Претседателот на македонското Собрание, Африм Гаши, од Берлин порача дека владејачкото мнозинство е подготвено веднаш да ги вметне Бугарите во Уставот, но бара предвидливост на процесот.

Немаме никаков проблем со тоа Бугарите да бидат дел од Уставот, но очекуваме гаранции дека веднаш потоа нема да има следен услов, изјави Гаши за „Дојче веле“ (ДВ), посочувајќи дека во владата нема дилема дека треба да се продолжи европскиот пат на земјата што побрзо.

Откако Албанија изминатата недела и формално ги почна преговорите за членство во ЕУ, Гаши вели дека и официјално Скопје сака процесот да продолжи што побрзо.

Знаете дека блокадата од Бугарија се однесува на историски и идентитетски прашања. Ние и денеска во СР Германија сме дојдени токму поради таа тема. Сакаме што побргу да се одблокира тој процес. Ние сме подготвени Бугарите во Уставот да ги вметнеме веднаш. Мислам дека имаме целосен или поконкретно голем консензус околу тоа дека немаме никаков проблем со тоа Бугарите да бидат дел од Уставот. Но, нашиот проблем е со предвидливоста на процесот, и гаранциите дека веднаш после тоа ќе нема следно прашање или следен услов кој се однесува на историски и идентитетски прашања кои мислиме дека се тешко решливи на политичките маси на преговарање, изјави Гаши.

За предложеното посредништво од унгарскиот премиер Виктор Орбан што Бугарија го одби и дали Германија би можела да се вклучи како олеснувач, претседателот Собранието истакнува дека Скопје и Софија имаат капацитет да се договорат, но оти е добредојдена секаква помош.

Ние мислиме дека како две соседни држави имаме капацитет да седнеме и да се договориме, но секако, секаква помош е добредојдена за нас. Ние не ги бираме пријателите кои сакаат да ни помогнат, за нас е битно процесот на евроинтеграција да продолжи што побргу, и што побрзо да станеме членка на ЕУ, вели Гаши.

Тој нагласува дека владината коалиција на ВМРО-ДПМНЕ и Вреди е единствена во однос на приближувањето кон ЕУ и работи интензивно да се одблокира процесот.

Што се однесува до идентитетската компонента, иако тоа не ги тангира Албанците, добро е што не само Албанците, туку сите граѓаните на државата без оглед на етничката припадност, сите заедно стоиме во одбрана на македонскиот идентитет и затоа мислиме дека овој процес треба да продолжи и Македонија што побрзо да стане членка на ЕУ, изјави Гаши за „ДВ“.

Претседателот на Собрането Африм Гаши во Берлин се сретна со претседателката на германскиот Бундестаг, Барбел Бас, со пратеници и претседателите на парламентарните комисии, Михаел Рот, Антон Хофрајмер и Дирк Фопел, како и со министерката за Европа во германското МНР, Ања Лирман.

The post Гаши: Подготвени сме веднаш да ги вметнеме Бугарите во Уставот, но бараме гаранции дека ќе нема нови условувања appeared first on Република.

Претседателот на Социјалдемократскиот сојуз на Македонија, Венко Филипче, во емисијата „Само интервју“ на Канал 5, посочи дека сите ветувања на премиерот Мицкоски за време на предизборната кампања се лага.

„Ние не гледаме ниту една иницијатива да се подобрат тие услови за преговарање. Ветувањата на премиерот Мицкоски и благодарение на нивната политика на влошување на односите со соседите, паѓаат во вода и сега тој нема со кого да преговара. Сметам дека на виделина излегува една скриена агенда која што тој не ја кажа за време на предизборната кампања и со тоа ги излажа граѓаните и гласачите, а тоа е неговото ветување дека нешто ќе се подобри“, потенцираше Филипче.

Во интервјуто Филипче посочи дека Владата на СДСМ обезбеди преговарачка рамка со која е заштитен македонскиот идентитет, државните и национални интереси.

„ Тоа што е постигнато е една повеќедецениска теза на Бугарија дека ние сме еден народ во две држави паѓа во вода поради тоа што со внесување на бугарското малцинство во Уставот се прави јасна дистинкција македонскиот и бугарскиот народ. Придобивка од целиот тој пакет кој што се нарекува француски предлог е тоа што е точно и јасно прецизирано признавањето на македонскиот јазик во тој договор. И благодарание на тоа на македонски јазик го потпишавме договорот Фронтекс, прв договор кој што е потпишан на македонски јазик, кој што го признаваат сите земји членки на ЕУ вклучувајќи ја и Бугарија. Целата ЕУ стои зад тоа решение“, рече Филипче, додавајќи дека ВМРО ДПМНЕ и Мицкоски треба да сфатат дека веќе не се опозиција и дека имаат сериозна задача и одговорност пред државата и граѓаните.

The post Филипче: Со внесување на бугарското малцинство во Уставот се прави јасна дистинкција на македонскиот и бугарскиот народ appeared first on Република.

Поранешните премиери на Бугарија, Бојко Борисов и Кирил Петков, денеска изјавија дека Договорот за доброседство мора да се почитува и ги повикаа властите во Македонија да одлучат дали ќе ги внесат Бугарите во Уставот или нејзиниот пат кон ЕУ ќе остане затворен.

Лидерот на ГЕРБ Борисов, кој е и претседател на Комисијата за надворешна политика во бугарскиот Парламент, истакна дека Бугарија и Македонија потпишаа Договор за добрососедство, кој е вклучен во планот за проширување, и никој не може да отстапи од него.

Борисов смета дек Софија треба да остане и мирна и трпелива, да не изгледа агресивна бидејќи како што наведе „вината е кај колегите во Скопје“.

Посочи дека „секој што ќе го прекрши добриот тон, а Бугарија тоа не го направи, ќе ги трпи последиците“.

