На 18 септември 2024 година во салата за промоции на Оштина Новаци, се организира промоција на книгата „Авторските неологизми во поезијата на Весна Мундишевска-Велјановска“ чиј автор е м-р Елизабета Јончиќ. Издавач на оваа книга со книжевно научни-согледби од областа на морфологијата и зборообрзувањето е Македонското научно друштво Битола.

Рецензенти на книгата се: проф. д-р Виолета Јанушева, проф. д-р Весна Мојсова-Чепишевска и Гордана Јовиќ-Стојковска. Дизајнот на корицата е на Весна Мундишевска-Велјановска, а модератор на промоцијата е Милица Димитријовска-Радевска.

Во книгата „Авторските неологизми во поезијата на Весна Мундишевска-Велјановска“ авторката Елизабета Јончиќ навлегува во не многу истражувано поле на јазикот – неологизмите. Во овој научен труд, низ исцрпна и подробна анализа, авторката ги обработува зборовите што отстапуваат по форма од зборовите во општа употреба односно авторските неологизми, во поетските збирки: „КонтинуУМ“ , „ДвОглед“, „Птицоврик“ , „Вибрации на духот“ и „Срцевина“ од писателката Весна Мундишевска-Велјановска. Елизабета Јончиќ не само што го забележува сликовитиот и конструктивен начин при изразувањето на поетесата, туку и ја вреднува вештината на творење на новите зборови не занемарувајќи ги притоа и другите обележја на јазичните средства почнувајќи од рамништето на морфологијата, продолжувајќи во рамниште на зборообразувањето и лексикологијата. Во оваа книга се забележува дека е работено исцрпно и систематски, со земање предвид на сите можности на зборообразување. Според тоа на виделина имаме еден значаен научен труд што измогнува сили за нови сознанија во јазикот и во неговите безгранични простори и можности“, вели проф. д-р Виолета Јанушева.

Во петте поетски книги на Мундишевска-Велјановска, авторката Јончиќ евидентира четириесет и три неологизми, коишто ќе ги анализира според морфолошките карактеристики и категориите втемелени врз начелата за зборообразовните постапки (елементи) понудени од Б. Конески, Л. Минова-Ѓуркова, В. Јанушева, Д. Пандев и други македонски книжевни истражувачи, но и со поткрепа на светската лингвистичка и книжевна елита, истражувачи што му посветиле сериозен пристап на овој феномен, толку чест и присутен во нашето секојдневеење пред сѐ во смисла на ширење на јазикот, надвор од линиите на основната потреба да се именуваат нештата. Овие зборообразовни постапки рапидно се појавуваат во чекор со цивилизацискиот растеж, од нештата што произлегуваат од основната потреба да се вклопиме во модерното време и да ги објасниме дејствијата, но и за нас најважното, да ги уловиме, да ги начекаме, па да ги зборообразуваме нашите чувства, нашата мисла. Што во нашиот свет се претвора во бркање збор, односно во нашата авторска игра да создадеме збор, зашто не постои сериозен автор што не трага по вистинскиот, по чудоносниот збор, збор кој ќе го етаблира како сопствена муза“, вели Гордана Јовиќ-Стојковска.

Елизабета Јончиќ во книгата „Авторските неологизми во поезијата на Весна Мундишевска-Велјановска“ исто така се фокусира и на деконструкција на јазичните структури и начинот на кој поетесата ги користи истите за да создаде нови значења, како ги „прекршува и обликува“ правилата на зборосоздавањето за да изгради нови форми на изразување кои се истовремено и познати и непознати/нови за читателот. Понатаму укажува за начинот на кој неологизмите ги отвораат границите на јазикот, го прошируваат стилскиот и лексичкиот фонд, наспроти „пречките“ што на некој начин го ограничуваат истиот“, вели проф. д-р Весна Мојсова-Чепишевска.

Елизабета Јончиќ е македонска поетеса, книжевен критичар, член е на Друштвото на писателите на Македонија, на Македонското научно друштво – Битола , и на Битолскиот книжевен круг каде во еден мандат била и негов претседател. Магистер е на наставата по Македонски јазик и книжевност. Автор е на пет збирки поезија, три книги со книжевни критики и уредник на петнаесетина книги поезија, проза, книжевна критика и литература за деца.

The post Промоција на книгата „Авторските неологизми во поезијата на Весна Мундишевска-Велјановска“ appeared first on Република.