Новиот топловод под мостот „Беласица“ од ноќеска е целосно ставен во функција и обезбедува стабилна и сигурна испорака на топлинска енергија, информира АД ЕСМ.

Откако вчера најави дека можно е да има прекини во испораката при поврзувањето на топловодот, денеска АД ЕСМ информира дека се поминало без никакви прекини или отстапки во квалитетот на испораката на топлинска енергија.

Соопшти дека поставувањето на новите топловодни цевки е завршено „во рекордно краток период од помалку од два месеца, благодарение на високата ефикасност и посветеноста на тимовите на АД ЕСМ и ЕСМ Дистрибуција на топлина“.

Иако првично беше предвидено привремено прилагодување на квалитетот на испораката за мал дел од корисниците за време на финалните активности, ефикасната координација и професионалноста на екипите овозможија поврзувањето на новиот топловод со постоечкиот систем за дистрибуција на топлинска енергија да помине без никакви прекини или отстапки во квалитетот на испораката. Задоволен сум што со тимска работа и вложување на натчовечки напори успеавме да го завршиме зафатот за 40 дена и овој капацитет веднаш да го ставиме во целосна функција - истакнува Петар Милетиќ, директор на ЕСМ-Дистрибуција на топлина.

The post Новиот топловод под мостот „Беласица“ проработи без прекини во испораката на топлинска енергија appeared first on Република.

Пожарот кој избувна во подножјето на планината Беласица на 10 овој месец, меѓу селата Смоларе и Мокрино, е изгаснат, соопштија утрово од Центарот за управување со кризи (ЦУК).

Шумскиот пожар е ликвидиран, а беше зафатена површина од околу 20 хектари најразновидна шума. На терен беа 7 вработени и 2 теренски возила од ЈП „Национални шуми“, ПШС „Беласица-Струмица“ , се наведува во информацијата од ЦУК.

Завчера дојде до повторно разгорување на пожарот на планината Беласица во близина на село Смоларе и притоа се приближил кон црквата „Свети Петар и Павле“, но со брза интервенција не беше дозволено пожарот да се прошири.

Инаку, вчера и покрај влажнотo и студено време струмичките пожарникари интервенирале на пожар на отворено на запалена ниска вегетација, капини и тополи во село Робово, Општина Босилово.

The post По четири дена изгаснат пожарот на Беласица appeared first on Република.

Синоќа дошло до повторно разгорување на пожарот на планината Беласица во близина на село Смоларе и притоа се приближил кон црквата „Свети Петар и Павле“, информираа денеска од ТППЕ Струмица.

Додаваат дека веднаш по првите повици од жителите на селото ТППЕ Струмица испратила екипа од пожарникари-спасители, кои и покрај тешко пристапниот терен успеале да дојдат до фронталната линија на пожарот и да го спречат неговото движење во тој правец.

Ширењето на овој пожар и покрај ниските температури е непредвидливо поради специфичноста на конфигурацијата на теренот и огромната количина на горлив материјал на тлото, висок слој на лисната маса која придонесува да се развиват доста високи температури и пожарот од приземен го развива кон крошните на дрвјата и како таков добива на интензитет, се наведува во информацијата од струмичките пожарникари.

Од Центарот за управување со кризи (ЦУК) потврдуваат дека пожарот е локализиран, но дека се уште има внатрешно горење на одредени места.

Во текот на вчерашниот ден интервенирале 25 лица од ЈП „Национални шуми“ Подружница „Беласица“ – Струмица, со 4 теренски возила. Екипите се повлекле од терен во текот на вечерните часови, а останале 4 лица заради контрола. Во текот на ноќта, на терен заминала и ТППЕ Струмица со 5 пожарникари и 2 против пожарни возила. Врз пожарот се уште се дејствува согласно можностите за превенција против негово ширење до негово целосно гаснење, се наведува во утринската информација од ЦУК.

Пожарот избувна на 10 ноември во подножјето на планината Беласица меѓу селата Смолари и Мокрино, Општина Ново Село.

The post Пожарот на Беласица синоќа се приближил кон црква во селото Смоларе appeared first on Република.