- Сè што направивме во Европската народна партија, во Европскиот совет, во Европската комисија, беше многу добро слушнато. Така функционираат европските институции. Не се закануваат, не навредуваат, а резултатот е Албанија оди напред. Таа го прифати бугарското малцинство, а нашите колеги од Македонија треба да ги понесат последиците од нивното досегашно однесување, рече Борисов во пресрет на разгледувањето на декларацијата за Македонија поднесена од крајнодесничарската партија „Преродба“. Борисов вели дека ќе се обиде да ги убеди колегите во Комисијата за надворешна политика да не се однесуваат емотивно, туку да прагматично и разумно.

И лидерот на ПП-ДБ Кирил Петков, вели дека Скопје треба да одлучи дали сака да ги прифати Бугарите во својот устав или да го запре патот кон ЕУ.

- Времето покажа дека договорот што го направивме во времето на нашата влада - францускиот предлог - се покажа многу добар за Бугарија. Реално, целата Европска унија застана на страната на Бугарија. Република Македонија мора да одлучи дали сака да ги прифати Бугарите во нејзиниот устав или нејзиниот пат кон Европа е затворен. Многу се надевам дека ќе се преиспитаат, бидејќи она што се случи во моментов е дека Албанија се одделува од нив и побрзо ќе го продолжи патот кон ЕУ, изјави Петков.

Одвојувањето на Албанија и Макеоднија на патотот кон ЕУ, го поздрави првиот човек на „Преродба“ Костадин Костадинов. Тоа според него се случи откако „Тирана го признала бугарското малцинство и му ги гарантирала сите уставни права“.

- Отсега, Република Македонија има два пата – или ќе го признае присуството на Бугарите како државотворен елемент на својата земја и ќе ги вклучи во Уставот или ќе остане надвор од преговарачкиот процес, рече Костадинов.

Во врска со Договорот за добрососедство, Костадинов смета дека откако Скопје одби да го почитува, и Софија веќе не треба да се држи до обврските што прозилегуваат од него.

The post Борисов и Петков: Скопје треба да одлучи-внесување на Бугарите во Уставот или затворање appeared first on Република.

Поранешниот министер за финансии Џевдет Хајредини смета дека со одлуката за промена на Уставот може да води кон поголема бугаризација на Македонците во земајва. Сепак, тој посочува дека е енигма дали планот ќе им успее.

Со Бугарите во уставот, Бугарија сака да го почне процесот на бугаризација на Македонците во Македонија. Дали во тоа ќе успее и колку тој процес ќе трае, никој не знае, напиша Хајредини на неговиот фејсбук профил.

Тој потенцира и дека Албанците за влез во ЕУ, немаат потреба за нонпејпер потпишан од Али Амети.

The post Хајредини: Со Бугарите во Уставот, Бугарија сака да го почне процесот за бугаризација на Македонците appeared first on Република.

Денеска во Пустец се оствари средба меѓу поранешниот градоначалник на општина Пустец Едмонд Темелко, кандидатот за градоначалник на таа општина на последните локални избори Панди Јани, македонските активисти во Албанија Спиро Малевски, Светко Китани, свештеникот Алексо Темелко, Доне Донев од Македонија и Тони Ордановски од Холандија, информираа од македонската заедница во Пустец, Мала Преспа.

Додаваат дека гостите Ордановски и Калпачки Германиа подариле книги за првиот македонски претседател Методија Андонов Ченто од авторот и актерот Доне Донев, кој изведе монодрама „За македонските работи“.

– Заедничката порака од семакедонската средба во Пустец е апел до Македонците за пописот на населението: Попишете се сите, тоа што сме биле отсекогаш, сме и ќе бидеме-МАКЕДОНЦИ! Да ставиме крај на бугарските пропаганди и без страв да останеме достојни на нашите македонски корени, посочуваат од заедницата.

Уште еднаш порачуваат дека „Во Албанија Бугари нема“.

Едмонд Темелко, кој во три мандати беше градоначалник на Пустец и е прв претседател на единствената македонска партија, МАЕИ, за МИА изјави дека иако се повлекол од политиката сега сака јавно да ја изнесе осудата на бугарските агитатори.

-Најостро ја осудувам асимилаторската политика на бугарските високи државни претставници и здруженија, која никако да престане. Апелирам до моите Македонци каде и да живеат во Албанија, да не потклекнуваат на никакви закани, слободно да се изјаснат тоа што сме-Македонци зашто тоа го овозможува пописот, порачува меѓу другото Темелко.

Според него Македонците ги има над 120 илјади во Албанија, живеат не само во областите Мала Преспа, Голо Брдо и Гора, туку со десетици илјади и во Елбасан, Тирана, Драч, Фиер и други.

The post Maкедонците во Албанија едногласни: Бугари во Албанија нема appeared first on Република.

Претседателката на Уставниот суд Добрила Кацарска вечерва во „Клик Плус“ на ТВ21 кажа дека, според неа, нема ништо да се загуби ако се внесат Бугарите и другите народи во Уставот.

Коментирајќи за постапката за внесувањето во Уставот, кажа дека „не треба да им се попречува на младите и на другите граѓани да им биде полесен животот со тоа што државата ќе влезе во ЕУ“.

За граѓаните да разберат, треба да знаеме друго. Да се нагласи дека Македонија е држава на македонскиот народ и на сите останати народи кои се наведени во Уставот. Лошо би било кога Македонија е држава на македонскиот или на бугарскиот народ, тогаш да. Но ние кога имаме во самиот Устав дека ова е држава на Албанци, Срби, Власи, Бошњаци и другите, што губат граѓаните ако бидат внесени и бугарскиот народ? Можеби поради што односите меѓу двете земји е таков, но лично мое мислење е да не се блокира државата, ниту да им се попречува на младите и на другите граѓани. Што се губи тука? Во овој момент нема ништо спорно ниту ништо противуставно да може да се попречи измената на Уставот, рече Кацарска.

The post За Кацарска нема ништо страшно во тоа да се внесат Бугарите во Устав appeared first on Република.

Претседателот на ДУИ Али Ахмети порачува дека прашањето за уставните измени бара сериозен пристап и повикува да се внесат Бугарите во Уставот „со цел продолжување на евроинтеграцискиот процес“.

