Во полната киносала во „Фросина“ во Младинскиот културен центар (МКЦ) вчера се одржа првата сесија од конференцијата Edu Cuts Talks во рамките на 12. „Џифони Македонија“. На разговорот претходеше проекција на филмот „Моне“ од средношколецот Јон Будина од Албанија. Тој е првиот млад режисер кој доби поддршка за снимање краток филм, во рамките на мрежата Edu Cuts, која ги поддржува младите од Западен Балкан. Јон го сними својот дебитантски филм во текот на јули, со него конкурирше и веќе епримен на студии по филмска режија во Романија.

На конференцијата Edu Cuts Talks зборуваа директорот на „Џифони Македонија“, Дарко Башески и претставници на мрежата од неколку земји од регионот – Слаѓана Петровиќ-Варагиќ од Србија, Мирза Ќустовиќ од Босна и Херцеговина и Енес Лекиќи од Косово.

Башески рече дека фестивалот постои заради младите луѓе што сакаат филмови и сакаат да растат и да се развиваат во оваа уметност. Сите може да се вклучат во работилниците или да дојдат во „Џифони Македонија“ каде може да добијат посериозна опрема за да снимаат филм, поткаст или други содржини.

Тука сме и можеме заедно да растеме. Најважно од сè е да не се откажувате. Заследувајте фестивали на интернет, аплицирајте на проекти. И да ве одбијат, не се откажувајте. Бидете упорни, рече Башески.

Ќустовиќ ја нагласи позитивната страна на вмрежувањето. Филмот е колективна уметност и ни помага да пораснеме како луѓе. А фестивалите се место каде младите луѓе може да се запознаат, да се вмрежат, да се развиваат и да научат да бидат професионалци.

Петровиќ-Варагиќ била на фестивалот лани, а годинава се враќа како партнер во проектот Edu Cuts. Таа долго време работи во оваа дејност, но откако почнале да се вмрежуваат со фестивали од регионот и од светот, имаат значителен пораст. Летово во Ужице тие организираа работилница за документарен филм за 24 тинејџери од седум земји.

Во Приштина минатиот месец се одржаа уште две работилници на кои учествуваа млади од Македонија и од Косово кои правеа кратки филмови. На Edu Cuts работилницата за студенти „Кино Кабаре“ учесниците направија 3 кратки филмови. Лекиќи нагласи дека на Балканот тешко се снимаат филмови и затоа копродукции се неопходни. На работилницата Creative YEES која се одржа во неговото Финско школо на Косово учествуваа дваесетина средношколци од училиштето кои заедно со четирите учесници од Скопје во тек на 5 ден создаваа кратки филмоци и подкасти.

Публиката со овации го поздрави јутјуберот Иван Ајнштајн, кој снима филмови, музички видеа. Тој раскажа како почнал да снима, уште како дете. Вели дека сака да работи спонтано, зашто во видеата сака да внесе поинаква енергија. Според него креативниот процес секогаш почнува со некаква искра, да замислиш и да визуелизираш дека нешто може да влијание на луѓето. Тој сака да ја споделува својата уметност. Младите во публиката се интересираа како почнал да заработува и како јутјуберството му станало работа со полно работно време.

Ако сакате да заработите од тоа, треба да се потрудите. Во мојот случај заработката не ми беше мотив. Ме контактираа луѓе што сакаа да соработуваат со мене – рече тој.

Денеска е вториот работен ден за учесниците. На програмата кај сениори во 13 часот ќе биде добитникот на „Златна палма“ на Кан годинава, словенечкиот филм „Човекот што не можеше да молчи“, а ќе следува холандско-белгискиот филм „Летен брат“. Денеска на програмата Edu Cuts Talks ќе биде гостинката од Ирска, Грета Торнтон, која ќе го промовира својот краток филм „Горчливо слатко“ (Bittersweet). Грета му се враќа на Џифони по втор пат, годинава и во улога на волонтер на фестивалот.

Денес на програмата кај кадетите е македонскиот филм „М“ на режисерот Вардан Тозија, кој ќе се дружи со џифонци во Младинскиот културен центар од 12.30 часот. “Во програмата за сениорите филмот „Кога е… пролет е во воздухот“ во режија на Данијаел Сугавара од Полска.

Најмладите, односно јуниорите во Кинотеката ќе го проследат германскиот филм „Победници“.

