Изборниот материјал за парламентарните избори во Албанија, што ќе се одржат на пролет следната година, ќе биде и на македонски јазик, како и на јазиците на останатите осум малцинства, признати со законот донесен во 2017 година.

Ова го соопштил претседателот на Централната изборна комисија, ЦИК, Илиријан Целибаши, на средба со претставниците на националните малцинства, поточно членовите на Комитетот за малцинства, каде претставник на македонското малцинство е Марјана Костофски.

- Во фокусот на средбата беше до сега сработеното во однос на информирањето на националните малцинства на нивниот јазик за изборниот процес, како и тоа што треба понатаму да се направи, со цел подобрување на информираноста и нивна едукација за претстојните избори. Го истакнав правото на секој да добива информации за изборите и пред сè преку сите средства за информирање, објави Целибаши.

Додава дека ја изразил целосната подготвеност на ЦИК да го направи она што е најдобро за прашањата за кои има интерес секое национално малцинство.

- На оваа средба со националните малцинства истакнав дека изборните материјали ќе бидат преведени на мајчин јазик, за 9-те национални малцинства кои се законски признати во Албанија, напиша Целибаши.

Парламентарните избори, 11-ти по ред, по падот на тоталитарниот режим ќе се одржат на пролет, за што датумот треба да го одреди шефот на државата, Бајрам Бегај, во средата ги почна средбите со политичките партии. Според изборниот законик треба да биде датум од последната недела на април или првата недела од мај месец

The post Изборното ливче за изборите во Албанија ќе биде и на македонски јазик appeared first on Република.

Од декември 2018 година кога, во Албанија, почна да се имплементира процесот на проверка, познат како ветинг, Специјалната комисија за проверка донела 802 решенија за лица од правосудството, судии и обвинители.
Од вкупната бројка, околу 280 судии и обвинители биле разрешени, при што 130 од нив незадоволни од одлуката на соодветниот орган за проверка, поднеле жалба до судот во Стразбур. Во досиејата, отпуштените судии и обвинители тврдат дека не е регуларен процесот на проверка.

За пет години Стразбур објави седум решенија, шест од нив со потврдување на одлуката на албанските органи. Единственото решение за враќање на должноста е донесено за обвинителката Антонета Севдари за која Стразбур ја нарекува „диспропорционален процес“, поради што албанската држава е казнета од Стразбур, објавија албанските медиуми.

Според медиумите, 6.609 албански граѓани доставиле поплаки до комисијата за спроведување на ветингот, кои обвинуваат судии и обвинители дека се корумпирани, пристрасни, а ги наведуваат и  непријавените имоти од нивна страна.

Со оглед на тоа што мандатот на Комисијата за проверка завршува  до крајот на декември, граѓаните поплаките ќе може да ги упатуваат до Специјалниот одбор за жалби, кој ќе продолжи да ги разгледува жалбите на оние кои не се потврдени на функцијата.

Поради не поминување на проверката за потекло на имотот и вмешаност во криминални активности во земјата се чувствува дефицит од овој кадар.
Уставниот суд на Албанија не функционираше речиси три години бидејќи овој процес не го минаа шестмина од вкупно девет судии, меѓу нив и претседателот, а идентична беше состојбата и со Врховниот суд. И двете високи судски инстанци профнкционираа кон крајот на 2021 година.

The post Во Албанија ветингот разреши околу 280 судии и обвинители, 130 од нив се пожалиле во Старзбур appeared first on Република.

Директорот на Управата за граница и миграција во албанската државна полиција, Саимир Бошњаку, изјави дека во изминатиот период од годинава, на граничните премини запленети се над 2,3 милиони евра, за кои постојат основи на сомнение дека потекнуваат од криминални активности.

На јавната панел дискусија на тема „Спречување на перење пари и транснационална корупција“, организиран од Специјалната антикорупциска комисија, Бошњаку рече случаите на непријавување финансиски средства на граничните премини е во постојан раст.

Како гранична полиција сме откриле многу случаи на непријавување пари на граничните премини, што како појава од година во година бележи раст. Ако во 2022 година имавме околу 32 предмети, со околу 3,6 милиони евра, главно од физички лица или транспортни фирми, кои превезувале непријавени пари, во 2023 година имавме 79 предмети, со околу 2,8 милиони евра, рече Бошњаку.

Во изминатиот период од годинава, според него, има 62 случаи, со вкупно запленети над 2,3 милиони евра.

