Генералниот секретар на Обединетите нации, Антонио Гутереш, изјави дека прекинот на огнот меѓу Израел и либанската група Хезболах претставува „првата трошка надеж“ во регионалниот конфликт по неколкумесечна ескалација.

Гутереш на прес-конференција во Лисабон по разговорите со португалскиот премиер Луис Монтенегро, порача дека исто така е неопходно Израел и Хезболах да бидат целосно посветени на почитување на прекинот на огнот.

Генералниот секретар на ОН повика и на итен прекин на огнот во Појасот Газа.

Примирјето меѓу Израел и Хезболах стапи во сила утринава во 4 часот по локално време, со што завршија речиси 14-месечните борби кои започнаа откако палестинската милитантна група Хамас изврши терористички напад во јужниот дел на Израел во октомври минатата година.

The post Гутереш: Прекинот на огнот меѓу Израел и Хезболах е „прва трошка надеж“ во конфликтот appeared first on Република.

Генералниот секретар на ОН, Антонио Гутереш има намера да го ограничи членството на Израел во оваа меѓународна организација доколку израелскиот парламент - Кнесетот, одобри закон со кој агенцијата на ОН, УНРВА се признава како соучесник на Хамас.

Со закон усвоен од израелскиот Кнесет денеска се спречува УНРВА да продолжи со својата важна работа на окупираните палестински територии, со катастрофални последици за палестинските бегалци.

 

Го повикувам Израел да дејствува во согласност со своите обврски според Повелбата на ОН и меѓународното право. Националните закони не можат да ги променат овие обврски.

 

Го свртувам вниманието на Генералното собрание на Обединетите нации на ова прашање и ќе го информирам Собранието додека се развива ситуацијата.

 

Нема алтернатива за УНРВА, изјави Гутереш.

The post ОН имаат намера да воведат санкции против Израел appeared first on Република.

Украинскиот претседател, Володимир Зеленски, одби да го прими генералниот секретар на Обединетите Нации во Киев поради посетата на Антонио Гутереш на Казан во Русија каде што учествуваше на самитот на БРИКС, изјави за „АФП“ висок функционер од кабинетот на украинскиот претседател.

По Казан, тој сакаше да дојде во Украина, но претседателот не ја потврди неговата посета, рече тој функционер кој сакаше да остане неименуван.

Антонио Гутереш дојде во Русија за да се сретне со претседателот Владимир Путин на маргините на самитот на БРИКС, на кој, меѓу другите, присуствуваа и лидерите на Индија и Кина. Во разговорот со Путин, генералниот секретар на ОН му го повторил „неговиот став дека руската инвазија на Украина“ го прекршува меѓународното право, се вели во соопштението од кабинетот на неговиот портпарол.

Кремљ се уште не објави никакви информации за содржината на нивните приватни разговори. Пред средбата, Гутереш повторно повика пред учесниците на самитот за „праведен мир“ во Украина. Уште пред разговорите Путин-Гутереш, Киев го критикуваше „погрешниот избор“ на генералниот секретар на ОН да оди во Казан, што само „го нарушило угледот на ОН“.

The post Зеленски одбил да го прими генералниот секретар на Обединетите Нации appeared first on Република.

Повеќе од сто земји-членки на Обединети нации испратија писмо со поддршка за генералниот секретар на ОН, Антонио Гутереш откако Израел, на почеток на месецот, го прогласи за „персона нон грата“.

- Изразуваме длабока загриженост поради неодамнешната изјава на шефот на израелската дипломатија Израел Кац, кој го прогласи Гутереш за непожелна личност. Таквите акции ја поткопуваат способноста на ОН да го спроведе својот мандат, што вклучува посредување при конфликти и пружање хуманитарна поддршка, се наведува во писмото.

САД, Велика Британија, Австралија, Нов Зеланд и Канада не го потпиша писмото за поддршка на Гутереш.

Кац на платформата Икс објави дека одлуката за забрана на влез во земјата за португалскиот дипломат е поттикната од неговото одбивање да го осуди неодамнешниот ирански ракетен напад врз Израел заедно со „неговото антисемитско и антиизраелско однесување“.

