Невреме со обилен дожд, ветер и силни електрични празнења, вечерва го зафати Дебарско, што услови прекин во напојувањето со елетрична енергија на целото дебарско конзумно подрачје.

Причина за прекинот беше испадот на 35 киловолтна доводна склопка на регулационен трансформатор во Хидроелектраната „Шпилје“. Екипите на ХЕС „Црн Дрим“ успешно го решија проблемот за кратко време и покрај лошите временски услови во поширокиот дебарски регион, изјавија за МИА од ЕСМ.

Без струја повеќе од еден час беа потрошувачите од конзумното подрачје кое ги опфаќа општините Дебар, Центар Жупа и подрачјето на Река, општина Маврово и Ростуше.

До сега нема пријавени штети, сообраќајот во регионот се одвива по влажни коловози, но се препорачува голема внимателност поради честите одрони од камен и земја. Екипи на дебарската секција на јавното претпријатие за одржување на регионални и магистрални патишта се постојано на терен во расчистување на истите, рече за МИА, Фемија Ајроски, раководител на Регионалниот ЦУК-Дебар.

The post Невремето без струја го остави целиот дебарски регион appeared first on Република.

Здружението за заштита и негување на културните вредности „Рајчица“, во соработка со општина Дебар, во рамки на проектот за поддршка на соживотот во регионот, синоќа во Дебар одржа трибина за важноста на семејството и меѓурелигискиот дијалог.

На трибината, меѓу многуте присутни граѓани од различна етничка и верска припадност, присуствуваа и градоначалникот Хекуран Дука, епископ Антаниски г. Партениј и дебарскиот муфтија Решат Качалнику, свештеници, архимандрити и јеромонаси, монахињи, просветни и културни работници и голем број претставници на институции.

Трибината ја отвори психологот Ангелина Василевска, која го истакна значењето на соживотот во регионот низ децениите наназад, како и важноста од отворањето на овие теми во јавниот простор.

Градоначалникот на Општина Дебар, г. Хекуран Дука, поздравувајќи го одржувањето на оваа средба меѓу другото рече дека треба да ги развиваме ваквите заложби за поддршка на соживотот, со кој Дебар се гордее.

- Во фокус на оваа трибина, би сакал да кажам дека сум многу задоволен што ќе се дискутира на тема поврзана со семејството, бидејќи многу пати сум бил присутен на различни трибини каде што се зборува за правата на децата, правата на жената, но никогаш не сум бил присутен, ниту пак, сум разбрал дека има дебата на која се зборува за нашето најважно, а тоа е семејството, кое е основна клетка на општеството. Оти какво што ни е семејството, такво ќе ни биде општеството, рече градоначалникот на отворањето на трибината, кој вети дека ќе продолжи да ги поддржува ваквите иницијативи насочени кон развој на младите во општеството.

Сестра Ефимија Зајковска, од манастирот во Рајчица, се заблагодари за поддршката добиена од градоначалникот Дука, и се задржа на темата насловена како „Семејството, состојби и предизвици“.

- Од една страна, гледаме дека денешните општества се значајно развиени. Имаме неверојатен цивилизациски напредок во многу полиња. Денес можеме да се пофалиме со силен индустриски, односно технолошки развој, кој има за цел олеснување на човечкиот живот, потоа со развој во областа на медицината која е насочена кон заштита и унапредување на човековото здравје, имаме отворени граници за да можеме полесно да разменуваме лични и професионални искуства, интелектуално да се надградуваме, па и да создаваме трајни пријателства и сл. Но, и покрај сето ова, сепак, се забележува еден парадокс, кој рефлектира сериозни оштетувања внатре во човечката личност: наместо да напредува, човекот регресира, се соочува со неверојатен стрес, страв, незнаење, болести. А најсилен, пак, негативен ефект од современиот развој е настанатото отуѓување меѓу луѓето, што значи дека тие отстапуваат од целта заради која се создадени, а тоа е живот во заедница и соединување со Бога. Денес човекот професионално непрестајно се развива, но стагнира и потфрлува на семеен план, тој има многу виртуелни пријатели, но со никого не создава длабоки физички и емотивни врски, неверојатно е храбар за да освојува нови сложени предизвици, а сериозно исплашен да го отвори своето срце за да го пушти внатре својот ближен, истакна сестра Ефимија во своето обраќање.

Меѓу другото, таа ги поттикна присутните на размислување, поставувајќи им го прашањето: Дали денешните семејства имаат реална способност да се спротивстават на модерните трендови, кои се насочени пред сè кон индивидуалниот развој на човекот, за сметка на неговото отуѓување од ближниот?