Тој посочи дека последниот случај е оној од синоќа кога на граничниот премин Хан Хоти- Муриќан, на границата со Црна Гора, на влез на албанска територија запленети се 680.595 евра. Биле скриени во модифицирани врати на патничко моторно возило „мерцедес“, при што приведен е 51-годишен албански државјанин.

The post Албанската полиција на граничните премини годинава запленила непријавени над 2,3 милиони евра appeared first on Република.

Албанија продолжува со рекордна посетеност од  странски туристи, што го потврдува бројката од 10,4 милиони, што е на исто ниво како цела мината година.

-Албанија го собори рекордот од 2023 година по бројот на странски туристи кои ја посетиле нашата земја. Во периодот јануари-октомври престојувале 10,4 милиони туристи или 16,2 отсто повеќе споредено со истиот период минатата година, што значи дека станува се попосакувана туристичка дестинација, објави Мирела Кумбаро, министерка за туризам и животна средина.

Според податоците на Министерството за туризам и животна средина, во месец октомври земјава ја посетиле 761 илјада странски посетители или за 9,3 отсто повеќе од октомври 2023 година.

Пред неколку дена Светската туристичка организација во Глобалниот барометар ја рангираше Албанија на прво место во Европа и на второ место во светот, по Кипар, според стапката на раст на странски посетители. Овој ист барометар ја класифицира Албанија како прва во однос на порастот на приходите од туристичкиот сектор во однос на периодот пред пандемијата.

На крајот на октомври, познатиот магазин „Wanderlust“ и додели на Албанија сребрен медал како најпосакувано место за посета на туристите, преку гласање на британските читатели

The post Албанија урива рекорди во туризмот appeared first on Република.

Албанија ќе продолжи да се вооружува во 2025 година, за што во Предлог-буџетот за следната година предвидени се околу 180 милиони лека (98 лека=1 евро) за набавка на беспилотни летала.

Беспилотните летала ќе бидат опремени заедно со командни и контролни системи. Првите шест авиони купени од Турција се веќе поставени во базата на НАТО во Кучово, додека за време на посетата на Тирана турскиот претседател Реџеп Таип Ердоган изјави дека ќе донира и други камикази - беспилотни летала за Албанија, објави „Ора њуз“.

Според истиот извор, друго финансирање ќе биде заштитата од напади, за што се предвидува продолжување на проектот „противвоздушен систем на национално ниво“ вреден 271 милиони лека, но кој се очекува да трае до 2027 година со вкупно 20 милијарди лека.

Зголемувањето на капацитетот нема да застане тука. Албанија и следната година планира да купи хеликоптер „УХ 69 Блек Хок“, за што е предвидена сума од 6,6 милијарди лека. Друга иновација ќе биде купувањето авиони со повеќенаменски цели. Се очекува да се инвестираат 1,3 милијарди лека, наведува телевизијата.

Нивната намена ќе биде за гаснење пожари, но и за помош на луѓе заглавени во непристапни предели.

The post Албанија ќе купува дронови, системи за противвоздушна одбрана и хеликоптери appeared first on Република.

Албанската влада денеска го усвои Предлог-законот за повторно формирање на резервен состав на албанската армија.

Министерот за одбрана, Пиро Венгу, по владината седница изјави дека ваквата одлука дошла како „резултат на глобалната ситуација, но и како надополнување на стандардите на НАТО“.

Постои потреба од создавање на резервни сили. Ова му дава можност на активниот армиски персонал, кој од различни причини одлучил да ги развива своите кариери во приватниот сектор, да се врати во вооружените сили со специфични мисии и да придонесат во специфични мисии со обврски кои исто така може да ги покриваат мисиите на НАТО или во регионот, рече Венгу.

Додаде дека по изгласувањето на законот од страна на Собранието очекува на почетокот на новата година да бидат направени првите чекори кон создавањето на резервниот состав.

Имаме наменски финансиски пакет во буџетот за 2025 година за резервистите во износ од 15,5 милиони евра, како и натамошна обврска во следните години. Се враќаме на стандардите на НАТО и стануваме поатрактивни вооружени сили, а тоа значи дека вооружените сили имаат поширок опсег на персонал во операција. Ги сметаме за национални капацитети, рече министерот Венгу. 

The post Албанија го враќа резервниот состав на армијата appeared first on Република.

Албанските опозициски пратеници продолжуваат со „граѓанската непослушност“, вечерва со блокирање на пленарната седница на законодавниот дом, појава која е присутна повеќе седници по ред.

Седницата, на која на дневен ред беа повеќе прашања „траеше“ дваесеттина минути, но не ни почна поради тензичната ситуација.

