отколку да им се обезбеди целосна социјална помош. Има дури и значителна финансиска помош од ЕУ за напуштање.

The post Германија на одбиените азиланти им дава пари да си заминат од државата appeared first on Република.

Германските граѓани се предупредени да се подготват за можна Трета светска војна со Русија, откако рускиот претседател Владимир Путин уште еднаш се закани со нуклеарен напад.

Тензиите се зголемија откако американскиот претседател Џо Бајден и даде дозвола на Украина да користи ракети со долг дострел за да ја нападне Русија, по што Путин потпиша декрет со кој нуклеарното оружје е последна линија на одбрана.

Германскиот министер за одбрана Борис Писториус изјави дека Русија не е само воена, туку и хибридна закана и дека Европа треба да има широк пристап кон одбраната. Германското Министерство за надворешни работи, исто така, вети дека Путин нема да ја „заплаши“ земјата откако беше откриено дека Германија ќе стане полигон за обука на НАТО доколку конфликтот дополнително ескалира.

Во документот од 1.000 страници, наречен „Operationsplan Deutschland“, Германија ќе биде домаќин на стотици илјади војници од земјите на НАТО. Ќе служи како логистички центар за испраќање воена опрема, храна и лекови на фронтот.

Војската во Германија, исто така, ги информираше цивилите и деловните субјекти како да ја заштитат инфраструктурата и да бидат подготвени да ја одбранат земјата доколку биде нападната, било да е тоа саботажа, напади со беспилотни летала или шпионски операции.

The post Германија ги предупреди граѓаните да се подготват за Трета светска војна appeared first on Република.

Копретседателот на германската Социјалдемократска партија (СДП), Ларс Клингбејл, изјави дека политичката формација стои зад канцеларот Олаф Шолц, кој е во тешка позиција среде претстојните предвремени парламентарни избори, јави ДПА.

Олаф Шолц е канцелар. И сите ние кои сме одговорни во СДП јасно ставивме до знаење во последните денови дека стоиме зад него, рече Клингбејл на маргините на социјалдемократскиот форум во западниот град Есен.

Тој нагласи дека СДП треба да даде приоритет на „содржината на федералната изборна кампања, а не на дискусијата за персоналот“.

Со оглед на нискиот рејтинг на Шолц, пак, во редовите на социјалдемократите се слушаат се повеќе гласови за поддршка на промовирањето на популарниот министер за одбрана Борис Писториус за кандидат за канцелар на СДП на изборите, кои се се очекуваат на 23 февруари, забележува ДПА.

Претходно оваа недела, Писториус ја изрази својата поддршка за кампањата за реизбор на канцеларот Олаф Шолц.

Блокот на конзервативната Христијанско-демократска унија/Христијанско-социјална унија (ЦДУ/ЦСУ) има големо водство пред СДП во анкетите на јавното мислење. Според истражувањето на социолошката агенција ИНСА, нарачана од „Билд“, најмногу гласови добиваат испитаниците од ЦДУ/ЦСУ – 32 отсто, додека поддршката за СДП изнесува само 16 проценти.

The post Лидерот на германските социјалдемократи ги повика своите сопартијци да застанат зад Олаф Шолц appeared first on Република.

Најмалку 10 платеници со германско државјанство загинале во Украина.

Овој податок стана познат од одговорот на германската влада на парламентарната истрага на пратеникот на Бундестагот од левичарската партија „Сара Вагенкнехт унија“, Андреј Гунко.

Гунко во интервју за „Франкфуртер Рундшау“ нагласува дека федералната влада мора да преземе мерки за да го спречи учеството на германските граѓани во конфликтот и ги повика германските власти поактивно да го промовираат почетокот на мировните преговори меѓу Киев и Москва.

The post Најмалку 10 платеници со германско државјанство загинале во Украина appeared first on Република.

По распадот на владејачката коалиција во Германија, можно е одложување на одлуката за натамошни испораки на оружје за Украина, особено во снабдувањето со беспилотни летала, коментираат германските медиуми.

Конкретно станува збор за одложување на испораката на 812 извидувачки беспилотни летала на компанијата „Квантум“, вредни 153 милиони евра, објави „Шпигел“.