- Како да го сториме тоа, кога сè ова изгледа толку многу тешко? Ете, токму таму, во модерниот амбиент во кој реално сите ние живееме, имаме задача да ја понудиме нашата перспектива, да придонесеме и системски да се променат нештата, да се избориме за подобро образование на нашите деца, да бидеме истрајни во почитувањето на моралните вредности. Го менуваме општеството влијаејќи на него со својот позитивен пример, бранејќи ги, додека дишеме, вредностите кои ги стекнавме и научивме благодарение на животот во нашите семејства: почитувањето на секоја личност, скромноста, чесноста, трудот, пожртвуваноста, добротата, незлобливоста, милосрдието, простувањето, љубовта! Овие семејни вредности, од нашиот мал семеен круг непрестајно треба да ги пренесуваме во големото семејство на светот. Ако тоа го имаме, тогаш тоа ќе го дадеме. Бидејќи, секој го пренесува она што го научил, секој од срцето го дава тоа што во него го поседува, порача сестра Ефимија.

Зборувајќи за семејството Сумеа Рамадани, рече дека во секоја религија семејството е свето нешто, единствено место каде што нè прифаќаат онакви какви што сме, бидејќи само во семејството се потпираме на љубов.

-Во семејството сите сме исти, еден за сите и сите за еден. Затоа семејството е свето. Љбовта е фундаментална потреба за да опстанеме во живот. Љубовта пренесена од родителите на детето, детето ја пренесува на светот. Семејството нè учи на сите социјални вештини и емоционална стабилност. Мајката е најсветото нешто, најубавиот цвет во семејството, мајката е таа која го собира целото семејство и треба да се почитува со милост. Секако клучна улога во семејството и развојот на детето во вистинска личност одигрува и таткото, меѓутоа, мајката е најубавиот подарок што таткото може да му ја даде на детето, рече меѓу другото Рамадани.

Имамот Орхан ефенди Зенго, не го криеше задоволството што може да даде придонес на една „ваква одлична средба“.

-Религијата има клучна улога во создавањето на вистинска здрава личност. Да се биде религиозен, значи да се биде човек во потполна смисла на зборот. Религијата нè поучува како најдобро да го изградиме нашето семејство. Семејството е првата институција во која се раѓа и се гради една вистинска личност. Од Исламска перспектива, за да изградиме здрава личност потребно ни е да изградиме здраво семејство. А предуслов за здраво семејство е бракот помеѓу маж и жена, кои треба да бидат здрави и изградени личности. Превземањето на одговорноста е на двајцата родители, кои треба да го едуцираат своето дете, да му ги инсталираат сите човечки и хумани вредности и да го изградат во вистинска личност. И општествениот развој зависи токму од самиот човек и неговата личност. Колку повеќе добри личности ќе изградиме толку побрзо ќе се промени и развие во подобро нашето општество, рече ефенди Зенго.

За крај се обрати и Архимандрит Кирил Деловски од Бигорскиот манастир.

- Со голема чест и радост се собравме денес во овој знаменит и благороден град Дебар, кој низ вековите претставува жив симбол на соживот, взаемна почит и братство. Град каде што христијанските и муслиманските заедници секогаш биле блиски, каде што воомовите се негувале семејните вредности и каде што грижливо се пренесувал духот на широкоградоста и меѓусебното разбирање од поколение на поколение. Секако, имало и негативни ситуации и такви што сакале да внесат раздор, непочит и омраза, но, овде, за среќа, историјата памети само добри примери и оние кои твореле добро. Во овој град, љубовта и почитта кон ближниот се градат на секојдневно ниво, правејќи го Дебар неприкосновен пример во нашата држава за заедништво и почитување на разликите, рече архимандрит Кирил.

Верувам, додаде, дека „денешното наше заедничко присуство е плод на вековната традиција на заедништво и меѓусебна почит, толку важна за овој град, но нема да претерам ако речам и за светот“. Токму затоа, им благодарам на сите кои се потрудија во организацијата на оваа прекрасна трибина, а особено на градоначалникот на општина Дебар, Хекуран Дука, на нашиот Старец, Епископот Антаниски г. Партениј, со чијшто благослов сме вечерва тука и на почитуваниот дебарски муфтија, Решат Качалнику.

