Во Европскиот парламент денеска започнува постапката на сослушување на кандидатите за еврокомесари пред членовите на ресорните парламентарни комитети.

За време на сослушувањата кандидатите за еврокомесари треба да ги убедат европратениците дека имаат доволно квалификации и знаење да раководат се ресорите за кои се номинирани, како и да ги извршуваат должностите како членови на Колеџот на комесари на Европската комисија.

Во првите четири дена од сослушувањата, од денеска до четврток, ќе бидат сослушани 20-те номинирани еврокомесари, а за следниот понеделник (12 ноември) е предвиден „распит“ на петмината кандидати за потпретседатели на Европската комисија и за висока претставничка за надворешна политика и безбедност Каја Калас.

Постапката почнува попладнево (14:30) со сослушување на најдолговечниот член на Еврокомисијата и нејзин актуелен потпретседател за Зелениот план и меѓуинституционални односи, словачкиот дипломат Марош Шефчович, кој сега е кандидат за еврокомесар за трговија, економска безбедност, меѓуинституционални односи и транспарентност. Тој ќе биде сослушуван и треба да биде одобрен од членовите на комитетите за меѓународна трговија (ИНТА) и за уставни прашања (АФЦО). На сослушувањето се поканети и членовите на комитетите за надворешни работи (АФЕТ), за внатрешен пазар и заштита на потрошувачите (ИМЦО), за претставки (ПЕТИ), за развој (ДЕВЕ) и за правни прашања (ЈУРИ), но тие ќе немаат право да одлучуваат за одобрувањето на Шефчович.

Во истиот термин, од членовите на Комитетот за култура и образование (КУЛТ) ќе биде сослушан и Малтежанецот Глен Микалеф, кој е кандидат за еврокомесар за меѓугенерациска правичност, култура, млади и спорт. На неговото сослушување, без право за одлучување за одобрувањето ќе присуствуваат и членовите на комитетите за вработување и социјални работи (ЕМПЛ), за граѓански слободи, правда и внатрешни работи (ЛИБЕ) и на ЈУРИ.

Доцна попладнево (18:30) ќе бидат сослушани и кандидати за еврокомесари за земјоделство и храна, Луксембуржанецот Кристоф Хансен и за одржлив транспорт и туризам, Гркот Апостолос Ѕиѕикостас. Хансен ќе го сослушуваат и одобруваат членовите на Комитетот за земјоделство и рурален развој (АГРИ) во присуство на нивните колеги од комитетите за животна средина, јавно здравство и безбедност на храната (ЕНВИ) и за рибарство (ПЕЦХ). Членови на ЕНВИ ќе присуствуваат и на сослушувањето на Ѕиѕикостас во Комитетот за транспорт и туризам (ТРАН).

Утре во 9:00 треба да започне сослушувањето на кандидатката за еврокомесарка за истражување и иновации, Бугарката Екатерина Захариева пред членовите на Комитетот за индустрија, истражување и енергија (ИТРЕ), во присуство на нивни колеги од КУЛТ.

За во истото време, е закажано и сослушувањето на Ирецот Мајкл Мекграт, кој е кандидат за комесар за демократија, правда и владеење на правото, пред комитетите ЛИБЕ, ИМЦО и ЈУРИ, а на кое ќе присуствуваат и челнови на АФЦО, КУЛТ и на комитетите за буџет (БУДГ), за буџетска контрола (ЦОНТ) и за правата на жените и родова еднаквост (ФЕММ).

За попладне во 14:30 се предвидени сослушувањата на кандидатите за еврокомесари за Медитеранот, Хрватката Дубравка Шуица и за енергија и домување, Данецот Ден Јоргенсен.

Шуица ќе ја сослушуваат членовите на АФЕТ заедно со претставници на ЕМПЛ, ЛИБЕ и на Поткомитетот за човекови права (ДРОИ), додека Јоргесен ќе одговара пред членовите на ИТРЕ и ЕМПЛ, во присуство на нивни колеги од ЕНВИ, ИМЦО и на комитетите за регионален развој (РЕГИ) и за економски и монетарни прашања (ЕЦОН).

