Министерот Владо Мисајловски денеска во Министерството за одбрана оствари работна средба со амбасадорката на Соединетите Американски држави, Н.Е. Анџела Агелер.

На средбата се разговараше за претстојната работна посета на министерот Мисајловски на САД, по повод билатералните консултации во областа на одбраната меѓу двете земји.

Министерот и амбасадорката дискутираа за актуелните безбедносни предизвици со кои се соочува Европа и НАТО Алијансата како и за идните приоритети во билатералната одбранбена соработка со САД, нашиот докажан стратешки партнер и сојузник.

The post Работна средба на министерот Мисајловски со амбасадорката на САД, Анџела Агелер appeared first on Република.

Амбасадорката на САД Анџела Агелер смета дека е добро што претседателката Гордана Сиљановска-Давкова утре ќе оди во Софија каде, според бугарските медиуми, се очекува да се сретне со претседателот на Бугарија, Румен Радев.

Агелер во вечерашното гостување во централниот дневник на телевизија „Сител“ рече дека колку државите соработуваат како соседи, толку поголем ќе биде напредокот за сите граѓани.

Според мене е одлично што претседателката оди во Бугарија на покана на претседателот Радев. Овие врски во регионот се многу важни, бидејќи сте соседи. Колку се посилни односите меѓу соседите, толку побезбедна, попросперитетна и стабилна може да биде секоја земја, рече Агелер.

Во однос на именувањето на нови членови на Историската комисија со Бугарија, Агелер вели дека историјата е важна, но дека исто толку е важно да се разговара и за иднината.

Една од работите што ги разговарав и со претходната влада и сега со оваа нова Влада е тоа дека историјата е многу важна, таа не дефинира сите нас. Нашата историја како држави не донесе таму каде што сме денеска. Не само што е важно да се разговара за историјата, знам дека ова е дел од билатералните и меѓународните договори, исто така е важно да се разговара и за иднината. Мојата основна надеж е дека како што зборуваме за споделената историја која Македонија ја има со своите соседи, посебно со Бугарија, исто така зборуваат како ќе одиме напред во однос на транспортот, енергетиката, образовните размени… се надевам дека не гледаат само во историјата, туку дека гледаат и кон иднината, рече Агелер.

Во однос на изборите во САД и каква ќе биде поддршката по изборот на новиот американски претседател, Агелер рече дека без разлика на исходот од изборите, САД ќе останат силен пријател, сојузник и партнер на земјава.

Нашето пријателство и поддршка нема да се променат. Тоа ќе остане цврсто и може да ве уверувам дека додека сум овде како амбасадор ќе направиме се што можеме да ги поддржиме програмите на кои напорно работевте дури од независноста, рече Агелер.

The post Агелер: Одлично е што претседателката Сиљановска-Давкова оди во Бугарија appeared first on Република.

Премиерот Христијан Мицкоски на неговиот фејсбук профил објави дека остварил средба со амбасадорката на САД, Анџела П. Агелер, како и со заменичката амбасадорка, Никола Варнес.

Разговаравме за тековните политички и економски прашања и за напредокот на државата кон Европската Унија. Ја нагласив важноста на стратешкото партнерство со САД и истакнав дека американската поддршка е клучна за развојот и стабилноста на земјата. Се согласивме да ги зајакнеме билатералните односи и да ја зголемиме соработката во различни области, пишува Мицкоски на фејсбук.

The post Средба на премиерот Мицкоски со американската амбасадорка и нејзината заменичка appeared first on Република.

Министерот за дигитална трансформација, Стефан Андоновски, имаше средба со амбасадорката на САД, Анџела П. Агелер.

Како што соопшти кабинетот на Андоновски, во фокусот на разговорите биле проектите, активностите и целите на Министерството за дигитална трансформација.

Нашата заложба за дигитализација не е само технички проект; тоа е дел од нашата стратегија за изградба на почесно и поодговорно општество во служба на граѓаните, истакнал Андоновски на средбата.

Соговорниците се согласиле дека безбедносните предизвици во сајбер просторот се сериозна закана за постојниот меѓународен поредок. Воедно, била нагласена потребата од заеднички пристап и стратешка размена на информации и искуства особено меѓу НАТО сојузниците, во насока на успешно справување и надминување на сајбер заканите кои стануваат сѐ побројни, поразновидни и пософистицирани.