The post „Џифони Македонија“: Промоција на CinEd – Европска филмска едукативна програма и на групата млади филмски ентузијасти appeared first on Република.

Норвешкиот „Кралицата на танцот“ во режија на Аурора Госе за јуниорите, францускиот „Фантастичната тројка“ на Михаел Дихтер за кадетите и македонскиот „Сестри“ на Дина Дума за сениорите се најдобрите играни филмови за кои гласаше жирито на 11. Филмскиот фестивал за млади „Џифони Македонија“. Наградите беа соопштени синоќа на затворањето на фестивалот во преполната сала на скопското кино „Милениум“.

Најдобри кратки филмови според возрасни категории беа - „Магијата на Валентина“ на Ан Кристин Жирардо од Холандија (јуниори), „Марипоза“ на Маурицио Форчела од Италија (јуниори) и „Врати се дома безбедно“ на Тамара Дениќ од Германија (сениори).

Во категоријата на анимирани филмови за најдобар филм е прогласен „Ана Морфоз“ во режија на Жоао Родригез од Португалија, а најдобар краток филм снимен од ученик е „Средба“ во режија на Анастасија Петровиќ од Србија.

Младите џифонци од земјава и од странство низ танц, музика, филм, анимации, стрип, фотографии покажаа што научиле во изминатите пет фестивалски дена. Низ работилниците ги водеа врвни професионалци: Роберт Јанкулоски (фотографија), Ладислав Цветковски и Линда Трајкоска (дигитален дизајн), Мартин Чичовски (видео репортажа), Здравко Гиров и Давор Драмиќанин (стрип), Кирил Каракаш и Светислав Подлешанов (видео во еден кадар) и Филип Лафазановски (едноминутно видео) кои работеа со кадетите и сениорите. Работилниците за јуниори ги водеа: Моника Мотеска (ликовна уметност), Лада Шоптрајанова-Петровска (мјузикл) и Предраг Вукосављевиќ (краток филм).

Со громогласен аплауз младите џифонци го поздравија настапот на јуниорите од работилница за мјузикл, кои ја изведоа песната This is me од мјузиклот „Најголемиот шоумен“. Следуваа проекции од сите изработени филмови, цртежи, графички работилници, стрипови, фотографии.

Присутните ги поздрави Марио Де Роза, заменик амбасадор на Италија во нашата земја и самиот поранешен џифонец. Тој ги соопшти наградите ЕПИК (EPYC – Enhancing Peace through Youth Creativity). Овој проект е новина на фестивалот и преку креативноста на младите го промовира мирот, а е поддржан од италијанското Министерство за надворешни работи и меѓународна соработка. Во оваа категорија беа доделени три награди во категоријата краток филм: за млад автор, за автор од Балканот и награда за најдобар ЕПИК филм.

ЕПИК наградата за најдобар филм од млад автор ја доби американскиот „Смрт во Нормандија“ на 13-годишниот Лео Кан, Дамир Мехиќ од Босна и Херцеговина ја доби ЕПИК наградата за автор од Балканот за филмот Going Diaspora, а за најдобар ЕПИК филм е прогласен „Светла“ во режија на Јитка Немикинсова од Чешка.

Традиционално беа објавени имињата на дел од џифонците од нашата земја кои ќе нè претставуваат на „Џифони Италија“ идната година. Михаела Душански, Максим Јосевски, Срна Ѓорѓиевска и Вања Марковиќ беа избрани меѓу најактивните учесници на ова издание според традиционалните критериуми. Оваа година беше воведена и една новина: во вид на „лотарија“ беше извлечено едно име од сите оние што годинава биле домаќини на учесник од странство, а најмногу среќа имаше Билјана Савиќ. Останатите претставници за гостување на фестивалот во Италија и на другите партнерски фестивали ќе бидат избрани во следните месеци.

The post „Кралицата на танцот“, „Фантастичната тројка“ и „Сестри“ – најдобри филмови според жирито на 11. „Џифони Македонија“ appeared first on Република.

Богата програма со проекции на филмови и дискусии ги очекува учесниците на 11. „Џифони Македонија“ на претпоследниот ден на фестивалот. Денес на „Џифони Македонија“ сениорите ќе го гледаат „Утре, некаде, покрај морето“, кај кадетите е на програмата српскиот филм „Мрак“ во копродукција со Данска, Бугарија, Грција и Италија, а на дискусијата по проекцијата ќе гостува актерката Илона Милов. Јуниорите во Кинотеката ќе го гледаат рускиот филм „Таму и назад“, по што ќе имаат можност да разговараат со режисерот на филмот Олег Асадулин.

