Во рамките на Град Скопје како престолнина на културата 2028 година Културно информативниот центар – Скопје и Здружението за зачувување на делото на Анте Поповски имаат особена чест и задоволство да ве поканат на Поетска вечер со добитниците на наградите на Манифестацијата „АНТЕВО ПЕРО“, денес од 19:00 часот во Салон Империјал 2.

Убавината и оригиналноста на овој настан, e во тоа што на едно место овојпат ќе бидат собрани и ќе се претстават со извадоци од своето поетско писмо, досегашните добитници на наградите „Антево перо“, „Антев златник и „Антев часовник“. Овие традиционални награди им беа доделени по конкурсите за необјавена збирка поезија на македонски јазик, реализирани во рамките на седумте досегашни изданија на „Меѓународната поетско-културна манифестација „Анте Поповски-Антево перо“. Вљубениците во поезијата ќе имаат ретка можност да слушнат квалитетни поетски сочиненија кои се одраз на новите модерни текови во македонската поезија, а се инспирирани од името и творештвото на нашиот поетски великан Анте Поповски.

Низ сценариото и програмата ќе водат професорките Татјана Алексиќ и м-р Митра Мими Спасова, кои ќе интерпретираат и одделни извадоци од творештвото на Анте Поповски и на други поети, а присутните посетители ќе имаат можност да проследат и видео материјали изворно со гласот на Анте Поповски.

The post Поетска вечер со добитниците на наградите на Манифестацијата „Антево перо“ appeared first on Република.