Била потенцирана отвореноста на САД за соработка и продолжување на спроведувањето на реформите и системските мерки, кои се од огромна важност за дигитална трансформација на процесите во државата.

Дигитализацијата не е само технологија; таа е алатка за транспарентност, отчетност и ефикасност. Со воведувањето на електронски услуги и дигитални системи, можеме да ги елиминираме многу од точките каде што корупцијата најчесто се јавува. Дигиталната трансформација на процесите е важен елемент во справувањето со корупцијата, било заклучено на средбата од страна на соговорниците.

The post Средба Андоновски – Агелер: Дигиталната трансформација на процесите е важен елемент во справувањето со корупцијата appeared first on Република.

Портпаролката на ВМРО-ДПМНЕ Марија Митева, прашана за ставот на партијата во однос на интервјуто на американската амбасадорка Анџела Агелер, во кое вели дека „нема одново преговори ниту за Преспа, ни со Бугарија за ЕУ“, истакна дека не е соодветно од нивна страна да коментираат изјави на нашиот стратешки партнер со кој Македонија гради соработка веќе изминатите три децении, но она што е клучно е испратената порака дека се потребни навистина важни разговори од кои сите инволвирани страни ќе имаат корист.

Митева нагласи дека Владата на ВМРО-ДПМНЕ уште на самиот почеток покажала што ќе биде наш фокус – растот на економијата, нови инвестиции и подобар животен стандард на граѓаните.

„Владата на ВМРО-ДПМНЕ уште на самиот почеток, првите пет дена на дело покажа што ќе биде наш фокус. Тоа е растот на економијата, нови инвестиции, а се со цел подобар животен стандард на граѓаните. Не е соодветно од наша страна да коментираме изјави на нашиот стратешки партнер со кој Македонија гради соработка веќе изминатите три децении, но она што е клучно е испратената порака дека се потребни навистина важни разговори од кои сите инволвирани страни ќе имаат корист. Фокусот на оваа влада е реформски. Потребни се брзи реформи со цел враќање на реномето и угледот на нашата држава Македонија, затоа што се досега од страна на СДС и ДУИ беше погазено и уништено“, изјави Митева.

The post ВМРО-ДПМНЕ за интервјуто на Агелер: Не е соодветно да коментираме изјави на стратешки партнер, покажавме што ќе биде наш фокус appeared first on Република.

Нема одново преговори ниту за Преспа, ни со Бугарија за ЕУ. Тие договори се веќе направени, нема одново преговарање за напредок кон ЕУ, вели американската амбасадорка Анџела Агелер.

Агелер, во интервју за Радио Слободна Европа, вели дека граѓаните од новата Влада треба да бараат транспарентност и справување со корупцијата, нагласувајќи дека секогаш постои ризик од влез на корозивен капитал и дека власта треба да одговори на сите прашања.

Да бидам многу јасна, Договорот од Преспа беше апсолутно историски за државата. Знам дека беше исклучително тешко за многу луѓе во државата да прифатат промена на името. Но тоа беше меѓународен договор, со кој тогашната влада и многу во меѓународната заедница се согласија. Ние секако бевме дел од тој процес и ние аплаудиравме. Тоа е нешто што и помогна на Cеверна Македонија, сега да влезе во НАТО, и доби многу можности за да напредува во Европската Унија. Бевме многу задоволни што новиот премиер и неговите министри кажаа „Cеверна“ во заклетвата. Тоа е од клучна важност и е фундаментален дел од Договорот. Сега многу внимателно ќе следиме како се почитува. Но како што веќе кажав и кажавме дека со почитување на Договорот од Преспа, што е клучно, и секако има начин, и приоритетот за нас во Скопје, во Американската амбасада и за Вашингтон, е да се премине на многу од тие многу важни приоритети за кои треба да се зборува оваа земја. Чувствувам дека има одредено количество на одвлекување на вниманието и собирање поени од тоа кој и што и кога кажал. Но важно е да се почитуваат меѓународните договори, за кои премиерот кажа дека ќе го стори и да одиме напред и да ги имаме многу важните разговори, изјави Агелер.