Во 15.45 часот во киното „Фросина“ ќе следи втората ЕПИК панел дискусија, на тема „Иновативна едукација: Предавање вредности преку филм и креативност“. Ќе бидат разменети искуства за иновативни едукативни модели и потенцијалот на филмот и уметностите во процесот на пренесувањето на вредностите“. Џифонци ќе можат да ја проследат проекција на краткиот филм „Животот на една даска“ на младата Леона Јариќ, по што ќе следува разговор со авторката. Во 18 часот ќе следува проекција на докудрамата „Учениците од Умберто Примо“, грчко-италијанска копродукција во режија на Алесандра Мајолети. Филмот зборува за нераскажаните приказни на девет еврејски ученици што учеле во италијанското училиште „Умберто Примо“ во Солун за време на нацистичката окупација и е базиран на архивски материјал откриен во 2003 година од италијански професор и сведочења на преживеаните протагонисти. Попладневните проекции се од отворен карактер.

Како да се распознаат лажните вести, кому да веруваме на интернет, како да ги заштитиме сопствените лични податоци, беа само дел од темите што на вчерашниот ден ги отворија Мери Јордановска, заменик-уредничка на Мета.мк и Деспина Ковачевска, медиа мониторинг специјалист од фондацијата „Метаморфозис“.

Штетите од лажните вести и од дезинформациите можат да го загрозат човековото здравје, ако на пример купувате медицински продукти кои лажно се претставуваат на интернет како да се одобрени од стручни медицински лица, можат да ви ги испразнат вашите или картичките на вашите родители, доколку вршите уплата на сомнителни веб-страници каде што се бараат вашите лични податоци. Дезинформациите можат да ја сменат вашата перцепција во однос на општествените и политичките случувања и да ви јават сомнежи во однос на научните и медицинските наоди“, им посочија говорничките на средношколците.

Големо внимание вчера предизвика светската премиера на краткиот филм „Јан“ на младиот босански режисер Кенан Мусиќ. Многу прашања и импресии од филмот споделија средношколците со режисерот Мусиќ и дел од авторската и актерската екипа. Џифонци имаа ексклузивна прилика првида го видат филмот што ја отвора темата на справување со предрасудите и борба за лична слобода на младите луѓе. „Ејџ-Би-О Макс“ веќе го откупи филмот за прикажување, а паралалено се снима и ТВ-серија со седум епизоди.

Вчера Џифонци го одгледаа и вториот блок кратки филмови од млади автори, кои се натпреваруваат за една од трите награди за најдобар ЕПИК краток филм.

The post ЕПИК-разговори на „Џифони“ за иновативните модели за учење преку филм, гостување на режисерот Олег Асадулин, проекција на докудрама appeared first on Република.

Единаесеттото издание на Филмскиот фестивал за млади „Џифоини Македонија“, ќе биде отворено вечерва во 19 часот во киното „Милениум“ во Скопје, со проекција на филмот „Вратената“ (L'Arminuta) во режија на Џузепе Бонито. Проекцијата е од отворен карактер и не е наменета само за учесниците на фестивалот.

„Вратената“ е снимен според истоимениот роман на Донатела ди Пјерантонио. Улогите ги толкуваат: Аурора Барули, Карлота де Леонардис, Фабрицио Феракане, Андреа Фуорто и други. Филмот во 2022 година ја добил наградата за најдобро адаптирано сценарио на италијанските филмски награди „Давид ди Донатело“.
На отворањето ќе се обрати амбасадорот на Италија во Скопје, Н.Е. Андреа Силвестри.
Повеќе од 550 учесници од девет земји од денеска ќе бидат дел од 11. издание на „Џифони Македонија“. На добро познатите локации – Младинскиот културен центар, Кинотеката на Македонија и киното „Милениум“ до 10 октомври џифонци ќе гледаат филмови, ќе дискутираат, ќе учествуваат на креативни работилници. Утрово јуниорите, односно основците го започнаа својот прв ден во Кинотеката, а средношколците ќе ја започнат својата програма утре во Младинскиот културен центар.