Жири-комисијата за доделување на наградата во состав: проф. д-р Весна Мојсова Чепишевска (претседател), д-р Атина Цветаноска и Жорж Поповски (членови), пред да пристапи кон донесување на завршната одлука за наградата „Антево перо“, што подразбира печатење на наградената стихозбирка во специјалната едиција на наградени автори, уште еднаш го изразува своето задоволство од одличниот одзив за оваа награда. Оваа година, комисијата имаше навистина тешка задача да направи селекција на поетските писма кои со своите квалитети и одличен израз се издвоија.
Пристигнаа 75 стихозбирки, со најразлична трендовска и жанровска разноликост, од кои во потесен избор за наградата влегоа седум стихозбирки: „Ми се чини дека некаде слушнав дете“ на Тони Попов, „Собрани остатоци од светот“ на Пепи Стамков, „Сивка: геометрија на болката“ на Ирена Бабамова Стојчева, „Музеј на заборавот“ на Сашо Димоски „Царски рез на небото“ на Даниела Андоновска Трајковска, книгата „Анатомија на скриена болка“ доставена под шифрата Суштина и поетскиот ракопис „Каде што се раѓаат сенките“ на Агрон Усеини. По темелно разгледување на вредностите на секоја од овие седум стихозбирки и по завршните дискусии на членовите, Комисијата едногласно донесе одлука наградата „Антево Перо“ за 2024 година да ѝ припадне на стихозбирката „Музеј на заборавот“ од Сашо Димоски.
Доживувањето на стварноста кај индивидуите кои имаат изразен сензибилитет условува нивните дела да покажуваат креативност која, ако се мери на некоја скала на интензитет, тогаш би биле на самиот врв. Постоењето на тие дела во времето и просторот создава сопствена реалност и се сместени во духовни музеи во кои вечноста е нивен главен предзнак. Во еден таков музеј, својот живот го живее и поезијата на Сашо Димоски, која токму поради овие квалитети, ја понесува наградата „Антево перо“ за 2024 година. Поетскиот музеј на Димоски, кој е вечен дом на личниот, интимен заборав, е богатство на мигновеноста, на времето минато, сегашно и идно, на времето кое постои и не постои, на љубовта во најесенцијалната суштественост во која се родени, се раѓаат и ќе се родат безброј микрокосмоси (вклучително и сите форми на љубовта за татковината, за татковиот збор и ковчег, за клучот и катенцот, за мајчиниот јазик и болка, како далечно ехо на поетската слика на големиот Анте Поповски), микрокосмоси и љубови од кои е составен човекот. Оваа поезија, покрај тоа што е слика преоблечена во различни стилови и во нив преовладуваат тонови од целиот спектар на бои, таа има и звуковен карактер чиј интензитет се огледува во одличната употреба на парадоксот, оксиморонот, сложените метафори, но и фигурите кои припаѓаат на звучниот код. Со помош на зборовите, Димоски ни презентира визуелност во која гледаме како машкиот и женскиот принцип, темнината и светлината, вистината и заборавот страсно танцуваат танго. Тоа танго некогаш е во духот на аргентинската милонга во која слободата на движењата, незадолжителноста на формата и опуштеноста на рацете и нозете преоѓа во танцовен чекор со различен ритам и брзина правејќи тоа да биде milonga de amor и да има длабоко треперење при самото танцување. Понекогаш танцот е во духот на либертангото кое ги руши стереотипите и пред нас става нешто ново без притоа да ги заборави традиционалните вредности што од нас ги бара татковината, погледот на мајката или исконскиот оган во домашното огниште.
Поради одличниот квалитет на поетските текстови од збирките кои се избрани во потесен избор, оваа година Комисијата, едногласно одлучи да додели три награди „Антев златник“, што значи, една повеќе од она што, до сега, беше пракса. Наградите „Антев златник“ за 2024 година им припаѓаат на: Ирена Бабамова Стојчева за збирката „Сивка: Геометрија на болката“, Тони Попов за збирката „Ми се чини дека некаде слушнав дете“ и Пепи Стамков за збирката „Собрани остатоци од светот“.
Животната мрежа од координатни точки е уникатен отпечаток на секое битие. Во треперењето на суптилните нишки, кои тие точки ги поврзуваат, е сместена целата суштина на човековото постоење, а поезијата и уметноста во целина се обид да се преслика и да се направи приказ, да се даде увид во таа суштина. Човекот е сраснат со природата и неговото поврзување со пеперутката Сивка, како што авторката сугерира во овие песни, е повеќе од податливо. Таа е срасната со оваа навидум непривлечна крилеста пријателка на која доминира сивата боја. Нејзиното постоење е контраст на шарените, восхитувачки пеперутки од чијашто колоритност остануваме занемени секогаш кога ќе ги погледнеме. Сивка е тажна убавица, но и еден вид непокор како оној на Анте Поповски. Лета со скршено крило кое не може да биде исто и ако зарасне. Боли таа фрактура на срцето чиишто половини сега се нејзини крилја. Во таа геометрија на болката, Бабамова Стојчева ја истражува тагата како одговор на неотповикливата промена на околностите, на она што сме го замислувале како деца со сета детска невиност во размислата. Болката од изневерата во сите нејзини форми, значења и димензии создава ехо кое се шири низ геометријата на битието, низ сите негови точки и прави пукнатини кои и да зараснат остануваат со траги кои потсетуваат на нив.
Во кратките и едноставни стихови полни со непретенциозна фигуративност, Тони Попов населил уметнички свет кој е преземен од микрокосмосот на неговото сликарско око. Напишани во постимпресионистички и модернистички стил, песните од оваа збирка ја имаат колоритноста и уметничката визуелност на сликите на Анри Матис и Ван Гог, но и на неговата перцепција на обичните нешта кои вешто се насликани со помош на друг медиум како што се зборовите. Длабоките реминисценции тој ги доживува на повеќе нивоа и иако нивното соопштување го прави на едноставен начин, во таа едноставност се огледуваат силните импулси на емотивните сеќавања. Во одекот на тие сеќавања, се собрани звуците на неговиот живот кон кои се враќа секогаш кога некоја сегашност ќе го побара тоа од него. Од сите нив можеби најзначаен е повикот од детството зашто гласот на детето во нас најдобро ја знае вистината.
Поетскиот егзистенцијализам со кој се карактеризира поезијата на Пепи Стамков креира сериозни квалитети на изразот во кои македонскиот јазик ги испитува границите на можностите на експресивноста на употребените сложени фигури од логичкиот код. Во исклучително збиениот израз, со кој се карактеризира оваа поезија, авторот тргнува во потрага по остатоците од денот, идеалите, животните предизвици, љубовта и застанат на личните крстопати се прашува дали треба да живееме со полни гради, до крај, или е доволно да се задоволиме со остатоците кои најчесто не се наши. Преку честото одење отаде времето и животот, овој млад и чувствителен поет на сложен и едноставен начин ни соопштува универзални вистини во кои сите сме, на некој начин, колекционери од остатоците на светот.
Со должно внимание и задоволство, Жирито дискутираше и за петте стихозбирки кои влегоа во потесен избор за наградата „Антев часовник“, што се доделува со цел откривање и афирмација на нови, млади, талентирани поети кои творат на македонски јазик и тоа: Софија Тодороска – „Птиците заминуваат на исток“, Ива Пуовиќ – „Полет“, Мартина Костадиноска – „Пијавици“, Нино Наумовски – „Индиго солзи“ и Стефан Спасовски – „Ќумур смоквин млеч“. И овде, Комисијата имаше тешка задача да одбере само една збирка која ќе биде наградена, поради што за првпат во седумгодишното постоење на Манифестацијата „Антево перо“, се донесе одлука наградата „Антев часовник“ да биде доделена на двајца млади поети и тоа на: Нино Наумовски за неговата збирка „Индиго солзи“ и на Стефан Спасовски за збирката „Ќумур смоквин млеч“.
Поетиката на Нино Наумовски и неговата збирка „Индиго солзи“ претставува младешка перцепција на суровата стварност во која de jour en jour се обидува да ги разбере правилата и начинот како да се живее. Оваа поезија може да се толкува и како бунтовен крик против дистопијата и секојдневието кое не се вклопува во младешкиот ритам. Затоа, се добива впечаток дека авторот влегува во посебни улоги и како на филм ја гледа стварноста притоа слушајќи алтернативна музика со поетика која го поддржува тој бунт. Надреалистичките слики што понекогаш ги создава оваа поезија имаат индиго боја што сугерира една нова генерација ослободена од стегите на традиционалното, која допрва треба да ги покаже своите плодови.
Поезијата на Стефан Спасовски, со креативен и иновативен наслов „Ќумур смоквин млеч“, е интересно патување по сетилните меридијани на неговта млада душа. Песните, иако се пишувани во традиционален дух и изобилуваат со сложени внатрешни рими, инверзии, фигури на звукот и метафори, сепак имаат еден модернистички начин на соопштување на доживеаните чувства. Експерименталноста, што е една од карактеристиките на оваа поезија, симпатично комуницира со интертекстуалноста притоа создавајќи оригинални стихови. Овие песни понекогаш се мрачни и песимистични, но речиси секогаш содржат хумор и игривост кои не дозволуваат да превлада мрачниот тон.
Комисијата искрено им се заблагодарува на сите учесници на Конкурсот за наградата „Антево перо“ и изразува надеж дека и во иднина ќе продолжи интересот за оваа престижна награда. Во наредниот период ќе следи уште едно Соопштение со кое јавноста навремено ќе биде информирана за датумот, местото и терминот на официјалното прогласување на победникот на Конкурсот за наградата „Антево перо“ за 2024 година и врачувањето на сите награди.