Уставните измени се сериозно прашање. Има сериозни разлики со опозицијата. Ова прашање бара сериозен пристап. Се работи за иднината на државата. Видете, уставните измени се историска можност за Македонците, ако се вистински патриоти ќе гласаат ЗА. Ова го имам кажано на сите политички партии, вели Ахмети во интервју за ТВ21.

Како што пренесува телевизијата во објава на делови од интервјуто, што ќе биде објавено вечер, Ахмети додава дека „на состанок пред неколку години, каде бил присутен и лидерот на ВМРО-ДПМНЕ, Христијан Мицкоски, им кажал за острата реторика на националистичките партии во Бугарија“.

Јас сум бил на неколку средби во Софија, националистичките партии ми велеа – „всичко Блгари, нема македонски народ“, и да ви кажам искрено оваа нивна реторика ме вознемири, и ова бараше сериозно да се следи и анализира. Ова им го кажав на меѓународните претставници дека националистиките партии во Бугарија имаат остра реторика и тоа е сериозен проблем кој може во идинина да ни направи уште поголем проблем. Еве го проблемот денес. Затоа, да ги внесеме Бугарите во уставот. Тоа е за доброто на државата. Да одиме напред и да не се враќаме назад. Ни бегаат луѓето надвор од државата, бегаат Македонци, Албанци, сите бегаат затоа што не гледаат иднина. Со зачленувањето во ЕУ, се отвора преспектива, вели Ахмети.

The post Ахмети: Македонците, ако се вистински патриоти, ќе гласаат ЗА внесување на Бугарите во Устав appeared first on Република.

Со скапа кампања не може да се убедат граѓаните да поддржат нешто што знаат дека е на штета на националните интереси. Затоа спротивен ефект имаат билбордите дека „Ние сме Европа“.

Да Македонија е Европа ама Брисел прави сѐ да ни се одмили ЕУ со уцените дека мораме да прифатиме Бугарите да влезат во Уставот а за возврат да добиеме само пофалба и петка на рачето.

Да, ако Македонија ги направи уставните измени, формално ќе ги отвори преговорите и ќе се сопне на првата бугарска кривина.

Сега услов за отворање на преговорите се уставните измени, потоа ќе биде Гоце Делчев, па заедничката историја и така до недоглед...

Затоа треба да бидеме на чисто и работите да ги поставиме на здрави основи.

Потребни се избори, не поради тоа што ВМРО-ДПМНЕ ќе дојде на власт. Тоа е повеќе од сигурно и тоа го знаат и во СДСМ, туку поради ветувањата што ќе им се дадат на граѓаните во однос на уставните измени. ВМРО-ДПМНЕ ќе мора во кампањата јасно и гласно да каже дали и како ќе го решава проблемот со уставните измени кој СДСМ го наметна.

Сегашниот парламентарен состав на ВМРО-ДПМНЕ ниту ветило ниту има право да го менува Уставот.

Тоа, не го вети ниту СДСМ на последните избори но власта последно за што се грижи се ветувањата кон тие што ги избрале.

Ако ВМРО-ДПМНЕ ја добие поддршката од граѓаните тогаш има полно право да влезе во процесот на уставни измени.

Значи, ДА за уставни измени но не вакви со додавање на запирка и впишување на дел од бугарскиот народ и со Комитет за односи меѓу заедниците кој де факто значи дводомен Парламент.

The post Потребни се избори, па потоа решение за уставните измени appeared first on Република.

Бугарија во координација со дипломати од ЕУ спроведува нова тактика која треба да ја натера опозицијата да гласа за уставни измени.

Откако минатата недела беа дојдени министрите за надворешни работи на  Австрија, Чешка и на Словачка, денеска доаѓа некаква „Вајмарска тројка“ со високи дипломати на Германија, Франција и Полска.

Сега дипломатите убедуваат дек Бугарија нема да има нови услови и дека тие ќе напраат се што е во нивна моќ Бугарија да не ја блокира Македонија со билатерални прашања.

За сево ова да е поубедливо  и бугарското министерство за надворешни работи излезе со соопштение дека немаат ови барања за соседот освен внесувањето на Бугарите и она што е договорено.

Но како што се вели „ѓаволот се крие во малите букви“.

 Го очекуваме првиот чекор во овој процес, согласно обврските потпишани од Скопје во јули 2022 година-вели бугарското МНР.

Токму она што беше договорено минатата година во т.н Француски предлог, кој во суштина е бугарски бидејќи во него се содржани апсолутно сите барања на Бугарија го става источниот сосед во лагодна ситуација да навистина не и требаат нови барања.

Протоколите кои станаа дел од преговарачката рамка и даваат право на Бугарија во секој момент да се повика на обврските од договорот меѓу Заев и Борисов, содржината на учебниците, напредокот во  историската комисија.

Само ќе замафтаат со она што го потпиша Османи, а потоа и Ковачевски и „всичко“ ќе биде по процедура.

The post На Бугарија не ѝ требаат нови услови: Само ќе замафтаат со она што го потпишаа Османи и Заев и „всичко“ ќе биде по процедура appeared first on Република.

Премиерот Димитар Ковачевски денеска изјави дека  ВМРО-ДПМНЕ треба да остане на искажаниот став во однос на уставните измени и да се работи на ниво на работни групи и да се договорат деталите, потенцирајќи дека со внесувањето на Бугарите во Премабулата на Уставот паѓа во вода тезата за „еден народ во две држави“.

- Не толкувам што е јавно кажано и јавно презентирано пред медиумите, а преку медиумите и до јавноста. Сите можевме да видиме на прес-конференцијата после лидерската средба на 7 јуни дека позициите беа приближени. Прво, дека за ВМРО-ДПМНЕ е прифатлива промена на Уставот. Тоа беше кажано јавно на телевизија, бидејќи пред тоа, тие излегуваа дека не е прифатливо под кои било околности промена на Уставот. Тоа тогаш беше променето, јавно кажано, рече Ковачевски.