Попладнево во 16:20 часот избувна голема шумски пожар на планината Беласица, над селото Смоларе, кој според првичните информации зафатил поголема површина најразновидна шума.

Избувнувањето на пожарот за МИА го потврди командирот на ТППЕ Струмица, Александар Гудев, според кого пожарот засега е ставен под контрола.

-На терен заедно со припадници на „Национални шуми“ се две противпожарни возила и шест пожарникари, кои го држат под контрола пожарот. На одредени места има горење. Утре на терен ќе излезат вработени од „Национални шуми“ и доколку има потреба на местото на пожарот ќе оди и наша екипа, изјави Гудев.

Според информации од жители на селото Смоларе, пожарот избувнал на три места и бргу се проширил.

The post Под контрола пожарот, кој попладнево избувна на планината Беласица appeared first on Република.

Тим од четворица струмички пожарникари со теренско возило транспортираа повреден велосипедист од планината Беласица, кој претпладнево излетал во провалија на планината Беласица, на местото „Ѓаволски мост“, соопштија попладнево од ТППЕ Струмица.

-Велосипедистот спуштајќи се по патеката излетал во провалија и се здобил со повреди при што од неа бил извлечен од други велосипедисти. Со теренското возило на ТППЕ Струмица заедно со тим на брза помош е префрлен до село Борисово каде е преземен од возило на брза помош и пренесен во Медицински центар Струмица, се наведува во информацијата од струмичките пожарникари.

Тие апелираат до граѓаните на крајна внимателност кога престојуваат или се движат во планина со цел да се избегнуваат такви несреќни случаи.

The post Велосипедист излета во провалија на Беласица appeared first on Република.

Министерот за внатрешни работи Панче Тошковски денеска објави дека е поднесена кривична пријава за пожарот на мостот „Беласица“ кој избувна на 11 мај минатата година.

На 11 мај 2023 година на ул. „Беласица“ во Скопје, поточно под мост "Беласица“ предизвикан е пожар на просторијата за компензација на тополовод во истиот мост, на левиот брег на реката Вардар, кој се проширил на термичката изолација и топловодните цевководи кои се дел од топлификациска мрежа на ЕСМ - снабдување со топлина, при што предизвикани се и топлински оштетувања на наведениот топловод како и видливи оштетувања на конструктивните елементи на мостот.

Со наведеното дејствие извршено е кривично дело "Тешки дела против општата сигурност" по чл. 292 од КЗ, а во врска со кривично дело "Предизвикување општа опасност" по чл. 288 од КЗ за што од страна на Единица за насилен криминал при СВР Скопје преземени се опсежни оперативни мерки за откривање на сторителот на истото.

По изготвувањето на анализи во Одделот за форензички испитувања на подигнатите траги од лице место (отпушоци од цигари и запалка) од страна на полициски службеници извршен е разговор со повеќе лица, при што е утврден сторителот на горенаведеното кривично дело, лицето И.Х. (37) од Скопје и против истиот на 10.05.2024 година до ОЈО Скопје е поднесена кривична пријава.

Пријавениот И.Х. од 12.09.2023 година се наоѓа на издржување казна затвор во КПУ "Скопје" поради сторено кривично дело "Тешка кражба" по чл. 236 од КЗ, објави Тошковски.

The post Кривична пријава за пожарот на мостот „Беласица” appeared first on Република.

Пронајдени се двајцата велосипедисти кои се загубиле вчера на планината Беласица, некаде над село Банско, информира Центарот за упрување со кризи (ЦУК).

Вчера во 16.50 часот во Регионалниот ЦУК Струмица на Единствениот број за итни повици 112 било пријавено дека велосипедистите се изгубиле.

-Веднаш била пратена патрола од гранична полиција и стапиле во контакт со двајцата велосипедисти. Околу 19.30 часот биле спуштени велосипедистите со помош на гранична полиција на безбедно и пред да настапи ноќта, се вели во соопштението.