Прашана што треба да очекуваат македонските граѓани и кои треба да бидат приоритетите, Агелер вели дека ја следеле земјата во периодот на кампањата и на изборите кои беа фер и демократски.

Демократијата е многу кревка работа и ја следевме земјата во периодот на кампањата и на изборите кои беа предизвик и за граѓаните и за кандидатите во оваа земја. Резултатите, меѓутоа, беа многу дефинитивни. Изборите беа фер и демократски, сеедно која партија и кого граѓаните подржаа. Да се види овој демократски процес како напредува е позитивно за луѓето во оваа земја. Тие многу јасно кажаа на раководствотo дека сакаат да видат промена. Новата Влада јасно кажа за време на нивната кампањата кои сметаат дека се тие потребни промени. И сега е одговорност, мислам, на секој граѓанин во оваа земја и на сите нас да ги држиме за збор, се види дали се совпаѓаат активностите со изјавите дадени за време на кампањата. Зборуваа за справување со корупцијата, зборуваа за раст на економија, зборуваа за енергија и инфраструктура, за важноста на образованието и здравството за секој граѓанин на оваа земја. И ќе следиме внимателно, знам дека и сите вие ќе следите како овие ветувања ќе се претворат во акции и резултати за граѓаните на Cеверна Македонија, вели Агелер.

The post Агелер: Нема одново да се преговора ниту за Преспа, ниту со Бугарија за ЕУ appeared first on Република.

Заменик претседателот на Владата и министер за транспорт, Александар Николоски, оствари работна средба со Амбасадорката на САД, Анџела Агелер на која разговарале за реформските процеси и стратешките приорити на Владата и на Министерството за транспорт.

Како што соопштија од Министерството, Николоски ја истакнал огромната важност за навремена реализација на капитални проекти, со посебен акцент на регионалното поврзување и интеграција.

Тој изразил уверување дека предвидените проекти од владината програма ќе ги реализира заради забрзан економски раст и развој на инфраструктурата во државата.

На средбата министерот Николоски ја потенцира стратешката определба која е во насока на зајакнување на билатералната соработка меѓу двете земји. САД се наш најзначаен партнер и поддржувач. На средбата се нагласи и поддршката на САД во делот на размена на искуства и знаење во областа на капитални инвестиции и инфраструктурни решенија. Двајцата се согласија за зајакнување на билатералните односи и интензивирање на соработката, се наведува во соопштението.

The post Николоски – Агелер: Зајакнување на билатералните односи и интензивирање на соработката со САД appeared first on Република.

Шефот на дипломатијата Тимчо Муцунски денеска во просториите на Министерството за надворешни работи, остварил работен состанок со амбасадорката на САД, Анџела Агелер.

-На состанокот ја потврдивме стратешката определба на Владата за спроведување на реформските заложби, во насока на забрзување на евроинтегративниот процес, притоа истакнувајќи ја поддршката која САД ја дава за унапредување на демократскиот развој и засилување на борбата против криминалот и корупцијата, напиша министерот Муцунски на неговиот официјален профил на социјалната мрежа фејсбук.

На средбата, се посочува, била потврдена посветеноста и заложбата за понатамошното развивање на билатералните односи и соработката во согласност со Стратешкиот дијалог со САД.

-Како стратешки партнери и сојузници во НАТО сојузот и во актуелниот геополитички контекст, стоиме обединети во одбрана на вредностите кои ги споделуваме, стои на објавата на фб на министерот за надворешни работи Муцунски

The post Средба на Муцунски со Агелер: Потврден континуитетот во стратешката соработка appeared first on Република.

Американската амбасадорка во земјава – Анџела Агелер на социјалната мрежа Х упати честитки за формирањето на новата Влада.

– Додека премиерот и неговиот кабинет ја преземаат функцијата, со нетрпение очекуваме да го продолжиме нашето партнерство во зајакнувањето на владеењето на правото, подобрувањето на економскиот, енергетскиот и инфраструктурниот развој, социјалните структури и придвижувањето на земјата напред на нејзиниот евроатлантски пат – се вели во честитката на Агелер.

