Германија депортираше осудени криминалци во Авганистан за прв пат откако Талибанците дојдоа на власт, соопшти германската влада.

Утринава, за прв пат од август 2021 година, Германија изврши принудно враќање на авганистанските државјани во нивната земја на потекло, рече владиниот портпарол Штефен Хебестрајт.

Тој рече дека се работи за осудени криминалци кои немале право да престојуваат во Германија и кои чекаат депортација извесно време.

„Der Spiegel“ претходно објави дека 28 лица биле пренесени во Кабул од аеродромот Лајпциг/Хале со чартер на катарската авиокомпанија.

Весникот „Билд“ наведува дека осудените добиле по 1.000 евра кои треба да им помогнат по пристигнувањето во Кабул.

Федералната влада изрази благодарност до „регионалните партнери“ кои одиграа клучна улога во извршувањето на ова протерување и најави дополнителни депортации и покрај дискусиите дека Авганистан не е безбедна земја.

Истовремено, не беше прецизирано за кои „регионални партнери“ станува збор. Министерката за внатрешни работи, Ненси Фезер, во последните денови ги спомена преговорите со земјите што го опкружуваат Авганистан, како што е Таџикистан.

„Германската влада инсистира на депортации. Безбедносните интереси на Германија се несомнено поважни од безбедносните интереси на криминалците и лицата од кои доаѓа потенцијална опасност“, се вели во владиното соопштение.

По терористичкиот напад пред една недела во Золинген, се разви жестока дебата за односот кон миграцијата на бегалците и недоволното протерување на лица кои немаат право да престојуваат во Германија или кои го прекршиле законот.

А осомничениот напаѓач, 26-годишен Сириец, требало да биде депортиран во Бугарија, земјата каде што е регистриран по влезот во Европската унија, но депортацијата пропаднала поради неуспехот на германските власти.

Во четвртокот германската влада усвои низа мерки кои треба да го спречат натамошниот притисок на бегалците врз Германија, која, според мислењето на германската влада, мигрантите најчесто ја избираат како крајна дестинација поради социјалните бенефиции.

The post Германија депортираше 28 лица во Авганистан appeared first on Република.

Земјотрес со јачина од 5,4 степени според Рихтеровата скала денеска го погоди Авганистан.

Земјотресот бил на длабочина од 224 километри, но добро се почувствувал.

Епицентарот на земјотресот бил на околу 200 километри источно од градот Кундуз, но тресењето на земјата се почувствувало во Кабул, но и во Исламабад, Пакистан.

„Го почувствував, добро се тресеше“, напишаа луѓето на веб-страницата на ЕМСЦ.

The post Земјотрес со јачина од 5,4 степени го погоди Авганистан appeared first on Република.

Авганистанското Министерство за морал отпушти повеќе од 280 припадници на безбедносните сили поради тоа што не пуштиле брада во изминатата година и приведе повеќе од 13.000 луѓе за „неморални дејствија“, соопштија официјални лица.

Министерството за спречување на пороци и ширење доблести во својот годишен оперативен извештај наведува дека околу половина од приведените се ослободени по 24 часа. Тие не прецизираа кои се наводните прекршоци или полот на уапсените, пренесоа британските медиуми.

Официјалните лица уништиле 21.328 музички инструменти во изминатата година и спречиле илјадници корисници на компјутери да продаваат „неморални и неетички“ филмови

The post Не пуштиле брада: Во Авганистан отпуштени 280 полицајци appeared first on Република.

Во Авганистан денеска почна нова кампања за вакцинација против детска парализа, чија цел е заштита на околу 7,6 милиони деца на возраст под пет години, соопшти авганистанското Министерството за здравство.

Кампањата ќе трае четири дена во 21 од 34 провинции во земјата, информираа Министерството.

Портпаролот на Министерството за здравство, д-р Шарафат Заман, побара од верските научници и локалните старешини да соработуваат со давателите на вакцини во борбата против полио, заразна болест која може да предизвика парализа и да доведе до смрт.

Бројот на позитивни случаи на полио е намален оваа година, рече Заман.

Минатата година на национално ниво се откриени најмалку шест случаи со полиовирус.

