Министерот за финансии, Фатмир Бесими, во емисијата „Економски магазин“ на Алсат ТВ синоќа рече дека за време на пандемиската криза земјата го зголемила долгот за милијарда евра.

Ова министерот го одговори во контекст на најавите дека ќе има даночни реформи во персоналниот данок, данокот на добивка, акцизите и ДДВ.

Ако зборуваме за Ковид, знаеме дека во тоа време не беше важно колку, туку беше важно да најдеш финансирање за да ја одржиш жива економијата. Кога хибернираше целата економија, имавме зголемување од 1 милијарда на јавниот долг. Тоа го направија сите земји во светот. Тоа беа препораки на ММФ, СБ, и тие дадоа нови инструменти, рече Бесими.

Министерот избегна да одговори каков е ефектот од ова задолжување и додаде дека во првата половина од 2022 повеќе од 300 милиони евра биле потрошени за увоз на енергија и енергетски суровини и тоа довело до притисок на буџетот.

Бесими додаде дека во моментов нема притисоци, формални и неформални, за повторно одложување на прогресивниот данок, кој треба да стапи на сила од 1 јануари 2023.

The post Бесими: За време на пандемијата Македонија го зголеми долгот за милијарда евра appeared first on Република.

САД ја поддржува брзата интеграцијата на Македонија во ЕУ, при што, како сојузници во НАТО, двете земји ќе работат на заеднички проекти што се од големо значење за унапредување на соработката. Ова беше заклучено на состанокот на министерот за финансии Фатмир Бесими со вршителот на должност заменик-помошник секретар за Европа и Евроазија Брајан Меколи, советникот на секретарот на Трезорот на САД Брент Ниман и Вилијам Лари Мекдоналд заменик помошник на секретарот за техничка поддршка во Тезорот.

Воедно САД, преку Канцеларијата за техничка помош на Трезорот на САД (ОТА), ќе понуди техничка помош во зајакнувањето на управувањето со јавните финансии, ефикасноста, транспарентноста, отчетноста на јавните финансии, информираат од Министерството за финансии.

Оттаму известуваат дека Бесими на средбата истакнал дека деблокирањето на интегративниот процес позитивно ќе се одрази на севкупната стабилност и на развојот на регионот. Притоа, активниот ангажман на САД по ова прашање би бил од клучно значење.

Воедно се разговараше и за можноста од продлабочување на економската соработка и реализација на нови проекти кои би се реализирале во соработка со УСАИД и со Амбасадата на САД во земјава, велат од министерството.

Двете страни се согласиле дека во моментов клучно е решавањето на енергетската криза и одржувањето ценовна стабилност како клучни фактори за обезбедување макроекономска и финансиска стабилност.

Претходно министерот Бесими, во рамки на Пролетните средби на ММФ и Светска банка, оствари средба и со Габриел Ескобар, заменик-помошникот на државниот секретар на САД за европски и евроазиски прашања и специјален претставник за Западен Балкан.

The post Министерството за финансии ќе соработува со Трезорот на САД во подобрување на ефикасноста, транспарентноста и отчетноста на јавните финансии appeared first on Република.

Продлабочување на економската соработка со Соединетите Американски Држави, економските последици коишто би можеле да настанат како последица од руско-украинската војна, како и реализацијата на инфраструктурни проекти, чија што реализација е клучна за развојот на нашата држава, беа темите на коишто министерот за финансии, Фатмир Бесими дискутираше со амбасадорката на САД, Кејт Мари Брнз.

Воедно, посочуваат од Министерството за финансии, на средбата министерот Бесими информираше и за законот за буџети чие носење од страна на пратениците е од есенцијално значење.

Владата, како и досега, ќе се однесува максимално одговорно и во најдобар интерес за заштита на домашната економија и финансиската состојба на граѓаните. Внимателно го следиме развојот на настаните и развиваме соодветни сценарија за можни исходи, рече Бесими.

Тој, притоа ја информираше амбасадорката за сетот мерки што ќе се реализира во следниот период со цел подобрување на стандардот на населението и конкурентноста на домашната економија.

Министерот Бесими ја изрази својата благодарност до Владата на САД која постојано и дава значајна поддршка на нашата Влада во спроведувањето на активностите насочени кон економски раст и стабилност, како и зајакнување на демократските практики на институциите.

Амбасадорката Брнз ја потврди заложбата за натамошна поддршка од страна на САД како стратешко партнерство и порача дека владеењето на правото и борбата против корупцијата ќе бидат клучни фактори во подобрување на деловната клима и остварување на стратешките цели за побрз, одржлив и инклузивен раст.

Соединетите Американски Државни се еден од најзначајните стратешки партнери на Македонија. Одличните политички релации меѓу двете земји треба да поттикнат и попродлабочена економска соработка во блиска иднина.

Воедно на средбата беше упатена благодарност за поддршката на Македонија, која како НАТО сојузник, се приклучи кон повикот за запирање на воените дејствија во Украина, што овозможува можности за зајакнување на идната соработка со САД.

The post Бесими-Брнз: Можности за продлабочување на економската соработка со САД, како главен стратешки партнер appeared first on Република.