Вознемирувачко видео на кое се гледаат три девојки како крвнички тепаат друго девојче денеска беше објавено на социјалните мрежи. Како што пренесуваат српските медиуми, станува збор за инцидент кој се случил пред хемиското училиште во Панчево, Србија. Според нивните информации, три 16-годишни девојки тепаат 15-годишно девојче поради некое момче.

Насилството не било пријавено во полиција, но тие веќе отвориле случај кога видеото било објавено на социјалните мрежи.

Оригиналното видео беше отстрането од „Инстаграм“, но објавена е замаглена верзија на „X“:

pic.twitter.com/XJgXTVRIqf

— bgd (@bgd1718384) September 19, 2024

The post Три девојки со клоци и тупаници тепаат девојче поради дечко, останатите гледаат appeared first on Република.

Од Градската општа болница „Св.Наум Охридски“ - Скопје во скопската полиција било пријавено дека во средата кај нив со тешки телесни повреди бил донесен малолтеник од с.Чифлик, скопско.

По преземени мерки било констатирано дека околу 12.30 часот пред основно училиште во с.Чифлик, а по претходна расправија на социјална мрежа, малолетникот бил физички нападнат од неколку малолетници, кои употребиле и тврд предмет, соопшти МВР.

За настанот бил известен јавен обвинител и се преземаат мерки за негово расчистување.

The post Претепано дете со тешки повреди во болница, врсници го нападнале пред училиште appeared first on Република.

Една третина од децата и младите луѓе во Македонија доживеале булгинг преку интерннет. Од вкупно 400 испитаници 18 отсто сметаат дека основна причина зошто опстојува онлајн-насилството е недостиг од информации и знаење, а 41 отсто веруваат дека инсититуциите не го сфаќаат сериозно проблемот. Ова се резултатите од анкетата на U-Report за безбедноста на интернет, спроведена во 2023 година. На Меѓународниот ден за побезбеден интернет што се одбележува како глобална иницијатива за промовирање побезбеден и подобар интернет за сите корисници, особено за децата и младите, УНИЦЕФ ги повикаа сите чинители да ги зголемат напорите за заштита на децата од растечките ризици на интернет.

Растењето онлајн нуди неограничени можности децата да учат, критички да размислуваат, да градат вештини и да се изразуваат преку интернет. Според последните податоци (ДЗС, 2023) практично сите (100 отсто) млади на возраст од 15 до 24 години во нашата земја користат интернет и речиси сите (97 отсто) го користат секојдневно по неколкупати, се вели во извештајот на УНИЦЕФ.

Долгото време што децата го поминуваат на виртуелните платформи може исто така да ги направи поранливи на сајбер-малтретирање и други форми на насилство од врсници, говор на омраза и изложеност на штетни содржини – во кои спаѓаат и пораки со кои се поттикнува самоповредување, па дури и самоубиство.

Најалармантна е зголемената закана од сексуална злоупотреба и експлоатација, вклучувајќи грабнување и трговија со деца. Според податоците од истражувачкиот проект Disrupting Harm се проценува дека милиони деца биле жртви на онлајн сексуална експлоатација и злоупотреба во тринаесетте земји учеснички во истражувањето од 2020 година.

На децата им треба поддршка за да станат одговорни дигитални граѓани; родителите треба да бидат оспособени за разговор околу чувствителни прашања со своите деца, а властите имаат моќ да обезбедат системи за заштита на правата на децата на интернет, сметаат од УНИЦЕФ.

Во својот најнов извештај (2022) Комитетот за правата на детето ги поздравува мерките што ги презеде земјата за справување со насилството врз децата, вклучително и законодавните реформи, усвојувањето на Националниот план за акција и ратификација на дополнителни меѓународни конвенции. Но тој исто така ја повикува земјата да преземе насочени активности како одговор на сексуалната злоупотреба и експлоатацијата на децата преку интернет.

Исто така, Комитетот укажува на потребата од распределба на доволно човечки, технички и финансиски ресурси за спроведување на Националната стратегија за превенција и заштита на децата од насилство (2020–2025) и воспоставување систем за задолжително известување, истрага во која ќе се вклучат повеќе институции и која ќе биде сензитивна кон децата во сите случаи на насилство врз деца – вклучително и во дигиталната средина.

Заштитата на децата од онлајн-насилство налага холистички пристап, синергија меѓу јавниот и приватниот сектор, како и вклучување и учество на младите. Неопходна е соработка меѓу секторите здравство, образование и заштита за да се реализира образовна програма за децата и родителите, вклучително и пристап до телефонска линија за помош, а службите во сите сектори треба да бидат информирани за доживената траума на децата со цел стручните лица да бараат предупредувачки знаци на насилство и соодветно да реагираат. Претпријатијата имаат одговорност да ги почитуваат и да ги поддржуваат правата на децата преку своите производи и услуги, и да се погрижат правото на децата на заштита од насилство да биде втемелено во нивната деловна практика, пишува во извештајот на УНИЦЕФ.

The post УНИЦЕФ: Една третина од децата и младите во Македонија доживеале булинг преку интернет appeared first on Република.

Почнува второто полугодие. Седнете со вашето дете и објаснете му дека да се биде многу високо, ниско, дебело, слабо не е причина за смеење…Или дали ученикот носи очила или исти чевли секој ден, порача наставникот Гоце Бумбароски од Прилеп, споделувајќи моќна порака до родителите.

Објаснете му на вашето дете дека стариот ранец ги носи истите соништа како и новиот.
Ве молам научете го вашето дете да не исклучува никого затоа што е сиромашно или „различно“.
Објаснете му на вашето дете дека малтретирањето боли и дека на училиште оди за да УЧИ, НЕ за да се натпреварува.
Сите имаме еднаква вредност.
Воспитувањето започнува од дома!, вели тој.