The post Наградата „Антево Перо“ за 2024 година за стихозбирката „Музеј на заборавот“ од Сашо Димоски appeared first on Република.

Дванаесет збирки поезија од 75 пристигнати, се избрани во потесна селекција за 7. награда „Антево перо“. На Конкурсот пристигнаа 75 поетски збирки кои имаат разноликост, креативност и особена автентичност и уникатност во поетскиот израз од автори од Италија, Австралија, Србија, Германија, Грција, Канада и од Македонија.

Она што е особено значајна придобивка и на што сме многу горди и среќни е тоа што наградата „Антево перо“ и името и творештвото на Анте Поповски оваа година беа провокација учество да земат и автори од албанската, ромската и другите етнички заедници што е за поздравување, велат организаторите.

Жири-комисијата во состав: проф. д-р Весна Мојсова Чепишевска, претседател, д-р Атина Цветаноска и Жорж Поповски, членови, ги издвоија следните стихозбирки (редоследот е според нивното пристигнување на електронската адреса):
На конкурсот, пак за „Антево перо“ за најдобра необјавена стихозбирка на македонски јазик, издвоени се следните 12 поетски збирки кои се во поширок избор за наградата „Антево перо“:

1.Тони Попов – „Ми се чини дека некаде слушнав дете“,

2.Борче Грозданов – „Акростихови“,
3.Шифра: И камен и цвет – „На каменот“,
4. Пепи Стамков – „Собрани остатоци од светот“,
5. Ирена Бабамова Стојчева – „Сивка: геометрија на болката“,
6. Сашо Димоски – „Музеј на заборавот“,
7.Елизабета Тодороска – „Збирка“,
8.Даниела Андоновска Трајковска – „Царски рез на небото“,
9. Шифра: Цреша – „Скршена тишина“,
10.Шифра: Суштина – Анатомија на скриената болка“,
11.Агрон Усеини – „Каде што се раѓаат сенките“
12.Емилија Матаничкова – „Парченца Македоноверзум“.

