Заедничката македонско-бугарска комисија за историски прашања денеска во Скопје ги продолжи разговорите за теми поврзани со историјата.

Ангел Димитров, бугарски историчар и дипломат, по претпладневниот дел од средбата во македонското Министерство за надворешни работи и надворешна трговија изјави дека се разговарало околу претставувањето на Охридската архиепископија во 11 век, но дека разговорите за ова прашање ќе продолжат на следна средба во Софија за која дополнително ќе се утврди термин. Тој изрази надеж дека ќе има добра волја за изнаоѓање заеднички јазик со новиот состав на историската комисија од македонска страна.

Започнавме едни долго водени разговори досега околу претставувањето на Охридската архиепископија во 11 век. Бидејќи на нашите колеги им треба време за да навлезат во таа проблематика, решивме тоа да го оставиме за следната средба која ќе биде во Софија. Уште не сме го определиле точниот датум, треба да се искоординираме со можностите на сите членови на заедничката комисија. Повеќе не дискутиравме за тие теми за преглед на тие учебници што се за седмо одделение во Република Македонија, но започнавме да работиме на утврдување на протоколи од претходни средби. Со тоа ќе продолжиме и после ручекот - рече Димитров.

На новинарско прашање дали заедничката историска комисија со Бугарија ќе почне со работа од почеток, вели дека ништо не може да почне од почеток и дека досега е завршена многу голема работа.

Значи ништо не може да се почне од почеток, бидејќи е завршена страшно многу работа и треба да го уважиме трудот на оваа Комисија - рече тој.

За тоа дали ќе најдат заеднички јазик со новиот состав на македонските историчари, Димитров вели дека доколку има добра волја се е можно.

Се надеваме дека има добра волја - рече Димитров.

Заедничката македонско - бугарска историска комисија од вчера во Скопје води разговори, први по промена на членовите на комисијата од македонска страна

The post Димитров: Се надеваме дека ќе има добра волја за заеднички јазик со македонските историчари appeared first on Република.

Република Македонија мора да го сфати значајното место, што го има работењето на Мешовитата бугарско-македонска историска комисија во процесот на пристапување на земјата во Европската унија.

Ова ексклузивно за БГНЕС го изјави проф. Ангел Димитров, копретседател на Мешовитата бугарско-македонска комисија за историски прашања, пренесува Трибуна.

Коментирајќи го она што комисијата го постигна на последниот состанок, проф. д-р Димитров изјави:

„Ако во една активност се врви ритмички и со резултат, не е проблем да се каже дека нема нешто ново. Но, кога нема резултати, навистина не е пријатно да се објави ова од едноставна причина, што на темите што ги работиме, тешко ми е да кажам на колку средби по ред не сме го постигнале посакуваниот резултат“.

Темата на која се разговарало денеска била поврзана со Охридската архиепископија.

„Темата на која одвоивме најмногу време на денешната средба е постигнувањето на заеднички став како да се претстави Охридската архиепископија. За жал, повторно не го постигнавме очекуваното“, нагласи проф. д-р Димитров.

The post Димитров: Македонија да го сфати важното место на историската комисија за пристапувањето во ЕУ appeared first on Република.

Да се ​​префрла несразмерна вина на Бугарија за депортацијата на Евреите од територијата на денешна Македонија е несериозно, изјави денеска Ангел Димитров, копретседател на Заедничката мултидисциплинарна и експертска комисија за историски и образовни прашања меѓу Бугарија и Македонија, како реакција на денешниот говор на претседателот Стево Пендаровски на одбележувањето – 80 години од депортацијата на македонските Евреи во Треблинка.

Македонскиот претседател побара извинување од Бугарија за улогата на профашистичката влада во Софија во тоа време во депортацијата на македонските Евреи.

