Професорот на Факултетот за напредни меѓународни студии на Универзитетот Џон Хопкинс во САД, Даниел Сервер, во интервју за „Слободен печат“ вели дека „реално, проблемите меѓу Бугарија и Македонија не се многу големи, освен, се разбира за луѓето што се директно вклучени“.

Но, не гледам причина да не бидат решени, вели Сервер во интервјуто,  во кое се осврнува и на состојбите во регионот, но и на конфликтот во Украина.

На прашањето дали Македонија, која е заглавена во „обвинувaњата“ од Бугарија, овој пат за почитување на правата на Бугарите во земјата, може да очекува крај на условите од Бугарија или треба да се подготви за долго „заложништво“ од страна на Софија, Сервер вели дека „секогаш е мудро да се биде подготвен за долг натпревар.

Сервер, во интервјуто зборува и за прашањето околу вметнувањето на Бугарите во македонскиот Устав, и дали треба да се инсистира на некаков реципроцитет од македонска страна, особено што во Бугарија Македонците не се признаени како малцинство, а има и 16 пресуди од Судот во Стразбур за тоа што Бугарија не дозволува регистрирање на партија на Македонците.

Јас сум поборник на реципроцитет. Тоа ги тера оние што бараат нешто двапати да размислат за тоа што го бараат, вели Сервер.

Целото интервју на „Слободен печат“.

The post Даниел Сервер: Не гледам причина да не бидат решени проблемите меѓу Бугарија и Македонија appeared first on Република.

(Даниел Север за peacefare.net)

Вашингтон испраќа чудни сигнали на Балканот. Ја поддржа одлуката на високиот претставник на меѓународната заедница во Босна и Херцеговина со која се воведува постизборна промена во начинот на кој гласовите ги одредуваат исходите. Ова ги фаворизира етнонационалистичките политички партии усогласени со Москва. Американците ги откажуваат косовските министерски посети со американски претставници. Вашингтон сака премиерот на Косово да го одложи воведувањето косовски регистарски таблички во северните општини со мнозинско српско население, без уверување дека натамошното одложување ќе доведе до усогласување.

Сето ова изгледа неповрзано, можеби дури и случајно и неважно. Не е ниту едното ниту другото.

Се е до Белград

Овде линијата е Белград. Џо Бајден беше силен поддржувач на борбата на Косово за ослободување од Србија. Но, тој одамна одлучи дека Белград е тешката категорија на Балканот. Јас сведочев пред него во Сенатот пред повеќе од 15 години. Тој јасно стави до знаење дека го поддржува приемот на Србија во процесот на пристапување во ЕУ, иако во тоа време таа очигледно не беше квалификувана за тоа. Бајден веруваше дека тоа ќе го ограничи Белград да се движи во европска насока.

Тој и неговата Бела куќа сега ја делегираа одговорноста за Балканот на Стејт департментот. Таму клучните играчи веруваат дека српскиот претседател Вучиќ е сериозно посветен на процесот на пристапување во ЕУ и исто така сериозно загрижен за благосостојбата на Србите во соседните земји. Пацификацијата на Србија стана цел на американската политика. Пред неклку дена специјалниот претставник на САД за Западен Балкан го прими во Вашингтон српскиот дипломат (Владимир Божовиќ) кој ја искористи приликата за особено недипломатски коментари за Црна Гора, членка на НАТО која претрпе долготрајна политичка нестабилност. Стејт департментот навива за непотребната иницијатива на Вучиќ за Отворен Балкан.

Штета што не е така

Има малку докази дека Вучиќ е сериозен за ЕУ. Србија постигна напредок во последните години во спроведувањето на техничките барања на acquis communautaire. Тоа е полесниот дел од квалификациите за пристап во ЕУ. Тешкиот дел е исполнувањето на критериумите од Копенхаген. Тие вклучуваат демократски институции, слободни медиуми, независно судство, владеење на правото и отворена пазарна економија. Србија постигна мал напредок во однос на ова, а за некои работи се врати назад. Таа, исто така, не успеа да ја усогласи својата надворешна политика со онаа на ЕУ, и тоа не само за санкциите за Русија.

За Србите кои живеат во соседните земји, послушниците на Вучиќ заговараат она што тие го нарекуваат „српски свет“. Да, тоа е исто како слоганот „руски свет“ што ја наведе Москва да ја нападне Украина. Вучиќ бараше и во голема мера постигна доминација над српските заедници во Косово, Црна Гора и Босна и Херцеговина. Во сите три, руската „хибридна војна“ и помага на Србија да изврши притисок за де факто, ако не и де јуре поделба. Вучиќ има за цел да го ограничи авторитетот на државните структури на неговите соседи и да создаде средно ниво на владеење во кое доминира српското население, контролирано од Белград. Тоа е она за што всушност се работи за проблемот со регистарските таблички.

Новата линија на поделба во Европа

Америка по крајот на Студената војна се надеваше на цела и слободна Европа. Тоа нема да се случи наскоро. Европа се дели помеѓу сфера на НАТО на запад и сфера со која доминира Русија на исток. Србија се определува да остане во сферата во која доминира Русија, заедно со Белорусија и она што Москва може да го задржи во Украина, Молдавија и Грузија. Белград, исто така, се надева дека ќе ги задржи фондовите за пристапување во ЕУ што ги добива од Брисел. Со тоа би требало да се финансираат подготовката за евентуалното членство, но Србија ги користи за да развие економија во која доминира државата.

