Продажбата на автомобили во Европа падна за 4,2 отсто во септември 2024 година. Ова е продолжение на трендот којшто трае неколку месеци, а според познавачите, се припишува на намалениот интерес на купувачите на електромобили. Но, и покрај тоа, електричен модел е најпродаваниот автомобил во Европа минатиот месец.

Така, според податоците собрани од „ЈАТО динамикс“ (JATO Dynamics), „Моделот ипсилон“ на „Тесла“ (Tesla Model Y) е на првото место. По американскиот електричен теренец следат конвенционалните модели „Рено клио“ „Дачија сандеро“, „Фолксваген тигуан“ и „Киа спортиџ“.

Како што пишува „Ауто стар“ (Auto Star), регистрирани се вкупно 28.876 продадени „Ипсилон“ возила - што е намалување од еден отсто во однос на истиот месец лани.

Најпродаваните автомобили во Европа во септември 2024 година:

„Тесла модел Ипсилон“ - 28.876 продадени возила;
„Рено клио“ - 20.708;
„Дачија сандеро“ - 18.960;
„Фолксваген тигуан“ - 17.670;
„Киа спортиџ“ - 16.697;
„Пежо 208“ - 16.350;
„Фолксваген голф“ - 15.776;
„Тојота јарис крос“ - 15.714;
„Фолксваген поло“ - 15.299;
„Форд пума“ - 15.141;
„Тесла модел 3“ - 14.965;
„Тојота јарис“ - 14.468;
„Опел корса“ - 14.355;
„Шкода октавија“ - 13.895;
„Хјундаи тусон“ - 13.798;
„Пежо 2008“ - 13.203;
„Дачија дастер“ - 12.977;
„Фолксваген Т-рок“ - 12.794;
„Рено каптур“ - 12.686;
„Тојота ЦХР“ - 12.071;
„БМВ Икс-1“ - 11.806;
„Нисан кашкај“ - 11.444;
„Форд Куга“ - 10.653;
„Мини купер“ - 10.386;
„Нисан јук“ - 9.628.

The post Пад на продажбата на автомобили во Европа appeared first on Република.

Европската автомобилска индустрија „се лизга во бездна“, објави „Блумберг“, кој го проучувал обемот на работа на фабриките на 5-те најголеми европски производители на автомобили (БМВ, Мерџцеде-Бенз, Стелантис, Рено и ВАГ) и дојде до заклучок дека 14 од 31 голема фабрика работат со капацитет помал од 50%.

Ниту еден од овие пет не може да се врати на нивото од пред пандемијата. Работите се особено лоши за „Рено“, кој е заглавен во повторно опремување на фабриките за производство на електрични возила кои ја губат популарноста, како и „Мерцедес“, кој од 2022 година воопшто не може да го зголеми обемот на производство. Голема прилина за тоа е што идејата за развој на премиум брендот за електрични автомобили со необичен и нејасен дизајн не успеа.

Како што анализира „Блумберг“, ако се погледне географијата на производство, Шпанија е во најдобра позиција: 5 од 6 фабрики немаат проблеми со обемот на работа, но само една фабрика има обем на работа од нешто повеќе од 50%. Ситуацијата е најлоша во Италија - 3 од 4 фабрики се во црвената зона и имаат неилузорна веројатност да бидат затворени. Акционерите на „Стелантис“ дури поднесоа тужба против производителот (повеќето италијански фабрики припаѓаат на овој концерн) поради прикривање на слабостите и надувување на вредноста на хартиите од вредност.

Не за џабе италијанските власти ненадејно се разбрануваа: Министерството за животна средина се спротивстави на забраната за мотори со внатрешно согорување од 2035 година, а италијанскиот премиер Марио Драги објави извештај од 400 страници во кој пишува дека минатите успеси на Европа се задржани на евтини енергетски ресурси и извоз во Кина.

