Во пресрет на одбележувањето на православниот празник Успение на Пресвета Богородица кај народот познат како Голема Богородица, во манастирот во Матка, кај Скопје во вторник на 27 август ќе се одржи вечерна богослужба и полноќно бдение.

На денот на празникот 28 август, во утринските часови во манастирот ќе се одржи Света божествена литургија со која ќе чиноначалствува Неговото Блаженство, Архиепископот Охридски и Македонски Г.г. Стефан.

Традиционално во дворот на манастирот на празникот по богослужбата ќе се одржи крводарителска акција.

The post Празнични богослужби во манастирот во Матка за Успение на Пресвета Богородица appeared first on Република.

Папата Франциск денеска отслужи богослужба во базиликата Свети Петар по повод Велики петок, во пресрет на ноќната поворка во римскиот Колосеум, што се одржува на најтажниот ден во христијанскиот календар, денот кога Исус умре на распнувањето.

Одбележувањето на Велики петок му претходи на Велигден, кој се смета за радосен ден во црковниот календар на христијаните кои веруваат дека Исус воскреснал на тој ден.

Папата Франциск утре ќе одржи Велигденско бдение, а во недела велигденска миса, по што ќе им се обрати на верниците „Urbi et Orbi“ (На Градот и светот), со порака и благослов од централниот балкон на базиликата Свети Петар.

The post Папата одржа богослужба за Велики петок appeared first on Република.

Во предвечерието на великиот празник Рождество на Пресвета Богородица, попладнево се служи Празнична вечерна богослужба во храмот посветен на Богородичното рождество во центарот на Скопје.

На богослужба присуствува и поглаварот на Македонската православна црква – Охридска архиепископија (МПЦ-ОА), г.г. Стефан.

Вечерната молитва ќе биде проследена со литија околу централното градско подрачје.

Македонската православна црква - Охридска Архиепископија ги поканува сите верници и граѓани да земат молитвено учество на Вечерната богослужба и на Литијата.

Утре (21 септември) православните верници го одбележуваат Рождеството на Пресвета Богородица.

The post Вечерна богослужба и литија во црквата Рождество на Пресвета Богородица во Скопје appeared first on Република.

Чет-бот со вештачка интелигенција (АИ) ги замоли верниците во преполната црква Свети Павле во германскиот град Фирт да станат од своите клупи и да се молат.

ChetGPT, отелотворена во брадест аватар на џиновски екран над олтарот, потоа почна да одржува богослужба пред повеќе од 300 луѓе во петокот наутро на експериментална служба во лутеранска црква.

„Драги пријатели, чест ми е што стојам овде и ви проповедам како прва вештачка интелигенција на овогодинешната конвенција на протестантите во Германија“ рекол аватарот со безизразно лице и монотон глас, пренесува АП.

Четириесетминутната служба, вклучувајќи проповед, молитви и музика, ја создадоа ChetGPT и Jonas Zimmerlein, теолог и филозоф од Универзитетот во Виена.

Еден час пред богослужбата, пред црквата се создала долга редица луѓе

Црковната служба на вештачката интелигенција беше еден од стотиците настани на протестантскиот конгрес во баварските градови Нирнберг и соседниот Фирт, и предизвика толку голем интерес што луѓето формираа долга линија пред неоготската зграда од 19 век еден час пред почетокот.

Самата конвенција Deutsćer Evangelisćer Kirchentag се одржува секоја втора година на различно место во Германија и привлекува десетици илјади верници да се молат, пеат и зборуваат за својата вера.

Тие зборуваат и за актуелните светски настани и бараат решенија за клучните прашања кои оваа година го вклучуваат глобалното затоплување, војната во Украина и вештачката интелигенција.

Верниците внимателно го слушаа проповедањето на вештачката интелигенција

Верниците во црквата внимателно слушаа додека вештачката интелигенција проповедаше за оставање на минатото зад себе, фокусирајќи се на предизвиците на сегашноста, надминувајќи го стравот од смртта и никогаш не губејќи ја верата во Исус Христос.

The post Аватар наместо свештеник: Вештачката интелигенција одржа служба во црква во Германија appeared first on Република.

Свештеникот Матија Бернаскони (36) го предизвика гневот на верниците, но и на црквата, кога во неделата отслужи богослужба во морето облечен само во своите гаќи за капење.

Сè се одвиваше во Калабрија, каде свештеникот од Милано отпатува во камп придружуван од 21 студент и волонтери од организацијата Либера.