Во декември, Светската здравствена организација (СЗО) предупреди дека репатријацијата на мигрантите од соседен Пакистан го зголеми ризикот од ширење на вирусот. Оттогаш, земјата спроведе најмалку два круга на национално вакцинирање.

The post Авганистан почна масовна кампања за вакцинација против детска парализа appeared first on Република.

Талибанската полиција во источната авганистанска провинција Хост им забрани на локалните радио и телевизиски канали да примаат телефонски повици од девојчиња, наведувајќи го неморалот како причина.

Центарот за новинари во Авганистан (AFJC) во соопштение информира дека претставниците на медиумите се предупредени за правни последици за прекршување на директивата.

Во писмото од провинциската полиција до кое дојде АФЈЦ се наведува дека некои приватни радио станици „шират неморал преку злоупотреба на социјални програми и образовни програми“.

Во писмото се обвинуваат девојчињата за „нелегитимни контакти“ со водителите за време на овие програми, што наводно води до „несоодветно однесување“ што е спротивно на исламските стандарди. Дополнително, во дописот се тврди дека овие радиостаници ги немаат потребните дозволи од надлежните за емитување едукативни содржини.

Поради затворањето на училиштата за девојчиња во Авганистан, медиумите се повеќе емитуваат едукативни програми, се додава во соопштението на АФЈЦ.

Локални извори изјавија за АФЈЦ дека некои медиуми користат учебници надвор од официјалната наставна програма за образование и ги продаваат овие книги по повисока цена.

The post Талибанците им забранија на медиумите да примаат повици од девојки во програма appeared first on Република.

Најмалку 33 лица загинаа, а 16 се повредени во одвоени сообраќајни несреќи во источен Авганистан, соопштија денеска локалните власти.

Во областа Сораби во провинцијата Кабул, 17 лица, меѓу кои две деца и четири жени, загинаа во десет судири на автопатот што го поврзува главниот град на Авганистан - Кабул со источната провинција Нангархар.

Во сообраќајките се повредени уште десет лица кои се примени на болничко лекување.

Во источната провинција Лагман се случиле четири сообраќајни несреќи во кои загинале 15 лица, се наведува во соопштението на локалната полиција.

Едно лице загина, а шест се повредени во сообраќајни несреќи во други делови на таа провинција.

Сообраќајните несреќи се чести во Авганистан, главно поради лошите услови на патиштата и невнимателните возачи на автопатите.

The post Кобен викенд во Авганистан: Најмалку 33 лица загинаа, а 16 се повредени во одвоени сообраќајни несреќи appeared first on Република.

Новиот тип на дрога, наречен нитазен или „франкенштајн“ се повеќе станува причина за загриженост Овие лекови, кои се создадени да ги имитираат ефектите на опиоидите како хероинот, може да се мешаат со други супстанции за да создадат многу посилни ефекти, често со фатални исходи.

Тие веќе ги одзедоа животите на речиси 50 луѓе низ Велика Британија Нитазените станаа популарни меѓу дилерите на дрога поради очекуваното пресушување на залихите на хероин од Авганистан.Забраната за одгледување на афион од страна на Талибанците доведе до барање алтернативи за продажба на улиците. Фармацевтските компании сè уште не успеале да развијат тестови за откривање на нитазен, што ја отежнува борбата против оваа нова закана.

https://www.youtube.com/watch?v=teV3WfT0ROE

The post Пристигна дрогата „Франкештајн“, пресушија залихите на хероин од Авганистан appeared first on Република.

Земјотрес со јачина од 6,3 степени според Рихтеровата скала денеска го погоди Авганистан, соопшти Европскиот медитерански сеизмолошки центар.

Епицентарот бил во планинскиот регион Хинду Куш на длабочина од 188 километри на 41 километар од градот Јурм, посочуваат од Европскиот медитерански сеизмолошки центар.

Засега нема извештаи за жртви и причинета материјална штета.

The post Земјотрес од 6,3 степени според Рихтер го погоди Авганистан appeared first on Република.

Во извештајот на Обединетите нации се вели дека производството на афион на опиум во Авганистан е значително намалено откако талибанските власти го забранија одгледувањето на наркотикот минатата година.
Во претходните години, Авганистан беше најголемиот снабдувач на афион во светот, но оваа година одгледувањето падна на само 10.800 хектари, што е намалување за 95% од претходната година.