-Ќе се вратам повторно на зборовите од мојата внука Коприна: „Колку е тажен светот да немам родители!“ Децата, според природниот поредок, имаат неопходност од родители во секој аспект на нивниот живот. Потребата за топлината, присуството и поддршката на родителите е неизмерна и непроценлива – таа е вградена во самото битие на детето. Но, дилемата на нашето време, во ерата на технократија и непрестајна трка по материјалните вредности и современите трендови, е дали родителите се навистина тука за децата. Живееме во општество кое ги вреднува видливите успеси, во кое човекот се оценува според неговиот успех на социјалните мрежи, според висината на неговиот доход и престижот на неговата позиција. Овој безмилосен ритам ја осиромашува човечката душа и го оддалечува од суштинските врски кои го облагородуваат животот. Родителите, заслепени од новите идеали за успех и самореализација, сè почесто се жртви на зависноста од социјалните мрежи и на бездушната трка за кариера и богатство, првонаредувајќи го, пред сè, својот дигитален имиџ, на сметка на семејната близина. Притоа, невидливата цена на оваа опсесија се плаќа со тежок данок: во изгубени моменти, во изгубено присуство, во изгубено воспитание. Родителите, погледнати низ очите на детето, се далечни, отсутни – дури и кога физички се присутни. Колку тажно е кога децата го бараат погледот на своите родители, но наместо на поглед кој зрачи со емпатија, нежност, радост и разбирање, наидуваат на екрани кои светат со друга светлина, светлина која не е топла и животворна, туку студена и илузорна. Екраните, кои ја крадат внимателноста на родителите, на детето му порачуваат дека неговото време и неговата љубов не се доволно важни. Детето сака мајка и татко, а не успешни бизнисмени и нашминкани слики во дигиталниот простор“.

Како што беше најавено, наскоро ќе бидат одржани и други трибини со фокус на семејството, на развојот на младите, и за соживотот

The post Дебар пример за вистински соживот appeared first on Република.

Дебарските верници в недела ќе го одбележат патронот на црквата „Света Петка“, со можност да се поклонат пред моштите на светителката.

- Црковниот одбор при храмот „Света Петка“ во Дебар има чест со сите да ја сподели радоста за доаѓањето на чесните мошти на светата Параскева во нашиот град, токму на денот на нејзиниот празничен спомен, 27 октомври 2024 лето Господово, објави Одборот.

Моштите ќе бидат поставени за поклонение во дебарскиот храм посветен на светата Параскева уште на самата Утрена богослужба, која ќе започне во 7:30 часот.

-Овие мошти верно се чуваат од страна на Пречистанското сестринство, од  манастирот „Света Богородица – Пречиста“ или Крнински манастир кај Кичево, кое со благослов на нашиот надлежен владика, митрополитот Дебарско-кичевски, г. Тимотеј, благоизволија да го збогатат празничниот спомен со оваа голема светиња, за поткрепа на верните дебрани, се додава во објавата.

Божествената литургија со која ќе чиноначалствува игуменот на Бигорската свештена Обител, епископот г. Партениј, во сослужение со бигорските јеромонаси и архијерејскиот намесник, отец Миле Ангеловски, ќе почне во 8:45 часот.

-Ги покануваме сите верни дебрани и останати празникољупци да земат учество во ова големо торжество и да се поклонат на моштите на светата Параскева, стекнувајќи го нејзиниот штедар благослов, стои во објавата.

Бидејќи празникот е во неработен ден се очекува да присуствуваат и дебрани по потекло, кои живеат во други градови во државава.

Црквата се наоѓа во центарот на градот, во близина на градската болница, изградена е во 14 век, била обновена во 19 век, а реновирана во 1913 година и по катастрофалниот земјотрес, што во ноември 1967 година го погоди градот.

Во дворот на црквата е сместено и седиштето на Дебарската парохија.

The post Со можност за поклонение пред моштите на светителката, ќе се одбележи патронот на црквата „Света Петка“ во Дебар appeared first on Република.

Во центарот на Дебар денеска е поставен трансперент на кој пишува „Албанците се понижуват до таму што се гази и крвта на паднатите борци! Врати се команданте, Али Ахмети!“.

Транспарентот го поставивме денеска наутро во 7 часот. Тој се наоѓа на спротивната страна од седиштето на огранокот на нашата партија. Поставен е по барање на 90 отсто од Албанците во Дебар, изјави за МИА, Рамадан Имери, потпретседател на огранокот на Демократската унија за интеграција.

Тоа е, како што поочи, поради „незадоволството и револтот од понижувањето што го доживуваат Албанците од актуелната влада“.

Со дебарчани со кои разговаравме сепак не се согласуваат со овие ставови и сметаат дека вакви „провокации не се потребни“.