Веднаш по влегувањето, демократите ја блокираа собраниската говорница, удираа по масите, а пратениците Оерд Булукбаши и Еди Палока ги ставија своите мобилни телефони на микрофонот на говорницата, вклучувајќи апликација што произведува бучава. И покрај зголеменото обезбедување состојбата не се нормализира.

Тие држеа транспаренти на кои пишуваше „Еди Рама, Наркостат“; „Слободни и фер избори“.

Со седницата претседаваше потпретседателот на парламентот Бледи Чучи, бидејќи претседателката Елиса Спиропали е во посета на Ватикан. Тој беше принуден да ја прекине седницата.

Имајќи ја во предвид хаотичната ситуација што беше создадена во и надвор од парламентот, во близина на просториите на Собранието беше стационирано противпожарно возило а беше поставена металната ограда околу објектот.

За утре попладне, демократите најавија блокирање на повеќе национални патни правци во земјата во период од три часа.

The post Повторно тензиии во албанскиот парламент appeared first on Република.

Во албанското Министерство за Европа и надворешни работи се одржа проштална средба на македонскиот амбасадорот Данчо Марковски со министерот Игли Хасани.

Покрај другото средбата била искористена за размена на мислења околу билатералните односи и перспективи меѓу двете земји.

Заеднички беше констатирана потребата од давање дополнителен импулс во соработката, особено во делот меѓу ресорската соработка, економско – трговската и културна соработка, како и на другите полиња од заемен интерес, објави амбасадата во Тирана.

Двајцата соговорници ја истакнале потребата за натамошно продлабочување на меѓусебните односи и заедничко генерирање на стабилност во регионот.

Марковски е вонреден и ополномоштен амбасадор на Република Македонија во Република Албанија од 2020 година.

The post Проштална средба на македонскиот амбасадор во Тирана, со шефот на албанската дипломатија appeared first on Република.

Народниот правобранител на Албанија поведе административна истрага за случајот со апсењето на Илир Мета, поранешен претседател на Албанија и актуелен лидер на опозициската Партија на слободата.

Оваа управна истрага се однесува на постапувањето на Државната полиција за тоа како е извршен налогот на Специјалното обвинителство против организиран криминал и корупција. Истрагата ја започнаа главно инспекторите на Народниот правобранител без да чекаат да добијат официјална жалба од Илир Мета или неговите адвокати, објави „Ора њуз“.

Случајот го истражуваат тројца инспектори на правобранителството кои го презеле видеото на кое се гледа моментот на апсењето на Мета од страна на оперативците и припадниците на специјалната единица „РЕНЕА“.

Мета беше уапсен на 21 месецов на влезот во Тирана, на враќање од Косово, под обвинение за корупција, перење пари и прикривање имот. На обвинувањата од опозицијата за „употреба на прекумерна сила при апсењето“ Министерството за внатрешни работи објави дека припадниците на полицијата му рекле да излезе од автомобилот, но тој одбил, агресивно се однесувал и упатувал навреди кон службениците лица.

Специјалниот суд за корупција и организиран криминал два дена подоцна одлучи да ја остави непроменета безбедносната мерка „затворски притвор“ за Мета, кој мерката ја издржува во затворот „313“, кој се смета за затвор со висока безбедност.
Неговиот адвокат Генц Ѓокутај најави дека деновиве ќе поднесе кривична пријава против сите полицајци кои учествуваа во акцијата за апсење, по што се очекува да се надоврзат и Агенцијата за полициски надзор и Обвинителството во Тирана.

The post Народниот правобранител на Албанија поведе истрага за апсењето на Илир Мета appeared first on Република.

Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).

Земјотресот се случил на длабочина од пет километри, додава EMSC.

Епицентарот на земјотресот е регистриран на 11 километри источно од градот Фиер, каде живеат околу 60.000 луѓе.

The post Земјотрес со јачина од четири степени ја погоди Албанија appeared first on Република.

Институтот за статистика, ИНСТАТ денеска објави дека во периодот јануари-септември годинава Албанија ја  посетиле 9.680.030 странски туристи или 16,7 отсто повеќе во однос на истиот период минатата година, кога таа бројка била 8.294.600 туристи.

-Целта на влез на албанска територија на странските државјани, во над 90 отсто,  е поради одмор и посета на роднини. Во 9-месечниот период е забележан значителен пораст на влезот на странски државјани за деловни и професионални цели, стои во извештајот.

