Вчера во 23:20 часот било пријавено дека на магистралниот пат Битола-Прилеп кај село Долно Српци патничко моторно возило форд со бугарски регистарски ознаки, управувано од Д.И.(45) од Битола (женско лице), удрило во Џ.Ф.(52) од Албанија.

На местото на несреќата починал пешакот, а смрт била констатирана од страна на лекар од Итната медицинска помош. Со телесни повреди се здобила малолетна сопатничка од возилото, констатирани во Клиничката болница Битола.

Извршен бил увид од Јавен обвинител и увидна екипа од СВР Битола.

The post Загина пешак на патот Битола-Прилеп, повредено девојче appeared first on Република.

Околу 86 килограми марихуана во вредност од околу 300.000 евра и едно уапсено лице е епилогот од вчерашната акција за сузбивање на недозволена трговија со дрога на полициски службеници од Одделот за криминалистичка полиција – Сектор за недозволена трговија со дрога, оружје и опасни материи, Специјалната антитерористичка единица „Тигар“ и СВР Битола – ОВР Прилеп.

Во акцијата, како што соопшти МВР, пресечен е меѓународен канал за транспорт на дрога од Албанија, преку нашата земја, со крајна цел – Република Грција.

Во утринските часови на регионалниот пат Битола-Прилеп, на влезот во Прилеп, од страна на полициски службеници од сообраќајна полиција била дадена наредба за запирање на патничко возило „ауди А4“ со охридски регистарски ознаки, но возилото не сопрело, туку забрзало, оштетувајќи две службени возила на МВР и загрозувајќи ја безбедноста на полициските службеници кои извршувале службени дејства, велат од МВР.

Набрзо, на излезот од Прилеп возилото било пронајдено, додаваат од министерство, додека лицето А.Г.(23) од Охрид, кој го управувал возилото, бил лишен од слобода во моментот додека од возилото исфрлал четири торби покрај патот.

Од извршениот увид, во присуство на Јавен обвинител од ОЈО Прилеп, во торбите покрај возилото биле пронајдени повеќе пакувања со марихуана, кои се подигнати и предадени на вештачење. Воедно, при претрес извршен со судска наредба во домот на А.Г. во Охрид, биле пронајдени 17 куршуми со различен калибар, изјави портпаролот на МВР, Сузана Прањиќ Талевска.

Од страна на ОВР Прилеп во текот на денешниот ден против А.Г. ќе биде поднесена кривична пријава за сторени кривични дела по чл.215 за „недозволено производство и пуштање во промет на наркотични дроги, психотропни супстанци и прекурсори, по чл.383 за „напад врз службено лице при вршење работи на безбедноста“ и по чл.396 за „недозволено изработување, држење и тргување со оружје или распрскувачки материи“, сите според Кривичниот законик.

The post Пресечен меѓународен канал за транспорт на дрога на патoт Битола-Прилеп appeared first on Република.