Единаесет збирки поезија се во поширок избор за наградата „Антев часовник“. Младите автори со своите поетски квалитети создадоа мошне силна и голема конкуренција, истакна жирито на фестивалот.

1.Бунјамил Мефаил – „Бодликави мисли“,
2.Софија Тодороска – „Птиците заминуваат на исток“,
3.Ива Пуовиќ – „Полет“,
4.Емануела Ковачевска Китановска – „Преписки“,
5.Мартина Костадиноска – „Пијавици“,
6.Нино Наумовски – „Индиго солзи“,
7.Матеја Талеска – „Патот на соништата“,
8.Марија Филоска – „Зад пердето на јазикот“,
9.Дарио Постоловски – „Заемно проникнување“,
10.Евгенија Узунова – „Потрага“
11.Стефан Спасовски – „Ќумур смоквин млеч“.

The post 12 збирки поезија во потесен круг за наградата „Антево перо“, 11 – за „Антев часовник“ appeared first on Република.

Меѓународната поетско културна манифестација „Анте Поповски – Антево перо“ го распиша конкурсот за доделување на наградата „Антево перо“ востановена во чест на творештвото на бардот на современата македонска поезија, Анте Поповски, за 2024 година.

Пропозициите наведени во конкурсот се:

1. Наградата „Антево перо“ за 2024 година се доделува како исклучително македонско поетско признание за необјавена поетска книга (поетски ракопис).

2. Покрај наградата „Антево перо“, се доделуваат и придружни награди, „Антев златник“ и „Антев часовник“. Комисијата го   задржува правото да не ги додели придружните награди.

3. На Конкурсот можат да се јават сите автори кои имаат необјавен поетски ракопис на македонски јазик, без разлика на националноста, возраста, литературниот „стаж“ или државата во која живеат. Со оглед на тоа што покрај наградата „Антево   перо“, на Конкурсот се доделува и наградата „Антев часовник“, Комисијата препорачува творците кои се помлади од 25 години, да наведат дека спаѓаат во оваа категорија на автори. Напоменуваме дека возраста воопшто нема да влијае на Комисијата при распределба на наградите. Доколку Комисијата оцени дека некој од младите автори има збирка која заслужува да ја добие наградата „Антево  перо“, возраста воопшто нема да биде елиминаторен услов.

4. Наградата се состои во непрофитно објавување на поетскиот ракопис, со назнака на името на наградата на корицата од книгата, и со отстапување на комплетниот тираж (300 примероци) на авторот.

5. Книгата ќе биде квалитетно претставена и промовирана со   посебен осврт од наш истакнат литературен творец во рамките   на Mеѓународната поетско-културна манифестација „Анте Поповски - Антево перо“.

6. Пристигнатите ракописи ќе ги разгледува тричлена Комисија, во состав: проф.  д-р Весна Мојсова-Чепишевска (универзитетски професор, писател и книжевен критичар), д-р Атина Цветаноска, (книжевен истражувач, книжевен критичар и херменевтичар) и Жорж Поповски (новинар, член на семејството на Анте Поповски). Третиот член, има право на вето на одлуката на Комисијата, доколку смета дека делото кое Комисијата сака да го награди е под достоинството на поетското творештво на Анте Поповски, или го навредува јавниот и естетскиот вкус.

7. Ракописите треба да бидат напишани во Times New Roman, фонт 12 и да бидат испратени во електронски формат pdf или word на електронската адреса: antevopero@gmail.com заклучно со 05 август 2024 година.

8. Кандидатите можат ракописот да го достават под свое име и презиме, или под шифра. Во вториов случај, авторството го докажуваат со копија од ракописот, по објавувањето на резултатите.

9. Кандидатите не мора да го чекаат последниот рок, затоа што Комисијата ќе ги прегледува ракописите сукцесивно, онака како што пристигнуваат.