Над 9,2 милиони странски државјани кои ја посетиле земјата биле од Европа, околу 260 илјади американски државјани и над 77 илјади  од источна Азија и Пацификот.

- Во меѓувреме, бројките го покажуваат трендот кон туризмот во текот на целата година. Само во септември бројот на странски државјани кои влегле на албанска територија е 1.146.090. Овој број е поголем за 3,8 отсто во однос на истиот период од 2023 година, наведува ИНСТАТ.

Минатата година Албанија ја посетија над 10 милиони туристи што беше за 2,5 милиони повеќе споредено со претходната година. Оправдано се очекува дека оваа календарска година ќе биде запишана како златна година на албанскиот туризам.

The post Рекордна туристичка сезона, Албанија за девет месеци ја посетиле над 9,6 милиони туристи appeared first on Република.

Специјалниот суд за корупција и организиран криминал одлучи да ја остави непроменета безбедносната мерка „затворски притвор“ за Илир Мета, поранешниот претседател на Албанија и актуелен лидер на Партијата на слободата.

Тој е префрлен во затворот „313“, кој се смета за затвор со висока безбедност.

За неговата сопруга, Моника Круемади, Судот одлучи да ја остави во сила мерката „обврска за јавување“, како и за Ема Чоку а на Пиро Џиџо, мерката е сменета, од домашен притвор во „обврска за јавување“.

По барање на СПАК, Мета беше уапсен пред два дена, под обвинение за корупција, перење пари и прикривање имот. Истото обвинение е и за Круемади, но според образложението „кревко здравје поради неколку оперативни зафати“ таа доби мерка „обврска за јавување“.

На денешното рочиште, Мета, упатил навредливи зборови кон првиот човек на СПАК, Алтин Думани, кој заедно со уште двајца обвинители биле во судницата.

О Дум думан, ќе ти ги истегнам ушите. О, дум думан, о кученце на Сорос. Ме уапсивме по наредба на наркодржавата, примате наредби од Рама, тоа е прекршување на законот, обвинил меѓу другото Мета.

Круемади по излегување од судницата за медиумите рече дека „се докажало дека случајот ЧЕЗ-ДИА започнал во јануари 2018 година и дека немало никакви докази. Беше многу смешно тоа што го кажа Обвинителството.

За сите работи за кои е обвинета Моника, го носат Илир Мета во затвор. Посакував обврската за јавување да биде еднаш неделно, но тоа сега треба да го правам еднаш месечно. Ќе ме имате овде. Обвинителот рече дека ти, Моника Круемади, си имала операција, изјавила таа.

Мета (55) е е еден од најпопуларните политичари во земјата. Првпат беше избран за пратеник во 1992 година, по што беше на многу важни функции, како премиер, и претседател на парламентот. Во 2004 година, се отцепи од Социјалистичката партија и ја основа партијата Социјалистичкото движење за интеграција (ЛСИ).

Беше шеф на државата од 28 април 2017 година до 24 јули 2022 година. По завршувањето на мандатот тој се врати во неговата матична партија, која ја преименува во Партија на слободата, која е блиска со опозициската Демократска партија на Сали Бериша, кој од 30 декември минатата година е во домашен притвор поради корупција.

The post Илир Мета останува во затворски притвор appeared first on Република.

Европскиот комесар за проширување Оливер Вархеји изјави дека Албанија има целосна поддршка од ЕУ за забрзување на реформскиот процес, со цел до крајот на мандатот на тековната Европска комисија да стане членка на ЕУ.

Силната посветеност на Албанија кон реформскиот процес нѐ доведе до отворање на првиот кластер на минатонеделната Меѓувладина конференција. Даваме целосна поддршка за забрзување на реформскиот процес, за земјата да може да стане членка на ЕУ до крајот на следниот мандат, објави Вархеји на социјалната мрежа Икс.

Албанија на 15 октомври го отвори првиот кластер за преговори за членство во ЕУ, кој ги опфаќа прашањата за правосудството и основните права, правдата, слободата и безбедноста, јавните набавки, статистиката и финансискиот надзор.

The post Албанија може да стане членка на ЕУ до крајот на мандатот на актуелната Европската комисија appeared first on Република.

По налог на Специјалното обвинителство против организиран криминал и корупција, попладнево уапсен е Илир Мета, поранешен албански претседател и актуелен лидер на опозициската Партија на слободата.

Според албанските медиуми Мета се наоѓал во близина на трговскиот центар „Каса Италија“ во Тирана во моментот на извршување на наредбата на СПАК.