Годинава, освен од нашата земја, на фестивалот се очекуваат 40 учесници од: Италија, Србија, Косово, Босна, Грција, Бугарија, Романија и од Франција.
Петнаесет долгометражни филмови во официјална конкуренција поместени во три категории, односно кадети (6 до 9 одделение), јуниори (I и II средно) и сениори (III и IV). Ќе проследат 35 краткометражни и анимирани филмови.

Годинава имаме 40-ина учесници од странство. Ние би сакале тој број да биде и поголем и се обидуваме да ги поттикнеме семејствата од Македонија да ги отворат своите домови за децата од странство. Не е секогаш едноставно, зашто не секој имал такво искуство. Годинава прв пат тоа го правиме и со основците и можам да кажам дека изненадувачки е колку имавме убав одек при повикот. Родителите на основците беа одушевени од можноста и се надевам дека наредните години ќе можеме тој број и да го дуплираме. Учесници и од далечни земји, како Бразил и Индија сакаат да дојдат кај нас, слушнале за „Џифони Македонија“, имаме многу побарувања од странски фестивали да дојдат кај нас, но мораме прво да имаме доволно семејства. Ова нека биде и апел за семејствата кои годинава се двоумеле, но в година да се осмелат и да примат дете во својот дом – истакна Деа Крстевска-Тамборини.

Ние сакаме да пречекаме што е можно повеќе учесници, меѓутоа и киносалите ни се со ограничен капацитет, истакна Дарко Башески, директор на фестивалот.

Како здружение, повремено организираме и други проекти. „Џифони патува“ веќе помина 25 општини, а за жал, годинава тој проект не беше поддржан. Имавме уште една активност што ја почнавме минатата година, „Џифони филмски денови“, со идеја да ги вратиме децата во киносалите, по паузата за време на пандемијата. Одржавме такви 10 настани. Сакам да напоменам дека сите активности што ги организира нашето здружение се комплетно бесплатни за сите млади. Сите се добредојдени да уживаат – истакна Башески.

Од филмовите што ќе бидат прикажани во рамките на фестивалот, учесниците ќе можат да се запознаат и да учествуваат на дискусиите со режисерката Дина Дума (кај сениорите), рускиот режисер Олег Асадулин (кај јуниорите) и српската актерка Миона Илов (кај кадетите).
Ќе бидат реализирани девет работилници - 3 за јуниори и 6 за кадети и сениори.

Програмата на фестивалот годинава е збогатена со нов сегмент наречен ЕПИК (EPYC – Enhancing Peace through Youth Creativity). Станува збор за проектот за промоција на мирот преку креативност кај младите (EPYC – Enhancing Peace through Youth Creativity), поддржан од италијанското Министерство за надворешни работи и меѓународна соработка во рамките на програмата која има за цел да придонесе за стабилизацијата во регионот и за поддршка на процесите за пристап кон ЕУ.

ЕПИК предвидува серија активности, особено во рамките на 11. издание на „Џифони Македонија“, насочени кон промовирање на мирот, европските вредности и човековите права, преку филм, уметност и култура и активно вклучување на младите во создавањето на филмски и уметнички остварувања кои имаат моќ да пренесат пораки за мир наменети за младата публика.

Во рамките на ЕПИК ќе бидат прикажани 17 краткометражни филмови што ќе се натпреваруваат за три награди. Ќе бидат организирани две панел дискусии на тема ЕПИК со претставници од филмски фестивали за деца од регионот, а во понеделник ќе биде прикажан и грчко-италијанскиот документарен филм „Учениците од Умберто Примо“.

Дел од програмата ќе бидат и две презентации на нови кратки филмови од млади автори од Македонија, „Метаморфозис“ ќе одржи презентација на тема медиумска писменост, а ќе се реализира и средба со основачите на брендот Filmthusiast. Крстевска истакна дека како фестивал, „Џифони Македонија“ индиректно им помага на младите да дознаат со какви сѐ професии можат да се занимаваат, преку успешни примери од луже кои се осмелиле да го следат својот сон.