Претходно транспарент со ликот на лидерот на ДУИ, Али Ахмети, беше поставен на надвозник на автопатот Скопје – Тетово, веднаш после населеното место Сарај, на кој беше напишано „Команданте ние сме подготвени“.

Европкиот фронт утре ќе одржи настан под мотото „Сто дена, омаловажување, скандали, навреди“, на кој ќе се обратат лидерите на партиите вклучени во Фронтот.

Министерот за внатрешни ранботи Панче Тошковски вчера изјави дека полицијата жестоко ќе одговори на сите предзвици кои ќе бидат насочени кон дестабилизација на државата. По изјавата на премиерот Мицкоски во врска со можни обиди за дестабилизација по одвојувањето на Севрена Македонија од Албанија во евроинтегративниот процес, дека земјава соодветно ќе постапи, како и пораките од Мала Речица дека ДУИ е „подготвена за идните политички предизвици“, Тошковски рече дека сите информации се проследуваат до надлежните органи. Ќе се одговори, вели, и на сите обиди за подгревање на меѓуетнички тензии.

Службите во рамки на институционалните форми кои што ги имавме во државата, а се занимаваат со овој тип на надлежност, проследуваа и проследуваат соодветни информации до надлежните раководни органи во рамки на истите. Така што, сето она кое што сме го говореле во минатото, од аспект на обиди какви што веќе видовме во овие месец дена, за подгревање на меѓуетнички тензии, дека се реалност, соодветно одговоривме, соодветно ќе одговориме и во иднина. Кога велам соодветно одговараме, велам дека МВР ги има соодветните капацитети за да одговори на начин на кој што ќе биде потребно сè со цел сите граѓани да се чувствуваат безбедно и мирно и во рамки на тој безбеден и мирен систем да ги остварува правата - изјави Тошковски.

Премиерот Мицкоски во август излезе со тврдење дека интегративците во септември ќе преземат чекори во насока на дестабилизирање на државата во обид да го заштити капиталот кој го создале за време на владеењето, но ова тврдење беше отфрлено од страна на партискиот лидер Али Ахмети.

Пред два дена партијата одржа состанок во седиштето во Мала Речица. -Ние сме тука и сме подготвени, напишаа на заедничката фотографија што ја објавија по состанокот, а потоа, на социјалните мрежи се појавија и други фотографии со кои упатија прашање: „Дали сте подготвени?“. Од партијата постојано демантираат дека имаат какви било планови за дестабилизација.

The post ДУИ во Дебар си постави транспарент: Албанците се понижуват до таму што се гази и крвта на паднатите борци! Врати се команданте, Али Ахмети! appeared first on Република.

Македонскиот народен театар (МНТ) на 28 септември ќе учествува на 23. Традиционален фестивал „Албански театар во Македонија“, Дебар со претставата „Лагата“, од Флоријан Зелер, а во режија на Бесфорт Идризи. Играат: Јордан Симонов, Габриела Петрушевска, Оливер Митковски и Драгана Левенска.

Ова е второ фестивалско учество на претставата. На 31. Фестивал на камерен театар „Ристо Шишков“ во Струмица, актерот Јордан Симонов за улогата на Павле ја доби наградата за највисокото актерско остварување.

Фестивалот во Дебар почна на 24 и ќе трае до 30 септември 2024 година.

Во натпреварувачкиот дел од програмата ќе учествуваат седум)претстави од театри од нашата земја, Албанија и Косово, а во изминатите години до сега на фестивалот учествувале повеќе од 180 претстави од Македонија, Албанија, Косово, Србија, Црна Гора, Франција, Швајцарија и САД.

The post Претставата на МНТ „Лагата“ гостува Фестивал во Дебар appeared first on Република.

Одделението за внатрешни работи-Дебар поднесе кривична пријава против жител на градот поради напад врз полициски службеници.

Кривична пријава е поднесена против М.Р. (51) од Дебар, поради постоење основи на сомнение за сторено кривично дело „Напад врз службено лице при вршење работи од безбедноста“, информираше Стефан Димоски, портпарол на Секторот за внатрешни работи-Охрид.

Додаде дека Р.М. во неделата (22 септември) во просториите на ОВР Дебар бил агресивен кон полициските службеници при што се обидел со нож да ги нападне. Веднаш бил приведен и лишен од слобода

The post Со нож влегол во полиција и се обидел да напаѓа полицајци appeared first on Република.

Во гимназиите „28 ноември“ во Дебар и „АТА“ во Центар Жупа по двата уписни рока не е пополнета предвидената квота за упис во прва година.