ЦУК информира дека поголем број неексплодирани убојни средства, конкретно 80 минофрлачки гранати од 60 милиметри од Првата светска војна биле пронајдени во село Рибарци, Општина Новаци.

Регионалниот ЦУК Битола информира дека тие безбедно биле подигнати и отстранети од страна на овластениот пиротехничар од ДЗС Битола.

Кога ќе се најдат, при прошетки на терен, неексплодирани средства од минатите војни, не треба да се фаќаат, да се поместуваат ваквите стари гранати, бомби и слични опасни неексплодирани средства, едноставно само треба веднаш да се пријави на 112 во ЦУК за нивната локација, соопшти ЦУК.

The post Пронајдени изгубените велосипедисти на Беласица appeared first on Република.

ЈП „Улици и патишта” – Скопје известува за привремен сообраќаен режим денеска на мостот „Беласица”, каде што од 8 часот до 12 часот ќе се изведуваат градежни активности.

-Поради изведба на градежните работи мостот ќе биде затворен за сообраќај во двете насоки и обележан со соодветна сообраќајна сигнализација, соопшти јавното претпријатие.

ЈП „Улици и патишта“ апелира внимателно да се управуваат возилата, а граѓаните да бидат трпеливи до завршување на градежните работи.

The post Мостот „Беласица” ќе биде привремено затворен за сообраќај поради градежни активности appeared first on Република.

ЈП „Улици и патишта" - Скопје известува за привремен сообраќаен режим утре на мостот „Беласица", каде што од 8 часот до 12 часот ќе се изведуваат градежни активности.

Поради изведба на градежните работи мостот ќе биде затворен за сообраќај во двете насоки и обележан со соодветна сообраќајна сигнализација, соопшти јавното претпријатие.

ЈП „Улици и патишта“ апелира внимателно да се управуваат возилата, а граѓаните да бидат трпеливи до завршување на градежните работи.

The post Мостот „Беласица” утре ќе биде затворен за сообраќај поради градежни активности appeared first on Република.

Под мостот „Беласица“ се поставуваат нови цевки за парното греење во Скопје. Електрани на Македонија АД соопшти дека се вложуваат „максимални напори за санацијата да заврши во најкус можен рок“ и дека се работи за „комплексна активност што бара сериозна посветеност и работа“.

Додека траат активностите за поставувањето на новите цевки се користи алтернативниот вод на железничкиот мост кој има капацитет да се врши континуирана испорака на топлинска енергија до потрошувачите вклучувајќи ги и количините кои ќе ги испорачува ТЕ-ТО. Во текот на изминатиот период, АД ЕСМ активно работеше на решение за проблемот со цевководот кај мостот „Беласица“, кој е од суштинска важност за парното греење во Град Скопје. Успешно беа отстранети оштетените цевки и донесени се нови и за нивно постаувавање веќе се започна со активности на терен, соопшти ЕСМ.

Наведува дека испораката на топлинска енергија во грејна сезона е од 6 до 22 часот по строго утврдени правила и дијаграми и, според нив, во октомври и првата половина на ноември, кога надворешните временски услови се променливи, снабдувањето со топлинска енергија зависи од надворешните температури и од атмосферските услови во различни периоди од денот.

При одредени атмосферски услови во периодите на високи надворешни дневни температури, се прекинува испораката на топлинска енергија. Воедно, повторно апелираме до потрошувачите и управителите односно заедниците на сопственици да ги отстранат дефектите на внатрешната грејна инсталација во најкус можен рок и тоа веднаш да го пријават во Центарот за грижа за потрошувачи, да овозможат непречен пристап на екипите на компанијата до топлинската станица, како и да обезбедат постојано напојување на топлинската станица со електрична енергија (платени сметки за електрична енергија за топлинската станица и функционална електрична инсталација), информира АД ЕСМ.

The post ЕСМ: Се поставуваат нови цевки под мостот „Беласица“, испораката на топлинска енергија е по алтернативен вод appeared first on Република.

Граѓаните на Скопје ќе имаат топлинска енергија од 15 октомври до крајот на грејната сезона, а ЕСМ е подготвено да интервенира на мостот „Беласица“ во делот на топловодот веднаш откако ќе ги добие соодветните дозволи од Град Скопје, истакна денеска министерот за економија Крешник Бектеши.