Весникот наведува дека, пред распадот на коалицијата, германскиот канцелар Олаф Шолц разговарал за прашањето за доделување дополнителни три милијарди евра за воена поддршка на Украина.

Оваа година германската влада веќе испрати оружје во вредност од речиси осум милијарди евра во Украина, но буџетот за овие трошоци е исцрпен.

Истовремено, Украина инсистира на донесување одлуки за понатамошна испорака на оружје, пред вонредните парламентарни избори во Германија.

Мора да се направи сè за да се обезбеди непречено спроведување на планираните налози и финансирање на дополнителна помош во новата година“, вели украинскиот амбасадор Алексеј Макеев во интервју за „Шпигел“.

Германија годинава веќе испорача 348 извидувачки беспилотни летала „Вектор“, од компанијата „Квантум“ во Украина, а до крајот на годината на фронтот треба да пристигне уште еден пакет од 127 беспилотни летала.

Планирана е и испорака на до 4.000 борбени дронови од друг германски производител, но Украина засега се воздржува од откривање детали за типот на овие дронови.

The post „Шпигел“: Распадот на коалицијата во Германија ја загрозува испораката на дронови во Украина appeared first on Република.

По победата на Доналд Трамп на претседателските избориво САД, Германија треба да направи се за да одржува добри односи со САД, кои се основа за успехот на најголемата европска економија, изјави германскиот канцелар Олаф Шолц.

Toj денеска пред пратениците во германскиот Бундестаг соопшти дека имал добар телефонски разговор со Трамп по неговата изборна победа.

Мораме да продолжиме да правиме сè за да обезбедиме односите да продолжат да се развиваат добро во наредните децении, без оглед на владата што постои овде или таму, изјави Шолц.

Канцеларот се обрати во Бундестагот неколку дена по распадот на владејачката коалиција и распишувањето на предвремени парламентарни избори.

Шолц додаде дека неговата земја нема да ја остави Украина сама во војната.

Украина може да смета на нашата земја и на нашата солидарност, рече Шолц.

The post Шолц: Германија ќе направи се за да одржи добри односи со САД appeared first on Република.

Социјалдемократската партија на Германија (СПД) и Христијанско-демократската унија ЦДУ/ЦСУ постигнаа договор за датумот за предвремени парламентарни избори, кои треба да се одржат на 23 февруари следната година, јавуваат германските агенции.

Пратеничките групи на владејачките партии СПД, Зелените и Либералите, заедно со опозициската Унија ЦДУ/ЦСУ, се договорија да се одржат предвремени избори на 23 февруари. Германскиот канцелар Олаф Шолц (СПД) планира да го постави прашањето за довербата во Бундестагот на 16 декември, објавија германските медиуми, повикувајќи се на извори блиски до раководството на партијата. Овој датум, 23 февруари, му е предложен на германскиот претседател Франк-Валтер Штајнмаер, кој треба и официјално да го потврди.

Претходната среда, канцеларот Шолц го разреши министерот за финансии Кристијан Линднер (Либерално-демократската партија, ФДП), што доведе до колапс на неговата коалициска влада составена од СПД, Зелените и ФДП. Со ова се отвори дискусија за можно гласање доверба на владата во Бундестагот и датум за предвремени избори.

Шолц првично најави дека ќе побара гласање за доверба во средината на јануари, што претставниците на демохристијанската опозиција го сметаа за предоцна, барајќи тој да го постави прашањето порано.

Последните анкети спроведени по распадот на коалицијата покажуваат дека Унијата ЦДУ/ЦСУ би освоила најмногу гласови со 32 отсто поддршка, додека Алтернативата за Германија (АфД) би добила 19 отсто од гласовите. СПД во моментов има поддршка од 15 отсто од гласачите, додека Зелените бележат 11 отсто.

The post Предвремените избори во Германија закажани за 23 февруари appeared first on Република.

Германија денеска со повеќе свечености под називот “Да ја сочуваме слободата“ одбележува 35 години од падот на Берлинскиот, во моменти кога во Украина беснее војна и многумина стравуваат дека демократијата е нападната.