- Сакаме да им покажеме на децата што се во публика дека нема невозможни професии, дека сѐ што ги интересира, необична работа што ним им претставува задоволство, може да им стане професија. Дека во креативната индустрија има мал милион работи со кои можат да се занимаваат. На пример, сите тие луѓе што работат на филмовите, чии имиња ги гледаме на завршните кајрони на филмовите, тоа се сѐ убави професии. Иако можеби на родителите не им изгледаат како посакувана иднина за нивното дете. Честопати имаме примери на деца кои велат – моите родители сакаат да студирам право, а јас сакам филм. На „Џифони“ дознаваат дека тоа е возможно.
Фестивалот ќе биде затворен на 10 октомври во киното „Милениум“ кога ќе бидат прогласени победничките филмови во сите натпреварувачки категории, а ќе бидат доделени и наградите од конкурсот ЕПИК. Ќе бидат прикажани творбите и сценските изведби подготвени од учесниците на креативните работилници.

The post Со проекција на филмот „Вратената“ во режија на Џузепе Бонито вечерва почнува 11. издание на Филмскиот фестивал за млади „Џифони Македонија“ appeared first on Република.

Од 20 до 29 јули во Џифони Вале Пјана во Италија се одржува 53-то издание на Филмскиот фестивал Џифони, најголемиот филмски фестивал за деца во светот. Меѓу 6500 учесници од триесетина земји, Македонија повторно е застапена со најбројна делегација: десет претставници на возраст од 14 до 19 години, избрани меѓу најактивните учесници на последното издание на Филмскиот фестивал за млади Џифони Македонија.

Калина, Бисера, Максим, Јован, Бојана, Чејс, Дамјан, Летиција, Лина и Тео овие десет дена се дел од големото меѓународно жири кое гледа најнови филмови од светската филмска продукција за деца и млади и ќе ги избере најдобрите остварувања за оваа година.

Освен филмовите, за младите учесници се организирани и бројни други активности, средби со режисери, продуценти и глумци, како и богата музичка програма.

Филмскиот фестивал Џифони се одржува секоја година во јули, како централна манифестација со која се крунисуваат бројните активности на големото семејство Џифони што се организираат во текот на целата година ширум светот.

Со своето единаесетто издание што ќе се одржи во октомври годинава, Џифони Македонија, како горд член на семејството Џифони и единствен фестивал надвор од Италија што го носи тоа име, повторно ќе приреди единствено филмско доживување за околу 600 учесници од Македонија и од странство.

The post Десет млади од Македонија на Филмскиот фестивал Џифони во Италија appeared first on Република.

Данскиот тинејџерски филм „Хакер“ во режија на Пол Берг ќе биде прикажан в сабота на „Џифони филмски денови“ во Кинотеката. Филмот е синхронизиран на македонски јазик, а гласовите ги позајмија: Steffonator, Гораст Цветковски, Кристина Христова-Николова.

Тринаесетгодишниот Бенџамин е врвен хакер, но исто така и тинејџер кој е многу недоверлив кон другите по смртта на неговата мајка пред седум години. Бенџамин, кој никогаш не го познавал својот татко, живее во дом за сираци. Еден ден на посета доаѓаат двајца мажи од Тајната разузнавачка служба на Данска кои го известуваат дека една жена за која веруваат дека е мајка  му на  Бенџамин била регистрирана од надзорните камери на аеродромот неколку дена порано. На почетокот, Бенџамин е шокиран од веста. Сепак, тој наскоро се решава да ја испита работата и да дојде до вистината.

Од 12.30 часот ќе следува филмска работилница во Кинотеката, што ја води режисерката Марија Џиџева.

Проектот „Џифони филмски денови“ се организира со поддршка на Делегацијата на ЕУ во Скопје, од Агенцијата за филм на РСМ и од Кинотеката на Македонија, а се остварува во соработка со Амбасадата на Италија во Скопје и италијанскиот партнер „Џифони Експириенс“.

https://www.youtube.com/watch?v=HQn_SyWKqHA

The post Тинејџерскиот филм „Хакер“ синхронизиран на македонски на „Џифони филмски денови“ appeared first on Република.

Фестивалот „Џифони Македонија“ ги поканува учениците од основно и средно образование што сакаат да учествуваат на нова сесија од „Џифони филмски денови“, што ќе се организира в сабота (30 април) од 10 часот во Кинотеката. На четвртата сесија од овие филмски денови учениците ќе го гледаат филмот „Рока го менува светот“ во режија на Катја Бенрат, кој е снимен според книжевните мотиви на шведската писателка за деца Астрид Линдгрен, најпозната по романот за Пипи Долгиот Чорап.