Така да се зборува за Бугарија е крајно неприфатливо, дури и неточно од страна на политичар со огромна одговорност, чија цел треба да биде воспоставување добри дипломатски односи меѓу нашите две земји, вели професорот за „БТА“.

https://republika.mk/vesti/makedonija/pendarovski-za-da-ima-pomiruvane-bugarija-treba-da-se-izvini-za-deportatsijata-na-makedonskite-evrei/

-Бугарија е единствената земја во Европа која, од една страна, беше сојузник со нацистичка Германија, но не го исполни нејзиниот притисок и ги спаси сите свои Евреи. Велат 48.000, но нивниот број во тоа време бил многу над 50.000. Освен тоа, над 10.000 Евреи со помош на бугарските дипломатски претставништва во Европа успеале да добијат документи и преку Бугарија да се спасат, додал тој.

Димитров изјавил дека „депортацијата на Евреите од географската област Македонија започна уште во јануари 1943 година, со најконцентрирана група на еврејско население во Солун“.

Значи, да се препишува вина на Бугарија е несериозно, бидејќи депортацијата се случи на експресно инсистирање и под контрола на претставници на нацистичка Германија, рекол Димитров.

Тој додал дека „Бугарија во тоа време не ги поседувала тие територии, туку само управувала со нив“.

Тогаш нема македонска држава, тие се државјани на Југославија, а Југославија не само што ги депортираше своите Евреи, туку се фалеше дека е првата земја што го решила еврејското прашање. На територијата на Србија има концентрациони логори во кои масовно биле истребувани локални Евреи, смета копретседателот на Мешовитата историска комисија.

The post Димитров до Пендаровски: Нацистичка Германија е виновна за депортацијата на македонските Евреи, а не Бугарија appeared first on Република.

Инцидентите како последниот со кршењето на стаклото на бугарскиот културен клуб „Цар Борис Трети“ во Охрид влијаат на билатералните односи, но не и на работата на Исторската комисија, бидејќи ние имаме свој научен пристап за решение на проблемите, изјави денеска во Скопје копретседавачот на бугарскиот тим историчари Ангел Димитров пред почетокот на новата средба на Заедничката мултидисциплинарна експертска комисија за историски и образовни прашања меѓу Македонија и Бугарија.

Тоа е еден брутален чин на омраза, додаде Димитров, во одговор на новинарско прашање за коментар за синоќешниот инцидент во Охрид.

Во однос на темите на средбата, што денеска и утре ќе се одржува во Скопје, тој посочи дека тоа се истите кои разговараат со македонските колеги на последните неколку средби.

Тоа значи дека нема напредок, а дали ќе има ќе видиме денеска. Оптимист сум и секогаш очекувам нешто добро, рече Димитров.

Се очекува на средбата во Скопје историчарите да дебатираат за учебниците по историја за 7-мо одделение и за Гоце Делчев.

Заедничката македонско-бугарска Комисија за историски прашања на 15 август усвои и објави препораки кои се однесуваат на подобрување на учебниците по историја за 6-то одделение во Македонија и 5-ти клас во Бугарија, како и препораки за заедничко чествување на личности од средниот век – Св. Кирил и Методиј, Св. Климент, Св. Наум и Цар Самоил.

Тие препораки се усвоени од страна на Заедничката меѓувладина комисија формирана согласно со Договорот за пријателство, добрососедство и соработка меѓу Република Македонија и Република Бугарија.

The post Димитров: Ваквите инциденти од Охрид не влијаат врз работата на Комисијата appeared first on Република.

На агендата на последната средба на Заедничката македонско-бугарска историска комисија што се одржа во Скопје беа учебниците по историја и периодот на Средновековието во Бугарија и во Република  Македонија и евентуално заедничкото чествување на Гоце Делчев, но повторно ништо не се случи, вели копретседателот на Комисијата од бугарска страна Ангел Димитров.

Тоа е интересен и важен сигнал пред се за атмосферата во која што работеше нашата комисија на последната 20-та средба. Можам да кажам дека таму нема подготвеност за некаква промена – изјавил Димитров за БНТ.

Средбата се одржа во време кога опозициската ВМРО-ДПМНЕ побара референдум за отфрлање на Договорот за пријателство и добрососедство со Бугарија, а, како што вели Димитров, некои од македонските колеги отворено му кажале дека се подложени на заплашувања и на притисок ако променат нешто во ниввната позиција.