Канцеларот Олаф Шолц, чија коалиција драматично се распадна неделава, денеска изјави дека либералните идеали од 1989 година „не се нешто што можеме да го земеме здраво за готово“.

Нашата историја и светот околу нас го покажуваат тоа, рече Шолц, чија трипартиска владејачка коалиција се распадна на денот кога Доналд Трамп беше реизбран за претседател, што доведе до политички превирања и принудувајќи ја Германија на нови избори.

Денот 9 ноември 1989 година се слави како датум кога источногерманската диктатура ги отвори своите граници кон Западот по неколкумесечни мирни масовни протести, отворајќи го патот за повторно обединување на Германија и колапс на советскиот комунизам.

Пензионираната Јута Кругер (75) се сеќава на тие важни настани и ја коментираше политичката криза што се случи во пресрет на годишнината: „Срамота е што вака се совпаѓа“.

Но, сепак треба навистина да го славиме падот на ѕидот, рече таа, поздравувајќи го како момент кога источните Германци можеа да патуваат и „слободата дојде во цела Германија“.

Претседателот Франк-Валтер Штајнмаерденеска ќе отвори настан на „Меморијалот на Берлинскиот ѕид“, во чест на најмалку 140 луѓе убиени при обидот да избегаат од Германската Демократска Република (ГДР) за време на Студената војна.

Вечерва кај Бранденбуршката порта, на патеката на некогашната бетонска бариера која од 1961 година го подели градот, ќе се одржи „журка на слободата“ со музичка и светлосна програма.

Рускиот панк бенд „Пуси Рајот“ утре ќе настапи пред поранешното седиште на источногерманската тајна полиција Штази.

На комеморацијата се поканети продемократски активисти од целиот свет, меѓу кои и белоруската опозициска лидерка Светлана Цихановскаја и иранскиот дисидент Масих Алинеџад.

Говори, перформанси и голема уметничка изложба на отворено ќе го одбележат настанот, кој министерката за култура Клаудија Рот го нарече „еден од најрадосните моменти во светската историја“.

Реплики на плакати од протестите во 1989 година ќе бидат изложени по должината на четири-километарската рута на Берлинскиот ѕид, веднаш до историската зграда на Рајхстагот и познатиот контролна точка Чарли.

The post Германија одбележува 35 години од падот на Берлинскиот ѕид appeared first on Република.

 Германскиот претседател Франк-Валтер Штајнмаер разреши тројца од четворицата министри на партијата Слободни демократи (ФДП) во кабинетот на канцеларот Олаф Шолц по распадот на коалицијата на левиот центар.

Штајнмаер им ги предаде отказите на министерот за финансии Кристијан Линднер, министерот за правда Марко Бушман и министерката за образование Бетина Старк-Ватцингер во неговата официјална резиденција Белви Палас.

Во исто време, советникот за економска политика на Шолц, Јерг Кукиес, го доби своето уверение за назначување за нов министер за финансии.

Единствениот преостанат поранешен политичар на ФДП во Кабинетот е министерот за транспорт Волкер Висинг, кој ја напушти својата партија. Висинг ја задржува функцијата министер за транспорт, a ќе ја извршува и функцијата министер за правда.

Министерството за образование ќе го преземе министерот за земјоделство Џем Оздемир.

The post Германскиот претседател Штајнмаер разреши тројца министри appeared first on Република.

Германската владејачка коалиција од три партии се распадна вечерва, откако канцеларот Олаф Шолц најави дека ќе го разреши министерот за финансии Кристијан Линднер поради постојаните несогласувања околу економските реформи.

Кризните разговори во коалицијата на Социјалдемократската партија на Шолц, Зелените и Слободната демократска партија на Линднер дојдоа до врвот откако ФДП објави документ со барања за либерални економски реформи кои другите две партии тешко ги прифатија.

За време на драматичната средба на лидерите на трите партии денеска, Линднер му рекол на Шолц дека не гледа начин да ја продолжи коалицијата и го повика да го отвори патот за предвремени избори во Германија.

Тоа предизвикало Шолц да објави дека ќе го разреши, изјавија два извори за Политико.