Како што потврдуваат за МИА од двете училишта, пополнети се само 103 од предвидените 340 ученички места, што е околу 24 отсто.

Во дебарската гимназија во двата уписни рока запишани се 81 ученик, што значи дека непополнети се 191 место.

- Во второто пријавување запишани се 35 завршени деветоодделенци, од нив 10 за настава на македонски и 25 на албански наставен јазик. Во двете пријавувања во првиот уписен рок се запишаа 46 ученици, 13 за настава на македонски и 33 се за паралелките на албански наставен јазик. Тоа значи непополнети се 79 за настава на македонски и 112 на албански наставен јазик, рече за МИА, Афрона Леши, претседателка на Комисијата за спроведување на уписот.

Додаде дека уписот во ова образовна установа продолжува поради фактот што дел од учениците се соочиле со проблем при електронското пријавување.

- Во нашата гимназија вчера, во рамки на вториот уписен рок, запишани се само двајца ученици за настава на турски наставен јазик а за настава на македонски не се пријави ниту еден ученик. Со запишаните во првиот уписен рок вкупната бројка е 22 ученика, од нив 18 за турски, додека четворица за македонски наставен јазик, изјави за МИА Сабри Асан, директор на гимназијата „АТА“.

Според него врз основа на конкурсот на МОН, право на упис имале 68 ученици, во две паралелки, односно по 34 на двата јазика.

Главната причина е масовната миграција, која услови години на ред намалување на бројот на учениците, како во основното така и во средното образование, во двете општини.

The post Во гимназиите во Дебар и Центар Жупа, во прва година, се запишале 103 ученици, а има место за 340 appeared first on Република.

Краткотрајно невреме, со силен ветер, обилен дожд и со ситен град, попладнево го зафати Дебар. Силниот ветер турна повеќе контејнери за отпад, по што веднаш интервенираа екипи на Јавното комунално претпријатие Стандард.

„По силното, но, за среќа, краткотрајно невреме во градот, на неколку локации беа превртени контејнери за отпад, при што ветрот ги разнесе на сите страни, па и на повеќе улици. Излеговме на увид и наши екипи ги расчистуваат просторот и улиците, рече директорот Бурим Каба и додаде дека мораше и сообраќајната полиција да го регулира сообраќајот.

The post Силен ветер, обилен дожд и ситен град попладнево во Дебар appeared first on Република.

• Од технички причини повеќе часа без вода е поголемиот дел од градот Дебар. - Без вода се жителите на населбите "Венец еден", "Венец два",  "Ќернаница", дел од центарот на градот и периметарот на деветолетката "Пенестија", стои во соопштението на Јавното комунално претпријатие "Стандард", кое стопанисува со водоводот Росоки-Дебар.

The post Kој живее во Дебар вечерва тешко ќе има вода appeared first on Република.

По двете пријавувања, во рамки на првиот уписен рок, во гимназиите „28 ноември“ во Дебар и „АТА“ во Центар Жупа, во прва година, пополнети се само 66 ученички места, што е 19,4 отсто од предвидената квота од 340 ученици.

Во дебарската гимназија, каде според конкурсот на МОН, предвиден е упис на 272 ученика, запишани се 46 ученици.

Во прва година, за учебната 2024/25 година, во прва година запишани се 46 завршени основци, од кои 33 за паралелките на албански и 13 на македонски наставен јазик. Тоа значи дека за вториот, августовски уписен рок, слободни се 226 ученички места. Гледано одделно за настава на албански 137 и 89 на македонски наставен јазик, изјави за МИА, Афрона Леши, претседателка на Комисијата за спроведување на уписот.

Споредено со првиот уписен рок за минатата учебна година бројот на сега запишаните бележи благ пад. Тогаш биле запишани 71 ученик, односно 65 за настава на албански и шест на македонски наставен јазик.

Според директорот на гимназијата АТА, Сабри Асан, во оваа образовна институција во прва година запишани се 20 ученици.

Гледано одделно по наставен јазик, 16 се за паралелката на турски, од кои 11 во првото и 5 во второто пријавува, додека на македонски наставен јазик четворицата ученици се во првото пријавување, додека во второто ниту еден. Право на упис имаат 68 ученици, во две паралелки, односно по 34 на двата јазика, рече за МИА, директорот Асан.

Во оваа гимназија годинава бројот на запишаните е за пет ученика повеќе. Тогаш биле запишани 15 од кои 10 на труски и пет на македонски наставен јазик.