Тоа не значи дека тие се подготвени тоа да го направат, но зборувам за атмосферата во јавноста и тоа јасно покажува што се случува во Република Македонија – коментира Димитров.

Во контекст на истражувањето на „Конрад Аденауер” кое покажа дека дури 44 отсто од македонските граѓани ја сметаат Бугарија за најголем непријател, а 37,4 отсто велат дека Србија им е најголем пријател, Димитров коментира дека луѓето во  Македонија кои тврдат дека ова има длабоки историски корени, мислат само на периодот по 1944 година.

Тие немаат сознанија што се случувало во првата половина на минатиот век кога населението таму беше прогласено за српско и кога имаше терористички режим, кога таму имаше страшно насилство и постојани репресии. Тоа се чини дека воопшто не ги интересира, па знаат само за пропагандата и манипулациите по 1944 година, а за жал таа пропаганда е антибугарска – објаснува Димитров.

Според него, Гоце Делчев е постојано во програмата на Комисијата веќе трета година и никако да се стигне до него. Она што е решено и објавено, вели, е дека треба да се пристапи кон промена на учебниците во Македонија и тоа оние учебници кои се надвор од „нашата заедничка историја”. Димитров уште објаснува дека забелешките за бугарските учебници се општи, не се однесуваат на важни нешта во интерпретацијата на историјата и се пожелни, но во Македонија треба да има сериозни промени во учебниците.

Многу е интересно што во 90-те години на минатиот век високи политичари, па дури и самиот претседател рекоа дека „стигнавме до дебугаризација”. Сега се плашат дека ќе настапи бугаризација, што е апсурд – оцени Димитров.

The post Димитров : Во Македонија нема подготвеност за промени, мислат само на антибугарската пропаганда по 1944 година appeared first on Република.

Нема подготвеност за промена на учебниците во Македонија, иако тоа може да се случи веднаш. Во Македонија главно се занимаваат со барањето на ДПМНЕ за распишување референдум за целосно да се отфрли Договорот за добрососедство со Бугарија, а таквата атмосфера влијаеше и на состанокот на Мешовитата комисија.

Ова за БНТ го изјави шефот на бугарскиот тим од Заедничката историска комисија, Ангел Димитров.

-Јасно можев да ја видам загриженоста на дел од колегите, бидејќи некои од нив рекоа дека се подложени на закани и притисоци кога нешто менуваат во својата позиција.Гоце Делчев е постојано во нашата програма веќе трета година и не стигнуваме до него, всушност не се разговара за тоа, пренесува БГНЕС.

Она што е одлучено и најавено е дека треба да се пристапи кон промена на нивните (македонските н.з.) учебници. Вели дека заелешките за бугарските учебници од македонска страна биле општи, не допирале важни работи во толкувањето и биле пуста желба.

Но, Димитров вели дека македонската страна треба да направи „сериозни измени во нивните учебници“.

-Ова треба да се направи веднаш. Учебниците може да се дополнат и без да се печатат нови, коментира проф.Димитров.

Тој нагласи дека сета оваа политичка тензија во Скопје е на тема бугаризација.

Димитров вели дека тоа е апсурдно и потсети дека и претседателот Стево Пендаровски „ова го дефинираше како ќорфишек“.

The post Бугарија порача дека мора да направиме сериозни измени во нашите учебници appeared first on Република.

Во моментов сме сведоци на фарса, иако има и трагични ноти. Се чудам како прашањето за „брз старт“ на Република Македонија за членство во ЕУ стана централно прашање, а не би требало, вели Ангел Димитров, копретседател на Заедничката историска комисија.

Во интервју за БНТ Димитров оценува дека се изместува нормалниот акцент во разговорите меѓу Софија и Скопје и дека „наместо Македонија да биде заинтересирана за активна позиција, наеднаш излегува дека Бугарија е заинтересирана“. Објаснувањето, како што вели, е дека идејата дошла од надвор, а нејзиното прифаќање е малку избрзано.