10. Комисијата својата одлука ќе ја соопшти кон крајот на август 2024 година.

Наградата „Антево перо“ е востановена во 2018 година за необјавена поетска книга (поетски ракопис) и на конкурсот може да се пријават автори кои имаат необјавен поетски ракопис на македонски јазик. Досегашни добитници се: Славе Ѓорѓо Димоски за „Кумова слама“ (2018), Александра Димитрова за „Дупка“ (2019), Ана Стојаноска за „Потпис: Трепетлика“, Братислав Ташковски за „Небесни разговори“ (2021), Јулијана Младеновска Тешија за „Куќа“ (2022) и Александар Русјаков за „50 испеани приказни“ (2023).

The post Наградата „Антево перо“ ќе се додели по седми пат: Распишан конкурсот за 2024 appeared first on Република.

Во Музејот на македонската борба за самостојност во Скопје, вечер ќе биде одржан централниот настан од шестото издание на Меѓународната поетско-културна манифестација „Анте Поповски – Антево перо“ на кој ќе бидат доделени годинашните награди.

Присутните посетители ќе имаат можност да проследат видео материјали со кус рецитал на академик Анте Поповски, како и снимки од негови песни во интерпретација на артистката Софија Гогова Врчаковска. Модератор ќе биде м-р Александра Јуруковска, ќе биде прочитана Одлуката на Жири Комисијата за наградите, а пред присутните ќе се обрати д-р Атина Цветаноска, соопшти организаторите.

Манифестацијата се одржува во чест на творештвото на бардот на современата македонска поезија, академик Анте Поповски и е поддржана со програмата за 2023 година на Министерството за култура.

По доделување на наградите ќе се одржи и поетско читање, во кое освен наградените автори ќе земаат учество и неколку други учесници на годинашниот конкурс.са/

Фото: Меѓународната поетско-културна манифестација „Анте Поповски – Антево перо“

The post Свечено доделување на наградата „Анте Поповски – Антево перо“ за 2023 година appeared first on Република.

The post „Антево перо“ за 2023 за стихозбирката „50 испеани приказни“ од Александар Русјаков appeared first on Република.

Во потесниот избор на жири-комисијата во состав: проф. д-р Весна Мојсова Чепишевска (претседател) и д-р Атина Цветаноска и Жорж Поповски (членови), се најдоа ракописите:

„Монолог на пирејот“  (Љубинка Донева)

The post Шест ракописи во потесниот избор за наградата „Антево перо“ appeared first on Република.

Здружението за зачувување на делото на Анте Поповски „Антево перо“, како организатор на Меѓународната поетско-културна манифестација „Анте Поповски – Антево перо“, изрази благодарност до сите учесници кои се одзваа на Конкурсот за шестото доделување на наградата „Антево перо“, за најдобра необјавена стихозбирка на македонски јазик. Оваа година, на Конкурсот пристигнаа 73 поетски збирки кои имаат најразличен поетски израз, квалитети и трендовска и жанровска разноликост, од автори од Македонија, Италија и Австралија.

Жири-комисијата во состав: проф. д-р Весна Мојсова Чепишевска (претседател) и д-р Атина Цветаноска и Жорж Поповски (членови), во изминатиот период во неколку наврати сукцесивно и темелно ги разгледуваше и анализираше пристигнатите збирки. На својот прв состанок по завршувањето на Конкурсот, по плодната дискусија, жири-комисијата издвои 12 поетски збирки кои се во поширок избор за наградата „Антево перо“ и тоа: Шифра: Magna Mater – „(Ре)инкарнација“, Александар Русјаков – „50 испеани приказни“, Ирена Павлова де Одорико – „Царски рез“, Елизабета Дончевска Лушин – „(не)ПРИПИТОМЕНА“, Коста Бојчески – „До дното“, Љубинка Донева – „Монолог на пирејот“, Милена Сиљаноска – „Болопадание“, Кирил Ангелов – „сновиденија“, Александра Спасеска – „Координати на болката“, Стела (Маја) Босилковска – „Невидлива е војната“, Томе Липовски – „А што да речам“ и Ѓорги Калајџиев – „Петна“. Редоследот на номинираните нема вредносно значење.