Второто пријавување ќе се врши на 21 август, кога се очекува борјот на запишани да биде поголем, но повеќе од јасно е дека предидената квота и оваа година нема да биде пополнета.

The post Во првиот уписен рок во гимназиите во Дебар и Центар Жупа, запишани само 66 од предвидените 340 ученици appeared first on Република.

Во изминатите неколку дена во Општата болница со проширена дејност во Дебар, антивиперин, серум против змиски отров, добиле две лица странски државјани, со што се спасени нивните животи.

„Во едниот случај станува збор за лице од соседните албански населени места, во чии амбуланти во моментот немало серум, а додадено на тоа поради фактот што нашата болница е поблиску од регионалната во Пешкопеја, потребната помош се дава побрзо и навреме. Доколку во период од 3 до 4 часа не се добие ваков серум настапува смрт“, вели за МИА, директорот Јетлумт Пашоли.

Вториот случај, како што посочува, бил вчера, а неофицијално се работи за холандски државјанин, кој бил на одмор во Охрид.

„Колегите од општата болница од Охрид, кои не располагале со серум, ни се јавија за случајот и веднаш излеговме во пресрет, да помогнеме. Времето беше во прашање, кое не дозволуваше да однесеме серум до Охрид, поради што со санителско возило од охриската болница пациентот беше донесен кај нас, прими антивиперин и повторно беше вратен во Охрид“, додава Пашоли.

Според него, имајќи го предвид периодот на појава на змии, навреме се снабдиле со потребниот серум, посака да нема потреба, но, изрази подготвеност да се помогне доколку затреба.

The post Холандски турист каснат од змија со итна помош однесен во Дебар зашто во Охрид немале серум appeared first on Република.

Изборниот ден од вториот круг на седмите по ред претседателски, како и 11. парламентарни избори, во општините Дебар и Центар Жупа, минува во фер и демократска атмосфера, со зголемена излезност попладнево, потврдуваат од општинските изборни комисии.

И граѓаните кои ги затекнавме на избрачките места задоволни се од текот на гласањето, велат се е добро организирано и оти гласањето е демократско право и секој треба да го оствари.

Инаку, според ОИК, во општина Дебар, до 15 часот правото на глас за претседателските избори го оствариле 15 отсто што е за 7 отсто помала излезност споредено со првиот круг на гласање, кога излезноста беше 22 отсто. На парламентарните избори излезноста е 23 отсто.

Во општина Центар Жупа, потврдуваат од ОИК, за претседателските избори гласале 1.014 лица или 13,74 отсто од вкупно запишаните 7.368, што споредено со првиот круг од претседателските избори процентот на излезност е речиси на исто нив, кога тој изнесувал 13,11 отсто, додека на парламентарните гласале 1005 гласачи или 13,64 отсто од вкупно 7.383 гласачи.

Членови на комисиите редовно се во обиколка на избирачките места, кои во текот на денов беа посетени и од претставници на набљудувачката мисија на ОБСЕ/ОДХИР.

The post Во Дебар, до 15 часот за претседателските избори гласале 15 отсто, а за парламентарните 23 отсто од граѓаните со право на глас appeared first on Република.

Изборниот ден во општините Дебар и Центар Жупа минува тековно, со поголема излезност од претпладневните часови.

- До 13 часот во општина Дебар правото на глас го искористиле 2566 лице или 13 отсто од вкупно запишаните 19 334 лица во единствениот избирачки список. Во сите 27 гласачки места изборниот ден минува во најдобар ред. Очекуваме излезноста да се зголемува. Вчера, инаку, правото на глас го остварија 29 болни и изнемоштени лица, изјави за МИА, Рилинд Хаса, претседател на ОИК-Дебар.

Споредено со  првиот круг од претседателските избори на 21 април 2019 година излезноста е помала. Тогаш до 13 часот гласале 3.259 лица или 18 отсто од вкупно запишаните 18.574 со право на глас. Во вториот круг пак до 13 часот правото на глас го оствариле 1 594 лица или 9 отсто.

-Во нашата општина правото на глас до 13 часот го остварија 672 граѓани или 9,12 отсто од вкупно запишаните 7.383. На сите 16 избирачки места гласањето се одвива тековно. Вообичаено поголема излезност очекуваме во попладневните часови. Вчера гласаа три болни и изнемоштени лица, информираше за МИА, претседателот на ОИК-Центар Жупа, Неџип Илјаз.

На минатите претседателски избори, во првиот круг, во ова општина, одзивот на гласачи бил 6 отсто или правото на глас го искористиле 429 лица, од  вкупо 6 953 запишани во единствениот избирачки список, додека во вториот круг гласале 489 лица или седум отсто.