„Состојбата во билатералните односи претпоставува другата страна да биде активна за да ја исполни својата желба и цел“, изјави Димитров, a пренесува МКД.мк.

Тој останува на ставот дека Бугарија не смее да дозволи притисок врз себе и вели дека тоа е неприфатливо.

На прашањето дали Бугарија дозволува таков притисок, Димитров одговара: „Апсолутно да. Има притисок и внатре. Имаше притисок врз мене, внатре, не однадвор. Никој не дозволи директен притисок врз нашата комисија, но од пред три дена сум под притисок од една многу сериозна институција во Бугарија со обвинување дека речиси ги предавам националните интереси на државата. Обвинуваме некаква формација во земјава која ми е нејасна. Интересно е што ова се случува сега. Формацијата е граѓанска, но институцијата е државна. Тоа е ДАНС (Државна агенција Национална безбедност)“, вели Димитров во интервјуто, пренесува македонскиот портал.

Уште додава дека биле обвинети за предавство на интересите на државата. „Никој не знае како сме ги предале, но има такво обвинување“, рече тој и ги повика оние кои што му вршат притисок да се занимаваат со поважни работи.

The post Димитров се жали, бугарската безбедносна служба три дена му врши притисок да попушти за Македонија appeared first on Република.

„Проблемот со европската интеграција на РСМ не е централен за бугарскиот политички државен поредок. Формално, секоја влада носи одлуки од надворешнополитички аспект. Во оваа состојба, при доста спорна легитимност на сите во власта, од гледна точка на таквото преставување меѓу Бугарите, редно е да се запрашам дали во ваков момент можат да се носат решенија кои ги засегаат фундаменталните национални интереси“, изјави првиот човек на Историската комисија на Бугарија за спорот со Македонија, Ангел Димитров во интервју за Бугарското радио.

Тој практично ја оспори легитимноста на премиерот Кирил Петков да одлучува за ветото на Македонија со чисто политичка изјава, иако на функцијата е само во улога на историчар и цело време ја обвинува нашата страна дека ги политизира разговорите за историските разидувања.

Димитров отиде подалеку и порача дека нема ни потреба да се свикува Консултативниот совет за национална безбедност на оваа тема.

„Топката не мора постојано да се префрла од една во друга институција“, изјави тој.

Тој ја обвини Македонија дека Договорот за пријателство и добрососедствцо го смета за формален акт, за влезен билет за ЕУ, а не за солиден политички ангажман. Освен тоа, вели дека не треба да живеат со претставата за лажни сигнали, дека нешто се случува, а резултати нема.

„Не мора да живееме со поимот мимикрија на акција, на лажни сигнали дека нешто се случува, по што нема резултати“, порача Димитров. Тој смета дека зад  „избрзаните постапки на премиерот Кирил Петков“ со еуфоричното убедување дека може да се одврзе комплексен јазол, очигледно стојат активности кои остануваат јавно непознати, а тоа создава тензија кај бугарското општество. Тој нагласи дека нема ништо заедничко меѓу бугарската позиција и интересите на Русија, а тезата за тоа е несериозна и непријатна.

„РСМ има држава која е генетски поврзана со Србија и Русија. И не може или не сака да им сврти грб. Затоа се апсурдни тврдењата дека бугарската позиција е во служба на Русија или Србија. Бугарија категорично ја поддржа евроинтеграцијата на Македонија за да и помогне да се тргне од старата југословенска комунистичка орбита. Треба да се чуваме од таквите евтини политички мантри кои ја дискредитираат нашата земја“, рече Димитров.

The post Димитров: Македонија е генетски поврзана со Србија и Русија и не сака да им сврти грб appeared first on Република.

Бугарија не смее да дозволи притисок. Бугарската страна мора да покаже доверба во својот став, во своите аргументи и, без разлика дали некој ги прифаќа, ние мора да ги браниме. Затоа не смееме да дозволиме да има притисоци, рече Ангел Димитров, копретседател на Мешовитата бугарско-македонска историска комисија за БНТ.