Тој тврди дека речиси 90 проценти од Израелците се согласуваат со неговата одлука и оти „Гутереш може да продолжи да собира потписи за поддршка (на себе) од членките на ОН, но нема да биде променета одлуката.

Министерството за надворешни работи на Израел претходно соопшти дека одлуката е реакција бидејќи Гутереш „не го именувал Иран и недвосмислено не ја осудил неговата тешката агресија“ врз Израел.

Иран на 1 октомври истрела речиси 200 проектили кон Израел, како, одговор против агресијата на Израел и елиминацијата на лидерите на Хамас и на Хезболах, Исмаил Ханија и Хасан Насрала и заменик-командантот на иранската Револуционерна гарда, Абас Нилфорушан.

The post Повеќе од сто земји-членки на ОН потпишаа писмо за поддршка на Гутереш appeared first on Република.

Советот за безбедност на ОН синоќа изрази целосна поддршка за генералниот секретар Антонио Гутереш, откако израелскиот министер за надворешни работи Израел Кац го прогласи за “персона нон грата” во Израел.

Во официјалното соопштение на 15-члениот Совет се наведува дека „секоја одлука да не се соработува со генералниот секретар на ОН или Организацијата на Обединетите нации е контрапродуктивна, особено во контекст на зголемените тензии на Блискиот Исток”.

Во соопштението не беше спомнат Израел.

Ваквите соопштенија од Советот за безбедност се усвојуваат со целосен консензус.

The post ОН со целосна поддршка за Гутереш по прогласувањето за „персона нон грата“ во Израел appeared first on Република.

Обединетите нации во врска со одлуката на Израел да го прогласи генералниот секретар на Обединетите нации, Антонио Гутереш за „персона нон грата“, соопштија дека тоа е „уште еден напад на Тел Авив врз персоналот на ОН“.

Портпаролот на ОН, Стефан Дужарик ја поздрави поддршката на членовите на Советот за безбедност на ОН за Гутереш на седницата за Блискиот Исток и ја коментираше одлуката на Израел.

- Ја видовме оваа објава со која Израел го прогласи генералниот секретар на ОН за непожелна личност, а таа објава ја гледаме како политичка изјава на израелскиот премиер Бенјамин Нетанјаху, рече Дужарик.

Посочувајќи дека тоа е „само уште еден напад врз персоналот на ОН што го виделе од Владата на Израел“, Дујарик вети продолжување на соработката меѓу ОН и Израел „на оперативно ниво и на други нивоа“.

Тој потоа рече дека ОН „не признаваат дека концептот на персона нон грата се однесува на нивниот персонал“.

„Оваа објава ја гледаме како политичка изјава, повеќе од правна“, нагласи Дужарик, истакнувајќи дека Гутереш патува во земја само на покана на релевантно лице.

Дужарик понатаму изјавил дека во својата 24-годишна кариера никогаш не наишол на ваква изјава.

„Имаше моменти кога имаше исклучително тензични ситуации меѓу генералниот секретар и различни земји-членки, но јас не се сеќавам на ваква реторика“, додаде тој.

Претходно, Израел објави дека го прогласил Гутереш за „персона нон грата“, забранувајќи му да влезе во земјата, откако тој повика на итна деескалација на Блискиот Исток.

The post ОН: Одлуката на Израел да го прогласи Гутереш за „персона нон грата“ е уште еден напад на Тел Авив врз нашиот персонал appeared first on Република.

Македонската евроинтеграција целосно заслужено треба да се случи што е можно побрзо, истакнал генералниот секретар на Обединетите нации Антонио Гутереш на денешната средба со претседателката Гордана Сиљановска Давкова во Њујорк.

Како што информираат за МИА од Кабинетот на претседателката Сиљановска Давкова, на средбата таа ги потенцирала принципите на ОН како основа на која што мора да функционира меѓународниот поредок без разлика дали се работи за мали или големи држави.