Како и минатите години и оваа година жири-комисијата со особено задоволство одвои простор и за младите автори, коишто зедоа учество на Конкурсот што го распишува Здружението за зачувување на делото на Анте Поповски АНТЕВО ПЕРО. Во поширок избор за наградата „Антев часовник“, која се доделува на млад автор за поетско творештво на македонски јазик со забележителни поетски квалитети, жири-комисијата издвои 5 збирки поезија и тоа: Матеја Талеска – „Улица на соништата“, Ана Ѓорчевска – „Копнеж по тебе“, Емануела Ковачевска Китановска – „Второ детство“, Светла Јакшиќ – „Ноќен суфлер“ и Александра Атанасова – „Душебол“. И во овој случај, редоследот на номинираните нема вредносно значење.

На следното заседание, комисијата ќе го стесни изборот за наградите за што велат ќе следи ново соопштение.

The post 12 поетски збирки во поширок избор за наградата „Антево перо“ appeared first on Република.

The post Промоција на зборникот на трудови „Антево перо“ во Порта Македонија appeared first on Република.

Во Порта Македонија, вечерва во 19 чсот, ќе биде промовиран Зборник на трудови поднесени на Меѓународниот научен симпозиум „Антево дело“, одржан во Лазарополе, родното село на македонскиот поет, академик Анте Поповски.

Печатењето на Зборникот е реализирано во рамките на Меѓународната поетско-културна манифестација „Анте Поповски - Антево перо“.

Во Зборникот се објавени трудови од академик Катица Ќулавкова (МАНУ), проф. д-р Ала Шешкен од МГУ „Ломоносов“ од Москва, Руска Федерација, член на МАНУ надвор од работниот состав, проф.д-р Венко Андоновски, дописен член на МАНУ, проф. д-р Кристина Николовска, проф. д-р Емилија Црвенковска, проф. д-р Весна Мојсова Чепишевска, проф.д-р Бојан Ортаков, Филип Фиданоски, (во моментот на печатењето на Зборникот работеше како м-р на Универзитетот на Нов Јужен Велс Кенсингтон Сиднеј, Австралија, а сега е д-р при Универзитетот во Болоња, Емилија-Ромања, Италија), м-р Бранко Цветкоски, м-р Сузана В. Спасовска, м-р Александра Јуруковска и асс. м-р Иван Антоновски.

The post Промоција на зборникот на трудови „Антево перо“ appeared first on Република.

Во Музејот на македонската борба за самостојност во Скопје денеска ќе се одржи централниот настан од годинашното, петто по ред јубилејно издание на Меѓународната поетско-културна манифестација „Анте Поповски – Антево перо“. Манифестацијата се оддржува во чест на творештвото на бардот на современата македонска поезија, академик Анте Поповски.

По поздравното обраќање до присутните на директорката на Музејот, Даниела Николова, ќе следи претставување на најуспешните наслови пристигнати на Конкурсот за необјавена збирка поезија на македонски јазик, за кои на авторите ќе им бидат врачени традиционалните поетски награди кои ги доделува организацискиот одбор на Манифестацијата. Годинашен лауреат на престижната книжевна награда „Антево перо“ е поетесата Јулијана Младеновска Тешија за збирката песни под наслов „Куќа“ . Наградите „Антев златник“ ќе им бидат врачени на авторите Виолета Танчева Златева за стихозбирката „Глуво време“ и на Славица Гаџова Свидерска за стихозбирката „Golgotha Feminarum. Наградата „Антев часовник“, што се доделува со цел откривање и афирмација на нови, млади, талентирани поети кои творат на македонски јазик и припадна и ќе и биде врачена на поетесата Рената Пенчова, соопштија организаторите.

Тие додадоа дека во продолжение на вечерта, ќе следи и поетско читање на кое со дел од своите најнови поетски творби ќе се претстават наградените автори, но и поети, чии што дела беа селектирани во потесниот, односно поширокиот избор на поетскиот натпревар за наградите, на кој што учествуваа 76 творци.

Дополнително, дел од содржините со кои ќе биде заокружена годинашната Меѓународна поетско-културна манифестација „Анте Поповски – Антево перо“ е планирано да се одржат и на други локации и во други средини, за што јавноста ќе биде навремено информирана, наведоа организаторите.

The post Врачување на наградите на Меѓународната поетска манифестација „Анте Поповски – Антево перо“ appeared first on Република.