Сега мораме да купиме ЛНГ, кој е за 50% поскап од гасоводот (како резултат на тоа, гасот е 354% поскап отколку во САД), а струјата е 158% поскапа отколку во САД. Дури и нарачките за одбрана (63%) во 2023 година беа дадени во САД. Европската економија стана едноставно неконкурентна, изјави Драги.

„Блумберг“ анализира дека судејќи според предлозите кои ги искажа Драги, воопшто не се размислува за напуштање на влијанието на САД. Има само апстрактни предлози како потребата да се забави еколошката агенда доколку е во спротивност со економијата, да се склучат профитабилни договори со добавувачите на суровини, да се интегрираат пазарите на капитал, да се елиминираат противречностите во закони... Во принцип, за сите добри работи, против сè лошо. Во однос на специфичностите, има само зголемување на трошоците за одбрана. Но, тогаш повторно, зошто овие наредби за одбрана не би отишле во САД?

Ваквата нејасна политика доведе до фактот дека најстарите претпријатија во Германија, пред се индустриските, масовно банкротираат. Бројот на големите стечаи во првата половина на 2024 година се зголеми за 41%. Не е изненадувачки што романската „Дачиа“ сега е број 1 производител на автомобили во Европа. Ги произведува најевтините автомобили, а сега тие заземаат водечка позиција на европскиот пазар. Истиот Фолксваген станува прескап за луѓето.

The post „Блумберг“: Автомобилската индустрија во Европа „се лизга во бездна“ appeared first on Република.

Во земјите на Европската унија во јуни се регистрирани 1.089.925 нови автомобили, што е за 4,3 отсто повеќе во споредба со истиот месец лани, соопшти денеска Асоцијацијата на европски производители на автомобили (ACEA).

На повеќето големи европски пазари е забележан раст на продажбата на годишно ниво, во Италија за 15,1 отсто, Германија за 6,1 отсто, Шпанија за 2,2 отсто, додека во Франција бројот на регистрации на нови автомобили е намален за 4,8 отсто.

Во јуни, најголем број нови регистрирани возила се на бензин – 34,4 отсто, потоа хибрид-електрични возила 29,5 отсто, електрични возила на батерии 14,4 отсто и автомобили на дизел 12,7 отсто.

The post Во ЕУ во јуни регистрирани речиси 1,1 милион нови автомобили appeared first on Република.

Комисијата за осигурување од автомобилска одговорност на денешната седница го разгледа доставениот извештај од Националното биро за осигурување поврзано со зголемените цени по основ на премија за вршење на дејноста на осигурување.

На состанокот Комисијата му укажа на Националното биро за осигурување и на регулаторот Агенцијата за супервизија на осигурувањето во текот на денешниот ден да им предложи на друштвата за осигурување до крајот на денешниот ден да ги стават во мирување одлуките за зголемување на трошоците и да ги вратат на ниво од пред 25 април 2024 година.

Ваквото укажување е со цел обезбедување транспарентност и предвидливост на процесите, имајќи предвид дека компаниите ниту поединечно, ниту преку Националното биро за осигурување го немаат известено регулаторот, односно Агенцијата за супервизија на осигурувањето ниту Комисијата дека планираат да ги зголемат трошоците по основ на премијата за вршење на дејноста на осигурување, и на тој начин не е обезбеден инклузивен пристап и кооперативност со сите засегнатите страни при донесување на одлуките.

Комисијата побара од регулаторот, односно Агенцијата за супервизија на осигурувањето, да изготви анализа за оправданоста и исправноста на донесените одлуки од страна на друштвата за осигурување, во насока на заштита на крајните корисници, а со цел обезбедување сеопфатна информација за донесување објективна и транспарентна одлука. Во правец на ова е укажувањето кон регулаторот за ставање во мирување на одлуката за зголемување на цената на трошоците од страна на друштвата за осигурување.

Истовремено, побара од друштвата за осигурување преку Националното биро да дадат свој придонес во изготвување на анализата и предлог-заклучоци за промена на Тарифата на премии за осигурување на сопствениците на моторни возила од одговорност за штети предизвикани на трети лица.

The post Да се стави во мирување поскапувањето на осигурувањето на автомобилите, побара Финансии appeared first on Република.