Утре за доцниот попладневен термин во 18:30 се планирани сослушувањата на кандидатката за еврокомесарка за животна средина, отпорност на водите и конкурентна циркуларна економија, Јесика Розвол од Шведска пред членовите на ЕНВИ заедно со колегите од ИМЦО, ИТРЕ и АГРИ, како и на кандидатот за внатрешни работи и миграција, Магнус Брунер од Австрија, пред ЛИБЕ во присуство на членови од ДЕВЕ.

В среда во 9:00 ќе почнат сослушувањата на Португалката Марија Луис Албукерке, кандидатка за еврокомесарка за финансиски услуги, штедење и инвестициите, пред членовите на ЕЦОН потпомогнати од колеги од ИМЦО и ЛИБЕ, како и на Белгијката, Хаџа Лабиб, која е номинирана да раководи се ресорот за подготвеност и управување со кризи, пред ДЕВЕ, ФЕММ, ЛИБЕ и ЕНВИ, на кое ќе присуствуваат и претставници на ЕМПЛ и на Поткомитетот за јавно здравство (САНТ).

По ова во 14:30 часот пред членовите на ПЕЦХ во присуство на невини колеги од ЕНВИ на пратеничките прашања ќе одговара кандидатот за еврокомесар за рибарство и океани Кипранецот, Костас Кадис, а пред ДЕВИ заедно со претставници на АФЕТ, ФЕММ, ИНТА и ЛИБЕ ќе биде сослушан, кандидатот за еврокомесар за меѓународни партнерства Чехот, Јозеф Сикела.

За вечерниот термин во 18:30 в среда се закажани сослушувањата на Литванецот Андриус Кубилиус, кандидат за еврокомесар за одбрана и Вселената и на Унгарецот Оливер Вархеји, кој е номиниран за прв човек на ресорот здравство и благосостојба на животните. Кубилиус ќе биде сослушуван од членови на АФЕТ и ИТРЕ во присуство на претставници на ТРАН и на Поткомитетот за безбедност и одбрана (СЕДЕ), а Вархеји пред ЕНВИ и АГРИ заедно со европратеници од ИТРЕ и САНТ.

Кандидатката за еврокомесарка за проширување Словенката Марта Кос ќе биде на сослушување пред членовите на АФЕТ во присуство на претставници на ЛИБЕ, АФЦО и ДРОИ в четврток во 9:00 часот. Во истиот термин на заедничко заседание на ЕНВИ, ИТРЕ и ЕКОН, на кое ќе учествуваат и европратеници од ЕМПЛ, ТРАН и од Поткомитетот за даночни прашања (ФИСЦ), ќе биде сослушан и кандидатот за еврокомесар за клима, нето нула емисии и чист раст, Холанѓанецот Вопке Хукстра.

Истиот ден од 14:30 часот се предвидени сослушувањата на Полјакот Пјотр Серафин, кандидат за еврокомесар за буџет, борба против измамите и јавна администрација, пред БУДГ и ЦОНТ на кое ќе присуствуваат и европратеници од ЛИБЕ и ЈУРИ, како и на Летонецот Валдис Домбровскис, кандидат за еврокомесар за економија, продуктивност, имплементација и поедноставување, пред ЕКОН и ЈУРИ, заедно со членови на БУДГ, АФЦО, ЕМПЛ, ИМЦО и ФИСЦ.

За последниот ден од сослушувањата, 12 ноември, во 9:00 часот пред АФЕТ ќе биде сослушана кандидатката за потпретседателка на ЕК и за висока претставничка на ЕУ за надворешна политика и безбедност, Естонката Каја Калас. На нејзиното сослушување без право да решаваат за одобрувањето се поканети и членови на ДЕВЕ, ИНТА, ФЕММ, СЕДЕ и ДРОИ.

Во истиот термин, е предвиден и за сослушување на кандидатот за извршен потпретседател на ЕК за кохезија и реформи и за еврокомесар за кохезивна политика, регионален развој и градовите, Италијанецот Рафаеле Фито пред РЕГИ во присуство на членови на ТРАН, БУДГ , АГРИ, ЕМПЛ и ЕКОН.

