Талибанската влада ги повика САД да ја преиспитаат својата одлука за запленувањето на замрзнатите средства на авганистанската Централна банка и да се воздржат од натамошни „провокативни дејства“.

Американскиот претседател Џо Бајден минатата недела ја потпиша извршната наредба со која го отвори патот за заплена и распределба на замрзнатите авганистански средства во САД во вредност од седум милијарди долари, по половина средства за жртвите од терористичките напади на 11 септември 2001 година и како хуманитарна помош за земјата.

Доколку САД не отстапат од својата позиција и продолжат со своите провокативни дејствија, Исламскиот емират, исто така, ќе биде принуден да ја преиспита својата политика кон земјата - соопштија авганистанските власти во официјалното соопштение.

Тие ги повикаа САД, беусловно да ги ослободат замрзнатите средства, кои му припаѓаат на Авганистан.

Одлуката на претседателот Бајден предизвика бес кај Авганистанците, а поранешниот претседател Хамид Карзаи ја нарече „злосторство“ врз авганистанските граѓани.

Локалните медиуми објавија дека стотици луѓе протестираат во Кабул во знак на осуда на одлуката на Бајден.

Авганистанските политичари и академици побараа замрзнатите средства да не се користат за компензација на жртвите од 11 септември, бидејќи ниту еден Авганистанец не бил вклучен во нападите, ниту, пак, сопствените пари на земјата треба да бидат насочени како помош. Тие сакаат средствата да останат недопрени за да се обезбеди стабилност на авганистанската валута и финансискиот систем на земјата како целина.

Авганистан во моментов има околу девет милијарди долари замрзнати средства, од кои седум се во САД, а останатите најмногу се чуваат во Германија, Обединетите Арапски Емирати и Швајцарија.

The post Талибанците бараат САД да ја преразгледаат одлуката за запленетите авганистански средства appeared first on Република.