Ако сме навистина сигурни во нашата позиција, мора да ја браниме. Со познавање на длабината на проблемите и предвидување на последиците, за разлика од позицијата на народот кој конјуктурно гледа на работите. И ова е прашање на достоинство, вели Димитров.

За заедничкото чествување на светите браќа Кирил и Методиј, Димитров потсети дека уште во 1999 година во Рим заедно биле двајцата премиери Иван Костов и Љубчо Георгиевски, а потоа и заедничко поклонение на премиерите Бојко Борисов и Зоран Заев.

Но, по 2018 година нема заедничко чествување. Двете делегации се таму, но не го прават тоа заедно. Има само средби, но секоја земја поединечно ја изразува својата почит, додава Димитров.

Тој рече дека бугарската страна во Комисијата дала предлог за заедничка прослава, но, како што објаснува, „она што успеавме да го постигнеме, и ова беше еден од ретките успеси кога зборуваме за светите браќа, да се нагласи улогата на бугарската држава и владетелите – принцот Борис и цар Симеон Први – за создавање и развој на културата создадена од браќата светители“.

Коментирајќи ја работата на заедничката комисија, тој смета дека нема значителен напредок.

За да одговориме на желбата за нов почеток, побарана од премиерот Кирил Петков, договоривме со колегите од Скопје да одржиме три средби од февруари до мај. По малиот напредок во однос на царот Самуил, нешто што дури и не заслужува посебно внимание, нема ништо ново. Напредокот повторно е запрен, рече Димитров.

Тој нагласува дека проблемот е што македонските историчари се трудат да не прифатат заедничка историја.

Кога не прифаќате постоење историски феномен, тогаш се создава отпор против спроведувањето на самиот Договор за пријателство и добрососедство. Во обидот да не се зборува за заедничка туку споделена историја, што е нешто поинакво, тогаш се бега од желбата да направат сериозна критичка анализа на сопственото минато, вели Димитров.

Според него, Заедничката историска комисија има важна задача да надмине некои акумулации во минатото, не поради самата наука туку поради последиците што ги има и влијанието на, како што вели, неточното толкување. Овие последици според него се поврзани со омразата кон Бугарија и Бугарите која се негува во Македонија.

Работата на комисијата е важна, барем да се зборува за минатото. Тоа е катализатор за решавање на политичките прашања, политичарите ќе ја донесат одлуката, но не и историчарите… Мора да се сретнеме со нашите колеги, не можеме да очекуваме само Бугарија да направи некои гестови и чекори. Проблемите се во Maкедонија. Катарзата мора да се одвива таму бидејќи сè уште нема критичка анализа на сопственото минато, вели Ангел Димитров.

The post Димитров: Да не дозволиме да нè притискаат, мора да ја браниме нашата позиција за Македонија appeared first on Република.

Ванчо Ѓорѓиев, македонски историчар и поранешен член на комисијата, во македонските медиуми рече дека Ангел Димитров, копретседавач од бугарската страна, присуствувал на погребот на Ванчо Михајлов во 1990 година. Ѓорѓиев посочи дека неговото искажување може да се потврди со постоењето на фотографија на која може да се види бугарскиот копретседавач.

Со оваа изјава на Ѓорѓиев се доведуваат во прашање кредибилитетот, професионалноста и авторитетот на историската комисија од бугарска страна.

Во новинарското истражување на „Нова Македонија“, беа пронајдени две фотографии што ја потврдуваат изјавата на професорот, односно поранешниот член на историската комисија.

На двете фотографии до кои дојде „Нова Македонија“ е видливо присуството на копретседавачот на историската комисија, Ангел Димитров, на погребот на Михајлов.

Една од фотографиите е објавена на сајтот на Македонскиот научен институт од Софија, кој има јасна антимакедонска определба, а втората фотографија е објавена на 20 септември 1990 година, од страна на „Македонска трибуна“ (Macedonian Tribune). Фотографиите се направени во внатрешноста на капелата во која биле положени останките на Михајлов.

