Што се случува во Старата скопска чаршија? Ќе потсетам дека е заштитена како културно наследство од особено значење од 2008 година и подразбира степен на заштита и механизми за реставрација и зачувување на автентичната состојба. Меѓутоа изминативе години гледаме дека се случуваат неубави слики, се менува ликот и се загрозува степенот на заштита, прашува пратеничката од ВМРО-ДПМНЕ, Велика Стојкова Серафимовска на денешната седница за пратенички прашања.

Таа истакна дека никнуваат згради кои не содејствуваат со архитектурата на чаршија, а пред неколку месеци објектот Шар, култен објект кој е срамнет со земја, а на негово место се гради нов објект.

Чаршијата се уништува, се губи едно од најатрактивните места во Скопје, а не се отворени ни музеите на скопско Кале. Зошто нема никаква реакција, зошто се гради објект кој никој не знае како ќе изгледа, прекршени се закони, рече таа.

Стојкова Серафимовска исто така посочи дека Ковачевски и министерката за култура беа во Љубојно, каде ветија центар за македонски јазик, во второто училиште во Македонија, и потсети дека и Зоран Заев како премиер се пофали со реконструкција и дека се издвоени пари кои никој не знае каде се.

Првото училиште во Македонија започнато со работа 1943 година е во кичевско Подвис и ништо не е направено, и покрај што има елаборат, првото школо е со руинирана зграда. За второто школо во 2020 година тогашниот премиер Зоран Заев објави дека ќе се реконструира училиштето во Љубојно и за тоа се одвоени 30 милиони денари. Моето прашање за Ковачевски е каде отидоа тие 30 милиони денари кои владата ги одвои во 2020 година за истата намена за која сега се вели ќе се одвојат 163 милиони денари?

The post Стојкова Серафимовска: Каде отидоа 30 милиони денари за училиштето во Љубојно и зошто се уништува Старата скопска чаршија? appeared first on Република.

Министерката за култура Бисера Костадиновска-Стојчевска изврши увид во работата за санација на покривната конструкција на Националната и универзитетска библиотека „Св. Климент Охридски“ во Скопје. Во изминативе два месеца активно се реконструираат три од постојните пет кубуси на покривната конструкција на стариот дел од објектот.

За оваа неопходна санација и реконструција на една од најзначајните институции за науката и културата во нашата земја, Министерството за култура досега одвои околу 30 милиони денари. Активностите се одвиваат според планот, и досега се реализирани над 50 проценти од одобрените средства, односно 16.827.443,00 денари“, рече министерката Костадиновска-Стојчевска.

За време на увидот, директорот на НУБ, Рахметула Куќи, и министерката Костадиновска-Стојчевска дискутираа и за актуелните предизвици со кои се соочува оваа институција чиј објект претставува архитектонско ремек-дело на еден од најзначајните македонски архитекти, неодамна починатиот Петар Муличковски. Годинава симболично, со неговата смрт и почетокот на реконструкцијата на старата зграда на НУБ, се навршува точно половина век од нејзиното официјално пуштање во употреба.

Министерката Костадиновска-Стојчевска и директорот Куќи го потенцираа и повеќедецениското неоправдано запоставување на оваа наша најголема ризница на знаење и ги искажаа своите заеднички идни заложби, но и заемното задоволство што таквата практика веќе станува минато. Потврда за тоа се подобрените работни услови за вработените, како и интересот на неколку домашни угледни компании и дипломатски претставништва да дадат свој придонес во враќањето на сјајот на оваа клучна институција од областа на културата и образованието.

Директорот Куќи ја актуализираше потребата од зголемување на бројот на стручниот кадар, како и потребата за набавка на нова современа опрема во Центарот за дигитализација при НУБ, потребна за едукација и надградба на знаењата на новите млади генерации корисници.

Mинистерката за култура уште еднаш ја потенцираше својата заложба оваа монументална и значајна институција, која е и една од првите институции основана со одлука на АСНОМ во 1944 година, повторно да го врати својот сјај и да стане водечко збирно место за младите и прогресивни студенти, истражувачи и културни дејци.

Реализацијата на проектот за целосна реконструкција на покривот, кој во оваа фаза опфаќа вкупно 1070 квадратни метри, како и на блоковите 3 и 5 од објектот на НУБ „Св. Климент Охридски“, продолжува и следната година.

The post Се реконструира покривот на НУБ „Св. Климент Охридски“, санацијата чини 30 милиони денари appeared first on Република.