The post Наставникот Бумбароски со порака: Објаснете му на вашето дете дека носењето исти чевли или стар ранец не е причина за смеење appeared first on Република.

Ученик од второ одделение во основно училиште во скопската населба Аеродром агресивно се однесува, па дури и физички ги повредува соучениците, а пред некое време ѝ ги соблекол панталоните и долната облека на соученичка додека миела раце во тоалетот. Родителите со кои зборуваше МКД.мк и чиј идентитет ѝ е познат на редакцијата велат дека децата ги праќаат во училиште, а не на фронт. Тие бараат да се реши ситуацијата, која трае повеќе од една година, но состојбата не се менува.

Деновиве, како што тврдат родителите, проблематичниот ученик не оди на училиште, но никој не им кажува дали е можеби префрлен во друго училиште или која е причината за неговото отсуство.

Училиштето знае за ова однесување на второодделенецот бидејќи родителите испраќале писмени дописи до директорката за преместување на нивните деца во друго одделение или за испишување на агресивниот ученик. До сега од овој клас и училиште самоиницијативно се отпишале дури седум ученици.

Стручни служби од училиштето присуствувале на час и седеле за да го набљудуваат однесувањето на детето, но додека било со придружба однесувањето на детето било во ред.

Што се случува, зошто детето отсуствува подолго и дали повторно ќе се врати во училишните клупи, никој во одделението не знае.

Целата сторија на МКД.мк

The post Второодделенец соблекува и повредува соученици во училиште во Аеродром, најмалку седум деца се отпишани appeared first on Република.

Тренчевска: Од петок започнуваме со кампања која ќе има за дел подигање на свеста за булингот

Скопје, 10 октомври 2023 (МИА) – Од петок започнуваме со кампања во делот на менталното здравје која ќе има за цел да пренесе пораки за подигање на свеста за булингот, информира денеска министерката за труд и социјална политика Јована Тренчевска.

Таа на денешната промоција на Протколот за постапување со деца со дијабетес во училиштата и детските градинки, одговорајќи на новинарско прашање рече дека Министерството за труд и социјална политика работи преку центрите за врсничко насилство, булингот и дека по секоја пријава од училиште, од градинка се вклучуваат стручни тимови.

-Во петок почнуваме од Валандово и Струмица во петок заедно со амбасадори, со поддршка на УНИЦЕФ, со извидници со млади, токму од младите за младите да ја подигнеме свеста за врсничкото насилство, за превенција, и за препознавање на насилството. Општина Центар започнаа веќе со активности. Исто така и други општини започнуваат со активности во училиштата. Министерството за образование ги користи стручните тимови од центрите како поддршка на стручните тимови и училиштата, и верувам дека една од приоритетите во наредниот период, ќе биде токму врсничкото насилство, да ги заштитиме децата, истакна министерката.

Градоначалник на општина Центар Горан Герасимовски од друга страна, рече дека општината изминатиот период има направено повеќе акции.

-Да. Последниов месец дена кога настана неколку немили настани Дебар маало, една од населбите каде што е најфреквентна и има збиралишта на поголем број на наши млади деца. Во соработка и со МВР, но и со МТСП и други ресорни министерства направивме повеќе акции , се со цел да ги намалиме сите тие немили настани. Дополнително како општина отпочнавме одредени кампањи. Покрај тоа што се грижиме да нашите дечиња учат и се воспитуваат во најдобри услови ги реконструираме сите градинки, училишта, дополнително се грижиме за нашиот наставен кадар каде што изминатиот месец дена нашите наставници, негувателки имаа обуки во делот на булингот и меѓу врсничкото насилство коешто ќе го пренесат на дечињата.

Додаде дека покрај кампањите во кои ќе се вклучат со министерствата, општината дополнително потпишала Меморандум за поддршка на кампањата на Макпетрол во делот на врсничкото насилство.

-Исто така за брзо време ќе почнеме обуки на дечињата на родителите, коишто ќе се вклучат во истите, ќе се делат брошури, флаери се со цел да ја подигнеме свеста кај најмладите. Постојано ги повикуваме и родителите меѓу кој сум и јас за што повеќе време одвоиме и споделуваме заедно со нашите дечиња, посочи Герасимовски.

The post Почнува кампања за подигање на свеста за врсничкото насилство, превенција и за препознавање на насилството appeared first on Република.

Триесет и седумгодишната тетовка И.С. вчеравечер во СВР Тетово пријавила дека на 4-ти овој месец нејзиниот малолетен син физички бил нападнат од неколку малолетници, кои со мобилен телефон го снимале настанот и потоа снименото го прикажувале на други лица.

Од СВР Тетово велат дека се преземаат мерки за расчистување и документирање на случајот.

The post Малолетници снимале како тепаат и малтретираат врсник appeared first on Република.

По вонредниот увид во ОУ „Владислав Рибникар“ во Белград, потврдени се наодите на Центарот за социјална работа, Министерството за образование и Министерството за семејна грижа, дека во ова училиште немало врсничко насилство во однос на малолетното момче (13), кој го извршил масовното убиство, соопштуваат од Владата на Србија.

Токму затоа бараме од сите медиуми со должно внимание да се однесуваат кон овие информации и да не објавуваат непроверени и непотврдени информации, бидејќи со тоа продолжува процесот на трауматизирање на децата и родителите – велат од српската Влада.

Владата им се заблагодари на родителите, наставниците и на сите вработени во образовниот систем за разбирањето и поддршката.

Пред околу три недели девет ученици и еден чувар беа убиени од тринсесетгодишникот Коста Кецмановиќ во ова белградско училиште.

The post Коста не бил жртва на булинг во училиштето, потврди српската Влада appeared first on Република.