The post Агелер честита за новата Влада: Со нетрпение очекуваме да го продолжиме нашето партнерство appeared first on Република.

Американската амбасадорка Анџела Агелер во интервју за „360 степени“, нагласи дека е задоволна што владата е составена од различни групи и дека нема законска обврска според која ДУИ треба да е во влада

„Тоа е дел од жива демократија“-вели амбасадорката.

Агелер објасни дека победникот е тој што ги избира партнерите, но и дека „Европскиот фронт“, како и „Вреди“, биле коалиција. На крај, според неа, важно е дека во владата има диверзитет.

„ВМРО-ДПМНЕ го избра партнерот – ’Вреди’, која е исто така коалиција, исто како и „Европскиот фронт“ предводен од ДУИ. Сум имала разговори за ова со низа функционери на ДУИ и дури и нема законска обврска за тоа со кој ќе стапите во коалиција. Партијата која победи на изборите ја имаше можноста и избра да создаде коалиција со малцински групи во земјата. Тоа е од исклучителна важност зашто она што двете наши земји ги прави толку богати е диверзитетот, различните етнички групи и заедници и она што тие го носат за нашите демократии. Оттука, задоволна сум дека владата е составена од различни групи и нема законски обврски за ДУИ да се вклучи во владата. Знам дека има прашање на закон наспроти легитимитет, но факт е дека ВМРО-ДПМНЕ избра партнери од различни заедници во земјата и тоа е нивно право. Избраа тоа да го направат и ќе видиме како ова партнерство ќе функционира“,

изјави Агелер.

Извор: 360 степени

The post Агелер: ВМРО-ДПМНЕ ги избира партнерите во владата, нема законска обврска ДУИ да биде во неа appeared first on Република.

Политичкиот аналитичар и поранешен министер, Џевдет Хајредини, коментира дека на сите во Македонија, па така и на американската амбасадорка Анџела Агелер и на евроамбасадорот Дејвид Гир, им е добро познато кој е најмногу одговорен за корупцијата во земјата.

Многу добро им е познато на амбасадорите Агелер и Гир, колку за корупцијата во Македонија, и лично е одговорен кандидатот број 1 за пратеник во шестата изборна единица, коментира Хајредини.

The post Хајредини: На амбасадорите Агелер и Гир им е многу добро познато колку за корупцијата во Македонија лично е одговорен кандидатот број 1 за пратеник во ИЕ6 appeared first on Република.

Состојбите во Јавното обвинителство и предизвиците со кои се соочува институцијата, најмногу од аспект на материјалните и кадровските ресурси, биле теми на дискусија на денешната средба на јавниот обвинител на Република Македонија Љупчо Коцевски со амбасадорката на САД во земјава Анџела Агелер.

Коцевски, како што соопшти ЈОРСМ, се заблагодарил за поддршката што САД ја даваат за Обвинителството, особено за воспоставувањето и опремувањето на истражните центри во Основното јавно обвинителство Скопје и Основното јавно обвинителство за гонење на организиран криминал и корупција.

Амбасадорката Агелер истакнала дека поддршката на САД ќе продолжи на сите нивоа кон сите поединци што работат со интегритет и тие кои се посветени да ги дадат најдобрите услуги на граѓаните, додавајќи дека од воспоставувањето на стратешкото партнерство на САД со нашата земја, американската финансиска поддршка за целокупниот систем за владеење на правото изнесува околу половина милијарда долари.

Во соопштението се наведува дека амбасадорката Агелер остварила средба и со сите обвинители во републичкото обвинителство, при што се информирала за тековните активности со следење на евентуални нерегуларности поврзани со претстојниот изборен процес. д

The post Американската амбасадорка Агелер во посета на новиот јавен обвините Љупчо Коцевски appeared first on Република.

Американската амбасадорка Анџела Агелер денеска посочи оти се надева дека дискурсот на изборната кампањата ќе се фокусира на суштинските прашања, а не на лични напади. Таа порача кандидатите од целиот политички спектар да запомнат дека изборите се за граѓаните, но и за иднината на оваа држава.