Два автомобили горат на стариот полигон спроти стадионот под Кале. Пожарот е на стариот полигон спроти стадионот под Кале. Огнените пламени се префрлија и на други две возила, а се заканува да зафати и други возила кои се паркирани на местото, како и зеленилото во близина. Засега не е познато која е причината за пожарот.

The post Пожар под Кале: Горат два автомобили на стариот полигон спроти стадионот! appeared first on Република.

И покрај најавената инвестиција на Владата за производство на електричните возила на Е-гоу за која беа одобрени милионски субвенции, но никогаш не се оствари, во Македонија тешко, па дури и невозможно е да се произведуваат автомобили, вели претседателот на Советот на странски инвеститори Виктор Мизо.

„Тоа што мене ми падна во очи е дека не се сеќавам дека некој од компанијата Е-гоу официјално дојде да го објасни целиот тој процес, на кој начин ќе се произведува школката на возилото, дали таа ќе биде метална, од карбонски влакна или некој друг вид на композити. Од каде ќе доаѓаат батериите, електромоторите, што точно и на кој начин ќе се составува овде и каде ќе се произведуваат возилата. За тоа треба да има поврзаност со железница, дали до пристаниште па потоа со бродски транспорт или со железница директно до некои централни транспортни хабови од каде со друг транспорт ќе се пренесат до крајните потрошувачи, сметам дека тоа е неопходно. Во нашиов случај беше избрана зоната во Тетово, но таа директно нема пристап до железница“, изјави Мизо во поткастот „Каде се парите“.

Мизо потенцира дека внатре во фабриката мора да има начин како возилата кога ќе бидат тестирани, склопени но и фабриката да биде многу блиску, за да може автомобилите директно да се товарат на транспортни железнички вагони.

„Дополнително нешто што мене ми претставуваше сомнеж од моментот кога беше најавена во август 2022 година е тоа што поминаа речиси 18 месеци од најавата и кога знаете колкав капитал вложувате, сакате и брзо да се реализира. Дополнително возилото кое беше иницијално претставено, гледаме дека не само во Кина, туку и во Европа е по цена од 10-12 илјади долари. Така да брзината на одобрување на сите оние перформанси и намалување на цената на електричните возила посебно за такви мини возила, е толку брза во Кина што е тешко да може некој да ве увери дали во тој сегментможе да се биде конкурентен на Азија“, рече Мизо.

Мизо одговара и на тоа што Европа се двоуми околу идејата за применета на електрични автомобили, но и за тоа зошто кога е во прашање развојот на автомобилската индустрија, не се осмелува ниту еден производител да донесе барем некој мал производ што може да го склопи во Македонија.

„Во Европа има поголем капацитет за производство отколку што е побарувачката во моментов. Дополнително при производство на возила секогаш треба да се земе предвид индустриската традиција на државата. Ако гледаме на просторите на поранешна Југославија, таква индустрија имавме во Војводина, БиХ, Словенија. Фиат ја презеде фабриката на Застава. Производстсвото во Босна не постои, а во Словенија сѐ уште опстана производството на Рено. И Фиат 500 Л кој се произведуваше во Србија не се произведува компанијата планира да се произведува нов модел. Индустриската традиција за производство на вакви возила кај нс не постои. Дополнително за производство на 200 илјади возила на годишно ниво, многу поразлични од она што се кажа за Е-гоу, едноставно потребни се не помалку од 300 хектари со целосна инфраструктура. Таква фабрика побарува сигурно и 10 илјади вработени и голем број добавувачи. Таква локација е многу тешко да се најде во Македонија, а прашање е и дали ние може да канализираме постоечки компании од автомобилската индустрија. Потребен е кадар обучен од оваа индустрија и прашање е дали тој ќе мигрира кон оваа фабрика. Со популација како нашата и можностите кои ние би ги понудиле за производство на возила, според сите темелни анализи, е многу тешко, па дури и е во рамки на невозможното да се произведуваат возила“, потенцира Мизо.