Во него, главен лик е Рока, девојче од друга планета. Таа е супериорна во техничката и социјалната комуникација во однос на нејзините врсници, има сила да го менува светот и со таа мисија започнува во нејзиното непосредно опкружување. Рока се бори за правда и без страв им се спротивставува на насилните врсници што ги малтретираат послабите. Рока, всушност, израснала во изолирана средина, и тоа не било каква, туку во вселенска станица. Затоа секојдневниот живот во Хамбург, за неа изгледа многу чудно. И покрај тоа, Рока ги задржува својот отворен дух и духовитоста, пријателски настроена кон другите. Секогаш полна со оптимизам, Рока се бори да ја зачува својата независност и да докаже дека и децата имаат моќ да го менуваат светот…

„Рока го менува светот“ беше во конкуренција за Наградата на младата публика на Европската филмска академија во 2020 година. Децата-актери од филмот ги освоија националните германски филмски награди, беше најдобар филм на фестивалот за деца „Џифони“ и на фестивалот во Луксембург.

Проектот „Џифони филмски денови“ се организира со поддршка на Делегацијата на ЕУ во Скопје, од Агенцијата за филм на РСМ и од Кинотеката на Македонија, а се остварува во соработка со Амбасадата на Италија во Скопје и италијанскиот партнер „Џифони Експириенс“.

Линк за пријавување учество.

The post Филмот „Рока го менува светот“ снимен според книжевните мотиви на шведската писателка за деца Астрид Линдгрен на „Џифони филмски денови“ appeared first on Република.

Фестивалот „Џифони Македонија“ ги поканува учениците од основно и средно образование што сакаат да учествуваат на втората сесија од „Џифони филмски денови“, што ќе се организира в сабота (16 април) од 10 часот во Кинотеката.

Деновите се отворени за ученици од петто одделение нагоре. Ќе биде прикажан белгискиот филм „Вселенско момче“ во режија на Оливер Перо. Сценариото е на Есебио Лареа и Оливер Перо. Филмот ја освои главната награда на Интернационален детски и младински фестивал во Бусан. Гости на настанот ќе бидат членови на Marvie Productions (Марви продукција), која обединува средношколци што создаваат свои филмови.

По проекцијата на филмот ќе следува дискусија. Може да се пријавите на следниот линк.

Младиот протагонист во ова компактно 100 минутно „патување до космосот“ е 11-годишниот Џим (Басил Грунбергер со особено енергетична изведба) на кој му се случува огромна промена во животот. Неговиот самохран татко и идол (Јаник Ренер) не само што се подготвува за пат во вселената, туку и одлучува да се преселат во друг град за да биде поблиску до обсерваторијата во која ќе работи. Џим истовремено е возбуден поради новата авантура, но и малку исплашен поради тоа што ќе треба да се навикне на ново училиште каде не познава никого. Иако е посочен како филм за деца и младинци, суштината на „Вселенско момче“ е многу подлабока што го прави ова филмско остварување соодветно за лица од 7 до 77 години – пишува Петра Бранковска, во рецензијата објaвена на Гледај.мк.

По дискусијата на филмот, во 12 часот ќе започне „Филмска работилница“ со режисерката Марија Џиџева.  За оваа работилница може да се пријавите на следниот линк.

Проектот „Џифони филмски денови“ се организира со поддршка на Делегацијата на ЕУ во Скопје, од Агенцијата за филм на РСМ и од Кинотеката на Македонија, а се остварува во соработка со Амбасадата на Италија во Скопје и италијанскиот партнер „Џифони Експириенс“.

The post „Џифони филмски денови“: Дискусија за белгискиот филм за деца „Вселенско момче“ и гости од „Марви продукција“ appeared first on Република.