-Кога би можела да дадам една препорака до кандидатите од целиот политички спектар, тоа би било да запомнат дека овие, но и сите други избори се за граѓаните на оваа земја. Тие се за иднината на која се надева и заслужува оваа земја и нејзиниот народ. Затоа, се надевам дека дискурсот на кампањата ќе се фокусира на суштинските прашања, а не на лични напади, бидејќи верувам дека луѓето се уморни од негативноста, изјави Агелер за порталот PRESSonline.al.

Како што потенцираше, дури тогаш гласачите ќе можат да направат избор меѓу кандидатите за оние за кои веруваат дека најдобро ќе им помогнат да ги остварат своите надежи и соништа за себе, нивните деца и нивното општество.

Агелер напомена оти се надева дека овие одлуки ќе ја доближат државата до целосна интеграција во европската заедница. Таа нагласи дека владините институции треба да воспостават процеси за слободни и фер избори за претседателските и парламентарните избори.

-Гласачите мора да се информираат преку сигурни извори на информации, а да ги препознаат и отфрлат сите дезинформации и манипулации. И што е најважно, гласачите мора да гласаат! Демократијата функционира кога сите ја исполнуваме нашата обврска. Моите очекувања за изборите се исти како и оние на гласачите, а тоа е целиот процес, од периодот на кампањата до формирањето на идната влада, да се одвива на транспарентен начин, преку кој ќе се обезбедат слободни и фер избори, подвлече Агелер.

The post Агелер: Дискурсот на кампањата да биде фокусиран на суштинските прашања, а не на лични напади appeared first on Република.

Амбасадорката на САД во државава Анџела Агелер на конференцијата „Украина – две години хероизам“ денеска истакна дека по почетокот на војната украинските херои продолжуваат да се борат и оти нивната храброст и сила освоила мали и големи победи и покрај тоа што преживеа големи загуби. Украина, рече Агелер, ќе победи со сета наша помош, и за тоа нема алтернатива.

-Не само што запреа голем непријател, туку ги запреа стоките на Русија да одат на светскиот пазар, продолжија да даваат и испорачуваат струја и услуги, ја реформираа државата и таа се придвижува напред кон членство во трансатлантските институции. Украина ќе победи со сета наша помош. Нема алтернатива, рече Агелер на конференцијата во Скопје, во организација на Амбасадата на Украина.

Заложбите, посочи американската амбасадорка, не може да бидат повисоки и се многу поголеми од границите на Украина.

- Нелегалната брутална војна на Русија не’ потсетува на заканите коишто ги даваат авторитарните режими, важноста да се одбраниме од силеџиите и да се бориме за демократија и за слобода. Денеска повторно се заложуваме за кауза и за мир и за правда. САД останува на своето место, останува на својата поддршка за Украина и за нејзините државјани. Слава на Украина, рече Агелер.

Светот гледаше со загриженост и искреност, со неверување, додаде таа, како во зимата 2022 година додека Путин собираше војска пред границите на Украина и пред две години гледавме како ужасната и бруталната инвазија врз Украина започна.

- Путин и многу други сметаа дека руската воена моќ ќе го прегази Киев за една недела и ќе ја заземе земјата за еден месец. Но, тоа не се случи. Украинците со САД, НАТО и други партнери, вклучувајќи ја и Европската унија застанаа во отпор и рекоа не. Украинците не се предадоа. Тие се бореа. Претседателот Зеленски не избега од државата, туку остана и ја водеше државата. Западот не го сврте грбот, ние се обединивме и ги здруживме силите, а НАТО наместо да се распадне – порасна, рече Агелер.

Амбасадорот на ЕУ во земјава Дејвид Гир на конференцијата истакна дека Унијата е и ќе продолжи да биде еден од најголемите пријатели на украинскиот народ. Тој потсети дека 4,2 милиони украинци користат привремена заштита во земјите од ЕУ, на политичка поддршка што ја вклучува и историската одлука од минатиот декември да се отворат преговорите за прием во ЕУ, како и на огромната финансиска, техничка и хуманитарна помош, како и нашата воена поддршка заедно во износ од 90 милијарди евра.

Во Скопје денеска се одржува конференција за одбележување на двегодишнината од почетокот на војната во Украина. На првиот панел се обратија претседателот Стево Пендаровски, украинската амбасадорка во земјава, министри и повеќе други претставници.