The post Мизо: Во Македонија тешко, па дури и невозможно е да се произведуваат автомобили appeared first on Република.

Во дводневна заедничка акција на Секторот за контрола и истраги при Царинска управа и Министерството за внатрешни работи запленети се 22 патнички моторни возила со странски регистарски таблици управувани од македонски државјани.

Запленетите возила се од различни марки, а меѓу нив, четири ПМВ се марка МЕРЦЕДЕС, три ПМВ се марка АУДИ, две ПМВ се марка БМВ, едно патничко товарно возило е марка ТЕСЛА и др., а сите возила биле управувани од македонски државјани на територија на Република Македонија повеќе од 6 месеци.

Против сторителите на прекршоците ќе биде поднесено Барање за поведување прекршочна постапката до надлежниот суд.

Имено, во согласност со законските надлежности на Царинската управа, кои се во согласност со критериумите и условите пропишани во Истанбулската конвенција за привремен увоз, одредби од Царинскиот закон и одредби од Уредбата за спроведување на Царинскиот закон, граѓаните на РСМ и странците можат привремено да внесат и да управуваат возило на територијата на Република Македонија за време на нивниот престој, но, најмногу 6 месеци во период од 12 месеци, по што возилото мора да ја напушти територијата на Република Македонија.

Во спротивно ќе треба да се пријават на најблиската царинска испостава во местото каде привремено престојуваат и да започнат соодветна царинска постапка за увоз или привремен увоз на возилото.

The post Запленети 22 патнички моторни возила со странски регистарски таблици управувани од македонски државјани appeared first on Република.

Кина дојде на чекор од добивање на признанието најголем светски извозник на автомобили во 2024 година.

Кинескиот извоз на автомобили расте и се движи кон меѓународна продажба од 5 милиони. Испораките на автомобили се искачиле за 58 проценти, што претставува неверојатни 4,4 милиони единици за 11 месеци од 2023 година, надминувајќи ги јапонските 3,99 милиони единици во 2022 година.

Глобалната финансиска компанија УБС предвидува дека до 2030 година, една третина од автомобилите ширум светот би можеле да бидат од кинеско производство.

The post Го презема приматот: Кина станува најголем извозник на автомобили во светот appeared first on Република.

Албанскиот премиер Еди Рама соопшти дека Албанија има подготвен проект за производство на автомобили за потребите на државата, со домашна компанија, која до сега произвела амбулантни возила за Украина, но и за соседните земји Македонија, Бугарија, Турција.

Додаде дека овие автомобили ќе бидат пуштени во употреба за потребите на министерството за здравство, за внатрешни работи и Националната агенција за транспорт и нагласи дека проблемот со транспортот на наставниците исто така ќе биде надминат.

Создавањето на акционерско друштво за производство на возила за потребите на државата и за извоз е многу убав проект, кој ќе ни даде можност да произведуваме за потребите на Министерството за здравство, МВР, Националната агенција за транспорт и за извоз, врз основа на стручноста на една девојка Албанка, Арјета Пуца, со која го градиме овој процес, со нејзиното претпријатие, но кое победува на меѓународни тендери за испраќање амбулантни возила надвор од земјата - рече Рама.

Арјета Пуца е претприемач која моментално произведува амбулантни возила во нејзината фабрика во Албанија и беше избрана од ОН да произведе 500 амбулантни возила кои се испорачани во Украина.

Заедно со нејзиното семејство, Пуца ја основала компанијата „ТИМАК“ во 2016 година, произведувајќи над 150 амбулантни возила за албанските болници, како и за соседните земји како Македонија, Бугарија, Турција.

The post Рама најави дека Албанија ќе произведува автомобили за државните институции appeared first on Република.

Руската влада објави список на автомобили произведени во државата што им се нудат за купување на владините службеници, сите руски или кинески марки.

Министерството за индустрија и трговија објави дека списокот на автомобили е наменет за употреба од државни и општински службеници за службени цели по инструкција на претседателот Владимир Путин.