Во случајот со македонската евроинтеграција, рекла Сиљановска Давкова, не смее да се дозволи билатерализацијата да стане камен на сопнување за проширувањето на Европската унија која настана како мировен процес.

Како што јави известувачот на МИА од Њујорк, генералниот секретар на ОН на средбата искажал несогласување со пречките кои што Македонија ги има на патот кон ЕУ.  Гутереш порачал дека е голем почитувач на македонската евроинтеграција и ја потенцирал својата лична солидарност за напорите на земјата да биде дел од ЕУ.

Претседателката Гордана Сиљановска Давкова на маргините на Генералното собрание на ОН денеска ќе се сретне и со генералниот секретар на Советот на Европа Алан Берсе.

Вечерва ќе се сретне со претставници на нашата дијаспора во Њујорк.

The post Средба Сиљановска Давкова – Гутереш во Њујорк: Македонската евроинтеграција целосно заслужено треба да се случи што е можно побрзо appeared first on Република.

Шефот на ОН Антонио Гутереш е „длабоко вознемирен“ од извештаите дека голем број комуникациски уреди експлодирале низ Либан.

- Генералниот секретар ги повикува сите вклучени актери да покажат максимална воздржаност за да се спречи понатамошна ескалација, нагласи неговиот портпарол Стефан Дижарик.

Дижарик, исто така, ги повика страните „да се обврзат повторно да ја имплементираат резолуцијата 1701 на Советот за безбедност“, мислејќи на онаа со која заврши војната меѓу Хезболах и Израел во 2006 година.

The post Шефот на ОН повика на „максимална воздржаност“ по експлозиите во Либан appeared first on Република.

Човештвото е жртва на „екстремна топлотна епидемија“, предупреди денеска генералниот секретар на ОН, Антонио Гутереш, повикувајќи на мерки за ограничување на влијанието на топлотните бранови кои се зголемуваат поради климатските промени.

Ако има едно нешто што го обединува нашиот поделен свет, тоа е што станува се потопол … Милијарди луѓе се соочуваат со епидемија на екстремни горештини, изложени на топлотни бранови кои се сè поубиствени, со температури кои надминуваат 50 степени Целзиусови, изјави Гутереш.

Според европската мрежа Коперникус, 21, 22 и 24 јули оваа година биле најтоплите денови досега регистрирани во светот.

„Осакатувачка топлина е насекаде. Милијарди луѓе ширум светот венеат под сè посилните топлотни бранови предизвикани главно од климатската криза предизвикана од фосилни горива. Повеќе од 70 отсто од глобалната работна сила – 2,4 милијарди луѓе – сега се изложени на висок ризик од екстремни горештини. Најпогодени се најранливите заедници“, се вели во повикот за акција на Гутереш објавен од ОН.

Како одговор на брзиот пораст на обемот, интензитетот, зачестеноста и времетраењето на екстремните горештини, генералниот секретар на ОН Антонио Гутереш денеска повика на итни и заеднички напори за зајакнување на меѓународната соработка за справување со екстремните горештини во четири критични области: Грижа за ранливите, заштита на работниците, зголемување на отпорноста на економиите и општествата со користење на податоци и наука, ограничување на порастот на температурата на 1,5 степен Целзиусов со постепено укинување на фосилните горива и зголемување на инвестициите во обновливи извори на енергија.

(МИА)

The post Гутереш: Човештвото е жртва на екстремна топлотна епидемија appeared first on Република.

Генералниот секретар на Обединети нации, Антонио Гутереш, денеска по повод Меѓународниот ден на борбата против омразата, истакна дека говорот на омраза е показател за дискриминација, злоупотреба, насилство, конфликти и злосторства против човештвото.

- Видовме како се одвиваше од нацистичка Германија до Руанда, Босна и пошироко. Нема прифатливо ниво на говор на омраза. Сите мораме да работиме на негово целосно искоренување, посочи Гутереш.

Тој додаде дека изминатите месеци зголемен е антисемитскиот и антимуслиманскиот говор на омраза на интернет и во јавните обраќања на влијателни лидери.