ЕСМ е подготвена уште од утре да ја среди ситуацијата само чекаат одредени дозволи од страна на Град Скопје. Во моментот кога ќе ги имаат тие дозволи веќе утредента ќе почнат со работа во делот на средување на мостот за снабдување со топлинска енергија, рече Бектеши во одговор на новинарско прашање по посетата на подружницата на ЕВН Македонија во Бутел заедно со директорот на Бирото за метрологија, Авдуљ Сељам Селами.

Нагласи дека ЕСМ е подготвена уште од утре да го санира местото на мостот каде треба да поминува топловодот, но за тоа е неопходно првично да се завршат процедурите во Град Скопје кои, како што рече, се неопходни согласно сознанијата кои ги имаме како Министерство за економија.

Но најважно од се е дека граѓаните на Град Скопје ќе имаат топлинска енергија за време на зимата од 15 октомври, па до крајот на грејната сезона, потенцира Бектеши.

The post Бектеши: ЕСМ е подготвено веднаш да го санира мостот „Беласица“ во делот на топловодот appeared first on Република.

Констатациите за оштетувања на конструкцијата на мостот „Беласица“ од пожарот коишто се однесуваат на состојбата на каблите за преднапрегање, а кои се донесени врз база на преглед на мостот со дрон и тоа на помалку загрозените делови на неговата конструкција, без сомнение не можат да бидат основ за носење заклучок дека каблите не се сериозно оштетени, вели проектантот на мостот, Вукан Њагуљ за МИА.

Њагуљ појаснува дека се неопходни испитувања на лице место и дополнителни пресметки. Според него, улогата на средишната плоча на мостот за негово правилно функционирање во ниту еден случај не може да се смета за споредна.

Напротив, со тоа што ги поврзува главните сандачести носачи во една целина таа значително ги намалува влијанијата во нив при несиметричното сообраќајно оптоварување. Ова може да се докаже со соодветна статичка пресметка, онака како што е направено и во Главниот проект - вели Њагуљ.

Мислењето дека мостот е во ред само затоа што во моментот стои и затоа што можеби би издржал некое пробно оптоварување, според Њагуљ, не е во согласност со основните особини на сите градежни материјали.

Тоа конкретно подразбира дека мостот не е сигурен доколку поради пожарот дошло до губиток на силата на преднапрегање и како последица на тоа до пораст на напрегањата на затегнување во бетонот преку границите дефинирани со проектот. Во такви околности мостот наизглед сигурно ќе стои се додека носивоста на бетонот на затегнување поради замор не се намали на ниво кое ќе овозможи појава на статички неконтролирани пукнатини што ќе доведе до загрозување на стабилноста на конструкцијата. Или грубо кажано – мора да се знае зошто мостот стои - појаснува Вукан.

Додава дека би сакал да го види извештајот како човек кој целиот работен век се занимава со мостови, особено како проектакт на мостот „Беласица“.

За жал, немав прилика да го погледнам Извештајот, а како некој кој целиот свој работен век, па и повеќе, се занимава со мостови и особено како проектант на овој мост навистина би сакал да ја имам таа можност - вели меѓу другото Њагуљ, додавајќи дека поради тоа неговите заклучоци се креирани врз основа на информациите објавени во јавноста.

The post Не може со дрон да се заклучи дека каблите не се сериозно оштетени, вели проектантот на мостот „Беласица“ appeared first on Република.

Почнаа теренските активностите за отстранување на опожарениот топловод на мостот „Беласица”. ЕСМ Дистрибуција на топлина ќе вложи максимални напори демонтажата да се заврши во најкраток можен рок.

Почетокот на активностите за санација на опожарениот топловод е поврзан со завршување на сите дејствија на мостот од страна на вклучените релевантни институции и компании.

И покрај опожарувањето на мостот Беласица, во следната грејна сезона која почнува во октомври 2023 ќе има сигурна и непрекината испорака на топлинска енергија до сите потрошувачи приклучени на дистрибутивната мрежа, се вели во соопштението на ЕСМ.