Домашните компании до денес веќе имаат произведено широк асортиман на модели со различни технички карактеристики и опрема (шест марки и над 20 модели) што можат да ги задоволат потребите на вработените на различни нивоа. Сите производители на автомобили се обврзаа да го зајакнат производството преку специјални инвестициски договори со владата“, велат од Министерството.

Руските автомобили на листата вклучуваат пет модели на Лада произведени од најголемиот руски производител на автомобили Автоваз, како и УАЗ, Аурус, Москвич и електричните автомбили „Еволут“.

Списокот вклучува и пет модели на кинескиот производител на автомобили Хавал, кој од 2019 година произведува автомобили во фабриката во регионот Тула, на 200 километри од Москва.

Кинеските производители на автомобили добија пазарен удел на рускиот пазар по повлекувањето на брендовите како Рено и Нисан.

Исто така, официјален Кремљ им нареди на високите функционери вклучени во подготовките за претседателските избори во 2024 година да престанат да користат Ајфон поради стравувањата дека уредите се ранливи на западните разузнавачки служби.

The post Руската влада ги повика државните службеници да купуваат руски и кинески автомобили appeared first on Република.

Новата гранична такса за јаглерод во Европската унија, според проценката на американската консултантска компанија Boston Consulting Group, ќе предизвика поскапување на новите автомобили за речиси 600 евра.

Регулативата на Европската унија за прекуграничниот механизам за прилагодување на цената на јаглеродот (CBAM) ги обврзува увозниците надвор од ЕУ да ѝ плаќаат данок на јаглерод што го испуштаат за време на производството, како што се челикот и цементот.

Бостон Консалтинг групацијата посочи дека просечниот автомобил со четири врати содржи седум тони јаглерод диоксид (CO2), од кои нешто помалку од половина се однесуваат на челикот и алуминиумот што се користат за производство на автомобили, објави порталот Енергија Балкан.

Имајќи предвид дека данокот на тон јаглерод во моментов е 82,90 евра, просечната цена на новиот автомобил се очекува да се зголеми за 580,30 евра.

Производителите веќе мораа да го откупат правото да испуштаат јаглерод диоксид (ETS) за да можат да го увезат она што им е потребно за производство.

The post Новите автомобили во ЕУ ќе поскапат во просек за 600 евра поради данокот на јаглерод appeared first on Република.

Во Загреб, на Меѓународниот ден без автомобили, се одржа традиционалното возење велосипед низ улиците на градот, чијашто цел е да се потикне толеранција и поголема сообраќајна култура кај сите учесници во сообраќајот.

По тој повод, активисти на „Зелена акција“ во Хрватска изведоа перформанс со којшто, меѓу другото, покажаа колку простор зафаќа еден автомобил во споредба со пешак. Нивниот натпис со содржина „Толку простор за толку многу загадување“ послужи како порака за свесност.

Бројот на автомобили и во Загреб и низ Хрватска секојдневно расте и тие зафаќаат сѐ повеќе јавни простори. Во цела Хрватска има над 1,8 милиони автомобили и тие зафаќаат вкупно 27 квадратни километри само за паркирање... Во Загреб има над 350.000 регистрирани автомобили, што ја прави ситуацијата неодржлива и повикуваме на поинаква сообраќајната политика, изјави Бернард Ивчиќ од „Зелена акција“.

Активистите, во настапот на Централната станица во Загреб, порачаа дека пешачењето, возењето велосипед и јавниот превоз треба да станат прифатливи и подостапни во градовите со цел да се намали загаденоста на воздухот, да се подобри општото здравје на населението и да се избегнат сообраќајни метежи и застои.

The post Зафаќаат 27 квадратни километри за паркирање: Во Хрватска има повеќе од 1,8 милиони автомобили appeared first on Република.

На две локации во Скопје во текот на ноќта се опожарени четири возила, информираат од МВР.

