Владимир Урин, директорот на светски познатиот московски Бољшој театар, најави оставка, пренесува ДПА, додавајќи дека минатата година Урин ја критикувал руската војна против Украина.

„Денес морам да се збогувам со вас, бидејќи денес е мојот последен работен ден на Бољшој“, им рекол 76-годишниот Урин на својот персонал во видео пораката што почнала да кружи на социјалните мрежи.

Портпаролката на тој престижен театар за ДПА ја потврди автентичноста на видеото и додаде дека наскоро ќе биде соопштено и официјално.

Урин беше еден од потписниците на отвореното писмо минатата година во кое културните работници повикаа на прекин на борбите во Украина.

Поради војната и санкциите од Западот, многу уметници го прекинаа својот ангажман во театарот.

Урин, кој ужива огромна репутација во театарскиот свет, не само во Русија, туку и пошироко, го презеде раководството на Бољшој во 2013 година. Според договорот тој требаше да остане на оваа позиција до 2027 година.

Руските медиуми кои ја објавија веста за оставката не ги наведоа причините за одлуката на Урин. Се шпекулира дека Урин би можел да биде заменет со светски познатиот диригент Валери Гергиев, кој е близок до претседателот Владимир Путин.

Но, 70-годишниот Гергиев, кој беше разрешен од функцијата главен директор на Филхармонијата во Минхен бидејќи не сакаше јавно да се изјасни за руската инвазија на Украина, рече дека е ангажиран во театарот Марински во Санкт Петербург и дека веќе бил многу зафатен и не барал дополнителна работа.

The post Директорот на Бољшој театарот поднесе оставка appeared first on Република.

Музичкиот директор и главен диригент на Бољшој театарот, Туган Сокиев, ја објави својата оставка, велејќи дека се чувствува под притисок поради повиците да заземе став за војната во Украина.

Русинот во изјавата во неделата рече дека поднесува оставка „со моментален ефект“ од неговата функција во московскиот театар, како и од неговата еквивалентна позиција во францускиот оркестар во Тулуз.

Сокиев (44) беше назначен од Бољшој во 2014 година. Тој беше донесен како дел од потезите за подобрување на имиџот на театарот по скандалите вклучувајќи го и нападот со киселина во 2013 година врз неговиот тогашен уметнички директор Сергеј Филин.

Меѓународно познатите руски изведувачи се под притисок да заземат став уште од почетокот на инвазијата на Русија на 24 февруари.

Војната предизвика бурни реакции низ светот на уметноста и културата, со театри, филмски фестивали и други настани кои ги откажаа руските проекции и претстави.

Во вторникот, на диригентската ѕвезда Валери Гергиев, лојалист на Кремљ, му беше одземена улогата во Минхенската филхармонија затоа што не ги осуди постапките на Русија.

Сокиев потекнува од истиот регион Северна Осетија во Русија како Гергиев и се смета за негов штитеник.

Сокиев во долгата изјава рече дека „многу луѓе чекаа да се изразам и да го слушнат мојот став за она што се случува во моментот“, мислејќи на воената акција на Русија во Украина.

Тој рече дека одлучил да поднесе оставка откако „беше принуден да се соочи со невозможната опција за избор меѓу моите сакани руски и сакани француски музичари“.

Тој го наведе противењето на властите во Тулуз за неговото планирано организирање на француско-руски музички фестивал таму, велејќи дека тие „сакаат да се изразам за мир“.

Сокиев стана музички директор на оркестарот во Тулуз во 2008 година и продолжи да работи со оркестарот откако се приклучи на Бољшој.

Сокиев не кажа експлицитно дали ги поддржува или се спротивставува на акциите на Русија во Украина, но рече дека „никогаш не сум поддржувал и секогаш ќе бидам против какви било конфликти во каква било облик и форма“.

Тој рече дека музичарите стануваат „жртви на таканаречената ‘култура на откажување’“ и посочи дека руската музика може да биде под закана.

Наскоро од мене ќе биде побарано да изберам помеѓу Чајковски, Стравински, Шостакович и Бетовен, Брамс, Дебиси, предупреди тој.

Генералниот директор на Бољшој Владимир Урин изјави за државната новинска агенција ТАСС дека е тажен поради одлуката на Сокиев.

The post Музичкиот директор на Бољшој театарот поднесе оставка поради војната во Украина appeared first on Република.