Канцеларијата на ОН за дрога и криминал (UNODC) објави дека падот на производството на афион извршил голем притисок врз земјоделците во Авганистан, кои во голема мера се зависни од ова производство. Во извештајот се наведува и дека вредноста на извозот на афион во минатото била поголема од вредноста на сите формално извезени стоки, што укажува на важноста на овој сектор во економијата на земјата.

Остриот пад на производството на афион може да има сериозни последици за авганистанската економија, со оглед на тоа што на мнозинството од населението во земјата му е потребна хуманитарна помош.

The post И дрогата не е тоа што беше: Падна производството на афион во Авганистан appeared first on Република.

Нов силен земјотрес утрово го погоди западниот дел на Авганистан. Неделава во серија земјотреси во земјата загинаа повеќе од 2.400 луѓе, а многу села беа срамнети со земја.

Новиот земјотрес со јачина од 6,3 степени е регистриран на околу 28 километри надвор од Херат, главниот град на истоимената провинција, на длабочина од 10 километри, соопшти Американскиот геолошки институт (УСГС).

Епицентарот на претходниот земјотрес, во саботата, беше на околу 40 километри северозападно од главниот град на провинцијата Херат, а имаше и неколку силни последователни потреси, вклучувајќи го и земјотресот со јачина од 6,3 степени во саботата.

https://republika.mk/vesti/svet/trka-so-vremeto-vo-avganistan-po-silniot-zemjotres-brojot-na-zhrtvi-nadmina-2-400/

Талибанските власти соопштија дека повеќе од 2.400 луѓе загинале во провинцијата Херат за време на претходните потреси. Тие подоцна објавија дека илјадници луѓе загинале и се повредени во последователните потреси, но не дадоа детални информации.

Засега нема информации за последиците од денешниот земјотрес.

The post Дополнителен удар по илјадниците загинати: Нов земјотрес со јачина од 6,3 степени во Авганистан appeared first on Република.

Спасувачките тимови во Авганистан работат деноноќно за да извлечат луѓе од урнатините по силниот земјотрес што го погоди западниот дел на земјата и усмрти најмалку 2.400 лица. Телефонските линии се прекинати, а многу патишта се блокирани и спасувачите се борат да стигнат до оддалечените области. Илјадници луѓе се повредени.

Епицентарот на земјотресот, кој се случи во саботата околу 11 часот по локално време, бил на околу 40 километри северозападно од градот Херат. Најтешко беа погодени селата каде што куќите беа претежно изградени од кал.

„Во првиот земјотрес сите куќи се урнаа“, изјави Башир Ахмад, жител на Херат, чиешто семејство живее во едно такво село, пренесе АФП.

„Таму беа затрупани оние што беа во тие куќи. Има семејства од кои не слушнавме вести“, додава тој.

Светската здравствена организација (СЗО) објави дека најмалку 465 куќи се срамнети со земја. Во многу авганистански градови се собира помош за настраданите од земјотресот.

Селаните користеле лопати и со раце ги извлекле преживеаните од урнатините. Бидејќи нивните домови се уништени, многумина се подготвуваат да ја поминат втората ноќ на отворено.

Во земјата со крајно несоодветни медицински капацитети, здравствените работници мака мачат да ги лекуваат повредените.

„Даваме се од себе“, им рече на новинарите во Кабул, Мула Џанан Сајек, портпарол на Министерството за управување со вонредни состојби.

Тој додаде дека операциите за пребарување се во тек. Херат се наоѓа на 120 километри источно од иранската граница и се смета за културна престолнина на Авганистан. Се проценува дека во покраината живеат околу 1,9 милиони луѓе.

Земјотресите се вообичаени во Авганистан, особено во планинскиот венец Хинду Куш, кој се наоѓа во близина на спојот на евроазиската и индиската тектонска плоча.

Во јуни минатата година, провинцијата Пактика беше погодена од земјотрес со јачина од 5,9 степени во кој загинаа повеќе од 1.000 луѓе, а десетици илјади останаа без покрив над главата.