Шолц потенцијално би можел да се обиде да продолжи да владее во малцинска влада, но нема мнозинство да го донесе буџетот, што ја зголемува можноста за гласање недоверба и предвремени избори - потенцијално на почетокот на март, наведува медиумот.

The post Се распаѓа германската коалициска влада appeared first on Република.

30-годишна жена била убиена во Дортмунд, Германија, а насилникот бил македонски државјанин. Како што соопшти Билд ја избодел со месарски нож пред трите малолетни деца. После настанот мажот побегнал и ја оставил жената да крвари во ходникот. Малите деца го пријавиле случајот кај соседите. Децата биле на возраст од 3, 4 и 6 години.

Жената сакала да се раздели од насилниот сопруг и да почне нов живот. Долго време трпела семејно насислтво, а на крајот на октомври се преселила со нејзините три деца во нов стан во Дортмунд.

Сторителот потоа бил фатен на автопат во Вирцбург, а се претпоставува дека тргнал да бега на пат кон Македонија. Моментално е во притвор во Нирнберг, од каде ќе биде префрлен во Дортмунд, соопштуваат германските медиуми.

The post Германија: Македонски државјанин со нож ја убил сопругата пред очите на малолетните деца appeared first on Република.

Во Германија го признаваат неуспехот на „турбо програмата“ за вработување на Украинци избегани од земјата.

Според Сметковната комора, во 2024 година, 40 отсто од украинските бегалци добиле слободни работни места од центрите за вработување по завршувањето на јазичните курсеви, но помалку од еден отсто од нив отишле да работат на нив.

Весникот „Билд“ ги обвинува самите центри за вработување за неуспехот на програмата, што се согласува со искажаните ставови на Украинците, кои повеќето од слободните работни места ги нарекуваат „неприфатливи за себе“.

Во моментов, околу 720.000 граѓани на Украина добиваат бенефиции во Германија, од кои околу 500.000 се работоспособни. Германија троши 539 милиони евра месечно за нивно одржување.

The post Само 1% ја прифатиле понудената работа: Германија го признава неуспехот на „турбо програмата“ за вработување на Украинци appeared first on Република.

Германското федерално јавно обвинителство денеска соопшти дека осуммина осомничени членови на екстремно десничарска терористичка организација се уапсени во источногерманската покраина Саксонија и во Полска.

Како што јави ДПА повикувајќи се на властите, се претресуваат и околу 20 имоти. Претреси се вршат и во Австрија.

Обвинителството ги сомничи обвинетите дека припаѓаат на „Саксонските сепаратисти“, група за која веруваат дека е формирана најдоцна во ноември 2020 година.

Ова е милитантна група составена од 15 до 20 луѓе, чија идеологија се карактеризира со расистички, антисемитски и делумно апокалиптични идеи, се вели во соопштението објавено од канцеларијата на обвинителството.

The post Апсења во Германија и Полска поради осомничени за десничарски екстремизам appeared first on Република.

Во повеќе градови низ Германија се одржуваат штрајкови на работниците од металуршката и електроиндустријата, организирани од синдикатот „ИГ метал“. На протестите учествуваат и работниците на автопроизводителите „Фолксваген“ и „БМВ“.

Според германските медиуми, околу 250 работници на „Фолксваген“ штрајкуваа во Оснабрик, Долна Саксонија, каде што се наоѓа фабриката на Фолксваген која е под закана од затворање.

https://republika.mk/vesti/svet/folksvagen-ke-zatvori-tri-pogoni-vo-germanija/

Во Регенсбург, Баварија, штрајкувачите истакнаа транспаренти со нивните барања пред фабриката на „БМВ“. Демонстрантите планираат да го сторат истото во фабриката на „Ауди“ во блискиот Инголштад.

Исто така, околу 200 вработени во компанијата за батерии Клариос однесоа факели и знамиња на синдикатот на улиците на Хановер во Долна Саксонија. Во истиот регион во градот Хилдесхајм, околу 400 вработени во „Јенсен ГмбХ“, „КСМ Кастингс груп“, „Роберт Бош“, „Вагонбау Граф“ и „ЗФ ЦВ Системс“ Хановер останаа без работа.

The post Штрајкови во Германија на вработените во автомобилската индустрија и големите претпријатија appeared first on Република.