The post Во Дебар до 13 часот излезноста на изборите е 13 отсто, во Центар Жупа 9,12 appeared first on Република.

Изборниот ден од првиот круг на претседателските избори во Дебар и Центар Жупа се одвива тековно, со зголемена излезност на граѓаните, кои го остваруваат нивното граѓанско право, потврдуваат од општинските изборни комисии.

Во општина Дебар, до 11 часот гласале 980 или 5 отсто од вкупно запишаните 19.334 лица.

Зголемена излезност е забележана и во општина Центар Жупа, каде до 11 часот од вкупно запишаните 7.383 лица  гласале  329 или 4,47  отсто.

И во двете општини, избирачките места се посетени од  претставници на набљудувачката мисија на ОБСЕ/ОДХИР.

Во близина избирачките места, 27 во општина Дебар и 16 во соседната, Центар Жупа, во согласност со законот, има присуство на полициски службеници. 

The post Излезноста во општините Дебар и Центар Жупа до 11 часот 5, односно 4,47 отсто appeared first on Република.

Непречено се одвива изборниот процес од првиот круг на претседателските избори во општините Дебар и Центар Жупа.

Според Рилинд Хаса претседател на ОИК-Дебар, до 9 часот правото на глас го искористиле 283 гласачи или еден отсто од вкупно запишаните 19.334 лица, колку што се запишани во единствениот Избрачки список.

Претседателот на ОК-Центар Жупа, Неџип Илјаз, информираше дека до 9 часот гласале 80 граѓани или 1,9 отсто од вкупно запишаните 7.383 лица со право на глас.

Членови на двете општински изборни комисии вршат редовни обиколки на гласачките места.

The post До 9 часот во Дебар еден отсто, во Центар Жупа 1,9 отсто излезеност appeared first on Република.

Во општините Дебар и Центар Жупа, сите 43 избрачки места се отворени навреме.

Гласачките места се отворени во седум часот. Гласањето во општина Дебар се спроведува во 27 избирачки места од кои 22 се во градот, две во село Могорче и по едно во селата Џепиште, Горно и Долно Косоврасти. Право на глас имаат 19.334 гласачи, што е за 123 гласачи повеќе споредено со последниот изборен циклус, локалните избори во октомври 2021 година. Вчера своето граѓанско право го остварија 29 болни и изнемоштени лица, рече Рилинд Хаса, претседател на Општинската изборна комисија во Дебар.

Според Неџип Илјаз, претседател на ОИК-Центар Жупа и во оваа општина избрачките места се отворени точно навреме.

Се гласа на 16 избрачки места, 9 се во Центар Жупа, по едно во населените места Броштица, Новак, Еленци, Брештани, Праленик, Коџаџик, Долгаш. Вчера правото на глас го искористија 3 болни и изнемоштени лице, изјави Илјаз.

Во единствениот избирачки список за општина Центар Жупа се запишани 7.383 со право на глас или 306 повеќе, во однос на повторените избори за градоначалник во април 2022 година.

The post Во општините Дебар и Центар Жупа избирачките места отворени навреме appeared first on Република.

Во општините Дебар и Центар Жупа, во единствениот избирачки список запишани се поголем број лица, отколку, што, според пописот од 2021 година, има резидентно население.

Во општина Дебар со право на глас се запишани 19.334 лица, наспроти 15.412 колку што според пописот има жители, додека во соседната општина Центар Жупа резидентно население има 3.720 а во единствениот избрачки список се запишани 7.393 лица со право на глас.

-На прв поглед овој податок збунува, но тоа е појава која е присутна и во други општини, како што повеќе изборни циклуси наназад е и соседната општина Маврово и Ростуше. Тоа е поради масовната миграција присутна во овој крај. Поконкретно бројот на гласачи е поголем бидејќи во него се и нашинците кои се во странство а поседуваат лични документи на нашата држава, изјави за МИА, Неџип Илјаз претседател на Општинската изборна комисија за Центар Жупа.

Подговоките за престојните избори течат непречено.

-Денеска во Дебар заврши петневната обука на 270 членови за 27 избрачки избори, како и за ОИК. На трети април  успешно заврши четиридневната обука во Центар Жупа за 160 членови на 16 избирачки одбори и ОИК, рече за МИА, Али Реџа одговорен на тричлената екипа обучувачи.

Според првите луѓе на ОИК разгледани се доставените барања и документацијата и одлучено е во вторник во домашни услови да гласаат 32  изнемоштени  и болни лица во општина Дебар и 5 во Џентар Жупа, колку што и се пријавиле.