Од 14:30 часот, пак, се предвидени сослушувањата на кандидатите за извршни потпретседатели на ЕК, Романката Роксана Манзату, која треба да биде задолжена за луѓето, вештини и стручно оспособување, а воедно и еврокомесарка за вештини, образование, култура, квалитетни работни места и социјални права и Французинот Стефан Сежурне во чија надлежност би биле просперитетот и индустриска стратегија и воедно би раководел со ресорот индустрија, мали и средни претпријатија и единствен пазар. Манзату ќе биде сослушана од европратениците од ЕМПЛ и КУЛТ во присуство на членови на ФЕМН и ЛИБЕ, а сослушувањето на Сежурне е закажано за заедничкото заседание на ИТРЕ, ИМЦО, ЕНВИ и ЕКОН, на кое се поканети и членови на ИНТА, ЕМПЛ, БУДГ и ЈУРИ.

Последниот термин за сослушувањата, следниот понеделник во 18:30 часот, е резервиран за Шпанката Тереза Рибера Родригез и Финката Хена Виркунен. Рибера Родригез, која е предложена за извршна претседателка на ЕК за чиста, праведна и конкурентна транзиција и за еврокомесарка за конкурентност, ќе биде сослушана од членови на ЕНВИ, ЕКОН и ИТРЕ заедно со европратеници од ИМЦО, ЕМПЛ, ТРАН, РЕГИ и АГРИ. Дел од членовите на ИТРЕ заедно со дел од нивните колеги од ИМЦО во истиот термин ќе ја сослушуваат Виркунен, која е номинирана за извршна потпретседателка на ЕК за технологија, суверенитет, безбедност и демократија и за еврокомесарка за дигитални технологии. На нејзиното сослушување, без право на одлучување, ќе присуствуваат и членови на ЛИБЕ, ЈУРИ, АФЕТ, СЕДЕ и КУЛТ.

По секое сослушување, претседателите и координаторите на групите во комитетите што го покриваат ресорот за кој е номиниран кандидатот треба, без одлагање, да се изјаснат дали го поддржуваат неговиот, односно нејзиниот избор.

Доколку, некој од предложените кандидати не биде одобрен, претседателката на ЕК, Урсула дон дер Лајен е должна на предложи друг кандидати од неговата земја, со цел да се задржи принципот дека секоја од земјите на ЕУ е застапена со по еден член во Комисијата.

Откако ќе заврши постапката за одобрување на сите кандидати за еврокомесари од страна на комитетите, за 21 ноември е закажано заседание на парламентарната Конференција на претседатели, што ја сочинуваат претседателката на Европарламентот, Роберта Мецола и првите луѓе на пратеничките групи, на кое вр основа на заклучоците на комитетите треба да извршат конечна евалуација на номинациите и да го прогласат процесот на сослушување за завршен.

По ова Европарламентот на пленарното заседание, предвидено за од 25 до 28 ноември во Стразбур, ќе треба да гласа за избор на Европската комисија во пакет. За да биде избрана, новата Европска комисија треба да добие мнозинство гласови на пратениците што го дале својот глас.

Доколку Еврокомисијата биде одобрена во Парламентот, таа треба уште формално да биде именувана од Советот на ЕУ, постапка што се очекува да заврши до крајот на ноември, по што од 1 декември би започнал да тече мандатот на новите еврокомесари.

The post Започнува „распитот“ на кандидатите за еврокомесари во Европскиот парламент appeared first on Република.

Новоизбраните европратеници денеска почнаа со работа во Стразбур - прва точка на дневниот ред е изборот на нов претседател на Европскиот парламент. За функцијата има двајца кандидати - актуелната претседателка Роберта Мецола (Европска народна партија) и Ирене Монтеро (Левица).

Во својот говор пред гласањето, Мецола се изјасни за поголема моќ на ЕП, дека ќе се бори против злоупотребите во институцијата и да ја поддржи Украина. „Европа е место на помирување, еднаквост, слобода, демократија, можности, владеење на правото и напредок“, рече таа.

„Европа ни дава можност да сонуваме за иднина со неограничени можности“, додаде Мецола.