Мета е обвинет за перење пари, корупција и непријавување имот. Тој неколкупати се појавуваше во СПАК на распит за случајот ЧЕЗ-ДИА. Станува збор за сериозен корупциски скандал во кој е вмешан еден од неговите блиски соработници и измама за наплата на долгот на ЧЕЗ, чешка енергетска компанија која работела во Албанија за време на владата на Сали Бериша а ја приватизира албанската Електродистрибуција, договор кој потоа беше раскинат. И во 2022 година, Мета беше пријавен во СПАК од страна на поранешниот пратеник Халит Валтери.

Мета и неговата сопруга Моника Круемади, кои се во фаза на развод, исто така се под финансиска истрага, како и во врска со прашањето за лобирање во САД.

Мета (55) беше шеф на албанската држава во периодот од 24 јули 2017 – 24 јули 2022 година.

The post Уапсен Илир Мета, поранешен претседател на Албанија и лидер на Партијата на слободата appeared first on Република.

Потпретседателката на Собранието од движењето ЗНАМ, Весна Бендевска во „Дејли Клик“ на ТВ21 зборуваше за членството на Македонија во ЕУ.

Бендевска и посака се најдобро на Албанија, и истакна разочараност што Македонија повторно извиси на патот кон ЕУ.

На пријателска република Албанија ѝ посакувам се најдобро. Јас сум разочарана по којзнае кој пат остануваме надвор од колосокот кон ЕУ. Реалноста мора да се согледа. Ние премногу правиме остапки. За нас важат поинакви правила, и де факто сме во билатерален спор. Сите членки досега влегле откако ги исполниле копенхашките критериуми. Јас се чувствувам како да сме дел од некој експеримент, рече Бендевска.

The post Бендевска: На Албанија ѝ посакувам среќа, а ние сме оставени на немилост на соседна земја која негира се што е македонско appeared first on Република.

Италија дава пример за другите европски земји со тоа што испраќа мигранти во трети земји поради обработка на нивните барања за азил, изјави денеска италијанската премиерка Џорџа Мелони.

Мелони пред Сенатот на италијанскиот парламент рече дека испраќањето мигранти во двата мигрантски центри изградени од Италија во Албанија претставува, како што рече, „нов, храбар, начин без преседан, но кој совршено го одразува европскиот дух“.

Првата група мигранти, составена од 10 државјани на Бангладеш и шест Египќани, во неделата е спасена на море во близина на Либија, а утре треба да пристигнат во Албанија. Мигрантите се превезуваат кон Албанија со бродот „Либра“.

Центрите за мигранти во Шенѓин и Ѓадер на северот на Албанија почнаа да функционираат минатата недела.

Центрите ќе бидат целосно управувани од италијанската Влада, која платила за нивната изградба. Повеќе од еден милион мигранти стигнале до Италија по море во последните 12 години

The post Италија давала пример со тоа што испраќа мигранти во Албанија appeared first on Република.

Албанија ќе биде првата земја кандидат за членство која ќе ги отвори пристапните преговори според изменетата методологија за проширување, соопшти унгарското претседателство со ЕУ.

Во Луксембург денеска ќе се одржи втората меѓувладина конференција меѓу Албанија и Европската унија (ЕУ), на која ќе бидат отворени преговорите.

Кластерот 1 опфаќа фундаментални реформи и го отвора патот за почеток на преговори за поглавјата од другите кластери.

Првиот кластер, наречен „фундаментални прашања“, ја претставува најважната област имајќи предвид дека содржи поглавја поврзани со демократските институции, владеењето на правото, судството, политичките и економските критериуми, реформата на јавната администрација, јавните набавки, финансиската контрола и статистиката.

По воведувањето на ревидираната методологија за пристапни преговори во 2020 година, поглавјата од преговорите беа поделени во шест тематски групи, односно кластери, и тоа: фундаментални прашања, внатрешен пазар, конкурентност и инклузивен раст, зелена програма и одржливо поврзување, ресурси, земјоделство и кохезија и надворешните односи.

Албанија аплицираше за членство во ЕУ во април 2009 година и доби статус на кандидат во јуни 2014 година. Во јули 2022 година, ЕУ ја организираше првата меѓувладина конференција со Албанија.

Македонија која изминатите неколку години заедно со Албанија се движеше на патот кон ЕУ, останува во чекалната поради неисполнетиот услов за внесување на Бугарите во македонскиот Устав, на којшто се согласи претходната власт.

The post Албанија ги отвора преговорите за членство во Европската унија appeared first on Република.