The post Трка со времето во Авганистан по силниот земјотрес, бројот на жртви надмина 2.400 appeared first on Република.

– Околу 2.000 луѓе загинаа во неколку вчерашни силни земјотреси што го погодија западен Авганистан, изјави денеска портпаролот на владата на талибанците, Абдул Вахид Рајан за Германската новинска агенција (ДПА).

Според него бројот на повредени е многу поголем. Тој додаде дека продолжува потрагата по преживеани продолжи.

Најмалку осум земјотреси со интензитет од 4,6 до 6,3 степени според Рихтеровата скала вчера се регистрирани северозападно од авганистанскиот град Херат, што е во близина на границата со Иран.

Земјотресите беа на мала длабочина од околу 10 километри. Силни земјотреси се чести во регионот каде што се спојуваат арапските, индиските и евроазиските плочи.

The post Околу 2.000 луѓе загинаа во земјотресот што го погоди западен Авганистан appeared first on Република.

Oколу 2.000 луѓе загинале во серија силни земјотреси што го погодија западен Авганистан.

Како што соопшти портпаролот на владата на талибанците, Абдул Вахид Рајан за Германската новинска агенција (ДПА), бројот на повредени е многу поголем. Тој додаде дека продолжува потрагата по преживеани продолжи.

Најмалку осум земјотреси со интензитет од 4,6 до 6,3 степени според Рихтеровата скала се регистрирани во текот на вчерашниот ден северозападно од авганистанскиот град Херат, што е во близина на границата со Иран. Земјотресите биле на мала длабочина од околу 10 километри.

Силните земјотреси се чести во регионот каде што се спојуваат арапската, индиската и евроазиската плоча. Во минатогодишниот разорен земјотрес во Авганистан загинаа повеќе од 1.000 луѓе.

The post Осум силни земјотреси го погодија Авганистан appeared first on Република.

Во Авганистан е регистриран земјотрес со интензитет од 6,4 степени според Рихтеровата скала.

Земјотресот бил на 48 километри северозападно од градот Херат, каде што живеат 272.000 луѓе, а епицентарот бил во близина на градот Кара Баг со 12.400 жители.

Засега нема информации за евентуални жртви и причинета материјална штета.

The post Силен земјотрес во Авганистан appeared first on Република.

Талибанците им забранија на жените да го посетуваат еден од најпопуларните национални паркови во Авганистан поради поплаки дека женските посетители не го носат правилно хиџабот.

Илјадници луѓе го посетуваат националниот парк Банд-е-Амир секоја година, кого го красат пејсажи со сафирно сини езера и високи карпи во централната провинција Бамијан во земјата, пишува британскиот весник „Гардијан“.

Забраната беше соопштена откако в.д. министерот за морални вредности се пожали дека жените кои го посетуваат паркот не го следат правилниот начин на носење хиџаб.

„Жените не мора да одат во разгледување на градот“, рече Мохамед Калид Ханафи откако побара од безбедносните сили да почнат да ги спречуваат жените да влегуваат во паркот.

Талибанците, кои дојдоа на власт во Авганистан во август 2021 година, рекоа дека причината за забраната на жените да одат на повеќето јавни места е затоа што жените не ги почитувале правилата за носење хиџаб.

Наспроти ветувањата за поумерена политика кон жените, која ја дадоа кога дојдоа на власт, талибанците им забранија пристап на јавни места, како што се паркови и спортски сали, образование и ги ограничија медиумските слободи.

The post Забранет влез за жени во национален парк во Авганистан: „Жените не мора да одат во разгледување на градот“ appeared first on Република.

Портпаролот на талибанското Министерство за ширење доблест и спречување пороците рече дека жените губат вредност ако мажите можат да ги видат нивните лица во јавност, додавајќи дека верските научници во Авганистан се согласуваат дека жените мора да го покриваат лицето надвор од своите домови.

Талибанците, кои дојдоа на власт во Авганистан во август 2021 година, велат дека причината за забранет пристап за жени на повеќето јавни места е затоа што жените не ги почитувале правилата за носење хиџаб.

Портпаролот на талибанското министерство Молви Мохамад Садик Акиф во интервју за Асошиетед прес изјави дека жените, доколку нивните лица се гледаат во јавноста, може да паднат во грев, пренесува Бета.