Таа посочи дека ЕП треба да го премости јазот помеѓу она што го прави ЕУ и она што луѓето го очекуваат. Мецола вети дека ќе се бори за правото на ЕП на законодавна иницијатива и додаде дека европратениците треба да можат да ги отфрлат законите со кои не се согласуваат.

„ЕП мора да се зајакне, искрено и отворено, инсистираше таа. Нема да бегам од тешки одлуки“, додаде Мецола.

Зошто сите сакаат во Европарламентот? Ова се платите и надоместоците:

https://republika.mk/vesti/svet/i-tie-lapaat-patni-troshotsi-i-dnevnitsi-kolku-zarabotuvaat-evropratenitsite/

Ирене Монтеро зборуваше за мир во Европа и предложи ЕУ да воведе санкции за израелскиот премиер Бенјамин Нетанјаху, како што тоа го направи против рускиот претседател Владимир Путин, кого таа го нарече „злосторник“.

Монтеро рече дека нејзината кандидатура е во одбрана на мирот во Европа и правата на работниците. Според неа, „наметнат е воен консензус“ во ЕУ и војната во Украина е резултат на воените цели на САД.

„Војните секогаш водат до страдање за луѓето, денес многумина не можат да ги покријат своите трошоци, а ограничувањата на буџетските трошоци се враќаат, мирот е најважното нешто за Европа“, додаде таа.

Европа треба да ги поддржи синдикатите и повеќе права за работниците, милитаризирањето на Европа ќе го влоши енергетскиот проблем.

„Сакаме Европа да не биде расистичка, миграциската политика не може да зависи од состојбата на пазарот на трудот“, истакна Монтеро.

Таа инсистираше на тоа дека случаите како „Катаргејт“ - истрага која откри корупција меѓу европратениците во интерес на Мароко и Катар - не треба да се повторуваат.

По говорите на Мецола и Монтеро, почна гласањето, а новиот претседател на ЕП ќе биде објавен подоцна денеска.

The post Ќе земаат баснословни пари – новите европратеници почнаа со работа appeared first on Република.

Сите пратеници во Европскиот парламент имаат иста плата и според податоците од 2023 година таа изнесувала 10.075 евра бруто или 7.854 евра нето по одбивањето на даноци на ЕУ и придонесите за осигурување. Платата на европратениците е дефинирана со Статутот на пратениците во Европскиот парламент, а се пресметува од основната основна плата на судија на Судот на Европската унија, при што надоместокот на европратеникот е 38,5 отсто од таа плата.

Покрај таа плата, европратениците добиваат и други бенефиции, па освен платата од 7.854 евра, можат да заработат и дополнителни неколку илјади евра.

На пример - дневница од 350 евра, што покрива сместување, оброци и поврзани трошоци секој ден за време на службената работа на член на ЕП, а на висината на дневницата влијае и дали гласале. Потоа следуваат патните трошоци за доаѓање на седниците и состаноците на Европскиот парламент во Брисел и Стразбур, а горните граници се поставени до највисоката цена на авионскиот превоз од бизнис класата, билетите за воз од прва класа или 0,58 евра по километар за автомобил (до максимум 1.000 километри).

Пратениците во ЕП исто така, имаат право на враќање до две третини од третмани за лекување. Најконтроверзен е надоместокот за општи трошоци од 4.950 евра месечно, што им овозможува на пратениците да ги покријат трошоците како што се изнајмување канцеларија во земјата-членка во која се избрани или трошоци за ИТ хардвер и софтвер, канцелариски материјали, мобилни телефони/претплати и онлајн претплати. Таа сума оди директно на сметката на европратеникот и трошоците не мора да бидат оправдани, поради што додатокот се смета за контроверзен.

Исто така, предвидена е и такса за крајот на мандатот, односно преоден хонорар во висина од една месечна плата за секоја година во која извршувале функција, но најмногу две години од крајот на мандатот. Кога поранешен европратеник ќе ја преземе функцијата на друго место, износот на преодниот додаток се намалува во зависност од висината на новата плата. Ако европратеник има право на старосна или инвалидска пензија истовремено, не може да добива и пензија и надоместок, туку мора да избере едно или друго.