Во првиот случај кој е пријавен во СВР Скопје околу 03.12 часот по полноќ, на ул.„Цветан Димов“ настанал пожар во патничко возило „фолксваген голф“, сопственост на Б.А.(33) од Скопје и патничко возило „опел корса“, сопственост на Е.Д. (38) од Скопје, двете со скопски регистарски ознаки.

Вториот случај, пак, кој е пријавен во истото време, околу 03.12 часот во СВР Скопје, е на ул.„Петар Ацев“ во Скопје каде настанал пожар во патничко возило „сеат леон“ со скопски регистарски ознаки, сопственост на В.М.(32) од Скопје. Од пожарот било зафатено и патничко возило „субару“ со скопски регистарски ознаки, сопственост на Љ.Н. (58) од Скопје.

Во двата случаја повредени лица нема, а интеревенирале екипи на Бригадата за противпожарна заштита Скопје.

Увид на местата извршиле екипи од СВР Скопје.

The post Четири автомобили синоќа гореа во Скопје appeared first on Република.

Предрасудите кон жените зад воланот не се невообичаени, а најчестиот аргумент е дека тие се значително поопасни на патиштата. Сепак, дали е навистина така?

Статистиката за сообраќајните несреќи и бројот на загинати луѓе на британските патишта, објавени од ThisisMoney, откриваат дека патиштата би биле многу побезбедни доколку само жените возат автомобили.

Официјалните бројки покажуваат дека лани 658.711 возачи биле осудени за сообраќајни прекршоци. Само 18 отсто биле жени.

Мажите направиле 539.142 од вкупниот број сообраќајни прекршоци во 2022 година наспроти само 119.569 женски возачи.

Возењето под дејство на алкохол е една од најопасните работи што возачите можат да ја направат, а официјалните бројки покажуваат дека е прекршок што мажите го прават многу почесто од жените. Од 35.388 пресуди поврзани со алкохол минатата година, мажите добиле 28.399, а жените 6.989. Тоа значи дека четири од пет случаи на ваков вид прекршоци биле сторени од мажи возачи.

Кога станува збор за осудите за возење под дејство на дрога, жените повторно прават многу помалку прекршоци. Од 22.793 евидентирани пресуди, 20.684 (90,7 отсто) биле мажи наспроти само 2.109 жени.

Истото важи и за опасно возење. Од вкупно 5.172 пресуди евидентирани во 2022 година, 4.952 биле мажи, а само 220 жени.

Друга главна причина за несреќи и жртви на британските патишта е брзото возење, и повторно, ова е тип на прекршок доминиран од мажи. Од 229.150 казни, имало 174.884 мажи и 54.266 жени.

The post Што би се случило ако само жени возат автомобили? appeared first on Република.

Јапонската корпорација „Тојота“ (Toyota Motor Corp.) е лидер на светскиот автомобилски пазар во првите шест месеци од 2023 година, надминувајќи го четврта година по ред (за периодот од првата половина од годината), германскиот концерн „Фолксваген“ и другите главни конкуренти.

Автомобилската индустриска групација „Тојота“ објави дека во првата половина од 2023 година продале 5,42 милиони возила ширум светот, што е 5,5 отсто повеќе од истиот период лани. Ова ја вклучува продажбата на нејзиниот оддел „Дајхатсу мотор“ (Daihatsu Motor Co.), што е специјализиран за производство на мали моторни возила, како и другата компанија во сопственост на „Тојота“ - производителот на камиони „Хино моторс Лтд“ (Hino Motors Ltd.).

Во првото полугодие од 2023., германскиот концерн „Фолксваген“ продал 4,37 милиони возила, што претставува зголемување од 12,8 отсто.

The post „Тојота“ e лидер на светскиот автомобилски пазар во првата половина од 2023 година appeared first on Република.

Германскиот производител на спортски автомобили „Порше“ објави голем скок во продажбата во првата половина од годината, благодарение на засилената побарувачка на домашниот и странскиот пазар воопшто. Тоа значи - од јануари до јуни се испорачани 167.354 возила, што е 15 отсто повеќе од истиот период лани, соопштија од компанијата.