На својот втор состанок, Жири-комисијата за доделување на наградата „Антево перо“ во состав проф. д-р Весна Мојсова Чепишевска (претседател), д-р Атина Цветаноска и Жорж Поповски (членови), како поетски книги кои се издвојуваат по својот квалитет ги селектираше: Славица Гаџовска Свидерска „Golgotha Feminarum“, Јулијана Младеновска Тешија „Куќа“, Шифра Имануел „Умоверзум“, Тања Павлеска „Созборка“ и Виолета Танчева Златева „Глуво време“. Редоследот на номинираните нема вредносно значење.

Наградата „Антево перо“се доделува како исклучително македонско поетско признание за необјавен поетски ракопис, а ја доделува Meѓународната поетско-културна манифестација „Анте Поповски – Антево перо“ во чест на творештвото на бардот на современата македонска поезија, Анте Поповски.

Во потесен избор за наградата „Антев часовник“, која се доделува со цел откривање и афирмација на нови млади талентирани поети кои творат на македонски јазик и потстрек за нивното творештво, стручната комисија ги номинираше: Софија Тодороска „Контури“, Матеја Богдан „Посветено“ и Рената Пенчова „Точки во бескрајот“. И во овој случај редоследот на номинираните нема вредносно значење.

The post Пет поетски книги во потесен избор за „Антево перо“ appeared first on Република.

Организацискиот одбор на меѓународната поетско-културна манифестација „Анте Поповски – Антево перо“ изразува голема и искрена благодарност до сите учесници на Конкурсот за петтото доделување на наградата „Антево перо“, за најдобра необјавена стихозбирка на македонски јазик. Како што веќе беше објавено, на Конкурсот пристигнаа 76 поетски збирки од автори од Македонија, Австралија, Хрватска, Австрија, Шведска и Словенија.

На својот прв состанок жири-комисијата во состав: проф. д-р Весна Мојсова Чепишевска (претседател) , д-р Атина Цветаноска и Жорж Поповски (членови), темелно ги разгледа и анализираше пристигнатите збирки. По плодната дискусија, жири-комисијата издвои 9 стихозбирки кои се во поширок избор за наградата „Антево перо“ и тоа: Ана Пејчинова „Вонземно море“, Славица Гаџовска Свидерска „Golgotha Feminarum“, Јулијана Младеновска Тешија „Куќа“, Шифра Имануел „Умоверзум“, Ана Бунтеска „Остави го светлото“, Тања Павлеска „Созборка“, Кирил Ангелов „Онаму, каде молњите удираат“, Виолета Танчева Златева „Глуво време“ и Симун Лешоски „Песни“. Редоследот на номинираните нема вредносно значење.

Како и минатите години и овој пат жири-комисијата со особено задоволство ги издвои младите автори, коишто учествуваа во конкурсот што го распишува меѓународната поетско-културна манифестација „Анте Поповски – Антево Перо“. Во поширок избор за наградата „Антев часовник“, која се доделува на млад автор за поетско творештво на македонски јазик со забележителни поетски квалитети, Жирито издвои 5 збирки поезија и тоа: Софија Тодороска „Контури“, Матеја Талеска „Булевар на соништата“, Душко Двојаковски „Земја на зумбули“, Матеја Богдан „Посветено“ и Рената Пенчова „Точки во бескрајот“. И во овој случај, редоследот на номинираните нема вредносно значење.

На следната средба жири-комисијата ќе го стесни изборот за наградите.

The post Девет стихозбирки во поширок избор за наградата „Антево перо“ appeared first on Република.

Во наредниот период членовите на жири-комисија ќе ги разгледа сите пристигнати поетски дела кои конкурирале за наградата „Антево Перо“ за 2022 година и ќе направат првична селекција, по што ќе биде сочинет и потесен список на книги кои ќе останат во конкуренција за престижната награда. Победникот на конкурост ќе биде познат и објавен кон крајот на месецов. Годинава во конкуренција се 76 поетски збирки од автори од земјата, но и од автори кои творат на македонски јазик, а живеат во Австралија, Хрватска, Австрија, Шведска и Словенија.
Годинава меѓународната поетска манифестација „Антево перо“, во рамки на која се објавува Конкурсот за наградата „Антево перо“ за необјавена стихозбирка на македонски јазик, одбележува мал, но многу значаен јубилеј – 5 години од воспоставувањето на оваа награда како исклучително поетско признание во чест на великанот на македонската поезија Анте Поповски.