Неделата беше последниот ден од кампувањето, а свештеникот сакаше да одржи богослужба пред сите заедно да си одат дома.

Тој се соблекол во гаќи за капење и влегол во водата, а душекот на надувување му послужил како олтар.

Бројни капачи го гледаа отец Матија како одржува богослужба на плажа, а многумина ја фотографираа и снимија оваа необична сцена. Секако, сите снимки и фотографии се најдоа на социјалните мрежи, а потоа и во медиумите, се појавија многу луѓе да го критикуваат свештеникот за ваквото „богохулно однесување“.

Самата црква го критикуваше однесувањето на свештеникот, нагласувајќи во соопштението дека литургијата има „посебен јазик, обичаи и симболи, кои треба да се почитуваат и ценат“.

Свештеникот и одговори на надбискупијата со писмо објавено на веб-страницата на неговата парохија.

Отец Матија се бранел во писмото и категорично негирал дека има намера да ја банализира литургијата.

– Тоа беше само услуга со која заврши една недела работа со младите кои учествуваа на кампот. Понизно се извинувам од срце за конфузијата што ја предизвика објавувањето на сликите во медиумите – напишa отецот Матија.

Cuando lo sagrado y lo virtuoso es atacado, y lo profano y lo vulgar es exaltado, lo único que le espera a esa sociedad es caos, anarquía y autodestrucción. El "padre" #MattiaBernasconi, de la parroquia de San Luis Gonzaga en Milán, celebró una misa en las aguas del mar de... pic.twitter.com/fAqnhjlEOj

— Abstención Colombia (@AbstCol) July 27, 2022

The post Душекот му беше олтар: Свештеник одржа богослужба во гаќи за капење appeared first on Република.

Откако во четвртокот вселенскиот патријарх г. Вартоломеј на нашиот архиепископ г. Стефан му го предаде Патријаршискиот и синодален акт на Вселенската патријаршија за примање на Охридската Архиепископија во богослужбено и канонско единство, а вчера наша црковна делегација молитвено присуствуваше на празнична Божествена литургија по повод именденот на вселенскиот патријарх, утре во патријаршискиот храм во Фанар поглаварите на двете цркви ќе одржат заедничка Патријаршиска и синодална света литургија.

Во обраќањето кон патријархот Вартоломеј, по вчерашната Божествена литургија по повод неговиот именден во вселенскиот Соборен храм „Св. Георгиј Победоносец“ во Истанбул, архиепископот Стефан му се заблагодари за прифаќање на нашето апелациско прибегнување и за востановувањето на литургиското општење со нашата Црква.

Како првојерарх на Охридскиот престол, од името на свештениот Синод, на свештенојерархијата, на монаштвото и на верниот народ, како и од свое име, со преполно срце на уважување и почит, уште еднаш Ви благодарам за честа со која нè удостоивте и за срдечната љубов со која нè прегрнавте – соопштувајќи ни го благопријатниот Ваш суд за нашето апелациско прибегнување: востановувањето на литургиското општење со Вас и, преку Вас, со полнотата на Православната Црква, истакна архиепископот Стефан по Литургијата на која покрај него присуствуваа и митрополитите дебарско-кичевски г. Тимотеј и преспанско-пелагониски г. Петар, како и епископите хераклејски Климент и антаниски Партениј.

Сега е јасно, додаде г. Стефан, колку Вашето добротворство за нашата Охридска Архиепископија, се покажа, всушност, како Ваш најнов принос пред Сељубивиот Бог – како долично дело за таткото на Православните.

А ние, скромните Ваши чеда, можеме да Му заблагодариме на Бога, покрај за споменатата милост, ете – и за тоа што сме удостоени да бидеме современици на Вашата личност и на Вашите дела за доброто на Црквата и што ја имаме можноста да се радуваме и да се утешуваме од Вашиот подвиг на „добро стоење“, на автентично последување и себепрегорно, дури до мачеништво, исповедање на канонскиот и свештен поредок на Православната Црква, рече меѓу другото архепископот Стефан по литургијата на која присуствуваа и голем број верници од земјава, кои допатува во Истанбул по повод значајните настани за нашата Црква што деновиве се случуваат во древниот Фанар.

На крајот од богослужбата, епископот антаниски Партениј со неговото братство и сестринство, на вселенскиот патријарх Вартоломеј му подари архиерејска панагија во чест на неговиот именден и во знак на благодарност за признавањето на Охридската Архиепископија.