The post Агелер и Гир: Украина ќе победи со наша помош и за тоа нема алтернатива appeared first on Република.

Cеверна Македонија ги потврди своите вредности како лојална земја членка на Алијансата. Таа е четвртата земја која по број на жители и помогна на Украина, и тоа не само со воена опрема, туку и преку други начини на асистенција. Ние сме многу благодарни, искрено многу други побогати земји не помогнаа на начин на кој помогна оваа земја, истакна американската амбасадорка Анџела Агелер во интервју за ТВ Канал5.

Таа им се заблагодари на граѓаните и институциите на земјава што ја поддржале Украина и нивните напори, преку НАТО и преку други начини против, како што рече, ужасната, бруталната и крвавата инвазија на Русија и Путин и војната која трае речиси две години.

На прашањето дали претседателските избори во САД годинава може да влијаат на динамиката на помошта кон Украина, Агелер одговори дека не постои замор и дека во изминатите денови  Сенатот ја одобри помошта во вредност од 61 милијарди долари намената за Украина, а сега е на ред Претставничкиот дом.

-Она што е важно е дека во САД, исто како и во Cеверна Македонија, имаме избори оваа години и затоа секогаш ќе има определени политичари кои ова прашање ќе го искористат за добивање политички поени, преку правењето ова прашање да биде контроверзно. Јас силно верувам дека граѓаните на САД силно ја поддржуваат Украина, заштитата на нивниот суверенитет и обидите да се заврши војната, затоа сум прилично убедена дека ќе продолжиме со помошта, исто како што сум убедена дека граѓаните на оваа земја ќе ги направат истото, истакна амбасадорката на САД.

Дали ако не се реши набрзо конфликтот во Украна, има опасност да се прелее и да го загрози Западниот Балкан кој и онака е ранлив, Агелер одговори дека тоа е важно прашање зашто војните и конфликтите не стојат во границите.

-Ова започна со инвазијата на претседателот Путин и руската армија во Украина. Влијанието од ова веќе го чувствуваме, односно економски последици, социјални последици веќе се чувствуваат во целиот свет. Македонија е европска држава, а во Европа има војна, а тоа има големо влијание низ целиот континент. Затоа е императив, и покрај тоа што трупите не ја преминуваат границата утре, да се знае фактот дека НАТО ги заштитува своите земји членки. Знаејќи го тоа и местото кое го има оваа земја во Западниот Балкан и Европа е многу важно. Никој не е безбеден, Путин нема да се откаже доколку не е победен, рече Агелер.

Во однос на укажувањето од заменик генералниот секретар на НАТО дека во пресрет на изборите во нашата земја се очекува зголемена активност на хибридните закани, амбасадорката апелираше дека е важно македонските граѓани да знаат нив да ги препознаат.

- Хибридно не значи дека пешадија ви влегува преку границата, но дали е мешање во пресрет на изборите или е дезинформација, знаеме дека Русите се тука во овој регион, практикувајќи злонамерно влијание кое сме го виделе искрено во целиот свет. Во моментов нивните дејства ги гледаме и во САД, а имаа и влијание во нашите претходни избори. Тие се многу активни и ја користат секоја можност за да шират хаос. Според мене, најважната работа е граѓаните на оваа земја можат да го препознаат тоа, да се едуцираат за ова прашање, да поставуваат тешки прашања за политичарите, за кандидатите, но и да знаат дека можат да се потпрат на новинарите, за да им се помогне да можат да ја препознаат вистината и лажните информации и да ја донесат нивната одлука заснована на реалноста, што се случува и кои се кредибилните информации, рече амбасадорката на САД во интервју за ТВ Канал5.

The post Агелер: Cеверна Македонија се потврди како лојална членка на НАТО во помошта кон Украина appeared first on Република.

Министерот за внатрешни работи Панче Тошковски, Заменик министерот Назим Буши и Дополнителниот заменик министер Митко Бојмацалиев денес остварија работна средба со амбасадорката на Соединетите Американски Држави Н.Е. Анџела Агелер.