Министерот за образование и наука Јетон Шаќири потврди дека имало поплаки во однос на училишта кои не реагирале во случај на булинг.

Пред почетокот на денешната дебата „Насилство кај децата“ Шаќири изјави дека на мејл адресите на кои може да се пријавува насилство во училиштата, досега се стигнати повеќе од 20 пораки.

Бројот на пријавите достигна повеќе од 20. Ова значи дека имаме повеќе од 20 различни мејлови. Имаше и добри искуства, препораки од различните страни кои ги имаат решено проблемите. Да ги искористиме и добрите и лошите искуства, рече Шаќири во одговор на прашање пред почетокот на денешната дебата „Насилство кај децата“.

The post Има поплаки дека училишта не реагирале, иако имало случај на булинг, потврди министерот за образование appeared first on Република.

Верувам дека преку професионално ангажирање на сите стручни соработници ќе обезбедиме безбедна клима за работа во училиштата. Поддршката во овие ситуации е важна и за учениците и за училишниот кадар. Затоа е битно вашата работа да е во склад со професијата и да ви се овозможи непречена секојдневна работа за градење на клима за напредување во училиштата. Во овие услови стана видливо дека треба да дојде до нова структура на вашата работа и ослободување од административни обврски во училиштето.

Ова го истакна министерот за образование и наука Јетон Шаќири на денешната обука  за јакнење на вештините за поддршка на менталното здравје на учениците, што активот на стручни соработници на Град Скопје ја организираше за педагози и психолози во просториите на СУГС „Зеф Љуш Марку“ во Скопје, со поддршка на УНИЦЕФ.

„Го поздравувам трудот и професионализмот на активот на стручни соработници на ниво на Град Скопје, бидејќи преку нивното обезбедување на насоки до своите колеги во училиштата тие влијаат да се изгради стабилен однос во овие вознемирувачки ситуации. Стручните соработници треба да се активни чинители во решавање на проблеми поврзани со образованието и добростојбата на учениците, тие се мостот и до наставниците и до родителите“, рече Шаќири.

https://republika.mk/vesti/makedonija/so-fast-fud-reshenija-nema-da-go-reshime-problemot-so-bulingot-vo-uchilishtata/

Тој истакна дека верува во професионализмот на стручните служби во училиштата и дека ги поддржува напорите за континуирано професионално растење.

„Врз вас има и дополнителен терет да се обезбеди поддршка на учениците и вработените за надминување на последиците од пандемијата со Корона вирусот кога многу нешта се сменија, и тоа во начинот на комуникација, во начинот на совладување на образовните предизвици и во начинот за грижа за себе и за другите. Затоа е важно во училиштата да има просторија во која ќе може доверливо да се разговара својот училиштен психолог“, кажа министерот за образование.

Шаќири во своето обраќање упати и апел до училишните раководства во рамки на Годишната програма за работа да развијат и дополнително зајакнат превентивни програми за промоција на добросостојба на учениците, заштита од насилство, злоупотреба и запуштање, спречување дискриминација, соработка со родителите односно старателите.

The post Училишните педагози и психолози да се ослободат од административните обврски и да се фокусираат на менталното здравје и добросостојба на учениците appeared first on Република.

Двете масовни убиства во училиштето Владислав Рибникар во Белград и двете села во близина на Младеновац во кои животот го изгубија 18 лица, ги размрда македонските власти да размислуваат за поригорозни мерки за зголемување на безбедноста во училиштата и јавните површини. Во некои од училиштата се оддржаа вонредни родителски средби на кои се разговарало што да преземат родителите дома, а што ќе преземат училиштата и надлежните иституции. Една од мерките која беше најавена е дека децата од поголемите одделенија ќе бидат претресувани од страна на полиција. Се отвори дилема кај родителите колку ваквата мерка е оправдана, односно колку е позитивна, а колку е негативна. Побаравме одговор од стручни лица, разговаравме со Ивана Станковска, м-р по клиничка психологија. Ја прашавме како психолог како ја коментира оваа мерка, дали ќе остави последици кај некои од децата, особено помалите кога би гледале претресување од полиција пред училиштето, дали можеби ќе се роди желба за подметнување кај деца, желба да се надитри полицијата...

Оваа идеја ми остава впечаток на фаст фуд решение. Брза е, лесна е, примамлива и крајно нездрава. Доколку сакаме животот да си го отежниме, ќе бираме лесни, фаст фуд решенија за било кој проблем. Доколку сакаме животот да си го олесниме, ќе бираме суштински, долготрајни и можеби потешки стратегии. Зашто велам потешки, затоа што ќе бараат поголема ангажираност, промисленост и поголемо учество од сите засегнати страни во образовниот систем (стручна служба, наставници, родители, институции), отколку само полиција која ќе ги третира децата како криминалци. Зашто е погрешно како мерка за безбедност да се третираат децата како криминалци, излишно е да се образложува - вели магистар Станковска.

Наспроти фаст фуд решенија, според Станковска, потребни ни се мерки насочени кон сите актери во воспитно образовниот систем, институциите, образовната програма, наставниците, а последно децата.

Квалитетен воспитно-образовен систем е најважната мерка, која не е ни мерка, туку вредност, неопходност. На учениците им е потребен стабилен, креативен и здрав систем од кој ќе црпат ресурси за својот развој и на кој ќе се потпираат. Наставници кои ќе имаат свој авторитет. Образовен систем ослободен од корупција, непотизам и партизација. Последно на листата приоритети се мерки насочени кон учениците, бидејќи децата не се проблем; децата само го манифестираат она кое возрасните го создале.