Двете општини се дел од петтата изборна единица, ќе се гласа на 27 односно, 16 гласачки места, кои главно се сместени во простории на училиштата. 

The post Во општините Дебар и Центар Жупа повеќе гласачи од жители appeared first on Република.

 Главната парола на нашиот претседател не е случајно избрана. Јас никогаш не сум ги делел луѓето на наши и ваши. Јас сум ваш, вие сте мои. И затоа јас со право можам да кажам дека јас сум вашиот претседател, порача од Дебар претседателскиот кандидат Стево Пендаровски.

Тој посебно се задржа на соживотот, по кој е препознатлив поширокиот дебарски регион.

- За разлика од другите места што ги посетив, овде сакам да зборувам за она што вие најдобро го знаете, убаво живеете векови наназад, а тоа е соживотот, коегзистенцијата на различни народи, етникуми, вери, различни социјални статуси. Затоа што Дебар е еден од градовите кој може да се пофали и во најтешките времиња и светски војни, овде и Македонци и Албанци, и Турци и Роми и Власи и Срби и Бошњаци, сите што живеат на овој поширок простор знаеле да си помагаат еден со друг и да си се најдат еден на друг во неволја, рече тој.

Тоа, додаде го покажавте и откако Македонија стана независна и тоа на најдобар начин го покажувате и ден денес.

- Вие сте луѓе и во добри и во лоши времиња, а такви се поретко се наоѓаат во нашава држава. Дебар секогаш бил еден од интелктуалните центри во поширокиот регион, видни фамилии, видни поединци, интелектуалци, писатели, уметници, учители, реформатори, едукатори, потекнуваат од тука. И вие имате со што да се гордеете, констатира Пендаровски.

Сите години на независна Македонија, посочи, беше време на делби и тие делби меѓу луѓето по различни основи беа стимулирани од врвот на државата во тој период.

- Јас во моите пет години се трудев никого да не поделам по ниту една основа. За мене и сиромавиот и богатиот се исти. Јас ги делам луѓето на две групи: луѓе и не луѓе. Ние сме избрани да работиме за вас, а не за провизии и за тендери и за разно разни криминали. Затоа мислам дека во изминатите пет години покажав како еден претседател може да се нарекува претседател на сите, не само на хартија, туку во пракса, нагласи тој.

Пендаровски говореше и за членството во НАТО и отворањето преговори со ЕУ.

The post Пендаровски: Дебар е град кој може да се пофали со вековен соживот appeared first on Република.

Во детската градинка „Брешија“ во Дебар нема невакцинирани дечиња со ДиТеПер, потврди за медиумите директорката Ајрие Дачи.

Според неа, во оваа установа, во која се згрижени 330 деца, до сега нема заразено дете со голема кашлица, но состојбата внимателно се следи и редовно се вршат контроли.

Во службата за вакцинација при Општата болница со проширена дејност имунизацијата се реализира тековно, што, како што потврдуваат одговорните, е резултат на фактот дека родителите редовно ги носат децата, според картонот за вакцинација.

Во текот на минатата година, процентот на опфатеност со имунизација на децата во општините Дебар и Центар Жупа, кои со својата активност ги покрива дебарската болница, изнесува 95 отсто, што е намалување за 2 отсто споредено со претходната година. Тоа како последица на преселбата на семејството во друг град во државава или во странство.

The post Во дебарската градинка нема невакцинирани деца со ДиТеПер, а нема ни заразени appeared first on Република.

Во детската градинка „Брешија“ во Дебар нема невакцинирани дечиња со ДиТеПер, потврди за медиумите директорката Ајрие Дачи.

Според неа, во оваа установа, во која се згрижени 330 деца, до сега нема заразено дете со голема кашлица, но состојбата внимателно се следи и редовно се вршат контроли.

Во службата за вакцинација при Општата болница со проширена дејност имунизацијата се реализира тековно, што, како што потврдуваат одговорните, е резултат на фактот дека родителите редовно ги носат децата, според картонот за вакцинација.

Во текот на минатата година, процентот на опфатеност со имунизација на децата во општините Дебар и Центар Жупа, кои со својата активност ги покрива дебарската болница, изнесува 95 отсто, што е намалување за 2 отсто споредено со претходната година. Тоа како последица на преселбата на семејството во друг град во државава или во странство.

The post Во дебарската градинка нема невакцинирани деца против голема кашлица, а нема ни заразени appeared first on Република.