Во четвртокот во вечерната богослужба во Ставропигијалниот манастир „Балаклија” во Истанбул, што се одржа по повод споменот на Светите Апостоли Вартоломеј и Варнава и празникот на иконата на Мајката Божја „Достојно ест“, откако на г. Стефан му го предаде Патријаршискиот и синодален акт на Вселенската патријаршија за примање на Охридската Архиепископија во богослужбено и канонско единство со останатите православни цркви, со кој се отстранува повеќедецениската шизма наложена врз нашата Црква, вселенскиот патријарх Вартоломеј порача дека многумина православни верници „се радуваат за враќањето на христоносниот народ во прегратките на Мајката Црква“.

Денеска, браќа мои, кога наскоро ќе се исполни великиот ден на Педесетница, стаса и многукопнежниот час на решение за еден долг и болен раскол во Телото на Едната, Света, Соборна и Апостолска Црква. Денеска помеѓу нас стојат овде… најсвештениот во Христа брат, архиепископот охридски г. Стефан и неговата чесна придружба, за да го примат од нашите раце Патријаршискиот и синодален акт за востановување на црковното општење на нивната Мајка, Великата Христова Црква со нив, а од неа и преку неа со останатите помесни, свети Божји Цркви, преку врската на љубовта, единството и евхаристиското зближување преку взаемна почит, истакна патријархот Вартоломеј.

Тој нагласи дека станува збор за „голема радост на небото, зашто одамна скинатата риза на Господа се обновува, цела и неповредена, со иглата на Светиот Дух“ и „мноштвата на православните се радуваат за враќањето на христоносниот народ во прегратките на Мајката Црква“.

Свештенејши архиепископе г. Стефане, Мајката Црква Константинополска болуваше, се молеше, долго трпеше, очекуваше, се надеваше, советуваше и се подготвуваше за наоѓање решение за проблемот што ја засегаше Вашата помесна Црква… Ги разбираме вашите потешкотии, искрснатите дилеми, внатрешните соображенија, променливите различни мислења, но решенијата сакаат жртва и храброст. Така ја чувствуваме и радоста на сите вас за настанатиот развој. Од денеска, кога добивате положба и служба во сесвештеното Тело на Црквата, се надеваме дека ќе се покажете еднакво достојни на благонаклонетоста на Великата Христова Црква кон вас… Го благословуваме Народот на најсветата Архиепископија Охридска. Ја поздравуваме видливата, добра и братољубива расположба на најсветата Црква на Србија кон вас. Очекуваме и официјално известување од вас за напредокот на дијалогот помеѓу вас. На крај, ви го врачуваме востановителниот за црковното општење Патријаршиски и Синодален Акт и го претвкусуваме сослужението со вас на претстојната недела на Педесетница, а Бог на мирот нека биде со сите вас, амин, додаде патријархот Вартоломеј.

Архиепископот г. Стефан на чинот на примопредавањето на Актот во своето обраќање кон патријархот Вартоломеј, нагласи дека делегацијата на нашата Црква дошла кај него, во време во кое тој го слушнал крикот на нашето срце и го почувствувал копнежот на нашите души.

Дојдовме при Вас и сме многу радосни поради тоа. Дојдовме да го изразиме нашиот копнеж по Христа, кој, како православни Христијани, го имаме, и да ги изразиме почитта, честа и благодарноста пред Вашиот престол – да ги објавиме гласно, овде, од под куполата на Константинополската Црква, пред сечесниот Вселенски престол, нашата љубов кон целата Вселена, истакна неговото блаженство г. Стефан.

Затоа, додаде тој, стоејќи денес пред Вас и со привилегијата да стоиме со Вас, дојдовме да Ви кажеме едно големо благодарам.

Еве, токму во оваа благословена вечер, во која се собрани многу благодатни добрини: празникот на апостолите Вартоломеј и Варнава и соборот на првата светогорска икона ‘Достојно ест,; оваа ставропигија во која се наоѓаме и живата вода која се роди од Живоносниот источник, мртвите во гробовите и мртвите што воскреснавме. еклитонот кој кон Вас го упативме и преку чие оправдување нè прифативте во општење со Вас и со сиот православен свет и Вие, Архиепископе Константинополски, Вашите привилегии и Вашето срце полно со љубов, нагласи архиепископот Стефан.