Но еве, би рекла прво да ги прашаме децата. Што тие мислат дека треба да се промени? Доколку секое дете анонимно достави писменце до стручната служба во кое ќе одговори на три прашања: Што ме прави среќен/на додека сум на училиште? Што ме растажува или лути додека сум на училиште? Што би сакал/а да е поразлично во мојот училишен ден? Веројатно повеќето деца ќе напишат: би сакал/а поголем голем одмор и да нема тестови. Но, има шанси некои деца да нè изненадат со нивните идеи а и да разбереме повеќе за нивните проблеми - објаснува м-р Станковска.

[caption id="attachment_641197" align="alignleft" width="360"] Ивана Станковска, м-р по клиничка психологија, Семеен советник[/caption]

Она што недостига во училиштето е постојан вработен психолог. Законот налага вработување на педагог или психолог, па така во најголем дел од училиштата има вработено само педагог, кој пак, за волја на вистината работи повеќе административни работи, отколку она што му е вистинска задача. На прашањата „дали е неопходно задолжително вработување на психолог во училиштата? За дел од јавноста не е позната разликата меѓу педагог и психолог. Дали може кратко да ги разјасниме тие две работи?“ Станковска одговара:

Педагошката работа е посветена на менаџирање, планирање, советување и поддршка во училишните процеси на учење, постигнување резултати, унапредување, развивање на потенцијалите на учениците, мотивација и слично. Психолошката работа во училиште е посветена на менталното и емоционално здравје на учениците но и на наставничкиот тим во системска соработка со родителите; преку индивидуална и групна работа, како и редовни работилници за развивање емоционална интелигенција, решавање проблеми, решавање конфликти, комуникација, справување со стрес и слично.

Најверојатно кај нас ретко психологот има можност вистински да ја работи својата работа поради системската поставеност која го оптеретува повеќе со административни задачи отколку со пракса. Во едно основно училиште според мене треба да има барем двајца психолози, еден за училишни деца до петто одделение, и еден за деца во пубертет и рани адолесценти од петто одделение до деветто одделение. Тоа се две различни развојни периоди на децата и психолозите различно ќе работат со нив, а еден психолог за училиште од 1500 ученици е недоволен. Имајте предвид дека во 9 годишно основно образование, децата ќе минуваат низ различни семејни, развојни и социјални настани и ситуации, при што семејната ситуација ќе влијае на училишната и обратно.

Две недели по случувањата во Србија, темата во Македонија е сѐ уште актуелна. Се читаат вести за тоа, се шират секакви информации и дезинформации, се свикуваат родителски, родителите дома коментираат на темата,децата слушаат, се разговара и со нов. Во училиште се збори на истата тема, а секако и секој смета дека со разговарање на децата можеби ќе влијае на свеста на децата, па истото го слушаат и на некој курс, воншколска активност, извидници, спорт... Децата имаат телефони, пристап до интернет, секојдневно читаат разни вести на таа тема. Ја запрашавме магистар Станковска колку ова актуелизирање на оваа тема, постојано зборување со децата е позитивно, колку негативно. Таа вели:

Кога нешто ќе дознаеме, не можеме да го одзнаеме. Со други зборови, учениците кои веќе знаат за она што се случило, природно е да имаат прашања. Зависно од нивната емоционална зрелост, некои нема да разберат што точно се случило, некои ги покреваат своите одбрамбени механизми и велат: сигурно се децата некаде во болница, сигурно се живи; ова е некоја игра.

Тоа исто така значи и дека досега повеќето деца кај нас веќе заборавиле на оваа тема и продолжиле со своите детски активности, интереси и задачи, и тоа е добро. Оние кои имаат прашања, добро е да добијат одговори прилагодени на возраста, за да не мораат истите да ги бараат на интернет. Секоја негативна појава или ситуација може да се трансформира во нешто што ќе биде извор на добри, позитивни учења за добра комуникација, почит, разбирање, слушање, емпатија. Во смисла, ајде да зборуваме за она кое е вистински важно, за тоа како се однесуваме, како тоа влијае на другите, како да ги решиме нашите училишни и другарски грижи, кој може да ни помогне и охрабри, кое однесување е позитивно а кое треба да се корегира.
Негативното влијание на ситуацијата се огледува во т.н. Вертеров ефект кој повеќе е специфичен за самоубиствата, но го поврзуваат и со овие ситуации. Тоа значи дека за некои деца, особено ако се деца во пубертет или адолесценција, оваа ситуација ќе биде интересна, ќе ја доживеат како моќна и ќе го идентификуваат насилникот како некој кој е моќен и успешен. Тогаш е потребно да се обрне внимание и да се работи со овие деца и нивните семејства, без истите да се стигматизираат.

Социјалните мрежи и времето на користење интернет на учениците е проблем кој треба секако да се третира, независно од оваа ситуација. Мораме да разбереме дека зависноста од мрежите се зголемува и тоа е проблем, независно дали учениците следат позитивна или негативна содржина. Сè повеќе живеат во виртуелен свет и не развиваат капацитети за реалниот живот, оваа зависност влијае на нивната концентрација и фокус, расположение, мотивација, социјални релации. Стануваат немирни, анксиозни, депресивни, социјално се изолираат и не успеваат емоционално и социјално да созреваат, да проценуваат, да се адаптираат, да решаваат ситуации во реалниот свет на позитивен начин.

[caption id="attachment_107654" align="alignnone" width="1120"] (фото: илустрација)[/caption]

Стручната помош и поддршка е потребна во разни периоди низ кои поминува едно дете. Наспроти она сфаќање дека разговорот со психолог е срамно, стои и она дека разговорот со психолог може да му помогне на едно дете, на една личност полесно да ја помине фазата во животот низ која поминува. Секое дете поминува низ одредена траума и голема промена, било да е тоа развод на родители, загуба на близок член на семејството, починато милениче...