- Многу е лошо да се гледаат жени без хиџаб во големите градови, а нашите научници исто така се согласуваат дека лицето на жените треба да биде покриено, рече Акиф.

Тим Винтер, предавач по исламски студии на Богословскиот факултет на Универзитетот во Кембриџ, рече дека во исламот нема јасна наредба за покривање на лицето и дека Талибанците ќе мора да се борат да најдат нешто во исламските списи што ќе го поддржи нивното толкување на правилото за хиџаб.

Ограничувањата на талибанците за девојчињата и жените предизвикаа глобален бес, вклучително и во некои земји со мнозинско муслиманско население.

Специјалниот пратеник на ОН Гордон Браун во средата изјави дека Меѓународниот кривичен суд треба да ги гони талибанските водачи за злосторства против човештвото поради негирање образование и вработување на девојчиња и жени од Авганистан.

Акиф одби да одговори на прашања во врска со забраните, вклучително и дали некоја од нив може да биде укината доколку има универзално почитување на правилата за хиџаб. Тој рече дека има и други служби кои се занимаваат со тие прашања.

Портпаролот посочи дека под талибанскиот режим, мажите повеќе не ги вознемируваат жените и не зјапаат во нив како што правеа за време на претходниот режим.

Талибанските власти, исто така, оценија дека го искорениле „злото“ на пиење алкохол и „бача бази“, практика во која богатите или моќните мажи малтретираат момчиња поради забава, особено за танцување и секс

The post Жените во Авганистан немаат вредност ако им се гледа лицето! appeared first on Република.

Талибанците објавија дека од денеска мора да бидат затворени сите салони за убавина бидејќи истече едномесечниот рок што им беше оставен на сопствениците сами да го направат тоа, а протестите против забраната во меѓувреме беа минимални.

Портпаролот на Министерството за пропагирање на вредности и спречување пороци, Садик Акиф Махјар, не кажа децидно дали талибанците ќе употребат сила против сопствениците на салони кои одбиваат да ја почитуваат одлуката.

Талибанците велат дека ги забраниле козметичките салони бидејќи нуделе услуги забранети во исламот.

Забраната за салони за убавина е последното ограничување на правата и слободите на авганистанските жени и девојки, а и претходеа забрани за нивно одење на училиште, излегување сами на јавни места и повеќето форми на вработување.

Најавата за затворање на салонот предизвика малку јавни протести на десетици козметичарки и шминкерки во Кабул. Безбедносните сили употребија противпожарни црева и истрели од пиштол во воздух за да ги растераат.

Одлуката предизвика загриженост кај меѓународните претставници за нејзиното влијание врз жените претприемачи.

Генералниот секретар на ОН, Антонио Гутереш рече дека „ги поддржува напорите на Мисијата на ОН за помош во Авганистан (УНАМА)“, која ги повика властите да ја повлечат одлуката за затворање на козметичките салони.

УНАМА соопшти дека ограничувањето на правата на жените „ќе има негативно влијание врз економијата и е спротивно на поддршката за женското претприемништво, и ние бараме забраната да се укине“, изјави во понеделникот заменик портпаролот на ОН, Фархан Хак.

Талибанците наведоа низа услуги во салоните за кои велат дека се антиисламски: обликување веѓи, користење на туѓа коса за да се зголеми природната коса и шминка, што според нив го попречува „абдесот“ - ритуалното миење потребно пред молитвата.

Талибанците, исто така, велат дека плаќањето за услуги во салонот е финансиски товар за семејството на младоженецот, кое обично е должно да плати за посетата на невестата и нејзините блиски роднини во салонот пред свадбата.

Не се работи за средување на косата и ноктите. Во прашање се околу 60.000 жени кои ги губат своите работни места. Станува збор за жени кои ќе го загубат едно од ретките места каде што би можеле да одат за дружење и поддршка, бидејќи талибанците систематски го уништија целиот систем поставен за да одговори на семејното насилство“, истакна Хедер Бар, помошник директорка за правата на жените во Хјуман Рајтс Воч.

The post Во Авганистан заврши рокот за самостојно затворање на салоните за убавина appeared first on Република.