По четврточната богослужба, архиепископ г. Стефан, во знак на благодарност отслужи Трисагија пред гробот на патријархот Димитриј, за покојните цариградски пастири погребани на истите гробишта.

Одлуката на Светиот патријаршиски синод за отстранување на шизмата и примање на Охридската Архиепископија во богослужбено и канонско единство со останатите православни цркви беше донесена на синодското заседание на 9 мај, со што практично Вселенската Патријаршија ја призна црковната јерархија предводена од архиепископот Стефан за канонска и валидна во сеправославниот свет и воспостави канонско и литургиско општење со неа.

Предавањето на Патријаршискиот и синодален акт за отстранување на шизмата не значи и давање томос за автокефалност со кој официјално се регулира меѓународното име и статус на нашата Црква, туку е израз на татковска љубов и грижа од страна на Вселенската Патријаршија и претставува објава дека таа повеќе не е во шизма и раскол со севкупната православната Црква и нејзините свештенослужители можат да сослужуваат со свештенослужители од другите помесни православни цркви, додека за утврдување на конечниот статус ќе следуваат дополнителни преговори.

Ваквиот потег на патријархот Вартоломеј и на Вселенската Патријаршија претставува историски настан, бидејќи со него конечно се исправи долгата неправда нанесена врз нашата Црква и со признавањето на нејзината каноничноста се стави крај на речиси седумдесетгодишната изолација на возобновената Охридска Архиепископија.

The post Утре заедничка богослужба на патријархот Вартоломеј и архиепископт Стефан appeared first on Република.

Од Соборниот храм Св. „Климент Охридски“, во однос на редоследот на богослужби во страсната и светлата седмица за Воскресението Христово – Велигден, за МИА информираа дека во сабота во 23:00 часот започнува Полуноќницата. По опходот околу Соборниот храм „Св. Климент Охридски“ и објавата на Христото воскресение, продолжува Утрената и Света Златоустова литургија.

На 21 април – Велики четврток, од 9:00 часот ќе се одржи литургија на свети Василиј Велики со Вечерна. Негово Блаженство г.г. Стефан ќе богослужи во храмот „Свети вмч. Димитриј”. По светата литургија ќе се изврши Света тајна Елеосвештение во сите храмови. Од 18:00 часот ќе се одржи читање на 12-те евангелија за Христовите страданија. Поглаварот на МПЦ-ОА ќе богослужи во Архиепископскиот соборен храм „Свети Климент Охридски” – Скопје.

На 22 април, на Велики петок во 8:30 часот ќе се одржат Царски часови со Велика вечерна. Околу 10:00 часот ќе се одржи изнесување на светата плаштаница. Г.г Стефан ќе богослужи во храмот „Света Петка” во Црниче. Во 18:00 часот – Оплакување на Спасителот Господ Исус Христос. Неговото блаженство ќе богослужи во Архиепископскиот соборен храм „Свети Климент Охридски”- Скопје.

На 23 април, на Велика сабота, во 9:00 часот ќе се одржи Света Василиева литургија со Вечерна. Г.г. Стефан ќе богослужи во храмот „Свети Наум Охридски” во Радишани. Во 23:00 часот – Полуноќница. По опходот околу Соборниот храм „Св. Климент Охридски“ и објавата на Христото воскресение, продолжува Утрената и Света Златоустова литургија.

На 24 април, на Воскрсението Христово – Велигден, во 9:00 часот архиепископот Охридски и Македонски г.г. Стефан ќе богослужи Воскресна литургија во Соборниот храм „Свети Климент Охридски”- Скопје. Во 11:00 часот ќе се слави Второ Воскресение, со читање на Евангелието на повеќе јазици – Едноцрквие во Соборниот храм „Свети Климент Охридски” – Скопје.

Во текот на Светлата седмица, на 25 април, на вториот ден од Христовото Воскресение, во 9:00 часот г.г. Стефан ќе богослужи во храмот „Рождество на Пресвета Богородица” во Центар.

На 26 април – Воскресение Христово, трет ден, во 9:00 часот поглаварот на МПЦ-ОА ќе богослужи во храмот „Света Петка” во Црниче, а на 29 април на Свети мач-ки Аганија, Ирина и Хионија, Источен петок (Балаклија) во 9:00 часот ќе богослужи во храмот „Свети Јован Крстител” во Капиштец.

The post Редослед на богослужби во страсната и светлата седмица за Воскресението Христово – Велигден appeared first on Република.