Постојат многу механизми кои на дете кое минува низ одредена животна ситуација можат да му помогнат, една од нив е стручната помош и поддршка. Се разбира дека наша задача е тоа да им го овозможиме, доколку забележиме дека детето се соочува со нешто, доколку ни го покаже тоа преку своето однесување. Тоа е нешто кое не треба да се наметнува, не можеме однапред да одредиме дека некој настан ќе влијае повредувачки на детето, но имаме обврска да следиме и одговориме на тоа - вели м-р Станковска

Булингот и насилството меѓу учениците се еден проблем, но реакциите на родителите кога ќе бидат известени за одредено однесување на нивното дете е друг проблем. Честопати наставниците трпат закани од страна на родители чии деца имаат проблематично однесување во училиштата.  Како да се прекине тој круг ученик на ученик, родител на наставник/професор? На ова м-р Станковска вели:

Ова е проблем на нашиот актуелен систем на вредности, кој е изместен. Кога ќе го ослободиме системот од корупција и непотизам и вратиме авторитетот на наставникот, ќе излеземе од тој круг.
Не можеме да очекуваме од децата да не влегуваат во булинг, доколку булингот го гледаат насекаде околу нив.
Проблематичното однесување на некои деца, е често пати само повик за помош. Должни сме да одговориме на тој повик, исто како што сме должни и да ги заштитиме децата кои трпат булинг.

Нашиот соговорник смета дека нашата нација станува посвесни за бенифите од работа со психолог и психијатар и го надминува оној непотребен срам за барање помош од стручни лица:

Можеби сите клиенти нема отворено да зборуваат за тоа со своите пријатели и роднини, но бараат стручна помош кога им е потребна, без срам и без стигма. Можеби повеќето ќе ја побараат 5 минути подоцна, односно кога проблемот веќе се развил наместо да ја побараат навреме, но ќе ја побараат. Кога човек има сериозен личен психолошки, семеен или животен проблем, тој бара помош. Тоа е човечки и природно да сакаме да ни е добро и нешто да надминеме.

 

Психолозите се единствени кои имаат знаење да направат тестирање и психолошки наод и мислење за личноста

Родителите од едно скопско училиште добиле вибер порака порака, како записник од Совет на родители после настаните во Србија во кој записник како прва точка е наведено дека е направен психолошки профил на дете во училиштето кое, цитирам, може да биде спремно на такви злодела, и за тоа ќе се разговара на родителски состанок.

М-р Станковска: Не би знаела како да ја разберам таа ситуација бидејќи ми се потребни повеќе информации. Во секој случај, транспарентноста е нешто кое го посакуваме сите, и истовремено нешто кое остава последици, односно оптеретува. Родителите се активни учесници во образовниот процес. Секој учесник во истиот си има своја улога, одговорност и задачи кои треба да ги сработи, односно постојат граници помеѓу различните улоги на учесниците, иако соработката помеѓу нив е неопходна. Психолозите се единствени кои имаат знаење да направат тестирање и психолошки наод и мислење за личноста. Тоа се доверливи информации кои ние етички немаме право да ги споделуваме со јавноста т.е. сите родители, туку постапуваме според одредени правила и механизми.

Разговараше: Билјана Бабиќ

The post Со фаст фуд решенија нема да го решиме проблемот со булингот во училиштата appeared first on Република.

Пред година ВМРО-ДПМНЕ на владата и понуди шест комисии кои би и помогнале во справување со одредени проблеми и една таква комисија беше и за образование. Но од владата не добивме не добивме повратен одговор и го сфативме тоа како негативен одговор бидејќи нашата понудена помош не беше прифатена, вели Весна Јаневска, претседател на републичка комисија за образование и наука на ВМРО-ДПМНЕ, во вечерашното гостување во Тема на денот во централниот дневник на телевизија Сител.

Јаневска истакна дека булингот постои и во училиштата во Македонија, но за жал за тоа се зборува сега откако се случи страшната трагедија во Србија.

Ние почнуваме дискусии и дебати на медиумите тогаш кога ќе се случи некој трагичен настан како во Србија и кога консеквенциите се страшни. А врсничкото насилство и булингот постоеле и кај нас, но зошто ние не обрнуваме внимание не е прашање за опозицијата, туку за владејачката партија, рече таа.

На прашањето кој е нејзиниот став во однос на тоа дека идеите на МОН се забрана на социјалните мрежи, поголемо присуство на психолози, рече дека според нејзе забраната на Тик Ток нема да го реши проблемот со врсничкото насилство.

Забраната на Тик Ток мрежата конкретно според мене не е решение, и ние како партија сме против цензура. Не сметам дека тоа ќе биде нешто кое што ќе помогне, додаде Јаневска.

The post Јаневска: Булинг има во училиштата во Македонија, но не се реагира за негово решавање appeared first on Република.

Наместо со тимови, комисии и системи, треба да се почне со 12 до 14-годишните деца кои на училиште одат со ножеви, му кажа актерката Весна Петрушевска на министерот за образование Јетон Шаќири на на дебата за врсничко насилство „Stop bullying“ што денеска ја организираше Американскиот Универзитет на Европа – ФОН.

Петрушевска кажа дека анкетирала 80 деца од 8 до 14 години во нејзината актерска школа и сите кажале дека имало ножеви во нивните одделенија, па праша: Како ќе го регулирате тоа?

Според Петрушевска, Шаќири „кажува бајка“ кога зборува што презема МОН за превенција од оваа појава во училиштата, меѓу кои и најавените протоколи од новата учебна година.

Има деца кои не сакаат да кажат за врсничкото насилство затоа што, прво, имаат страв од родителот дома да не го осуди, а, второ, кога ќе пријават кај психологот во основното училиште и кај класниот раководител, секогаш жртвата е виновник... Овие деца се други, растат во друго време и во таа насока треба да ги воспитуваме и да се грижиме за нивното ментално здравје кое во Македонија е табу-тема, кажа Петрушевска.