 - Албанија денеска го отвора првиот т.н кластер на преговори за пристапување во ЕУ.

Во Луксембург ќе се одржи меѓувладина конференција ЕУ-Албанија, на која ќе започне првата фаза од преговорите, откако земјата во овој процес беше одвоена од Република Македонија на крајот на септември.

Албанија и Македонија заеднички ги започнаа преговорите на 19 јули 2022 година во Брисел.

-Европската комисија очекува почеток на преговорите за проширување што е можно поскоро со Албанија, како и со Македонија, откако ќе се исполнат барањата одобрени од Советот на ЕУ, изјави портпаролот на Комисијата во септември по повод одлуката да ги раздвои двете балкански земји во преговарачкиот процес.

Во првата фаза од преговорите се вклучени поглавјата „Јавни набавки“, „Статистика“, „Судски систем и основни права“, „Правда, слобода и безбедност“ и „Финансиска контрола

The post Aлбанија ги почнува преговорите со ЕУ appeared first on Република.

Албанскиот премиер Еди Рама, во пресрет на отворањето на прифатниот центар во Шнѓин и кампот во Ѓадр, каде ќе бидат сместувани имигранти, во интервју за „Ројтерс“ отфрлил секаква можност за договор со друга земја од ЕУ, освен Италија, за прием на имигранти, пренесуваат албанските медиуми.

Додал дека Албанија склучила договор со Италија да ги прифати бегалците кои пристигнуваат таму, за да помогне во спречувањето на нерегуларната миграција во ЕУ.

Запрашан дали е можен таков договор и со Германија, тој одговорил дека во моментов нема доволно капацитет и оти  „Германија мора да најде друг партнер“.

Откако потпишаниот договор со Италија, на 6 ноември минатата година, беше поттик тоа од Албанија да го побара и Обединетото Кралство, по неуспешниот план за депортација на мигранти во Руанда, Рама го отфрли барањето велејќи дека тоа е „ексклузивно само за Италија“.
Ова е прв пример на земја која не е членка на ЕУ да прима мигранти во име на земја-членка на Унијата.

Рама, како што претходно изјави нема информации за точниот датум кога ќе пристигнат првите мигранти ниту дали ќе има „свечено сечење на лента“, додавајќи дека тоа е се под надлежност на италијанските власти

The post И Германија сака да однесе мигранти во Албанија appeared first on Република.

Во реонот на Лежа, Албанија отворени се два центра за мигранти од Италија, врз основа на договорот потпишан на 6 ноември минатата година помеѓу двете земји за регулирање на илегалната миграција во Европска Унија. Предвидено е првите мигранти во Албанија да пристигнат деновиве.

Според договорот меѓу Рим и Тирана, илегалните мигранти кои пристигнуваат во Италија ќе бидат транспортирани со брод до пристаништето Шенѓин, каде ќе им се утврдува идентитетот и ќе им се прави првиот здравствен преглед, по што ќе бидат префрлени во блискиот град Ѓадр, поранешна воена база, каде што ќе бидат сместени и ќе го чекаат одговорот на барањето за азил.

Ова е прв пример на земја која не е членка на ЕУ да прима мигранти во име на земја-членка на Унијата.

Овој пример беше поттик од Албанија да го побара истото и од Велика Британија, по неуспешниот план за депортација во Руанда, но Рама го отфрли барањето велејќи дека тоа е „ексклузивно само за Италија“.

Центрите се финансирани од Италија, а во нив же бидат сместени луѓето спасени од италијанските бродови во Средоземно Море, а не и тие кои пристигнале на италијанска територија.

Албанија, една од најсиромашните европски земји, исто така е кандидат за членство во ЕУ. Во центрите можат да престојуваат до 3.000 мигранти месечно или 36.000 годишно.

Договорот е со петгодишна важност, со можност за продолжување. Изградбата на центрите, сите потребни придружни простории, се изградени со средства на италијанската Влада. Таа ќе ги сноси и трошоците за престој на мигрантите а и обезбедувањето и персоналот ќе пристигнат од Италија, која сето ова, за пет години, ќе ја чини најмалку 670 милиони евра.

Првично беше најавено центрите да профункционираат во мај, па во август и септември, но поради доцнење на работите во Ѓадр тоа не беше реализирано.

Инаку, на италијанските брегови во 2023 година пристигнале повеќе од 145.000 мигранти, наспроти околу 88.000 во 2022 година.

The post Во Албанија отворени се двата центри за мигранти од Италија appeared first on Република.