Министерот Тошковски ја запозна амбасадорката Агелер за функционирањето на Министерството за внатрешни работи во техничката Влада, кое ја има првенствената улога во спроведувањето на изборите кои ни претстојат, а тоа е законито и професионално постапување во организирањето и спроведувањето фер и демократски изборен процес.

Во тој контекст, Министерот Тошковски укажа на неможноста согласно Закон во рамки осумте раководни работници во секторите за внатрешни работи да назначи началник на СВР Тетово, со што се нарушува можноста да биде гарант на изборниот процес за тоа подрачје.

Министерот Тошковски ги образложи преземените активности во врска со важноста на патните исправи и го потенцираше решавањето на овој проблем на идентичен начин како и со возачките дозволи, односно преку промена на Законот за патни исправи, ставајќи се во улога на заштита на човековите права во однос на слободното движење на граѓаните.

На средбата, амбасадорката Агелер изјави дека го разбира целокупниот процес во насока на решавање на проблемот со личните документи и истакна дека нуди целокупна поддршка во насока на решавање на проблемот, од аспект на технички или кои било други ресурси. Воедно изрази уверување дека Министерството за внатрешни работи професионално ќе ги изврши своите обврски за организирање безбедни, фер и демократски избори и ја поздрави успешната билатерална соработка, ставајќи притоа акцент на тековните проекти започнати во соработка со Програмите кои работат на нивна реализација од аспект на зголемување на капацитетите на македонската полиција.

Дополнителниот заменик министер Бојмацалиев се заблагодари за досегашната соработка со САД, особено за остварувањето на неодамнешната посета на Вашингтон. Воедно нагласи дека раководството на МВР во овој состав на техничката Влада, засега функционира професионално и законито, без политички влијанија и на истиот начин треба да продолжи во целиот свој мандат.

The post Раководството на МВР на средба со американската амбасадорка Агелер appeared first on Република.

Американската амбасадорка во Македонија, Анџела Агелер, остварила средба со шефот на Основното јавно обвинителство (ОЈО) Скопје, Гаврил Бубевски.

Како што информираат од Амбасадата на САД во Скопје, Агелер на средбата со Бубевски ја изразила поддршката за независното обвинителство.

Ја изразив нашата поддршка за независното обвинителство, кое е клучно за унапредување на владеењето на правото и евроатлантските интеграции на Македонија. Граѓаните на Македонија заслужуваат правда и непристрасно одлучување, потенцирала амбасадорката Агелер, се посочува во објавата на американската амбасада.

The post Агелер на средба со Бубевски: Граѓаните на Македонија заслужуваат правда и непристрасно одлучување appeared first on Република.

Американската амбасадорка во Скопје, Анџела Агелер за Радио Слободна Европа вели дека не коментира предлог законски решенија, но ги поздравува и силно поддржува сите напори за истраги на наводните коруптивни криминални активности.

Ние ги сметаме за одговорни оние кои ја злоупотребуваат јавната доверба за лична корист. Јас претпоставувам дека институционални и законодавни реформи кои ќе ја зголемуваат транспарентноста и ја зајакнуваат борбата против корупцијата ќе бидат добредојдени не само од меѓународната заедница, туку и од сите граѓани на Македонија, истакнува амбасадорката Агелер.

Овој нејзин коментар следува по најавените измени на Законот за рестриктивни мерки, со кои ќе се санкционираат македонските државјани и фирми кои ќе се најдат на американската и на британската црна листа.

Иако предлогот за измена на Законот за рестриктивни мерки помина на владина седница и покрај правните дилеми што ги посочи Министерството за правда, неизвесно е дали тие бидат донесени од овој собраниски состав, имајќи предвид дека остануваат уште два месеца пред да почне кампањата за парламентарните и претседателските избори.

На црната лиса на САД се десетина сегашни и поранешни функционери, бизнисмени и компании. Меѓу актуелните фунцкионери на црната листа се најде струшкиот градоначалник Рамиз Мерко од ДУИ, а на неа е и поранешниот вицепремиер за економски прашања и бизнисмен Кочо Анѓушев.

The post Агелер: Не коментирам предлог закони, но ја поздравувам борбата против корупција appeared first on Република.