Премиерот потсети дека од ВМРО-ДПМНЕ собирале нотарски изјави на кои се потпишувале пратениците и дека партискиот лидер Христијан Мицкоски тврдеше дека ќе даде оставка ако и еден пратеник на партијата гласа за уставните измени, но оти сето тоа со изјавата на 7 јуни е тргнато на страна. И сега, додаде Ковачевски, имаме позиција во која што ВМРО-ДПМНЕ не е против уставни измени и внесување на делови од други народи во Преамбулата на Уставот.

- Втората работа, дека ВМРО-ДПМНЕ е подготвена да влезе во Владата, исто така беше кажано на прес-конференцијата, што потврдува нешто друго, а тоа е дека исто така не важи веќе дека оваа Влада нема легитимитет и дека Собранието нема легитимитет да носи одлука во делот на продолжување на европскиот пат. Имаше уште еден услов од страна на претседателот на ДПМНЕ, а тоа е партијата ДУИ да не биде дел од Владата: Тие веднаш на прес-конференција кажаа дека ДУИ е подготвен да поддржи Влада по усвојувањето на уставните измени, рече премиерот Ковачевски.

Според него, таквата Влада треба да биде Влада на големо, широко обединување во која треба да учествуваат сите и која треба да ги заврши уставните измени и скринингот, да ги отвори кластерите заедно и да затвори барем две поглавја од првиот кластер и потоа да се оди на избори.

- Дали со таа влада, дали со техничка влада согласно закон, тоа е работа на договор, вели Ковачевски.

Сега останува, како што нагласи, ВМРО-ДПМНЕ да остане на искажаниот став и да се работи на ниво на работни групи и да се договорат деталите.

The post Koвачевски: Со внесувањето на Бугарите во Премабулата на Уставот паѓа во вода тезата за „еден народ во две држави“ appeared first on Република.

Академикот Владо Камбовски денеска изјави дека прашањето за уставните измени не заслужуваат толкава бура во јавноста, бидејќи со иницијативата за внесување на Бугарите во Преамбулата на Уставот „тропаме на отворена врата“. Тие, потенцира академикот, се внесени во Уставот како заедница затоа што во Преамбулата постои генерална клаузула која зборува и за „други народи односно заедници“.

- Јас мислам дека е потребен дијалог во кој треба некои разумни аргументи. Значи не можеме во овој период да се водиме од страсти или стравувања, конкретно во однос на уставните амандмани. Околу едно прашање кое не заслужува да предизвика таква бура, да речам, и чувствата на луѓето. Еве конкретно за тоа прашање, бидејќи тоа е дел од овој период на обврски што треба да остварат. Па ние со тоа, таа иницијатива всушност за внесување на Бугарите во Преамбулата на Уставот тропаме на отворена врата, бидејќи тие се внесени во Уставот како заедница затоа што во преамбулата постои генерална клаузула која зборува за други народи, односно заедници. А во посебните одредби што се однесуваат на правата на припадниците на заедницата, постои потполна изедначеност на сите заедници било тие да се признати или не се признати, истакна академикот Камбовски.

Тој посочи и на меѓународните конвенции кои поаѓаат од ставот дека една заедница, национална, етничка, религиозна..., која и да е, постои со самото свое постоење без оглед дали е призната формално или не е призната во Уставот или во другите акти на државата, бидејќи се работи за права, колективни права итн.

- Зборот ми е низ еден разумен, трезвен дијалог без политички калкулации, без манипулирање, без непотребен популизам итн... нека се слуша малку мудриот глас на научната јавност и нека се дебатира со аргументи во однос на сите одбрани исклучителни прашања за кои сакаме да дебатираме со аргументи, без некакво политикантство или калкулации што тоа ќе значи за една партија, за друга партија, туку поаѓајќи од еден општ интерес и на македонскиот народ и на сите граѓани што живеат во Република Македонија, рече академикот Камбовски во изјава за медиумите пред почетокот на Конференција за забрзување на процесот за пристапување во ЕУ во МАНУ.

The post Поранешниот претседател на МАНУ Камбовски смета дека внесувањето на Бугарите во Уставот не заслужува толквава бура во јавноста appeared first on Република.

 Работната група на денешната седница ја усвои Предлог иницијативата за потребата од измени на Уставот со насоки за изменување и дополнување на Уставот на Република Македонија. Предлогот ќе се достави до Владата која ќе треба да ја проследи иницијативата до Собранието каде ќе ги помине сите работни тела.

-Состанокот заврши успешно, едногласно ги донесовме сите одлуки, имавме плодна дискусија, имаше презентација на едни, на други аргументи, но она што е најважно е дека се согласивме со она што е предлог за пристапување кон измена на Уставот на РСМ со одредени насоки, изменувања и дополнувања таму каде што треба. Промените се во делот на Преамбулата со тоа што се додаваат неколку народи. После бошњачкиот народ се додаваат зборовите: бугарски народ, хрватски народ, црногорски народ, словенечки народ, еврејски народ, египќански народ, изјави по состанокот претседателката на работната група Маргарира Цаца Николовска.

Втората измена, како што дополни таа, е во делот за дијаспората и во амандманот 34 кој е заменет со член 49 и амандманот 2. Во овој амандман на Уставот на Република Македонија со кој се заменува членот 49 и амандманот 2, после бошњачкиот народ се додаваат зборовите бугарски народ, хрватски, црногорски народ, словенечки народ, еврејски народ, египќански народ.

Таа соопшти дека има измена и во Комитетот за односи меѓу заедниците заради тоа што сега се јавува поголем број на народи кои можат да продуцираат поголем број пратеници и да има пратеници во Комитет на заедници.

-Тука е бројот 43, запазен е паритетот, со тоа што по 16 члена од редовите на пратениците во Собранието од редовите на Албанците и Македонците, по еден од редот на пратениците во преамбулата, со тоа што доколку некоја од заедницте нема пратеници, тогаш останува Народниот правобранител по консултации со релевентните претставници на тие заедници да предллжи членови на Комитетот, рече Цаца Николовска.

Работната група изготвила и кратко образложение за иницијативата и нејзината основаност и оправданост.