Во исто време, секој европратеник има право и на месечен буџет од 28.696 евра, од кои се покриваат трошоците како што се платите на персоналните асистенти, но овие пари не им се исплаќаат директно на европратениците, тие не смеат да вработат блиски роднини и асистенти не може да учествува во активности кои би можеле да доведат до конфликт на интереси.

Според овие привилегии, по изборите во 2024 година се очекуваат вкупно 720 пратеници, што е за 15 повеќе од последните избори, а најмногу пратеници ќе имаат Германија (96) и Франција (81). Следуваат Италија (76), Шпанија (61) и Полска (53), Романија (33) и Холандија (31). Белгија (22), Грција (21), Чешка (21), Шведска (21), Португалија (21), Унгарија (21) и Австрија (20) ќе имаат околу 20 европратеници. Помалку од тоа имаат Бугарија (17), Данска (15), Финска (15), Словачка (15) и Ирска (14). Хрватска има 12, а на дното на листата се Литванија (11), Словенија (9), Летонија (9), Естонија (7), Кипар (6), Луксембург (6) и Малта (6).

The post И тие лапаат патни трошоци и дневници: Колку заработуваат европратениците appeared first on Република.

Од 6 до 9 јуни, граѓаните од сите 27 земји-членки на ЕУ ќе изберат нов состав на Европскиот парламент, што заедно со другите институции на ЕУ ќе ја обликува политиката на ЕУ во следните пет години.

Гласањето за ЕП, единствената институција на ЕУ директно избрана од граѓаните, во Холандија почнува на 6 јуни, неколку земји ќе гласаат на 7 и 8 јуни, а во повеќето земји избори ќе се организираат в недела, на 9 јуни, кога треба да се познати и резултатите од гласањето.

Годинава се избираат 720 пратеници, 15 повеќе од претходните избори во 2019 година.

Бројот на пратеници од секоја земја во ЕП зависи од нејзиното население, па така Германија ќе има 96 пратеници, Франција 81, Италија 76, Шпанија 61 и Полска 53, додека Кипар, Луксембург и Малта ќе имаат најмалку по шест пратеници.

Националните политички партии учествуваат на изборите, но кога се избираат европратениците, повеќето одлучуваат да станат дел од транснационални политички групи, од кои моментално има седум: Европска народна партија (ЕПП), Прогресивна алијанса на социјалистите и демократите (С/Д), Обнови ја Европа , Европски конзервативци и реформисти (ЕЦР), Идентитет и демократија (ИД), Зелено-европска алијанса за слобода и Европска обединета левица-Нордиска зелена левица.

Покрај нив, има пратеници и партии кои не се поврзани со ниту една голема политичка групација.

Од почетокот на годината, бројни анкети укажуваат дека ИД како политичка групација на десничарски и екстремно десничарски партии, на кои припаѓаат Националното собрание на Марин Ле Пен и Лигата на Матео Салвини, како и ЕЦР, во која доминантната партија на италијанската премиерка Џорџа Мелони, полскиот Право и правда и шпанскиот Вокс би можеле значително да го зголемат бројот на пратенички места и да се „искачат“ од шесто и петто на четврто и трето место во ЕП.

Иако традиционално двете најголеми политички групи во централно-десниот и левиот центар ЕП - Европската народна партија (ЕПП) и Прогресивната алијанса на социјалистите и демократите (С&Д) - се очекува да освојат најмногу гласови и да останат на првото и второто место, најверојатно ќе имаат помалку пратеници во новото свикување на Европскиот парламент.

Најголеми загуби, според проекциите, ќе претрпи либералната група „Обнови ја Европа“, во која членуваат и партијата Преродба на францускиот претседател Емануел Макрон, како и Зелените.

Во ЕУ расте тензијата за тоа кои сојузи или коалиции планираат да формираат политички групи по изборите, што беше поттикнато од претседателката на Европската комисија и кандидат на ЕПП за новиот мандат, Урсула фон дер Лајен, откако таа не ја отфрли можноста за соработка со ЕЦР.

Покрај тоа, нејзината ЕПП одби да ја потпише декларацијата на лидерите на социјалистите и демократите, Обнови ја Европа, Зелените и левицата, која повикува на отфрлање на соработката со екстремно десничарските и радикалните партии. Европските партии од левиот центар ја предупредија Фон дер Лајен дека нема да ја поддржат нејзината кандидатура за втор мандат, доколку тоа значи поддршка на екстремно десничарските партии, вклучително и партијата на Џорџа Мелони.