Американската амбасадорка во земјава Анџела Агелер денеска изјави дека постојат различни начини и во различни етапи за да се изрази незадоволството на лицата кои САД ги поместуваат на „црната листа“. Таа денеска за време на посета на Криволак одговараше за новинарски прашања во врска со најавите на поранешниот вицепремиер Кочо Анѓушев дека ќе ја обжали одлуката на Стејт департментот, кој го стави на „црната листа“ поради значителна корупција.

Таа повтори дека листата ќе се проширува со нови лица, но не кажа кога и со кого, нагласувајќи дека не може да предвиди што ќе одлучи Вашингтон.

Има различни етапи и различни начини на кои луѓето кои се наоѓаат на „црната листа“ можат да пријават незадоволство но во секој случај ние имавме најавено санкција. Оваа санкција е воведена и ова не е нешто што лесно го прифаќаме и лесно го спроведуваме, но сепак ги следиме позитивните законски прописи на САД при воведувањето на ваквите санкции. Сите ве уверувам дека ќе има и други имиња. Нема конкретна временска рамка кога ќе се објават, рече Агелер, додавајќи дека во земјава има епидемија на корупција, која треба да биде спречена.

Американскиот Стејт департмент во вторникот објави дека го означува Кочо Анѓушев како генерално неподобен за влез во Соединетите Американски држави, поради неговата вмешаност во значителна корупција.

Додека ја извршуваше функцијата вицепремиер, Анѓушев ја злоупотреби својата службена положба во корист на неговите приватни деловни интереси, поткопувајќи ја довербата на јавноста во Македонија во нивните владини институции и јавни процеси, се наведува во соопштението објавено од Стејт департментот.

Оваа ознака, посочуваат од Стејт департментот, ја потврдува посветеноста на САД за борба против корупцијата, која му штети на јавниот интерес, го попречува економскиот просперитет на земјите и ја намалува способноста на владите ефективно да одговорат на потребите на својот народ.

Агелер се огласи истиот ден преку платформата X, нагласувајќи дека именувањето на Кочо Анѓушев е уште еден доказ дека САД ќе продолжат да ги санкционираат корумпираните актери во земјава и во регионот, без разлика на нивната позиција, политичка определба или времето на злоупотребите.

Ќе следуваат повеќе назначувања, но факт е дека нашите напори и нашите санкции не можат да ја поправат епидемијата на корупција во Македонија. На крајот на краиштата, останува на функционерите и граѓаните на оваа земја да побараат одговорност и промени, објави Агелер тогаш на платформата Х.

The post Агелер: Листата ќе се проширува, Македонија се соочува со епидемија од корупција appeared first on Република.

Мешањето на приватни лица или јавни функционери во судските процеси не смее да се толерира од оние во судството, од владата или од народот на оваа земја. Надворешното влијание ја нарушува вербата на јавноста во македонските институции и функционери. Правдата мора да биде транспарентна - граѓаните на оваа земја не заслужуваат ништо помалку, се вели во пишаниот одговор од амбасадорката на САД, Анџела Агелер, по барање од Сител телевизија во врска со информации објавени пред два дена дека „амбасадорката Агелер била во посета на Врховниот суд по барање на судии кои биле под жесток притисок од владата и барале заштита од политички реваншизам“.

Таа вели дека и било задоволство да се сретне со главниот судија на Врховниот суд и со другите судии и да ги слушне нивните забелешки и грижи.

Судиите во кој било суд и во која било земја мора да носат одлуки врз основа на законот и без мешање, е ставот на амбасадорката Агелер.

Како што е објавено на фејсбук страницата на Амбасадата на САД во Скопје, амбасадороката Агелер се сретнала со судијката на Врховниот суд, Беса Адеми, за да разговараат за важноста на независноста и транспарентноста на судството.

Таа, исто така, имаше можност да се сретне со судиите на Врховниот суд и да го повтори нашиот заеднички интерес за зајакнување на владеењето на правото и борбата против корупцијата. Соединетите Држави секогаш ќе бидат тука да го поддржат владеењето на правото и да работат заедно за да се постигне просперитетна и безбедна Македонија, објавено е на ФБ на Амбасадата на САД во Скопје.

The post Агелер: Судиите во кој било суд мора да носат одлуки врз основа на закон и без мешање appeared first on Република.