Автентичноста на фотодокументот беше потврдена, а на фотографијата е регистрирано присуството на роднините и приврзаниците на Михајлов. Копретседавачот на историската комисија, г. Ангел Димитров, веднаш до Атанас, братот на Ванчо Михајлов.

Целата сторија на „Нова Македонија“

The post Скандалозен фотодокумент за Ангел Димитров од Мешовитата комисија, кој отвора многу прашања appeared first on Република.

Политиката на политичарите, историјата на историчарите, беше пораката на министерот за надворешни работи, Бујар Османи, од еден од брифинзите со домашните новинари околу надминувањето на македонско-бугарските недоразбирања и кревањето на ветото за официјален почеток на преговорите на Македонија за членство во ЕУ.

Можеби ваквата порака во многу наликува на паролата на Коста Новаковиќ од пред повеќе од век и половина-Македонија на Македонците, земјата на селаните-но последниот развој на настаните покажа дека работите во пракса не одат баш така. Тоа го потврди копретседавачот од бугарска страна во мешовитата комисија за прашања од историјата и за учебниците, поранешниот амбасадор во Скопје, Ангел Димитров, во своја чисто политичка колумна за агенцијата БГНЕС во која пласираше низа тези, што ги навредија чувствата, дигнитетот и достоинството на македонските граѓани, пред се на Македонците.

Зашто, основно негово оправдување зошто Бугарија и ЕУ не смеат да дозволат почеток на преговорите на Македонија беше дека со тоа Унијата во своите редови ќе добие руско-српски тројански коњ!

И ако реакциите во земјава можат поинаку да се протолкуваат, тогаш оценката на бриселски „Политико“ дека „Бугарија е тројански коњ на Москва во ЕУ“ имаат сосема друга димензија и значење.

Ангел Димитров со колумната ги потроши сите и „научни“ и политички кредити. Иако неговото натамошно членство во Комисијата е внатрешно бугарско прашање, сепак на потег е нашиот министер за надворешни работи. Тој еднаш веќе и препорача на бугарската страна да направи проветрување, но сега за тоа има и конкретен повод.

Бујар Османи мора да побара отстранување на Ангел Димитров од натамошното членство и работата во Комисијата. Неговото затворање очи и натамошен молк нема да значи ништо друго, освен одобрување на таквиот став и метастазирање како меѓу останатите членови, така и во целото бугарско општество и држава, анализира Пресинг ТВ.

Извор: Пресинг ТВ

The post Дали Османи ќе побара отстранување на претседателот на бугарската комисија за историја поради навреди кон Македонците? appeared first on Република.

Првиот човек на бугарскиот дел од заедничката комисија за прашања од историјата и за учебниците, Ангел Димитров, во авторски текст за агенцијата БГНЕС ги истури сите лични фрустрации на сметка на Македонија и Македонците од досегашните недоразбирања и отсуството на конкретни резултати во нејзината работа. Во отворениот излив на бес, преточен во застарена и изживеана реторика, тој едноставно се размавтал и се однесува како „руски генерал во Бугарија“!

Наводите се оскористени, зашто токму таква била репликата на еден наш историчар кон него за време на една од сесиите на мешовитата комисија, по што Димитров, наводно, почнал да клоца дури и столчиња. Јавноста можеби првпат се запознава со ова, но членовите на комисијата сигурно ќе се потсетат на настанот, што се случил уште пред неколку години, анализира „Пресинг ТВ“.

Од денешен аспект, пак, текстот и сите истурени блуеници врз Македонија и Македонците го прават Димитров во прав ДимитровZ! Новокомпониран путинист, за кого историјата на Македонија и Македонците едноставно не постојат или ако постојат, тие се чисто бугарски и никако поинакви! Така, како што сака бугарската страна да се чита и Договорот за добрососедство и делот за „заедничка историја“!

Наспроти сите истурени навреди, сепак, се чини дека написот на ДимитровZ има повеќе внатрешно-политичка, отколку „добрососедска“ димензија. Зашто, крајно индикативен е моментот кога е напишан и објавен авторскиот текст. Случајно или не, тоа се случува во време кога веќе опозициската ГЕРБ едногласно го реизбра Бојко Борисов за партиски лидер и најави дека нејзината основна претстојна задача ќе биде доаѓање до нови предвремени парламентарни избори. А, на ова секако треба да се додаде и политичката, здравствената и економската криза во која се наоѓа Бугарија, впрочем како и сите земји во Европа.