- Говорот на омраза може да биде насочен против жените, бегалците, мигрантите, родово различните и трансродовите луѓе, како и малцинствата, истакна генералниот секретар на ОН.

Гутереш потенцира дека државите имаат обврска според меѓународното право да спречат и да се борат против поттикнување омраза, како и да промовираат различност, меѓусебно разбирање и солидарност.

Според генералниот секретар на ОН, најпогодени од говорот на омраза, особено на интернет, се младите луѓе кои мора да бидат и дел од решението.

The post Гутереш: Говорот на омраза е показател за дискриминација, злоупотреба, конфликти и злосторства против човештвото appeared first on Република.

Генералниот секретар на ОН, Антонио Гутереш денеска изјави дека се зголемува меѓународната поддршка за повикот до Израел дека е потребен прекин на огнот во Појасот Газа и дека инвазијата на градот Рафа ќе предизвика хуманитарна катастрофа. Гутереш ја даде изјавата за време на посетата на Јордан.

Гледаме како се формира поширок консензус во меѓународната заедница за тоа да му биде наведено на Израел дека е потребен прекин на огнот, а исто така – (за тоа) ги слушнав од САД, слушнав мислења и од Европската унија, нема потреба да спомнувам, се разбира, муслиманскиот свет – да му се стави јасно до знаење на Израел дека секоја копнена инвазија во Рафа може да значи хуманитарна катастрофа“, рече Гутереш на прес-конференција.

Градот Рафа, на границата со Египет, е пренаселен, со над милион Палестинци кои се засолниле таму бегајќи од воените дејствија во Појасот Газа, додека Израел е решен да го нападне градот, кој го смета за „последниот бастион“ на радикалното палестинско движење Хамас“.

The post Гутереш: Се зголемува меѓународната поддршка за повикот до Израел да го прекине огнот во Појасот Газа appeared first on Република.

Генералниот секретар на ОН, Антонио Гутереш, изјави дека „секој вработен во ОН вклучен во терористички акти“ ќе биде кривично гонет, по обвинувањата дека неколку работници на УНРВА учествувале во нападот на Хамас врз јужен Израел на 7 октомври.

Од 12. лица вклучени во тој напад на деветмина од нив им е раскинат договорот, за еден е потврдено дека е мртов, а идентитетот на останатите двајца се уште се утврдува, прецизираше Гутереш

Шефот на Светската организација, истовремено, апелираше до владите да продолжат да ја поддржуваат УНРВА, по одлуката на девет земји, меѓу кои САД и Британија, привремено да го прекинат финансирањето на агенцијата на ОН која им помага на палестинските бегалци.

Секој вработен во ОН вклучен во акти на терор ќе биде повикан на одговорност, вклучително и кривично гонење, потенцира Гутереш.

The post Гутереш порача дека секој вработен во ОН вклучен во терористички акти ќе одговара кривично appeared first on Република.

Генералниот секретар на Обединетите нации, Антонио Гутереш истакна дека е неприфатливо израелската влада да го отфрли решението за две држави.

Повторното отфрлање на решението за две држави на највисоко ниво на израелската влада е неприфатливо, изјави Гутереш на седницата на Советот за безбедност на Обединетите нации за ситуацијата во Појасот Газа.

Тој побара итно и безусловно ослободување на сите заложници кои ги држи палестинската милитантна група Хамас во Појасот Газа.

Посочи дека ништо не може да го оправда „намерното убивање, ранување или киднапирање на цивили“, како и сексуалното насилство и неселективното лансирање ракети кон нив.

Гутереш изјави дека Израел предлага двомесечна пауза во борбите во замена за „постепено ослободување“ на преостанатите заложници во Газа, објавено е на веб-страницата на ОН.

Ќе продолжам, со ограничени капацитети, да вложувам максимални напори за да придонесам за нивно ослободување, рече генералниот секретар на ОН.

Гутереш го повтори апелот за итно ослободување на заложниците и хуманитарен прекин на огнот.