Во училишната торба стојат учебниците и тетратките и одговорност на родителите е да видат што има во торбата на нивното дете. МОН не може да биде на местото на родителот или на местото на психологот, рече министерот за образование и наука.

Одговорен е и родителот кој кривично одговара ако некој има некаков материјал и размислуваме за тоа во препораките. Не можеме во период од 18 часа да го знаеме движењето на учениците и секој треба да е одговорен, истакна министерот.

Министерот соопшти дека во фаза на изработка е правилник наменет за училиштата за превенирање и за постапување во случај на насилство.

Исто така, мора добро да размислиме за ограничување на влијанието на социјалните мрежи во училишната средина. Отворивме и електронска адреса каде учениците, родителите, но и граѓаните, може да пријават случај на врсничко насилство, рече Шаќири, додавајќи дека МОН е во фаза на консултации со професорите и експертите што е тоа што може да се преземе за да се подигне институционалната грижа за правилниот развој на учениците.

Според проф. д-р Ана Фрицханд, раководителка на Институтот за психологија на Филозофскиот факултет, за врсничкото насилство треба да се разговара и родителите мора да знаат како нивните деца поминуваат на училиште и дали се соочуваат со некаков проблем. Рече дека феноменот е повеќеслоен и затоа и пристапот за решавање е таков и треба да се вклучат секој од својата позиција и во својот домен да го вложи максимумот – родителите, наставниците, стручните служби, безбедносните претставници...

Основен минимум е децата да знаат што е добро, што е лошо, тоа значи да имаат веќе изграден некаков систем на вредности... Една карика не смееме да ја заборавиме секогаш кога зборуваме за врсничкото насилство, а тоа се пасивните набљудувачи кои, според истражувањата, надминуваат и 80 проценти од целиот контекст. Не е само жртва – насилник, туку што правиме со сите тие што тоа го гледаат, снимаат и различно реагираат на такви ситуации, рече проф. Фрицханд.

Таа порача и дека жртвата на насилство мора веднаш да каже за тоа, а не да молчи, затоа што, рече, колку повеќе молчи, му помага на насилникот.

Од пракса знаеме дека некогаш родителите последни дознаваат, а меѓу први кои дознаваат се соучениците. Важно е насилството не само да го препознаат, туку и да дејствуваат, да бидат проактивни, да не бидат пасивни, додаде Фрицханд.

Одговарајќи на прашање за каков вид насилства се дописите што во минатите два дена стигнале на е-поштата на МОН prijavinasilstvo@mon.gov.mk, министерот Шаќири одговори дека нема да спомнува конкретни случаи, но за оној за кој известувале медиумите, од родителите разбрал дека „проблематичното дете не е веќе во класот повеќе од осум дена“, но смета дека не е решение да биде отстрането од одделението.

Ги побарав сите документи кои институции како постапиле во конкретниот случај. Другите мејлови се слични на оваа ситуација, имаме анонимни пријави за кои треба да се потврди изворот на пријавата за да знаеме дали се точни податоците, додаде Шаќири.

The post Наместо со тимови, комисии и системи, треба да се почне со 12-годишни деца кои на училиште носат нож, му рече актерката Весна Петрушевска на министерот за образование appeared first on Република.

Методот КиВа (KiVa) е иновативна финска програма против малтретирање во училиштата, базирана на истражувања и докази за да се спречи агресија и да се запре вознемирувањето во и надвор од училиштата.

Промовира лична добробит и образование и обезбедува соодветни алатки за искоренување на случаите на малтретирање и вознемирување, како и постојано следење на ситуацијата во училиштата.

Вклучува план за сите ученици фокусиран на превенција од малтретирање, како и серија активности што треба да се преземат кога ќе се открие случај на вознемирување и да се стави крај на ситуацијата.

KiVa доаѓа од финскиот збор „Kiusaamista Vastaan“ што значи против малтретирање. Создаден е на Универзитетот во Турку во 2007 година, а го спроведуваат експерти по оваа тема и го финансира Министерството за образование и култура.

Дури 90 отсто од училиштата во Финска го користат овој метод, кој веќе се проширува и применува во други училишта во Белгија, Шведска, Естонија, Обединетото Кралство, Нов Зеланд и Шпанија, што го докажува неговиот успех и ефикасност.

KiVa е научно докажано со бројни научни студии, а се проценуваат и неговите ефекти. Покрај тоа, професионалците кои го користат овој метод мора да бидат обучени во програмата.

KiVa се обидува да ги промени правилата што ја регулираат групата. Има и други во групата, оние кои не малтретираат, кои набљудуваат, кои се сведоци и кои се смеат. Преку оваа невербална комуникација тие ја пренесуваат пораката дека тоа што се случува е забавно или добро, дури и ако имаат поинакво мислење, вели Кристина Салмивали, професорка по психологија и една од креаторите на програмата.

Целта е групата да види дека вознемирувањето не е забавно, дека не треба да се толерира, дека не треба да се гледа како детски работи и дека не мора да се усвојува пасивен и неутрален став.

Групата треба да учествува со запирање на вознемирувањето со тоа што не го поддржува вознемирувањето. Групата треба да обезбеди поддршка и заштита на жртвата за да види дека таа не е сама.

Програмата се состои од три дела: За возраст од 6 до 9 години; За возраст од 10 до 12 години; За трансфер во средно образование, достапно само во Финска
Има специфичен материјал за наставници, ученици и родители, тоа е програма која е трајно вградена во училиштата.

Се состои од 10 часови и работи кои се изведуваат во текот на курсот, каде што учениците посетуваат настава, дебатираат, спроведуваат активности и групнo работат против вознемирување и почитување на другите.