Во крајна линија, ДимитровZ ни кажува дека и членовите на бугарскиот дел од комисијата не се согласуваат со рестартот и новиот приод во враќањето на довербата меѓу двете држави и дека имаат сосема друга политичка агенда, многу поблиска со ревизионистичката политика на Борисов, Румен Радев и Красимир Каракачанов!

Што го заболе уво ДимитровZ за спомениците на Гоце Делчев, Даме Груев или за Порта Македонија?! Да не сака и тој како Каракачанов да ни испрати една бугарска воена инженерска единица за да ни „помогне“ во „правилното“ нивно означување или можеби уривање?! Исто како што сега Путин се однесува во Украина! И за него не постојат Украинци, а Украина како држава е вештачка творба, исто како што за ревизионистичка и хегемонистичка Бугарија не постојат Македонци, а македонизмот е идеолошка творба градена врз антибугарски основи, само што државата Македонија може да постои, ама како втора бугарска држава.

А, за да го оправда сето ова, ДимитровZ ги плаши ЕУ и САД со реинкарнација на Тито и Сталин во Македонија! Па, ако станува збор за реинкарнација на тоталитаризмот, би било добро ДимитровZ малку да погледне во сопствениот, бугарски двор. И ќе види дека врз жестокиот бугарски антикомунизам фактички се крие отворен неонацизам!? Ќе види дека зад тој бугарски неонацизам се крие ревизијата и негирањето на холокаустот и депортацијата на македонските Евреи за време на Втората светска војна!

Ако тоа не може да го види, тогаш нека се запраша, на пример, зошто токму сега во бугарското општество се води полемика и за постоењето нацизам во Бугарија за време на Втората светска војна, зошто токму сега се бара менување на името на улицата „Гроф Игнатиев“, зошто токму сега се бара преместување на споменикот на Црвената армија во Софија, зошто токму сега експресно беше сменет министерот за одбрана…

Затоа би било многу подобро Aнгел ДимитровZ, наместо да пишува текстови и да ни држи лекции за убаво однесување, конечно да излезе од шинелот на размавтаниот руски генерал во Бугарија и да мисли со европски вредности. Што е многу подобро од ревизионистичките и шовинистичките политики на неговите политички ментори.

Извор: ПресингТВ

The post Ангел Димитров се размавтал како „руски генерал во Бугарија“! appeared first on Република.

Ангел Димитров, бугарскиот копретседавач со мешовитата историска комисија, во својата денешна колумна за БГНЕС пишува дека Трумфалната капија во центарот на Скопје е споменик на иредентизмот, додека Гоце Делчев и Даме Груев никогаш не јавале во костуми.

Сепак, меѓу многуте споменици кои, според британски Гардијан, го претворија Скопје во „главен град на кичот“, преовладуваат оние поврзани со бугарската историја. А ги има десетици и нема промена на натписите. Нема милост за Георги (Гоце) Делчев и Дамјан (Даме) Груев, кои во костими се качени на коњи што никогаш не ги јавале. Во Скопје ја имаат - ретко кој знае зошто - Триумфалната капија, која всушност е споменик на иредентизмот, бидејќи преку неа денешната република се поистоветува со целата географска територија на Македонија. Наспроти оваа материјализирана позадина на проблемот со толкувањето на минатото во Република Македонија, повеќе од јасно е дека нов почеток во меѓудржавните односи не само што е неопходен туку и неизбежен, пишува Димитров.

Тој ги повика Европската унија и САД да не ја критикуваат само Бугарија во преговорите со Македонија, бидејќи соседот, според Димитров, може да биде „тројански коњ“ на Москва.