Ова ќе обезбеди доволна помош да стигне таму каде што е потребна, ќе го олесни ослободувањето на заложниците и ќе помогне да се намалат тензиите на Блискиот Исток, заклучи тој.

The post Гутереш: Неприфатливо е израелската влада да го отфрли решението за две држави appeared first on Република.

Генералниот секретар на ОН, Антонио Гутереш денеска рече дека ситуацијата во Газа претставува „криза на човештвото“ и дека палестинската енклава брзо „станува гробишта за деца“, јави Би-Би-Си.

Стотици девојчиња и момчиња се убиени или повредени секој ден, рече на прес-конференција Гутереш.

Тој додаде дека конфликтот „го потресе светот“ и дека „уништува толку многу невини животи“.

Гутереш ја повтори својата осуда за „грозоморните терористички акти извршени од Хамас на 7 октомври“, велејќи дека неговите борци користеле цивили како „човечки штитови“ и продолжиле да го напаѓаат Израел.

Ништо не може да го оправда намерното мачење, убивање, ранување и киднапирање цивили. Заштитата на цивилите мора да биде најважна, рече тој.

Шефот на ОН, исто така, изрази загриженост поради „ескалацијата“ на непријателствата како резултат на војната меѓу Израел и Газа.

Тој ја повика меѓународната заедница да се справи со „ризиците од прелевање на конфликтот во поширокиот регион“.

Веќе сме сведоци на спирала на ескалација од Либан и Сирија, до Ирак и Јемен, додаде тој.

Гутереш смета дека има итна потреба од решение и повика на итен хуманитарен прекин на огнот.

The post Гутереш: Газа се претвора во гробишта за деца, има итна потреба од решение и хуманитарен прекин на огнот appeared first on Република.

Генералниот секретар на ОН е „згрозен од нападот“ на израелските сили врз конвојот амбулантни возила во Газа и нагласува дека конфликтот „мора да престане“.

Палестинската Црвена полумесечина соопшти дека едно од нивните амбулантни возила било погодено од „проектил испукан од израелските сили“ на само неколку метри од влезот во болница во градот Газа, во напад во кој загинале најмалку 15, а повеќе од 60 луѓе се ранети.

Згрозен сум од пријавениот напад во Газа врз конвој на брза помош пред болницата Ал Шифа. Фотографиите на тела на улицата надвор од болницата се шокантни“, наведува Гутереш во соопштение.

https://republika.mk/vesti/svet/petnaeset-zaginati-i-desetitsi-raneti-vo-izraelski-napad-vrz-konvoj-ambulantni-vozila-vo-gaza/

Израелската војска соопшти дека извршила воздушен напад врз „возило за брза помош, идентификувано од силите дека се користи од терористичка ќелија на Хамас во непосредна близина на нивната позиција во борбената зона“.

Инсистирајќи дека „не ги заборавил терористичките напади извршени од Хамас во Израел“, шефот на ОН додаде дека „речиси еден месец, цивилите во Газа, вклучително и деца и жени, се опколени, не им се дава помош, се убиваат и се протерани од нивните домови.

Тоа мора да престане...Хуманитарната ситуација во Газа е ужасна. Нема доволно храна, вода и лекови, додека горивото за напојување на болниците и постројките за вода е при крај. Засолништата на ОН во Газа се исполнети речиси четири пати повеќе од капацитетот и се бомбардирани. Мртовечниците се полни. Продавниците се празни. Санитарната состојба е катастрофална. Гледаме зголемување на болестите и респираторните заболувања, особено кај децата. Целото население е трауматизирано. Никаде не е безбедно“, предупреди Гутереш.

The post Гутереш „згрозен“ од израелскиот напад врз конвој на брзата помош во Газа appeared first on Република.

Генералниот секретар на ОН Антонио Гутереш денеска повика на „унифициран, траен и глобален“ одговор на ризиците поврзани со брзиот развој на вештачката интелигенција.

Првиот Самит за безбедност на вештачката интелигенција заврши денеска, а симболично се одржа на селскиот имот „Блечли парк“, северно од Лондон, каде што за време на Втората светска војна беше седиштето на сојузничките операции за дешифрирање на германските комуникации.