Врховниот водач на талибанците Хибатула Ахунџада денеска објави порака во која тврди дека неговата влада ги презела неопходните чекори за подобрување на животот на жените во Авганистан, каде на жените им се забранети јавен живот и работа, а образованието на девојчињата е строго ограничено.

Во својата порака за Курбан Бајрам, Ахунџада рече дека под власта на Исламскиот Емират, преземени се конкретни мерки за заштита на жените од многу традиционални облици на угнетување, вклучително и принуден брак, „и дека нивните шеријатски права се заштитени“.

Тој во пораката додава дека „преземени се чекори за подобрување на положбата на жените кои сочинуваат половина од општеството со цел да им се овозможи да живеат удобен и просперитетен живот според правилата на исламскиот шеријат“.

Пораката беше дистрибуирана на пет јазици: арапски, дари, англиски, пашту и урду. Ахунџада рече дека негативните аспекти од претходната 20-годишна странска окупација во врска со носењето хиџаб и „погрешните упатства“ на жените наскоро ќе завршат.

И покрај првичните ветувања за поумерено владеење отколку кога последен пат го контролираа Авганистан во 1990-тите, талибанците воведоа остри мерки откако ја презедоа власта во земјата во август 2021 година, откако силите на САД и НАТО се повлекоа.

Тие им забранија пристап на жените на јавни места, како што се паркови и спортски сали, и ги задушија медиумските слободи

The post Талибански лидер: На жените во Авганистан им се обезбедува просперитетен живот според правилата на шеријатот appeared first on Република.

Светската програма за храна на ОН (WFP) денеска објави дека итно ѝ се потребни 800 милиони долари за помош на Авганистан во следните шест месеци бидејќи таа земја е во најголема опасност од глад во изминатите 25 години.

Од враќањето на талибанците на власт во 2021 година, хуманитарните агенции им обезбедуваа на Авганистанците храна, образование и здравствена поддршка.

Итно ни требаат 800 милиони долари во следните шест месеци за да продолжиме да обезбедуваме помош за луѓето на кои им треба низ Авганистан. Катастрофален глад тропа на вратата на Авганистан и доколку не се одржи хуманитарна поддршка, на стотици илјади Авганистанци ќе им треба помош за да преживеат.

ОН предупредија дека нивната работа во Авганистан е попречена поради недоволните средства. За 2023 година се обезбедени 249 милиони долари, што не е ни третина од сумата од 2022 година.

The post ОН: Итно се потребни 800 милиони долари за да се спаси Авганистан од глад appeared first on Република.

Мажите од Авганистан кои работат за Обединетите нации во Кабул ќе останат дома во знак на солидарност со своите колешки, откако талибанците им забранија на Авганистанките да работат за оваа глобална организација, изјави висок претставник на ОН.

Рамиз Алакбаров, заменик специјален претставник на ОН, постојан и хуманитарен координатор за Авганистан, одлуката на талибанците ја нарече „кршење на човековите права без преседан“.

Во прашање се животите на авганистанските жени, рече тој и додаде дека меѓународниот персонал на ОН во Авганистан ќе остане на своите позиции.

ОН соопштија дека талибанците ги информирале Авганистанките дека повеќе не им е дозволено да работат за ОН во Авганистан и дека мерката активно ќе се спроведува.

Неколку жени од персоналот на ОН во земјата веќе искусиле ограничувања на движењето откако талибанците ја презедоа власта во 2021 година, вклучително и вознемирување и притворање, што ги натера ОН да му наредат на својот авганистански персонал, од сите полови, да не влегува во канцеларијата до понатамошно известување, се наведува во соопштението.

Специјалната пратеничка на генералниот секретар на ОН за Авганистан, Роза Отунбаева соработува со талибанците на највисоко ниво за да побара итно укинување на наредбата, се додава во соопштението.

ОН наведуваат дека потегот на талибанците е продолжување на претходната забрана, која стапи на сила минатиот декември, со која им се забрануваше на авганистанските жени да работат за национални и меѓународни невладини организации.

The post На Авганистанките им е забрането да работат во ОН, нивните колеги остануваат дома во знак на солидарност appeared first on Република.