Од таква перспектива, дали Европската Унија и САД разбираат дека упатувајќи критики само кон Бугарија, тие всушност ја рехабилитираат Коминтерната, руските и српските интереси, Сталин и Тито и тоа идеолошко наследство кое е апсурдно далеку од научното прецизност, политичка коректност и европски вредности? И дека држава која е генетски поврзана со Србија и Русија не може и не сака да им го сврти грбот? Во овој контекст, апсурдни се навестувањата дека позицијата на Бугарија им е на услуга, бидејќи Бугарија силно ја поддржа евроатлантската интеграција на Република Македонија за да ѝ помогне да излезе од старата југословенска комунистичка орбита. Инаку, Москва нема ништо против евроинтеграциите на Белград и Скопје, бидејќи - со оглед на нивното политичко наследство - тие ќе бидат толку потребните „тројански коњи“ во Европската унија, смета историчарот.

The post Димитров: Ако САД и ЕУ ја критикуваат само Бугарија, ќе ги разбудат Тито и Сталин во Македонија appeared first on Република.

Ангел Димитров од Организацијата на работодавачи смета дека е несериозен предлогот на ССМ за штрајк доколку не бидат задоволени нивните барање за минимална плата од 18.000 во моментов.

-Да се инсистира и да се заканува дека со штрајк мора да се добие 18.000 денари е несериозна работа. Насекаде во светот многу посериозно се настапува по однос на ова прашање. Порастот на минималната плата треба да биде резултат на сеопфатен дијалог меѓу сите страни. Сложеноста е затоа што минималната плата има две димензии, едната е социјалната за минимум егзистенција на семејствата и втората е економската состојба во државата, како ќе влијае на бројот на вработени, оценува Димитров за Дневникот на Тв Сител.

Според него, денес на средбата во Влата не бил планирано решение.

-Денес само започнавме дијалог за зголемување на минималната плата. Владата треба да помогне и сите да излеземе среќни со тоа што секоја страна треба да се откаже од своите интереси во однос на другиот, заклучува Димитров.

The post Организација на работодавачи: Несериозно е со штрајк да се бара минимална плата appeared first on Република.

Во бугарскиот дел од Мешовитата историска комисија со Македонија нема промени, но договорена е поголема динамика во работата и до средината на мај треба да има три средби, вели копретседателот на Комисијата од бугарска страна, Ангел Димитров за БНТ.

Според Димитров, зачестените средби на Комисијата не се ништо ново, бидејќи бугарската страна секогаш сакала многу повеќе средби за да има резултати.

„На почетокот таа наша желба беше окарактеризирана како политички притисок, но ете, сега има желба и од другата страна. Првата средба ќе биде на крајот на февруари“, вели тој.

Во разговорот тој уште тврди дека нема притисок врз Комисијата.

„Знаеме што да очекуваме и пристапуваме со внимание и реализам, без особени очекувања. Ние сме во Средновековието, уште сме во делот што се учи во основното училиште, сѐ уште не сме стигнале до она што се учи во средно училиште, а работиме 3,5 години. Сето тоа е така бидејќи нашите колеги не сакаат да прифатат дека имаме заедничка историја, а таа почнува во Средниот век. На тоа се должи блокирањето на нормалниот ритам на работата на Комисијата“, изјави Димитров.

Тој уште додава дека настојувал да се отвори разговорот за Гоце Делчев, ама, како што вели, за жал, седницата ќе биде по 150-годишнината од раѓањето на Делчев. Истовремено даде пример за разликите по прашањето за Гоце Делчев.

„Кога зборувавме како да подготвиме еден текст до владите за заедничко чествување, колегите од РСМ тргнуваат од современоста кон минатото, од нивната претстава за Гоце Делчев, вез да се зборува за него во неговото историско време. Тој пристап не е историски. Ние предлагаме прво да се оцени една личност во неговото историско време и оттаму да се дојде до неговото значење за сегашноста“, објаснува Димитров и додава дека не очекува нешто што ќе направи голем пресврт во работата на Комисијата.

The post Затоа немало напредок: Претседателот на бугарската комисија се жали што не прифаќаме дека имаме заедничка историја appeared first on Република.