Фокусот на дводневниот собир беше најсовремената, „гранична“ вештачка интелигенција, за која некои научници предупредуваат дека може да го загрози опстанокот на човештвото.

Гутереш оцени дека принципите на управување со вештачката интелигенција „треба да се засноваат на Повелбата на Обединетите нации и Универзалната декларација за човекови права“.

Стотици експерти, шефови на компании и политички лидери два дена разговараа за опасностите од ненадејниот, експоненцијален развој на вештачката интелигенција. Меѓу нив беа претседателката на Европската комисија, Урсула фон дер Лајен, потпретседателката на САД, Камала Харис и италијанската премиерка Џорџа Мелони.

На почетокот на состанокот, светските сили Кина, САД и ЕУ вчера се договорија за постоење на „поделена одговорност“ за ризикот од користење вештачка интелигенција, а британскиот премиер Риши Сунак го оцени соопштението од Блечли како „историско“.

Затворајќи го самитот денеска, тој најави договор меѓу земјите и компаниите „за заедничка работа на безбедноста на новите модели на вештачка интелигенција и нивното лансирање“.

Тие модели на вештачка интелигенција би можеле да бидат тестирани и оценети во истражувачките институти што Велика Британија и САД наведоа дека сакаат да ги постават.

Британскиот премиер оцени дека „успесите“ на овој самит ќе ја „изместат вагата“ во корист на човештвото бидејќи покажуваат дека постои и политичка волја и способност да се контролира оваа технологија и да се обезбедат долгорочни придобивки од неа.

Цитирајќи ги зборовите на физичарот Стивен Хокинг кој оцени дека вештачката интелигенција може да биде „најдоброто или најлошото нешто што му се случило на човештвото“, Риши Сунак рече дека е убеден дека „може да биде добро“ ако продолжи соработката што започна.

Учесниците се согласија да му доверат на канадскиот истражувач Џошуа Бенџо, влијателна личност во секторот и добитник на наградата Туринг за 2019 година, да го подготви првиот извештај за „состојбата на науката“.

Тој треба да направи научна проценка на постоечките истражувања и ризиците и можностите на вештачката интелигенција, а потоа да утврди приоритети за да се расветли идната работа за безбедноста на оваа врвна технологија.

Кина, чие присуство предизвика вознемиреност поради геополитичките тензии и стравувањата од технолошка шпионажа, не беше поканета на вториот ден од разговорите, кои се одржаа во потесен формат.

Пред „мала група високи претставници на истомисленици“ како што се Франција, Канада и Јапонија, американската потпретседателка Камала Харис ги истакна напорите на САД за „воспоставување норми и средства“ за разликување на автентичната дигитална содржина произведена од држава, од содржина произведена или манипулирана од вештачка интелигенција, соопшти Белата куќа.

Неколку месеци пред изборите како што се претседателските избори во САД и британските, производите за вештачка интелигенција предизвикуваат стравувања за ширење на лажни содржини на интернет и сè поверодостојни усовршени монтажи (дипфејк).

Оние технологии кои можат да произведат текст, звук, слики, видео за неколку секунди на едноставно барање, како што е роботот за разговор на ChatGPT, постигнаа експоненцијален напредок во последните години, а следните генерации на вештачка интелигенција ќе се појават до лето.

Развојот покренува огромни надежи за медицината или образованието, но исто така може да овозможи општествата да се дестабилизираат или да овозможи нелегалното производство на оружје да излезе од контрола, предупреди британската влада.

Самитот денеска се совпадна со објавувањето на новата „песна на Битлси“ која е производ на вештачката интелигенција, со синтетизираниот глас на убиениот Џон Ленон (1940-1980).

Два претстојни меѓународни самити ќе ги продолжат дискусиите за безбедноста на вештачката интелигенција: прво виртуелен состанок во Јужна Кореја за шест месеци, а потоа со лично присуство во Париз за една година.