Најмногу е зголемена продажбата во Германија, па во другите европски земји, за 24 и 23 отсто, соодветно. Во Кина, бројката е за околу осум насто поголема, а во Cеверна Америка - околу 12 насто повеќе од лани.

По првите шест месеци (од оваа година) може да бидеме задоволни со испораките, соопшти шефот на продажба, Детлев фон Платен.

Особено барани биле теренските возила - со 26 отсто повеќе продадени „Мекени“ и 12 насто повеќе „Кајени“. Се издвојува и спортскиот автомобил „911“, со зголемување на продажбата за 21 отсто.

Продажбата на електричниот „Тајкан“, од друга страна, е намалена за пет отсто, со продадени 17.991 автомобил, поради недостиг на делови, објавија од компанијата.

The post Особено барани биле теренските возила: Скок на продажбата на „Порше“ во првото полугодие од годинава appeared first on Република.

Туристите кои одат на одмор со својот автомобил ризикуваат да останат без него, бидејќи лесно можат да бидат мета на крадци, без разлика каде се наоѓаат.

Токму тоа  им се случи на туристи од Србија на одмор во Грција, поточно на Тасос.

На Фејсбук групата „Грчка инфо“ е објавена фотографија од бравата која е оштетена во обид  да му упаднат во автомобилот.

„Обид за упад на Тасос, плажа Нотос“, напиша оштетениот турист.

The post Почна обивањето автомобили во Грција appeared first on Република.

Три автомобили се оштетени утрово при фрлена бомба во белградската општина Звездара, а според првичните информации нема повредени, јави Бета.

Бомбата била фрлена од непознато лице од возило во движење.

Полицијата врши увид на лице место, по што ќе се знаат повеќе информации.

The post Екслозија на бомба во Белград: Оштетени три автомобили appeared first on Република.

Неговата бизарна опсесија го донесе Пол Пристли (44) од Велика Британија до затвор. Тој беше приведен на 27 март откако беше фатен како ги допирал рачките на автомобил во Питерборо, а за време на сослушувањето пред судот се бранел дека е „зависник од пробување на кваки“.

Ова не е првпат Пристли да се најде во неволја поради неговата опсесија со кваките: пред четири години тој доби условна казна од пет години забрана да допира или да влегува во автомобили без дозвола, но пред да истече казната, тој го повтори делото.

Сега е осуден на девет месеци затвор, две години условно, а мора да оди на десетдневна рехабилитација, пренесува Индипендент.

https://youtu.be/0b7rZ0hjUfk

Изречена ми е казна дека „не смее да допира возило без дозвола на сопственикот“ и дека мора „да го почитува полицискиот час од 23:00 до 6:00 часот секој ден до 28 март 2027 година“.

Иако се правда дека неговата опсесија се кваките, затворската казна не ја доби само поради нивно допирање. Пристли има криминално досие како тинејџер, кое вклучува стотици кривични дела поврзани со кражби.

The post „Не можам да си помогнам“: Овој „фетиш“ му донесе затвор, полициски час до 2027 година и забрана да допира автомобили appeared first on Република.

Косовската полиција денеска по полноќ пријави три возила на косовските Срби со таблички RKS (Република Косово) запалени во северниот дел на земјата, објави весникот „Коха диторе“, повикувајќи се на соопштение на полицијата. Шефот на претседателскиот кабинет на Косово вчера пријави уште две изгорени возила на косовски Срби со косовски регистарски таблички.

Според полицијата, два автомобила биле опожарени во градот Северна Митровица и еден во градот Звечан, а не е јасно кои се сторителите на подметнувањето пожар.

Косовската полиција ќе продолжи да работи на истрага и расветлување на ваквите случаи (на палење автомобили на државјани на косовски Срби со косовски регистарски таблички) и ќе продолжи да обезбедува безбедност за сите граѓани подеднакво, се вели во полициското соопштение.

Проблемот со регистарските таблички беше една од главните причини за тензиите во односите меѓу Белград и Приштина минатата година.

The post Запалени уште три автомобили на Срби од Косово appeared first on Република.