Учениците добиваат лекции како да го подобрат соживотот и знаењето за различните видови вознемирување, заедно со лекции за почит и емпатија, учење преку материјали за поддршка, аудиовизуелни материјали, видео игри, како и материјали за наставници и разговори за родители.

Дополнително, поставено е и виртуелно поштенско сандаче за оние ученици кои не сакаат да ја претстават својата ситуација пред другите соученици и преку него да кажат дека се жртви или учениците да пријават ситуации на кои биле сведоци.

Има и рекреативци, кои всушност се ученици кои носат рефлектирачки елеци, со цел да ја подигнат свеста и да запомнат дека и тие се одговорни за безбедноста на сите.

Од друга страна, секое училиште има тим од тројца професионалци кои реагираат веднаш штом дознаат за ситуација на малтретирање или кибер-малтретирање.

Прво делуваат како филтер, да препознаат дали се работи за систематско вознемирување. Тие потоа се среќаваат со жртвата за поддршка и помош. Разговараат и со вознемирувачите за да бидат свесни за нивните постапки и да ги променат, објасни Кристина Салмивали.

Финска се смета за една од најиновативните земји во Европа и земја со еден од најдобрите образовни системи во светот, според извештаите на ПИСА.

Во Финска, преку една студија беше оценето дека методот KiVa го намалува малтретирањето и виктимизацијата и ја зголемува мотивацијата, академските достигнувања, перцепцијата за позитивна клима во групата, како и намалувањето на анксиозноста и депресијата.

По интервенцијата, 98 отсто од жртвите изјавиле дека нивната состојба е подобрена.

Податоците од повеќе од 1.000 фински училишта покажаа дека по првата година од спроведувањето на програмата, малтретирањето и вознемирувањето биле значително намалени.

Оваа програма ја освои европската награда за превенција на криминалот (2009), наградата за најдобра социјална политика (2012) и Националните награди во 2008, 2010, 2011 и 2012 година.

The post Како со „КиВа“ методот речиси е искоренетп врсничкото насилство во Финска appeared first on Република.

На 6 мај околу 17.00 часот во СВР Скопје, М.А.М.(40) од Скопје пријавила дека околу 16.15 часот на ул.„Неготинска“ нејзиниот малолетен син бил физички нападнат од неколку малолетници.

Во 20.30 часот, пак, А.С.(36) од Скопје пријавила дека околу 19.30 часот во двор од основно училиште на подрачјето на Бутел нејзиниот малолетен син бил физички нападнат од двајца малолетници.

Од МВР велат дека се преземаат мерки за расчистување на двата случаи.

The post Дете нападнато од група во Ченто, сличен инцидент имало и во Бутел appeared first on Република.

Исклучително се битни тие психолошко-педагошки тимови во училиштата но мора да се оттргне стигмата од одење на психолог. Кај нас тоа се уште се доживува како некој вид казна, вели психијатарката Васка Митова во СТУДИО 10 на ТВ 24.

Пред една недела имавме ситуација малолетници да силуваат друг малолетник, а кој знае колку вакви случаи има. Затоа на секој знак треба да се направи консултација со стручно лице. Ако родителите не сакаат да прифатат дека детето има проблем, тој проблем ќе расте. Кај нас се малку застапени вештините на родителство, детето не се раѓа со прирачник како да се расне и воспитува, вели Митова.

Таа вели дека понатамошни вакви дејствија мора системски да се решаваат, оти многу е лесно да се обвини само детето или само родителите оти не е така. Митова апелира да се зголеми будноста оти не е можно ова да е импулсивна реакција затоа што има елемент на планирање.

И во нашето општество на пиедестал се става академската успешност, а не на останатите вештини кои треба да ги научи детето како моралните начела кои треба да се вградат во младата личност уште во градинка. Треба да научат за емоциите и да се јакне емпатијата. Петки може да има, ама ништо не вреди ако ги нема човечките карактеристики, вели Митова.

The post Митова: Ако родителите не сакаат да прифатат дека детето има проблем, тој проблем ќе расте appeared first on Република.

Околу 25 до 30 отсто од средношколците вршат одредено врсничко насилство спрема нивни врсници, покажува анализа на невладиниот сектор направена минатата година во државата, вели во изјава за МИА, професор доктор Лазар Нанев, претседател на Основен суд Кавадарци и претседател на државниот Совет за превентива против малолетничка деликвенција.

Според таа загрижувачка анализа, дури 14 отсто од децата потврдуваат дека биле жртви на врсничко насилство или булинг и тоа подолг временски период, нагласува Нанев.

Проблемот за врсничкото насилство е долгогодишен, а особено актуелен, по вчерашното убиство на неколку лица во училиште во Србија и информациите во јавноста дека и самиот малолетен убиец, претходно бил жртва на врсничко насилство.

Врсничкото насилство е тема на која изминатиот период и се посветува внимание, од страна на правници, психолози, педагози, особено од страна на невладиниот сектор. Ова насилство настанува како резултат на искривување на вредностите во општеството. Децата сторители на ваков вид насилство обично сакаат да привлечат внимание. Најпрвин имаше само вербално и физичко врсничко насилство, со исмејување, но сега има и психичко насилство со закани, насилство преку социјални мрежи. Тоа врсничко насилство, ако не се препознае и спречи трае се додека жртвата на булингот не се јави со соодветна реакција. Понекогаш, таа реакција може исто така да биде сериозна, како и самиот булинг. Затоа е неопходно да се делува превентивно во семејствата, училиштата, да се препознава евентуалното врсничко насилство и навреме да се реагира, појаснува Нанев.

Тој додава дека жртвите на врсничко насилство најчесто чувствуваат загрозеност и срам и се повлекуваат. Многу често не биле навреме препознати, се додека проблемот не ја надмине црвената линија.