Меѓу големите шефови во Блечли Парк беше Илон Маск, шеф на компанијата X и ко-основач на OpenAI, кој оцени дека вештачката интелигенција претставува „една од најголемите закани“ за човештвото.

Тој вечерва во Лондон треба да разговара за ова со британскиот премиер Риши Сунак, а подоцна ќе го објави разговорот на неговата платформа Х.

Организирањето на тој разговор предизвика критики откако Маск беше обвинет дека поддржува дезинформации на платформата X откако ја купи и ја презеде пред една година.

The post Шефот на ОН повика на обединет и глобален одговор на опасностите од вештачката интелигенција appeared first on Република.

Генералниот секретар на Обединетите нации, Антонио Гутереш, ги повика Белград и Приштина да се воздржат од преземање унилатерални дејствија кои би можеле да доведат до зголемени тензии и дополнителна ескалација на ситуацијата.

Во последниот шестмесечен извештај за работата на УНМИК, кој се однесува на периодот од 19 март до 18 септември, Гутереш посочи дека страните не постигнале значителен напредок во спроведувањето на Договорот на патот кон нормализацијата и дека допрва треба да се договорат за редоследот на одредбите на неговиот анекс.

Според Гутереш, претходните шест месеци биле обележани со постојани несогласувања меѓу Белград и Приштина, особено во однос на легитимитетот на новоизбраните градоначалници на косовските Албанци во четири општини со мнозинско српско население на северот на Косово. Безбедносната состојба на теренот продолжи да се влошува поради провокациите и зголемената реторика од двете страни, што доведе до жестоки судири во кои беа повредени припадници на косовските сили, како и цивили и новинари.

Гутереш смета дека протестите на северот на Косово, апсењата на косовски Срби, приведувањето на тројца косовски полицајци од страна на српските власти, новото распоредување на единиците за специјални операции на косовската полиција на северот на Косово, експропријација на земјиштето и неколку безбедносни инциденти придонеле за тензичното опкружување.

Како што истакна Гутереш, немањето напредок во дијалогот носи ризик од дополнителни тензии и можна ескалација на теренот.

Ги повикувам страните да ја потврдат својата вистинска посветеност на дијалогот со посредство на ЕУ и целосно да ги спроведат сите договори, се вели во извештајот.

Според него, неопходно е да се најде решение за брзо одржување на предвремени и инклузивни локални избори на северот на Косово, со учество на косовските Срби, за да се смират тензиите и да се оди напред.

Тој ги осуди нападите врз членовите на меѓународната мисија на теренот и воопшто употребата на насилството, наведувајќи дека ескалацијата на тензиите и безбедносните инциденти во мај и јуни имаа негативно влијание врз процесот на дијалог.

The post Гутереш се огласи за Косово: Немањето напредок во дијалогот носи ризик од можна ескалација appeared first on Република.

Генералниот секретар на ОН, Антонио Гутереш пристигна на египетскиот граничен премин Рафа со Газа каде што повика да се дозволи влез во Газа на камионите со хуманитарта помош.

Активно се ангажираме со сите страни со цел да ги разјасниме овие ограничувања за да можат овие камиони да се движат таму каде што се потребни. Потребно ни е овие камиони да се придвижат што е можно поскоро, рече Гутереш.

Тој рече дека видел „толку камиони натоварени со вода, гориво, лекови, храна“, додавајќи дека овие камиони би биле „спас“ и „разликата меѓу животот и смртта за толку многу луѓе во Газа“.

Имаме два милиони луѓе овде кои премногу страдаат. Нема вода, нема храна, нема лекови, нема гориво. На Газа и треба сè за да преживее, нагласи тој.

Шефот на ОН рече дека камионите со хуманитарна помош се натоварени и подготвени.

Овие камиони се спас. Тие се разликата помеѓу животот или смртта за толку многу луѓе, рече Гутереш.

The post Гутереш: Камионите со помош се разликата помеѓу животот или смртта appeared first on Република.