Нивото на власта во соседните земји што го контролираат Србите ќе биде особено корисно за Москва. Русите ќе го користи да ги дестабилизира сегашните и идните членки на НАТО. Тоа ќе го направи ризично натамошното проширување на Алијансата.

Лошо замислено и лошо изведено

Значи, што не е во ред со политиката на Вашингтон на Балканот? Лошо е замислено затоа што се заснова на погрешни претпоставки за европските амбиции на Србија и нејзините активности во соседните земји. Политиката на САД исто така лошо и слабо се спроведува. Нема оправдување за промената на правилата за броење гласовите по изборите или за непризнавање на „српскиот свет“ поради опасноста што ја претставува за соседите на Србија и потенцијалните сојузници на САД.

САД треба да се вратат на балканската политика која ќе го поддржи суверенитетот и територијалниот интегритет на секоја од балканските држави, како и почитувањето на човековите права на нивните граѓани. Тоа треба да го вклучи нивното право да одлучуваат демократски, без мешање од Белград, на која страна од новата линија што ја дели Европа ќе изберат да бидат. Можеме да се надеваме дека Србија ќе го промени мислењето за сојузништво со Русија, но за тоа ќе биде потребно стратешко трпение, а не пацификација на Белград.

(Даниел Сервер, професор на Факултетот за напредни меѓународни студии на Универзитетот Џон Хопкинс)

The post Што e погрешно во американската политика на Балканот? appeared first on Република.

На маргините на стратешкиот дијалог со САД, во Вашингтон министерот за надворешни работи Бујар Османи, по повод 30 години од независноста на Република Македонија му врачи признание на Даниел Сервер, професор во Џон Хопкинс универзитетот.

Како што соопшти МНР, упатувајќи благодарност, Османи истакна дека со своите јавни настапи, темелено на длабокото познавање на регионот и нашата држава, Сервер дал важен придонес во процесот на меѓународна афирмација на Македонија, преку јасната и цврста поддршка за интеграцијата на нашата држава во евро-атлантските механизми на интеграција, вклучително и преку континуираните апели со години наназад за решавање на отворените прашања кои го кочат овој процес.

По повод 30-годишнината од независноста на Република Македонија, во јуни, минатата година министерот Османи донесе одлука со која се доделува признание на 30 странски државјани, високи функционери од ЕУ и НАТО, државници, дипломати и познавачи на нашата држава и регионот, меѓу кои и Сервер, како симболична благодарност за нивната поддршка за нашата независност, нашите стратешки цели, зацврстување на евро-атлантските перспективи и мултиетничката, мултикултурна и мултиконфесионална кохезија на нашата држава и општество, наведуваат од МНР. 

The post Признание за Даниел Сервер за неговиот придонес во меѓународната афирмација на Македонија appeared first on Република.

Русија претставува закана и за Балканот, но не во смисла на инвазија, туку во смисла на негова дестабилизација, оценува во коментар за МИА за руско-украинската криза професорот Даниел Сервер од Универзитетот „Џон Хопкинс“ во Вашингтон.

Иако, војната не е завршена, веќе е јасно дека Русија го загуби не само моралниот статус во светот, како и економската стабилност дома, туку и пријателството на повеќето Украинци. Тие никогаш нема да го прифатат она што го сака Путин: апсорпција на Украина во нова руска империја - подвлекува Сервер кој важи за експерт за Балканот.

Запрашан за тоа какво влијание ќе има руско-украинската криза врз регионот на Западен Балкан, американскиот аналитичар посочува дека Русија претставува закана и за Балканот, но од аспект на можноста да влијае на негова дестабилизација.

Русија, исто така, е закана на Балканот, каде што делува и преку своите дезинформациски оружја (РТ и Спутник), како и преку српските националистички организации, вклучително српската Влада и Република Српска во Босна и Херцеговина, како и проруските политички сили во Црна Гора и на други места. Заканата не е инвазија на Балканот, туку дестабилизација, со која Русија се обиде и во  Македонија и во Црна Гора. Двете земји дадоа восхитувачки и демократски отпор. Се надевам дека ќе продолжат да го прават тоа - вели Сервер.

Прашан дали актуелната војна во Украина ќе влијае на забрзување или на забавување на проширувањето на ЕУ, Сервер се надева дека Европа ќе стане поотворена за нови членки, но, вели, се плаши дека е можно и спротивното.

Можеби се надевам дека војната во Украина ќе ја направи Европа поотворена за нови членки, но се плашам дека може да го направи спротивното. Главната работа за  Македонија и другите земји кои сакаат да влезат во ЕУ е да ги направат потребните политички и економски реформи, кои ќе потраат најголемиот дел од оваа деценија, за да бидете подготвени за пристапување во членство кога ќе се отвори прозорецот. Најголемиот дел од придобивките од пристапувањето во ЕУ доаѓа со тие реформи - оценува Сервер.

Тој смета дека  Македонија, Црна Гора, Албанија и Хрватска исто така имаат важна улога како членки на НАТО.

Алијансата ќе мора да се чува од агресија од Русија се додека Путин или некој од нему сличните владее во Москва, заклучува американскиот аналитичар Даниел Сервер.

The post Сервер за МИА: Русија претставува закана и за Балканот, не во смисла на инвазија, туку во смисла на дестабилизација appeared first on Република.