-Ова е наративниот текст. Јас ги прочитав измените и одредените членови во Уставот, меѓутоа амандманите после ќе треба да се припремаат во текстот така како што треба да се презентираат пред Собранието. Сега да посакаме успешна работа и на Собранието, да ги прифатат овие да речам предлог измени за да може понатаму државата успешно да ја тера постапката во остварување на заедничката стратешка цел - влез во Европа, изјави Цаца Николовска.

The post Работната група го стокми предлогот: Се менува Прембулата, Бугарите, стануваат народ, а не дел од народ appeared first on Република.

Не е парадоксално, не е само смешно, туку е неприфатливо Бугарите да влезат во преамбулата на Уставот со нејзината сегашна содржина во делот во кој се споменуваат “дел од тој и тој народ“.

Ова во синиќешната емисија „Само интервју“ на Канал 5 телевизија го истакна проф. Владо Поповски, еден од тројцата творци на највисокиот правен акт во државата.

-Во АСНОМ, Република Македонија се создаде како резултат на победата на ослободителната армија против бугарскиот окупатор, а сега не се знае што се сака да се каже со тоа што ќе се рече дека дел од бугарскиот народ им благодари на своите претци, што ја создале Република Македонија и ги зачувале сите свои знаменитости. А, всушност, ја ограбија Македонија, Еве еден пример. Ц рквата „Св.Богородица“ е во 1943 година комплетно ограбена и запалена од бугарскиот окупатор. И не е само црквата „Св.Богородица“ во Скопје. Бугарскиот министер претседател, кој беше елиминиран од комунистичките власти (Богдан Филов н.з.), има направено  цел список, што се е најдено и одземено од Македонија

Мојот став е да се стават Бугарите во преамбулата, но да се реконструира текстот на целата Преамбула за да не испадне дека Бугарите се благодарни на своите претци за создавање на македонската држава, нивните културни богатства, тардиции итн. Неприфатливо, ама не е до таа степен спротивно на фактите и на историјата како што е случајот со останатите делови од народи, изјави проф. Поповски.

The post Владо Поповски: Неприфатливо е Бугарите да влезат во Преамбулата со сегашната содржина appeared first on Република.

Ако не бидат донесени уставните измени, тоа би ја однело земјата во изолација и може да резултира Македонија да не се интегрира во ЕУ уште многу децении, вели шефот на дипломатијата Бујар Османи. Опозицијата, пак, останува на ставот дека во овој пратенички состав, Собранието нема мандат, ниту демократски легитимитет да отвори или менува Устав.

- План Б е да не се донесат уставните измени. Ова би ја однела земјата во долга изолација бидејќи во ноември ќе бидат прекинати преговорите за нас, а ќе продолжат за Албанија. Во меѓувреме се создаде побрз пат за членство во ЕУ, главно поради Украина, но и малку да го поттикне дијалогот Србија-Косово, рече Османи за ТВ Клан.

Според Османи, опозицијата нема да може да аргументира пред граѓаните зошто ја блокира европската иднина на земјата, бидејќи, како што вели, за да се донесе таква одлука, треба да има сериозни аргументи.

Што се однесува на меѓународните претставници во овој процес, Османи вели дека важните одлуки за судбината на земјата не треба да се прават под меѓународен притисок, бидејќи според него, земјата и домашните политичари се доволно зрели да ја разберат важноста на одлуките што ги донесуваат.

- Секако дека меѓународната заедница помогнала во комуникацијата, во претставувањето на различни сценарија, во зависност од нашите одлуки, но потсетувам дека по почетокот на јавната расправа и граѓаните јасно ќе разберат за што се работи со овие уставни измени, рече Османи.

Пратеникот на ВМРО-ДПМНЕ Антонио Милошоски, пак, вчера по средбата со специјалниот пратеник на Германија за Западен Балкан, Мануел Сарацин повтори дека ставот на пратеничката група на ВМРО-ДПМНЕ и коалициските партнери е единствен и значи дека во овој пратенички состав, Собранието нема мандат, ниту демократски легитимитет да отвори или менува Устав без да има потврда за тоа и понуда на решение на избори.

-Втората тема која што отворивме е дека е болен парадокс во време кога се разговара на политички теми поврзани со Европската Унија, истовремено во истата соба да имате седница на Комисијата за европски прашања каде се употребува европското знаменце за да се покрие досега можеби највисоката корупција на тајниот документ којшто го потпишале Артан Груби и Димитар Ковачевски за таканаречените делови од коридори. Друго што беше споменато е дека ги споделивме бројките кои велат дека 85 проценти од македонскиот народ е против ваквото наметнато уценување и барање за промена на Уставот, рече Милошоски.

Посочи дека на Сарацин му предочиле оти сериозни невладини граѓански организации што се занимаваат со европските интеграции подолго време укажуваат на тоа дека според нивната проценка ова нема да биде ниту прво, ниту последно барање од страна на Бугарија и затоа треба претпазливо да се пристапи кон оваа преземена одлука за да не се соочиме со втора, трета или четврта блокада.

Сарацин завчера се сретна со претседателот Стево Пендаровски, при што Пендаровски изразил очекување за натамошна силна поддршка од германските власти во пристапувањето на земјава кон ЕУ, посочувајќи дека забрзувањето на интегративните процеси е во интерес на политичката, безбедносната и економската стабилност на целиот регион.

Оствари средба и со првиот вицепремиер и министер за политички систем и односи меѓу заедниците, Артан Груби, кој го информирал за досегашните чекори во насока на исполнување на обврската за уставните измени.

Во вторникот, Сарацин оствари средба и со лидерот на опозициската ВМРО-ДПМНЕ Христијан Мицкоски, кој уште еднаш го афирмирал ставот на партијата во однос на евроинтегративниот процес и започнувањето на преговорите, додавајќи дека граѓаните на Македонија час поскоро треба да бидат дел од ЕУ, но процесот да се води исклучиво на европски процеси и принципи, а не на уцени и закани од соседна Бугарија.

За евроинтеграциите на државата, премиерот Димитар Ковачевски, во Рејкјавик каде учествуваше на Самитот на Советот на Европа, разговарал со високи европски претставници.