Од другата страна, лидерката на француската крајна десница Национален митинг Марин Ле Пен и предложи на Мелони да ги здружат силите во новото ЕП откако ИД неодамна ја исфрли Алтернативата за Германија (АфД) како водечки кандидат на АфД за европските избори. Исто така, постојат шпекулации дека Фидес на унгарскиот премиер Виктор Орбан би можел да се приклучи на ЕЦР.

Европскиот парламент, како единствена институција на ЕУ директно избрана од гласачите од сите 27 земји, ги поврзува граѓаните со извршната власт на ЕУ - Европската комисија и Советот на ЕУ, составена од министри од владите на ЕУ.

Европскиот парламент и Советот на ЕУ, како две законодавни тела на ЕУ, ги делат овластувањата за усвојување и измена на законите и одлучување за буџетот на ЕУ. Пратениците исто така ја надгледуваат работата на Европската комисија и другите тела на ЕУ и соработуваат со националните парламенти на земјите-членки на ЕУ.

Иако ЕП е единствената демократски избрана институција на ЕУ, граѓаните со гласањето на изборите индиректно влијаат врз составот на другите тела на ЕУ.

Така, една од првите задачи на членовите на ЕП, по изборот на претседателот на ЕП на првата пленарна седница, ќе биде да изберат нов претседател на Европската комисија, кој ќе го назначат земјите-членки.

ЕП, исто така, одобрува 27 комесари, по еден од секоја земја-членка на ЕУ, кои ќе ја предводат ЕУ во следните пет години, како и високиот претставник на ЕУ за надворешни работи и безбедносна политика.

Изборот на претседател на ИК се врши според процес во кој европските политички партии пред изборите предлагаат водечки кандидати за таа позиција. Граѓаните на ЕУ можат да поддржат конкретен кандидат со гласање за одредена партија.

Најголемата политичка група по изборите има најголем мандат да предложи кандидат за претседател на ЕК, кој по изборите го избира ЕП со апсолутно мнозинство, на предлог на земјите-членки.

Доколку кандидатот не добие доволно гласови, земјите-членки на ЕУ мора да предложат друг кандидат.

Европските политички партии не се обврзани да предложат водечки кандидат за лидер на ЕК, а можат да предложат и неколку кандидати, што некои го направија, додека ЕЦР и ИД одлучија да не предложат свои кандидати.

ЕПП ја предложи актуелната претседателка на Европската комисија, Урсула фон дер Лајен за водечки кандидат, Николас Шмит е кандидат на Партијата на европските социјалисти, додека „Обнови Европа“ сега предложи тројца кандидати - Валери Хејер, Сандра Гозија и Мари-Агнес Штрак Цимернам.

Валтер Баер е кандидат на Партијата на европската левица, Бас Екаут и Тери Рајнке се кандидатите на Европската зелена партија, Раул Ромева и Мејлис Розберг беа предложени од Европската слободна алијанса, Валерија Гилецки од Европското христијанско политичко движење.

The post Од четврток почнуваат изборите за европарламентарци appeared first on Република.

Граѓаните на земјите од Европската унија од 6 до 9 јули излегуваат на гласање за да изберат претставници во Европскиот парламент, но според изборните правила што многу се разликуваат од земја до земја - на некои места изборниот праг е 5 отсто, а во други нема, додека во некои земји можат да гласаат дури и 16-годишници.

Во повеќето европски земји изборите се одржуваат на 9 јули, но тие почнуваат на 6 јули кога се одржуваат во Холандија.

Ден подоцна Ирците и Чесите излегуваат на гласање, додека на 8 јуни избори за Европскиот парламент се одржуваат во Летонија, Малта, Словачка и Италија. Во две земји изборите се одржуваат во текот на два дена - Чешка и Италија.

Во новото свикување, Европскиот парламент нема да ги има досегашните 705, туку 720 пратеници.

Минималниот број на европретставници по земја е шест. Најмалите европски земји - Малта, Кипар и Луксембург - имаат толку европратеници. Германија има најмногу европратеници, 96.

