Фануропита е колач кој се приготвува во чест на Свети Фануриј, заштитникот на учениците и студентите. Оваа погача се приготвува често, но задолжително на денот на Свети Фануриј, кога се носи во црква за да биде испеана. Со оваа погача треба да се замисли желба која сакате да ви се исполни.

Во Прилеп за овој празник црквите се преполни со овие погачи кои се прават посни и само од 9 состојки. Под овој рецепт кој содржи квасец, можете да го прочитате и вториот кој се приготвува без квасец, со прашок за печиво.

Потребни состојки: 500 г брашно, вода за замесување, 1 мала чашка крстена вода, 2-3 зрна смелен темјан, 150 г шеќер, 1 свеж квасец, 2-3 лажици масло, 1 мала лажичка, сол и 100 г сусам.

Постапка: Квасецот се растопува во млака вода со малку шеќер и брашно. Од сите состојки се замесува средно меко тесто кое се остава на топло да се одмори и удвои.

Се размесува и се прави погача, со форма по желба, но одозгора мора да се направи крст и да биде украсена по желба. Повторно се остава да стасува, па потоа се пече на 180-200 степени, во зависност од рерната, додека убаво да зарумени.

Погачата Фануропита го добила името по младиот светец Фануриј кој живеел на островот Родос. Се приготвува кога имате некаква потреба, нешто изгубено, или работа, љубов, стан… му се молите на Свети Фануриј, го правите овој колач, а светецот ќе ви ја исполни вашата желба. Ова е народното верување и обичај.

Кратка приказна за Фануропитата: Тоа е прекрасен посен традиционален колач или погача која се приготвува во чест на светецот Фануриј. Неговата мајка била зла жена и кога таа умрела никој не се молел за нејзината душа.

Фануриос, кој бил честито и добро момче, на сите им помагал, а своите услуги не ги наплатувал, туку ги молел луѓето да го молат Господ да и ги прости гревовите на неговата мајка. Во негов спомен и за покој на душата на неговата мајка, жените од островот Родос започнале да го прават овој колач.

“Фанероно” значи да се покаже, да се прикаже нешто, па така останал обичај, кога нешто ќе се изгуби да се направи овој колач за поскоро да се најде изгубениот предмет. Колачот се прави од 7 или 9 состојки.

The post Фануропита се приготвува во чест на Свети Фануриј на 9. 09. од 9 состојки appeared first on Република.