Ковачевски на Фејсбук објави дека имал срдечна средба со Шарл Мишел, како што наведува „голем пријател и поддржувач во нашата стратешка определба за полноправното членство на Македонија во Европската Унија“.

- Нашите меѓународни партнери и поддржувачи го препознаваат напредокот на нашата држава. Во Македонија гледаат сериозен партнер кој се залага за демократија, слобода, мир и негување добрососедски односи. Европска перспектива на нашата земја е неповратен процес во кој имаме поддршка од нашите европски пријатели, напиша Ковачевски.

За средбата со францускиот претседател Емануел Макрон, пак, истакнува дека го споделиле оптимизмот за што побрзо членство на Македонија во Европската Унија и за брз реформски процес. - Во наш интерес е влијателни лидери како што е францускиот претседател да ни бидат поддршка на нашиот пат кон ЕУ, вели Ковачевски.

Ковачевски оствари куса средба и со претседателката на ЕК Урсула Фон дер Лајен, на која и се заблагодарил за поддршката на европскиот пат на државата.

Владини извори во понеделникот брифираа дека ако не се донесат уставните измени земјата ќе влезе  во изолација и во група на држави без долгорочна перспектива.

Варијантата А, велат владини извори, е завршување на уставните измени и продолжување – отворање на првото Поглавје, а варијанта Б е прекинување на преговорите, Албанија да ги продолжи преговорите, а земјава да влезе во една декада на изолација и да ја пропушти шансата, имајќи ја предвид новата геополитичка состојба пред се заради Украина.

Во однос на тековниот скрининг процес за усогласување на ЕУ-законодавството, владини извори информираат дека се завршени објаснувачките скринизи за четири кластери, процесот е на половина, останува уште да ги слушнеме во објаснувачкиот дел новините во законодавството на ЕУ во два кластери – Кластер 5 – Ресурси земјоделство и кохезија и Надворешни односи и очекувањата на Владата се тоа да се заврши до есен.

Сумирајќи ја посетата на владината делегација на САД, владини извори брифираа дека Вашингтон директно и порачал на опозицијата да го поддржи европскиот пат на државата, да поддржи уставни измени и да не блокира закони од клучно значење за државата.

Во САД, посочуваат извори од Владата, добивме недвосмислена и силна поддршка за продолжување на европскиот пат на државата, што значи спроведување на уставните измени, односно усвојување на амандманите и продолжување на преговорите како што се пропишани согласно Преговарачката рамка.

САД преку своите високи функционери ја нагласуваат поддршката што ја имаме за продолжување на европскиот пат, како и нивната недвосмислена поддршка за носење на овие одлуки коишто се потребни во нашето Собрание и таа порака беше директна и до опозицијата - идеолошките разлики не можат да бидат пречка за напредок на државата и за носењето на одлуките што се важни за граѓаните, а не за политичките партии, а најмалку пак за нивните лидери бидејќи лична кариера на некого е многу помалку важна од иднината на државата, дополнуваат владини извори.

Оттаму додаваат дека евроинтеграцискиот процес е неповратен процес којшто е започнат и не може некој да го врати назад, ниту да го однесе во друга насока.

Во меѓувреме, Работната група за подготвување на предлог-иницијатива за потребата од уставни измени, до петок треба да го изгласа деловникот за работа, најавија по состанокот одржан минатата недела.

Претседателката на работната група поранешна судијка Маргарита Цаца Николовска, во однос на изјавите од Влада дека до крајот на мај очекуваат да биде познат текстот на уставните амандмани, рече дека не би шпекулирала со време.

-Комисијата е составена од 23 членови, секој ќе сака нешто да каже, има право нормално. Сето тоа треба да се разгледува, да се сумира и во зависност од сето тоа ќе оди драфтирање на предлог нацрт амандманите, изјави Цаца Николовска.

Работната група за подготовка на предлог иницијативата за потребата од уставни измени, за внесување на Бугарите, заедно со другите етнички заедници во Уставот, што пак е услов за отворење на кластерите во процесот на преговори со Европската Унија, ја сочинуваат 23 членови од кои десет се од редот на експертите, десет се предлози на политички партии и тројца се членови од институции. 

The post За власта, недонесувањето на уставните измени ќе ја изолира државата, опозицијата останува на ставот дека нема да има промена на Уставот appeared first on Република.

Работната група за уставни измени најавува дека следната недела ќе излезе со предлогот за промена на Уставот во кој ќе бидат вметнати и Бугарите.

Дали тоа ќе биде како што власта сакаше да прикаже „козметичка“ промена со додавање на Бугарите како делови од народот или пак ќе се оди на целосно нова Преамбула никој не знае.

Друга работа е што работна група во оваа фаза не смее да се формира и тоа е можно само откако ќе се отвори Уставот. На тоа денеска реагираше и координарот на пратеничката група на ВМРО-ДПМНЕ Никола Мицевски кој нагласи дека за ова некој може и да одговара.

Постапката се знае како е, прво се отвара Уставот па потоа може да се разговара. За ова може некој и да одговара затоа што формирање на работна група за нешто имагинарно и исплаќање на средства од буџетот на државата за нешто што не е по постапка исто така е злоупотреба на службена положба и оштетување на буџетот. Така да тие што ја тераат оваа постапка добро да размислат за ова што го прават-вели Мицевски за „Република“.

Она што е потребно е на граѓаните да им се објасни кои ќе бидат последите, односно придобивките доколку Бугарите влезат во Уставот. Со механизмот „Балансер“ бугарската заедница ќе бара вработувања во државни интитуции и настава на бугарски јазик.Преведено во бројки тоа значи дека секоја институција треба да има 0,19 проценти Бугари.

Покрај тоа Македонија ќе треба со државни пари пари да финансира и прославува национални празници на бугарската заедница како што е трети март, денот на Санстефанска Бугарија која опфаќа и делови од Македонија.