Граѓаните на 14 земји од ЕУ можат, доколку живеат во странство, да гласаат по пошта.

Хрватска е меѓу осумте земји чии граѓани своето право на глас можат да го остварат само со гласање во дипломатските претставништва на земјата. Во четири земји (Чешка, Ирска, Малта и Словачка) нема можност за гласање надвор од државата, додека само една (Естонија) има можност за електронско гласање.

Гласањето на изборите за Европскиот парламент е задолжително во Белгија, Бугарија, Луксембург и Грција.

Во повеќето земји, вклучително и во Хрватска, на изборите за Европскиот парламент има само една изборна единица. Исклучок во овој поглед се Белгија, Ирска, Италија и Полска.

Изборен праг од пет проценти постои во девет земји. Сепак, повеќето земји, поточно 13 од нив, немаат одреден изборен праг. Изборниот праг е четири отсто во Италија, Австрија и Шведска, три отсто во Грција и 1,8 отсто во Кипар.

Возраста за гласање е иста како и полнолетството во повеќето земји-членки. Во Грција може да гласаат и седумнаесетгодишници, додека во Белгија, Германија, Малта и Австрија може да гласаат со наполнети 16 години.

Минималната возраст на кандидатите на изборите варира од 18 до 25 години. Во 15 држави минималната возраст на кандидатите е 18 години.

Три години постар од минималната возраст е правило во дури девет земји, додека во Романија кандидатот мора да има најмалку 23 години, а во Грција и Италија 25 години.

The post Во јули граѓаните на ЕУ ќе ги бираат новите европратеници appeared first on Република.

Воз со членови на Европскиот парламент (ЕП) и нивните тимови, непланирано отпатува кон „Дизниленд“ паркот во Париз, поради грешка во сигнализацијата, соопшти Француската национална железничка компанија.

Европратениците патувале од Брисел, Белгија, до Стразбур, Франција, заради Пленарната седница закажана за во понеделникот... И, во еден миг се нашле меѓу хотелот „Арт оф Марвел“ и „Мејн стрит УСА“ во забавниот парк. Возот, според надлежните, бил пренасочен кон Париз поради грешка во комуникацијата во станицата „Роаси-Шарл де Гол“.

Европратениците се пошегуваа за настанот на социјалните мрежи.

Холандската европратеничка Самира Рафаела објави фотографија од себе и својот колега Мохамед Чахим, во кафе-вагонот на возот. Коментарот до сликата гласи: „Тим Дизниленд“.

Германскиот пратеник Даниел Фројнд, пак, појасни дека тоа не било собранието на Мики Маус.

The post Европратеници залутаа во „Дизниленд“ appeared first on Република.

Европскиот парламент денеска со 234 гласа „за“, 175 „против“ и 122 „воздржани“ усвои Извештај со кој се бара преземање мерки од страна на ЕУ за справување со последиците од проституцијата, со кои меѓу другото се предлага и кривично гонење на корисниците на сексуални услуги.

Во Извештајот се посочува дека проституцијата има влијание врз родовата еднаквост и правата на жените, како и дека асиметријата помеѓу националните правила за проституција во ЕУ води до зголемен број на жртви на трговија со луѓе за сексуална експлоатација и создава плодна почва за организиран криминал.

- Земјите членки треба да го преоценат постојното законодавство за да се избегнат какви било пропусти што би им дозволиле на криминалците да дејствуваат неказнето, додека Комисијата треба да развие заеднички насоки на ЕУ кои ќе ги гарантираат основните права на луѓето вклучени во проституцијата, се наведува во Извештајот.

Во документот се додава и дека проституцијата и сексуалната експлоатација постојат затоа што има побарувачка за нив, па затоа „намалувањето на побарувачката е клучно за спречување и намалување на трговијата со луѓе и тоа мора да се направи на начин што нема да им се наштети на оние кои се занимаваат со проституција“.

Со извештајот се бара преземање мерки и против рекламите на интернет што директно или индиректно поттикнуваат проституција и соработка на полицијата и другите агенции за спроведување на законот со социјалните и медицинските служби и невладините организации во справување со трговијата со луѓе и сексуалната експлоатација и во заштита на жените вклучени во проституцијата.