The post Почна отстранувањето на опожарениот топловод на мостот „Беласица“ appeared first on Република.

Пуштањето во употреба на опожарениот мост „Беласица“ и натаму е неизвесно и предмет на дебата во јавноста.

Да се испита присуството на микропукнатини во структурата на бетонот, да се види до каде тие се протегаат и до која длабочина, како и да се утврди температурата што пристигнала до каблите за претходно напрегање, па врз основа на тој податок да се види дали треба контрола на нивните сили или нешто друго. Да се направи еден прецизен математички модел на мостот „Беласица“, што ќе покаже, со вака утврдени карактеристики, како тој би се однесувал во иднина.

Ова според професор доктор Горан Марковски е некој минимум, што треба да се направи за да може, како што рече на денешната презентација на потребната методологија за утврдување на состојбата на опожарениот мост „Беласица“, ризиците да се сведат на најмалку можна мерка.

Безмалку два месеца изминаа од опожарувањето, а Марковски, инаку декан на Градежен факултет при УКИМ во Скопје, денеска имаше презентација на своето видување околу овој проблем.

Времето што ќе биде потребно за санација на мостот „Беласица” зависи од состојбата на материјалите и конструкцијата во моментов, после опожарувањето. Доколку со такви подетални истраги се утврди дека треба да се санира само она што е видливо во моментов како оштетување, во тој случај мислам дека за неколку месеци тоа може да се заврши, со добра организација и со елиминирање на оние долги административни постапки. Доколку се утврди дека се зафатени внатрешните кабли, ако кај нив има некакво оштетување, во тој случај санацијата би била значително подолга, времето потребно за санација би било значително подолго, додаде тој.

Што подлабинско истражување, нагласи, толку ризикот е помал и толку наредните чекори можат полесно да бидат предвидливи.

Целта на презентацијата, е, со цел, како што рече, да го искаже своето видување на работите, нагласувајќи дека не сака тоа да биде некаква споредба помеѓу тоа што е правено и она што тој смета дека треба да се направи.

Според него, уривање на мостот не е опција и дури и при такво сценарио, работите би можеле да се средат со санација.

Иако има забрана за движење на „Беласица“, истата не се почитува, иако мостот кај нова железничка станица е затворен за сообраќај и за пешаци по пожарот што го зафати на 12 мај.

The post Проф. д-р Марковски: Уривање на опожарениот мост „Беласица“ не е опција appeared first on Република.

Почетокот на активностите за санација на опожарениот топловод е поврзан со завршување на сите дејствија и проверки на состојбата на мостот од страна на вклучените релевантни институции и компании. ЕСМ Дистрибуција на топлина ќе вложи максимални напори отстранувањето на опожарениот топловод на мостот да се заврши во најкраток можен рок, информираат од компанијата.

Од ЕСМ потенцираат дека и покрај опожарувањето на мостот Беласица, во следната грејна сезона која почнува во октомври 2023 ќе има сигурна и непрекината испорака на топлинска енергија до сите потрошувачи приклучени на дистрибутивната мрежа.

The post ЕСМ Дистрибуција на топлина ќе го отстрани опожарениот топловод на мостот Беласица appeared first on Република.

Првичните информации говорат дека благодарение на брзата реакција на пожарникарите, оштетувањата на објектот се минимални и не довеле до нарушување на структурниот интегритет на мостот,  изјави градоначалничката на Град Скопје, Данела Арсовска денеска на прес - конференција одржана на мостот „Беласица“.

-Сакам оваа прилика да ја искористам и да ги замолам сите институции кои се сметаат за засегнати да не шират страв и паника кај граѓаните со паушални тврдења кои се однесуваат на било какви наводни структурни оштетувања на мостот, рече Арсовска.

Посочи дека Службите на Градот Скопје и таа лично уште од првата вечер се на терен на увид во настаната штета при пожарот.