Протоколите кои се дел од Францускиот предлог покажуваат дека историјата е составен дел од преговорите со ЕУ. Покрај тоа што бугарски преднак добија Цар Самоил, Кирил Методиј, Климент и Наум, ќе биде многу тешко да се оди понатаму во преговорите без на ова Македонија да се согласи.

Крајната денеска ја потврди и Андреј Ковачев кој вели дека може да зборуваме за македонски јазик и Македонци но само од 1944-та што значи дека признавањето на македонскиот јазик преку Фронтекс за Бугарија а со тоа и на ЕУ не значи дека јазикот има историски континуитет, исто како и признавањето на Македонците се сведува на нивно постоење без никаква етногененеза. Врвна хипокризија е изедначувањето на Гоце Делчев со Ванчо Михајлов и на врховнизмот што значи негирање на македонизмот.

https://republika.mk/vesti/makedonija/so-vleguvanje-vo-ustavot-bugarite-kje-dobijat-vrabotuvanja-i-nastava-na-bugarski-jazik/

The post Ако Бугарите влезат во Уставот, со државни пари ќе го славиме Денот на Санстефанска Бугарија која опфаќала делови од Македонија! appeared first on Република.

Претседателот Стево Пендаровски денеска истакна дека тој преку својот претставник учествува во работната група за уставните измени и оти со тоа јасно го кажува неговиот политички став, дека е за промена на Уставот со внесувањето на Бугарите во него.

Јас учествувам преку мој претставник и со тоа јасно го кажувам мојот политички став, дека сум за тие уставни измени, сметам дека тие не се нешто страшно за нас и сметам дека државата нема да пропадне ако ги внесеме Бугарите, заедно со другите шест, седум народи, рече шефот на државата одговарајќи на новинарско прашање во врска со првиот состанок на работната група, на заедничката прес-конференција во Скопје со претседателката на Косово Вјоса Османи Кадриу.

Пендаровски во врска со денешниот почеток на работната група, рече дека неговиот преставник ќе учествува на работната сесија на групата формирана од Министерството за правда, на која како што истакна треба да се утврди динамиката на работа, колку состаноци се потребни, да се утврди редот во работата.

Јас се надевам со оглед на тоа што е обврска, која ја знае генералната јавност и сите ние ја знаеме дека тука објективно нема многу работа. Не знам колку седници ќе им требаат, но факт е дека е добро што почнува таа постапка и добро е што ќе се одвива пред очите на јавноста, тука нема скриени агенди, некој да не се плаше дека ќе се направи нешто надвор од она што е веќе воведено во Преамбулата и во нормативниот дел на Уставот за сите останати етнички заедници. Разлика нема да има за Бугарите се разбира, нагласи претседателот на државата.

Свои членови во работната група номинираа дел од полтичките партии и институции. СДСМ за свој претставник ја предложи Цветанка Иванова, Арбр Адеми е од ДУИ, Ремзи Мехмеди од Алијанса на Албанците, Соња Мираковска од НСДП, Нано Ружин од ЛДП, Христа Најданов од ДОМ, Темелко Ристески од Партијата на пензионери, Раметула Куќи од ДПА, Еран Куртиш од Партијата за движење на Турците и Бејџан Илјас од Демократската партија на Турците.

Од институциите предложени се Александар Спасов од Кабинетот на претседателот на Република Македонија, Драган Тилев од Секретаријатот за европски прашања и Шпенд Садики од Министерството за надворешни работи.

Министерството за правда минатата недела го објави и тимот експерти кои ќе учествуваат во работната група за уставни измени. Експертската работна група ќе ја сочинуваат Сали Мурати - поранешен претседател на Уставен суд, Маргарита Цаца Николовска - поранешен судија во Европскиот суд за човекови права во Стразбур, Бајрам Положани - поранешен уставен судија и професор по уставно право, Бранко Наумовски - поранешен претседател на Уставен суд, Јетон Шасивари - професор на Универзитетот на ЈИЕ, Ана Чупеска - професор на Правен факултет „Јустинијан Први”, Елена Михајлова Стратилати - професор на Правен факултет „Јустинијан Први”, Беса Арифи - професор на Универзитетот на ЈИЕ, Јагода Митревска - професор на Меѓународен Славјански Универзитет и Марија Пандевска - професор на Институт за национална историја.

Од Министерството за правда велат дека списокот на работната група ќе се дополнува во наредниот период и со други членови кои ќе дадат свој придонес во подготовката на уставните измени.

Се очекува, откако ќе се подготват измените, предлогот да ги помине сите работни тела во рамките на Собранието. Паралелно ќе се одржуваат и стручни јавни расправи на кои експерти, партии, граѓански организации и други институции ќе може да ги кажат своите ставови

Опозициските партии, меѓу кои и најголемата ВМРО-ДПМНЕ, и покрај повиците од власта, одбиваат да учествуваат во работната група. Остануваат на ставот дека нема да поддржат уставни измени и оти тие нема да бидат донесени за време на овој парламентарен состав. 

The post Пендаровски: Државата нема да пропадне ако ги внесеме Бугарите во Уставот appeared first on Република.

Пратеничката од ВМРО-ДПМНЕ, Благица Ласовска за „Анализа“ на ТВ24 истакна дека мнозинство од граѓаните не сакаат да се случат уставни измени и ако одите против волјата на граѓаните и ако правите нешто што е противуставно, противзаконско мора да одговарате.

- Затворена е темата уставни измени за ВМРО-ДПМНЕ. Уставот нема да се менува, ова го кажувам на ваков начин за да се смири јавноста особено Македонците и кои на средбите молат да не се попушта. Тука ја затвораме темата. Нема потреба повеќе да се дебатира за уставни измени, бидејќи нашиот став нема да се промени, рече таа.

Во врска со работната група, Ласовска истакна дека партиските претставници сакаат да си направат референца за биографија за Уставни судии, додека професорите по Уставно право одбија да бидат дел од неа.

- Работната група која е составена дел од кривичари и малку ексерти по Уставно право. Најеминентните професори по Уставно право се изјаснија дека не сакаат да учествуваат во работната група затоа што нема консензус. Членот 131 од Уставот е многу јасен – одлука за пристапување кон измена на Уставот донесува Собранието со двотретинско мнозинство гласови од вкупниот број на пратеници, рече Ласовска.