Со големо задоволство можеме да кажеме дека манифестацијата „Антево Перо“ сѐ повеќе расте и секоја година интересот за учество на Конкурсот за необјавена стихозбирка е сѐ поголем. Пријатно и преубаво е чувството да се сооопшти дека поетскиот натпревар за наградата востановена во чест на поетот Анте Поповски и овојпат предизвика голем интерес, што се огледа во пристигнатите 76 поетски збирки од автори од земјата, но и од автори кои творат на македонски јазик, а живеат во Австралија, Хрватска, Австрија, Шведска и Словенија, велат од тимот на манифестацијата.

Според нив, одличниот одѕив е јасна и силна потврда дека Анте Поповски е поет кој со своите стихови и стил на изразување претставува вистинска инспирација, но и своевиден идол на нови генерации творци кои се изразуваат во стих.

The post Добитниците на наградата „Антево перо“ за 2022 година ќе бидат познати до крајот на месецов appeared first on Република.

Конкурсот за петтото доделување на наградата „Антево перо“, за најдобра необјавена стихозбирка на македонски јазик, ќе заврши на 28 август. Организаторот потсетува дека трудовите треба да се праќаат на електронската адреса: antevopero@gmail.com и сите што во рокот ќе пратат ќе бидат учесници на поетскиот натпревар за наградата востановена во чест на поетот Анте Поповски.

Конкурсот и годинава предизвикува и побуди добар одглас, кој се очекува да резултира и да ја збогати македонската продукција со повеќе нови, но што е уште позначајно, со поквалитетни и поуверливи поетски творечки наслови и дострели. Жирито со задоволство ги евидентира пристигнатите дела од поетите од сите генерации, што само по себе значи дека и овојпат во целост е исполнета замислата со Конкурсот – пред се да стимулиура творци да се оствааруваат, да го негуваат и творат на македонски јазик – се наведува во соопштението.

The post Конкурсот за наградата „Антево перо“ отворен до 28 август appeared first on Република.

Meѓународната поетско-културна манифестација „Анте Поповски – Антево перо“ распишува конкурс за доделување на наградата „Антево перо“, востановена во чест на творештвото на бардот на современата македонска поезија, Анте Поповски, за 2022 година

Пропозиции:
1. Наградата „Антево перо“ за 2022 година се доделува како исклучително македонско поетско признание за необјавена поетска книга (поетски ракопис).
2. На Конкурсот можат да се јават сите автори што имаат необјавен поетски ракопис на македонски јазик, без разлика на националноста, возраста, литературниот „стаж“ или државата во која живеат.
3. Наградата се состои во непрофитно објавување на поетскиот ракопис, со назнака на името на наградата на корицата од книгата, и со отстапување на комплетниот тираж (300 примероци) на авторот.
4. Книгата ќе биде квалитетно претставена и промовирана со посебен осврт од наш истакнат литературен творец во рамките на самата манифестација.
5. Пристигнатите ракописи ќе ги разгледува тричлена Комисија, во состав: Весна Мојсова-Чепишевска (професорка, писателка и книжевна критичарка), д-р Атина Цветаноска (книжевна истражувачка) и Жорж Поповски (новинар, член на семејството на Анте Поповски). Третиот член има право на вето на одлуката на Комисијата, доколку смета дека делото што Комисијата сака да го награди е под достоинството на поетското творештво на Анте Поповски или го навредува јавниот и естетскиот вкус.
6. Ракописите треба да бидат напишани во Тајмс њу роман, фонт 12 и да бидат испратени во електронски формат ПДФ или Ворд на електронската адреса: antevopero@gmail.com заклучно со 28 август 2022 година.
7. Кандидатите можат да го достават ракописот под свое име и презиме или под шифра. Во вториов случај, авторството го докажуваат со копија од ракописот, по објавувањето на резултатите.
8. Кандидатите не мора да го чекаат последниот рок, затоа што Комисијата ќе ги прегледува ракописите сукцесивно, онака како што пристигнуваат.
9. Комисијата ќе ја соопшти својата одлука за време на манифестацијата кон средината на септември 2022 година.

The post Распишан поетскиот конкурс „Антево перо“ appeared first on Република.