Во пресрет на новото издание на филмскиот фестивал за деца и млади „Џифони Македонија“, во периодот од 9 април до 11 јуни, секоја сабота од 10 часот, во Кинотеката ќе се одржува програмата „Џифони филмски денови“, намената за учениците од скопските основни училишта. Ќе се прикажува по еден европски игран филм наменет за младата публика, проследен со дискусија и средба со филмски автор или актер.
Филмовите опфаќаат теми што ја засегаат младата генерација. На првиот ден од манифестацијата ќе биде прикажан филмот „Патешествието на принцот“, кој успешно допира две важни теми: првата се однесува на предрасудите во општеството и стремежот да се пронајде место за креативност и слободна мисла, а втората тема се однесува на зачувувањето на животната средина. „Патешествието на принцот“ е француско-луксембуршки филм од 2019 година, во режија на Жан-Франсоа Лагиони и Ксавие Пикар.
Гостинка на средбата ќе биде Леона Јариќ, добитничка на наградата „грин компетишн“, во организација на „Јурп хаус“. Таа ќе го претстави своето најново остварување и ќе разговара со младата публика за тоа како започналa да снима филмови, а ќе се осврне и на освоената награда – професионална камера.
Потоа на програмата ќе следува „Филмска училница“ – работилница што Кинотеката ја организира веќе трета година. Работилницата, која ќе се реализира под менторство на режисерката Марија Џиџева, ќе биде фокусирана на поттикнување на креативноста на младите што сакаат да ја раскажат својата кратка приказна со аудиовизуелен јазик близок на новите генерации. Филмовите што ќе произлезат од работилницата ќе бидат на десеттото издание на „Џифони Македонија“ и заедно со филмовите направени на фестивалот ќе се натпреваруваат за главната награда – професионална камера.

The post Од утре до 11 јуни секоја сабота „Џифони филмски денови“ во Кинотека appeared first on Република.

Во пресрет на новото издание на Филмскиот фестивал за деца и млади „Џифони Македонија“, во периодот од 9 април па сѐ до 11 јуни, секоја сабота од 10 часот, во Кинотеката на Македонија ќе се одржува програмата „Џифони филмски денови“ (Giffoni Movie Days).

Филмската програма е намената за учениците од скопските основни училишта и предвидува секоја сабота да се прикажува по еден европски игран филм наменет за младата публика, проследен со дискусија и средба со филмски автор или актер. Заинтересираните ученици можат да се пријават на следниот линк.

Филмовите опфаќаат теми што ја засегаат младата генерација. На првиот ден од манифестацијата ќе биде прикажан филмот „Патешествието на принцот“ (Le voyage du Prince) кој успешно допира две важни теми: првата се однесува на предрасудите во општеството и стремежот да се пронајде место за креативност и слободна мисла, а втората тема се однесува на зачувувањето на животната средина.

Гостинка на средбата ќе биде Леона Јариќ, добитничка на наградата Green Competition во организација на Europe House. Таа ќе го претстави своето најново остварување и ќе разговара со младата публика за тоа како започналa да снима филмови, а ќе се осврне и на освоената награда - професионална камера.

Потоа на програмата ќе следува „Филмска училница“ - работилница која Кинотеката ја организира веќе трета година. Работилницата која ќе се реализира под менторство на режисерката Марија Џиџева ќе биде фокусирана на поттикнивање на креативноста на младите кои сакаат да ја раскажат својата кратка приказна со аудиовизуелен јазик близок на новите генерации. „Филмската училница“ се организира под покровителство на Кинотеката на Македонија, а во соработка со „Планет-М“ и „Џифони Македонија“. Пријавувањето за „Филмската училница“ е на следниот линк.

Филмовите што ќе произлезат од работилницата ќе бидат прикажани за време на 10. издание на „Џифони Македонија“ и заедно со филмовите направени на фестивалот ќе се натпреваруваат за главната награда – професионална камера.

Проектот „Џифони филмски денови“ (Giffoni Movie Days) е поддржан од Делегацијата на ЕУ во Скопје, од Агенцијата за филм на РСМ и од Кинотеката, а се остварува во соработка со Амбасадата на Италија во Скопје и италијанскиот партнер „Џифони Експириенс“.

„Патешествието на принцот“ е француско-луксембуршки филм од 2019 година, во режија на Жан-Франсоа Лагиони и Ксавие Пикар.

Лорен, стариот принц на мајмуните, по една бродска несреќа, се буди на непознат брег на земјата Ниокус. Него го наоѓа 12-годишниот Том, а неговите родители ќе му пружат засолниште. Родителите на Том се научници во прогонство: нивната заедница ги протерала, зашто се осмелиле да веруваат дека постојат и други мајмунски цивилизации.

Принцот најпрвин ќе биде предмет на истражување, а потоа во придружба на Том, ќе шета низ главниот град и блиската џунгла, каде што ќе открие непознат и волшебен свет, но и крутите правила кои владеат со него.

The post „Џифони филмски денови“ од 9 април до крајот на учебната година во Кинотека appeared first on Република.