Таа потенцира ајде за зборуваме за криминалот, за образованието, за руинираното здравство, Уставот е затворена тема.

The post Ласовска: Прашањето за Уставот е затворена тема за ВМРО-ДПМНЕ, ајде да зборуваме за криминалот на власта appeared first on Република.

Очекуваме Република Македонија да ги заврши уставните измени за да продолжи со преговорите за влез во Европската Унија. Ова го изјави портпаролката на Европската комисија, Ана Писонеро, пренесе БГНЕС.

„Македонија е во првата фаза од преговорите. Се движи непречено и очекуваме да биде се готово околу оваа есен. Следниот чекор што го очекуваме се измените на Уставот што земјата е должна да ги направи доколку сака да продолжи со пристапните преговори“, изјави Писонеро.

The post Европска комисија: Македонија мора да го смени Уставот ако сака да влезе во ЕУ appeared first on Република.

Прашањето околу вметнување на Бугарите во Уставот е суверена одлука што треба да ја донесе самата држава, порача евроамбасадорот Дејвид Гир при посетата на општина Дебрца.

По однос прашањето имам две забелешки, а кои не се дел од јавната дебата по прашањето. Всушност, првата е дека живееме во исклучително важни времиња, со нов моментум во контекст на процесот на проширувањето на ЕУ, низ случувањата во Западниот Балкан. Тоа се заснива врз цврстата констатацијата дека тоа се ра боти за заеднички интерес на ЕУ и на Западниот Балкан, како на економски така и на безбедносен план, рече Гир.

Тој посочи дека патот за членство на државата кон ЕУ е отворен, а преговорите се во тек и Брисел сака да ја види земјата како полноправна члена на Унијата, со интерес за продолжување на тој процес.

Што е однесува конкретно на измените на Уставот за вклучување на лицата кои се самоидентификуваат како Бугари, всушност тие промени нема да бидат драматични оттаму што ќе бидат само консолидација на и онака добрата оценка што ја ужива земјата кога станува збор за уредувањето на меѓуетничките односи. Инклузијата на одредени заедници во Уставот не ги загрозуваат националните интереси на државата. Но, сепак, тоа е прашање што треба да го донесе самата држава, нагласи евроамбасадорот Гир.

The post Гир: Вметнувањето на Бугарите во Уставот е суверена одлука, треба да ја донесе самата држава appeared first on Република.

Тоа е една многу погрешна констатација која што изминатиот период ја зборуваше прво Али Ахмети, потоа дел од министрите кои што доаѓаат од ДУИ, а сега гледам, како што е редоследот таму, почнува да го зборува тоа и Ковачевски и останатите од СДСМ, Маричиќ и сличните, вели претседателот на ВМРО-ДПМНЕ, професор д-р Христијан Мицкоски оддговарајќи на новинарски прашања од отворањето на политичката академија во организација на Партискиот истражувачки и аналитички центар „Љубиша Георгиевски“ со поддршка на меѓународни институции како Фондацијата Конрад Аденауер.

Мицкоски посочи дека ги разбира преставниците на власта затоа што тие изгледа дека многу не другарувале со книгите, па не ги разбираат работите и поради тоа се обидуваат, нешто кое што го слушнале, недослушнале да го прераскажуваат.

„Ниту авторот на живковизмот немал проблем со современата македонска нација. Ниту тој имал проблем, ниту пак сега и неговите следбеници во Бугарија, а еден од нив е претседателот Радев. Тие немаат проблем со македонската нација која што е резултат на формирањето на современата македонска држава како резултат на одржаните собранија на АСНОМ и АВТОЈ и така натаму. Туку тие имаат проблем со македонскиот народ претходно, значи пред да се формира македонската држава и македонската нација, тоа е проблемот. Тие велат дека македонскиот народ е всушност бугарски народ и тоа е суштината. Никој од нив нема проблем кога вели, видете современата македонска нација е резултат на заседанијата на АСНОМ и на АВНОЈ, антифашистичката борба и формирањето на македонската држава, тоа треба секој да го знае. Тука нема никој проблем, туку што се случувало претходно. Тие велат, да тогаш се формираани тие ентитети, но претходно таму постоеле Бугари и живееле Бугари, тоа е суштината“, рече Мицкоски.

Така што, додаде Мицкоски, ваков тип на тврдења се резултат или на непознавање или на свесно манипилирање.

Во однос на македонскиот јазик, Мицкоски посочи дека тој е службен јазик на ОН уште од 1945 годи и истиот е кодифициран на атинската конвенција во 1977 година, додека пак службен јазик на Европска Унија ќе стане кога Македонија ќе биде полноправна членка што не се знае кога ќе се случи и за што ВМРО-ДПМНЕ бара гаранции.

„Што се однесува до јазикот, тоа е многу важно да се каже, бидејќи често пати се експлоатира тезата во јавност за договорот со ФРОНТЕКС. И тоа е уште една небулоза и уште една лага и манипулација. Македонскиот јазик е дел од официјалните јазици на обединетите нации уште од 1945 година, кога поранешната федерација станува членка на Обединетите Нации, а со тоа трите тогаш официјални јазици на поранешната федерација, српско-хрватски, словенечки и македонски стануваат официјални јазици на Обединетите Нации. Кодифициран е 77-мата година за време на атинската конференција 1977 година, а ќе стане официјален јазик на Европската Унија тогаш кога Македонија ќе стане членка на Европската Унија. А кога ќе стане Македонија членка на Европската Унија, гледате дека немаме гаранции. Тоа е она кое што ВМРО-ДПМНЕ го бара, гаранции. Еден од трите столба е тоа што ВМРО-ДПМНЕ го бара, а тоа се гаранции“, истакна Мицкоски.

The post Мицкоски: Тврдењата на власта дека со влез на Бугарите во Устав се прави дистинкција со Македонците или се резултат на незнаење или на свесно манипулирање appeared first on Република.