-Денеска со мене е и еден од најголемите експерти не само во Македонија туку и пошироко професорот Михаил Гаревски кој во текот на изминатата недела изврши иницијални проверки со цел да добиеме потврда и да бидеме сигурни дека во моментот кога мостот ќе биде пуштен во употреба нема да биде загрозен никој, нагласи Арсовска.

Таа напомена дека заедно со помошта на видни стручни лица од областа, Град Скопје ги превзема сите потребни проверки со цел да бидеме сигурни дека никој нема да биде доведен во опасност и затоа се спроведува детално истражување за штетата која би можела пожарот да ја нанесе на мостот „Беласица“.

Арсовска упати апел до сите институции да бидат на висина на задачата и прво да се спроведат сите можни испитувања на мостот „Беласица“ како што тоа го прави Градот Скопје со цел, како што истакна, да дојдеме до вистински заклучок кога најбрзо мостот може повторно да биде пуштен во употреба.

-Паушалните тврдења како досега кои произлегоа од политичките агенди на групи и поединци, што само шират страв и паника помеѓу граѓаните, не помагаат никому. Жалам што можам да констатирам дека секоја непогода со која се соочува градот резултира со медиумски линч на градската администрација иако на граѓаните им е јасно дека се работи само за очајни обиди за собирање на политички поени, рече Арсовска.

The post Нема нарушување на структурниот интегритет на мостот „Беласица“, рече Арсовска appeared first on Република.

Премиерот Димитар Ковачевски денеска изјави дека сите институции што треба да се вклучат, ќе бидат на располагање за што побрзо пуштање во функција на мостот „Беласица“ кој е затворен поради пожарот што настана пред шест дена.

Според она што го имам како информација прво мора да се направи детална статичка проверка на мостот што е процес којшто мора да го направат стручни институции и лица и врз основа на извештај што ќе биде изготвен. Тој е дел од градот Скопје и секако дека и државата има обврска да биде што побрзо ставена во функција таква клучна сообраќајница. Сите институции што треба да се вклучат, ќе бидат на располагање - рече Ковачевски.

Мостот од безбедносни причини е затворен за сообраќај. Пожарот избувна ноќта меѓу 11 и 12 мај. Според известувањата од Центарот за управување со кризи, бил пријавен околу полноќ на единствениот број за итни повици 112. На терен биле испратени осум противпожарни возила и 21 пожарникар. Изгаснат е околу четири часот наутро. Од Противпожарната единица, тогаш за МИА изјавија дека запалена била електрична инсталација и систем за парно греење.

The post Сите институции ќе бидат на располагање за што побрзо пуштање во функција на мостот „Беласица“, вели Ковачевски appeared first on Република.

Апелираме до јавноста, медиумите и оние кои сакаат да се нарекуваат експерти да не предизвикуваат паника во јавноста со паушални изјави кои не се базирани на никакви информации, вештачења ниту пак истражувања, велат од Град Скопје откако Сител објави дека мостот „Беласица“ најверојатно нема да може да се санира и ќе треба да се урне.

https://republika.mk/vesti/skopje/mostot-belasitsa-najverojatno-ke-se-uriva/

Во овој момент се работи вештачењето на состојбата со мостот „Беласица“ со цел утврдување дали воопшто има структурно оштетување.  Во моментот мостот е затворен како превентива, се додека не добиеме уверување од релевантните институции дека е безбеден или дека треба да се интервенира. Несериозно е од декани, неименувани експерти како и неименувани „извори“ да се предизвикува паника кај граѓаните. 

Мостот „Беласица“ во овој момент се вештачи, а во наредните неколку денови ќе се донесе и одлука за тоа дали ќе се врати во употреба веднаш, или пак ќе има било каква интервенција пред да се стави во употреба. 

Со ова, сакаме да ги демантираме и дезинформациите и паушалните раскази на медиуми кои ја користат оваа ситуација за водење на политичка агенда која на ниту еден начин не помага на разрешување на ситуацијата, велат од Град Скопје.

The post Град Скопје демантира дека мостот „Беласица“ ќе се урива, вештачењето е во тек appeared first on Република.

Големи се шансите мостот „Беласица“ да биде срушен и одново да се гради.