Рускиот министер за надворешни работи Сергеј Лавров го повика генералниот секретар на ОН Антонио Гутереш да спречи вовлекување на претставници на структурите на ОН во политизирани иницијативи во контекст на украинската криза, се наведува на веб-страницата на Министерството за надворешни работи.

Генералниот секретар на ОН потврди дека ќе се воздржи од учество во иницијативи кои не вклучуваат учество на сите страни, се наведува на веб-страницата на МСП, по резултатите од преговорите меѓу партиите на маргините на 78-та седница на ОН.

Фокусот на нивниот разговор традиционално беше на најитните меѓународни проблеми, како и на различните аспекти на соработката меѓу Русија и ОН, додаваат од Министерството.

Рускиот министер го повика генералниот секретар на ОН да покрене арбитражна постапка против Соединетите Американски Држави.

Министерот го привлече вниманието на генералниот секретар на континуираното кршење на обврските на САД од Договорот на ОН од 1947 година, со постојано одбивање да им се издаваат визи на дипломати од Русија и низа други земји за учество во настаните на ОН, соопштија од одделението.

Ваквите дејствија на Вашингтон ја диктираат потребата Гутереш што поскоро да покрене арбитражна постапка против САД, за што постојано се дискутираше во релевантните резолуции на Генералното собрание на ОН, објасни Лавров.

Шефот на руската дипломатија уште еднаш ја нагласи „потребата раководството на ОН и сите вработени во светската организација строго да го почитуваат принципот на непристрасност содржан во Повелбата на ОН. Истовремено, тој посочи дека употребата на двојни стандарди во статистичките и другите документи на ОН во однос на различни територии е недозволиво.

Соговорниците детално разговарале за реформата на ОН со цел да се прилагодат на современите реалности, а Лавров посочил дека е важно да се води сметка за позицијата на секоја од земјите-членки на ОН при спроведување на какви било реформски иницијативи.

Претходно Гутереш рече дека повеќето земји на ОН ја препознаваат потребата од реформи во Советот за безбедност. Сергеј Лавров истакна дека Советот за безбедност на ОН треба „да се прошири не на сметка на западните земји, туку на сметка на претставниците на Азија, Африка и Латинска Америка“.

The post Лавров до Гутереш: Почнете арбитражна постапка против Америка appeared first on Република.

Генералниот секретар на ОН, Антонио Гутереш изјави дека е неопходно да се реформира Советот за безбедност на ОН и системот Бретон Вудс за да бидат релевантни за современите глобални политички и економски трендови.

Денешните глобални структури на управување го одразуваат вчерашниот свет. Тие главно беа создадени по Втората светска војна, кога со многу африкански земји сè уште владееле колонијални сили. Ова особено се однесува на Советот за безбедност на Обединетите нации и институциите на Бретон Вудс“, изјави Гутереш на самитот на БРИКС и во Јужноафриканската Република.

Тој нагласи дека мултилатералните институции мора да се реформираат за да останат универзални и да ја одразуваат денешната моќ и економска реалност, а не таа по Втората светска војна.

Во отсуство на таква реформа, фрагментацијата е неизбежна. Не можеме да си дозволиме свет со поделена глобална економија и финансиски систем со различни стратегии за технологија, вклучително и вештачка интелигенција, и со конфликтни безбедносни рамки“, нагласи Гутереш.

Тој изјави дека во Јоханесбург дошол со едноставна порака: во поделен свет преплавен од кризи, едноставно нема алтернатива за соработка.

Мораме итно да ја вратиме довербата и повторно да го оживееме мултилатерализмот за 21 век. Ова бара храброст за компромис за општото добро“, нагласи генералниот секретар на ОН.

Договорот Бретон Вудс е меѓународен договор постигнат на конференција на претставници на 44 земји одржана во средината на 1944 година во Бретон Вудс (во американската држава Њу Хемпшир), за решавање на повоените монетарни и финансиски проблеми. На конференцијата беа формирани Меѓународниот монетарен фонд и Меѓународната банка за обнова и развој.

The post Mултилатералните институции мора да се реформираат за да останат универзални: Гутереш бара промени во Советот за безбедност на ОН appeared first on Република.