- Лицата кои се занимаваат со проституција се соочуваат со постојана закана од полициски и судски прогон и се маргинализирани и стигматизирани, што често ја попречува нивната намера да бараат правда, се додава во извештајот, во кој се апелира за овозможување на нивни целосен пристап до висококвалитетни здравствени и социјални услуги и до правосудниот систем.

Но, предлогот за кривично гонење на корисниците на сексуални услуги не наиде на подршка на сексуалните работници и организациите што поддржуваат целосна декриминализација на проституцијата, кои апелираа до европратениците да го отфрлат Извештајот. Според нив, идејата за гонење на корисниците на сексуални услуги не ги штити правата на жените и другите ангажирани во сексуалната работа.

Тие оценуваат дека Извештајот е „пристрасен и штетен“ и бараат да се усвои „пристап заснован на почитување на човековите права“, со кој би се декриминализирале сите аспекти на сексуалната работа.

Според нив, гонењето на корисниците на сексуални услуги ќе ја поттикне илегалната проституција и ќе придонесе за помала безбедност за сексуалните работници.

Европарламентот на денешното продолжение на овонеделната септемвриска сесија со 366 гласови „за“, 186 „против“ и 18 „воздржани“ даде зелено светло за старт на преговорите со Советот на ЕУ за реформа на пазарот на електрична енергија во Унијата, чија примарна цел е заштитата на потрошувачите од нестабилните цени на струјата.

The post Европратениците предлагаат кривично гонење на корисниците на сексуални услуги appeared first on Република.

Полека но сигурно, вистината испливува на површина! Иако декларативно и постојано нè убедуваат дека македонскиот јазик е „заштитен“, конечно гледаме дека тоа не е вистина, предупредува пратеникот Никола Мицевски, додавајќи дека очигледно, само Владата на Република Македонија не ја гледа или не сака да ја види бугарската негаторска и асимилаторска политика кон Македонија, македонскиот народ и македонскиот јазик.

Последниот доказ за тоа, посочува тој, е заедничкиот став на бугарските европратеници. Без разлика од која политичка опција доаѓаат, тие бараат БРИШЕЊЕ НА МАКЕДОНСКИОТ ЈАЗИК.

Ова повеќе не се само желби искажани напразно, ова е веќе официјална политика на Бугарија кон Македонија, која што во текот на вчерашниот ден, уште еднаш се потврди преку амандмани на Мешовитиот парламентарен комитет во Стразбур, поднесени од страна на бугарските европратеници каде побараа бришење на македонскиот јазик.

 

Како едни од подносителите на овие амандмани се вбројуваат и Сергеј Станишев, претседател на Групата на социјал-демократи во Европскиот парламент и поранешен премиер на Бугарија, како и од Александар Јорданов, од Сојузот на демократски сили и поранешен амбасадор во Македонија.

 

Значи, без разлика на која политичка опција припаѓаат бугарските претставници и државници, бугарската политика и дипломатија кон македонското прашање не се менува. За жал, тоа не е случај и кај нас, објавува Мицевски.

Токму затоа, вели тој, уште еднаш јасно и гласно кажувам дека решението не е во ова што ни се нуди и упорно ни се сервира како опција која што треба и мора да ја прифатиме.

Ве уверувам дека ова нема да биде последната уцена и вето кон Македонија од страна на бугарската страна, бидејќи токму штетниот Договор за добрососедство потпишан од страна на македонската влада го дозволува тоа.

 

Оттука, повторно сакам да упатам силна порака дека уставни измени нема да има се додека не се укине и измени уценувачкиот и асимилаторскиот Договор за добрососедство, кој што за волја на вистината е извор на сите неправди, уцени, негации и омаловажувања на македонскиот народ.

 

Ова е мојот став и ставот на ВМРО-ДПМНЕ од кој нема отстапување и нема попуштање.

 

Сакале или не, ова мора да го разберат и прифатат и претставниците од македонската и претставниците од бугарската Влада, порача Мицевски.

The post Бугарски европратеници побараа бришење на македонскиот јазик во Стразбур appeared first on Република.