Нанев нагласува дека на решавање на проблемите со врсничкото насилство, мора да има еден стратешки пристап. Мора да работи стручната фела, преку едукативни програми. Брзо и ефикасно да се препознае врсничкото насилство од кадарот во училиштата и соодветно да се делува. Родителите пак, да обрнат поголемо внимание околу тоа, како се однесуваат нивните деца.

The post Околу 30 отсто од средношколците во Македонија вршат врсничко насилство, покажува ланска анкета appeared first on Република.

Неколку девојчиња на возраст од 13 до 16 години претепале, малтретирале и понижиле 13-годишно девојче во Хајде во областа Дитмаршен во Германија.  Малтретирањето, кое беше снимено и објавено на интернет, ја разбранува германската јавност, а сега доби и епилог.

https://republika.mk/vesti/svet/ja-klotsaat-gasat-tsigari-od-litse-ja-palat-grupa-devojki-maltretiraat-13-godishno-devojche/

Во неделата малтретираното девојче се сретнало со двете деспотки и им простило. Како што пренесува германски „Билд“, девојчето во присуство на нејзината мајка и експертот за злоупотреба Карстен Стал, се сретнало со две од девојките кои ја напаѓале, а тие почнале да плачат веднаш штом ѝ се извиниле.

Никогаш повеќе нема да направиме такво нешто. Жал ни е поради тоа. Извини што ти го направивме тоа. Никогаш повеќе не треба да се плашиш од нас. Ако имаш проблеми, секогаш можеш да дојдеш кај нас, ѝ рекле тие.

Нивните мајки кажала дека ќерките „биле трогнати“ од оваа средба и „сфатиле каква ужасна грешка направиле“.

Не е наведено дали девојките ќе одговараат за насилството.

Девојчето се уште не се вратило на училиште и е на терапија, но според нејзината мајка откако ги прифатила извинувањата се чувствува многу подобро.

The post Малтретираното девојче им прости на своите деспотки: Никогаш повеќе не треба да се плашиш од нас appeared first on Република.

Неколку девојчиња на возраст од 13 до 16 години претепале, малтретирале и понижиле 13-годишно девојче во Хајде во областа Дитмаршен во Германија. Малтретирањето е се снимено со помош на паметен телефон, изјави денеска портпаролката на полицијата.

Инцидентот се случил на 21 февруари, а полицијата сега ги идентификуваше девојките напаѓачи. Портпаролката на полицијата не го коментираше прашањето дали девојчињата претходно го привлекле вниманието на полиција, поради истрагата која е во тек.

Како што пренесуваат германските медиуми, на видеото кое се шири по социјалните мрежи се гледа како на железничка станица на девојчето ѝ истурат сок врз главата, ѝ гасат цигари од лицето, на крај дури и ѝ ја палат косата. Во еден момент додека девојката се обидувала да стане, еден од напаѓачите почнал да вика: „Седни и моли ми се. Нема да те пуштам така лесно!“

Мајката на девојчето рекла дека мачењето било прекинато благодарение на храбрата интервенција на случаен минувач.

The post Ја клоцаат, ѝ гасат цигари од лице, ја палат: Група девојки малтретираат 13-годишно девојче appeared first on Република.

Последните неколку месеци низ училиштата во Штип регистрирани се два класични случаи на врсничко насилство, но се случиле надвор од училиштата. Снежана Санева раководител на Секторот за образование во Општина Штип вели дека едниот е пријавен кај нив, а вториот не е пријавен, но училиштето има преземено мерки.

Да истакнеме дека се работеше за случаи, кои се случија надвор од просториите на училиштат. За жал децата изразувале нетрпеливост и го искористиле моментот на превоз до училиштето, односно во автобусот, а исто така и надвор од школскиот двор. Но, како и да е целта е да се делува што порано, со цел да не ескалираат ваквите ситуации. Разговаравме со родители и со децата, со цел да не се повтори, вели Санева.

Таа се надева дека случаите ќе завршат со меѓусебно разбирање и нема да завршат во суд.

Општина Штип, Полициската станица-Штип и Невладината „ЕХО“ од денеска низ штипските усчилиштаа почнаа со едукативни предавања на тема врсничко насилство или познат како булинг.

Матеја Богдан од НВО „ЕХО“-Штип, вели дека според нивните истражувања предничи сајбер булингот и психичкото врсничко насилство. Посочи дека целта на едукативните предавања е младите да ги поттикнат да размислуваат на оваа сензитивна тема, бидејќи не знаат да прават разлика и немаат граница меѓу игра и насилство, едноставно, какошто вели не знаат да другаруваат.

Можеме да кажеме дека булингот е интензивен последните години, а ковидот можеби влијаеше да се зголеми сајбер булингот, бидејќи ги потикна младите повеќе време да поминуваат на социјалните мрежи со зад скриени намери да влијаат лошо врз другите. Моментално сајбер булингот е оној, кој е најмногу застапен и за кого сакаме најмногу да интервинираме , бидејќи многу се игнорира и не може да се препознае на почеток и да се реагира, вели Богдан.

Едукативните предавања почнаа од најголемото штипско основно училиште ООУ „Ванчо Прќе“-Штип. Психологот, Вилма Ничева вели дека свртуваат големо внимание на оваа тема, а наставниот кадар постојано оди и на обуки и имаат едукативни предавања. Прашана дали по пандемијата е зголемено врсничкото насилство, Ничева со одговор дека е малку зголемено во нивното училиште.

Баже Милев од Полициската станица во Штип истакна дека превентивните едукации имаат резултат кај младите, а заедно со невладината „ЕХО“ и Општина Штип во наредните денови ќе ги посетат сите основни училишта.

The post Во автобус и во школскиот двор: Два случаи на булинг во Штип во само неколку месеци appeared first on Република.