Извори на Сител упатени во процесот велат дека на надлежните ќе им биде многу тешко да најдат фирма која што ќе гарантира дека мостот во ваква состојба е безбеден за сообраќај.

Од Град Скопје официјално молк. Една недела по пожарот градот се уште не знае што ќе прави со мостот. Исто толку време, скопјани од Центар до Аеродром во сообраќајниот шипц патуваат и по еден час.

Под овој мост исто така беснееше голем пожар пред неколку години но тој, до сега не бил затворен за сообраќај. Ништо подобро не изгледаат ниту останатите мостови и надвозници во главниот град. Виснати кабли и кородирана инсталација се слика која што ќе ја затекнете кога ќе поминете под речиси секој мост во главниот град. Од ЦУК велат, тоа не е безбедно.

И додека Скопје се гуши во сообраќаен хаос политичките партии наместо решение, уште го бараат виновникот.

Мостот Беласица се запали пред крајот на минатата недела. Огнот веројатно ја нарушил статиката на мостот поради што тој е затворен и за пешаци, и за сообраќај.

The post Мостот „Беласица“ најверојатно ќе се урива appeared first on Република.

Мостот „Беласица“ дури година и половина би можел да биде надвор од функција, и тоа под услов доколку веднаш почне да се работи на него. Тоа значи дека година и половина скопјани ќе имаат големи тешкотии за време на сообраќајниот шпиц, бидејќи оние кои кратеа од Железничка кон Ист Гејт ќе мора да ги користат другите мостови.

Деканот на Градежниот факултет, во изјава за Сител појаснува дека самите процедури се долги и затоа ќе биде потребно многу време за санација.

Во најмала рака потребни се три до четири месеци интензивна и високостручна работа за да се утврди неговата моментална состојба. А, доколку се констатира дека е потребна негова санација, тогаш треба уште минимум половина година за да се изработи проект за санација, и после тоа да се изведе санацијата. Значи, треба доста време, вели професорот Марковски.

Проблемот е што за носивоста на мостот задолжени се кабли кои се сместени во внатрешноста на бетонската конструкција.

Со оглед на тоа што се работи за кабли изработени од високо вреден челик, тие се многу чувствителни на високи температури. Односно, ги губат своите карактеристики ако дојдат до контакт со висока температура. Оттаму, прво што треба да се утврди, а тоа не е нималку лесно е да се види колкава била температурата во каблите во времетраењето на пожарот. Па потоа да се констатира колкава е нивната носивост, дали е загрозена и колку е редуцирана. Па после тоа следат мерки за санација, појаснува професорот Марковски.

Професорот Марковски не верува дека штетата е толкава, што мостот не би можел да се санира, но тој зафат би бил многу скап.

Не би сакал во моментов да шпекулирам со цифри. Во секој случај многу зависи во каква состојба е сега тој. Ако степенот на санација е поголем, самата санација може да достигне и неколку милиони евра, вели Марковски.

Се уште останува дилема дали Град Скопје ќе има пари за ваков зафат поради лошата финансиска состојба во која се наоѓа градот. Градоначалничката Арсовска и денеска избега од камерите, но вети дека ќе излезе на прес-конференција во следните две недели. До тогаш скопјани ќе го чекаат епилогот за еден од главните крвотоци во сообраќајот на главниот град.

Вчера од Град Скопје само кратко ни кажаа дека не можат да направат ништо додека не ги добијат записниците од МВР и ЦУК.

Извештаите кога ќе бидат готови ќе бидат доставени до надлежните институции, тоа што е работа на МВР. Инаку, испитувањата коишто треба да бидат направени, дали пожарот придонел до намалување на статиката на мостот, не е обврска на МВР, вели Спасовски.

Мостот е затворен и за пешаци, а како што објавивме и вчера, на него постојано има и полициски службеници кои ги враќаат сите оние кои не знаат или не сакаат да ги читаат знаците.

The post Сообраќаен хаос во Скопје: Мостот „Беласица“ најмалку една година ќе биде надвор од употреба appeared first on Република.