Претседателот на Социјалдемократскиот сојуз на Македонија, Венко Филипче, денеска упати честитика до граѓаните по повод Денот на ослободувањето на Скопје. Филипче во честитката порача дека исто како пред 80 години кога нашите предци храбро и одлучно се изборија за слободата, така и денес сите имаме обврска да го продолжиме нивниот аманет, да ја зачуваме слободата и да градиме слободно и демократско општество.

„Денес оддаваме почит на храброста и истрајноста на хероите од Народноослободителната борба, кои се заслужни за слободата што ја живееме. На 13 ноември 1944 година, улиците на Скопје беа ослободени од фашистичкиот окупатор, а градот го доби симболот на отпор и надеж. Во време на економски и политички предизвици, треба да се сеќаваме и да не води храброста и одлучноста на нашите предци. Тие не се откажаа, се бореа за слобода, правда и еднаквост. После осум децении, ние потомците на НОБ ја имаме истата цел, да се избориме за слободно и демократско општество, за Скопје какво што го заслужуваат граѓаните, за град кој ќе се развива како европска и културно напредна метропола. Слава им на хероите, нека е честит и вековит 13 Ноември, Денот на ослободувањето на Скопје“, стои во честитката на претседателот на СДСМ, Венко Филипче.

The post Филипче: Храброста на нашите борци од НОБ е темелот на слободата што ја живееме appeared first on Република.

По повод одбележувањето на 80-годишнината од ослободувањето на Скопје, денеска, во 11 часот, на партизанските гробишта во Бутел, делегации од Град Скопје и од Собранието, ќе положат свежо цвеќе пред споменикот на ослободителите на градот.

Делегација од Град Скопје и собраниската делегација, во состав: Дијана Илиевска, Славјанка Петровска и Даниела Белимова, во 11:30 часот, ќе положат свежо цвеќе и пред споменикот на генерал Михајло Апостолски во Алејата на заслужните граѓани, а во 12:30 часот, пред споменикот на ослободителите на град Скопје пред Владата.

Свечена академија и доделување на 13-то Ноемвриската награда, ќе се одржи во 19 часот во Македонската Филхармонија. 

Во пресрет на обележувањето на 80-годишнината од ослободувањето, синоќа премиерот Христијан Мицкоски говореше на настан во организација на градскиот комитет на ВМРО-ДПМНЕ, насловен „Скопје се буди“. 

Како што е најавено, претседателот на Владата денеска ќе се обрати и на отворањето на меѓународниот научен собир „Антифашизмот помеѓу меморијата и заборавот“ во Музејот на македонската борба за самостојност.

Меѓународниот научен собир е организиран по повод 80 години од првото заседание на АСНОМ. Настанот е во организација на Институтот за национална историја, Универзитет „Св. Кирил и Методиј“ и Македонската академија на науките и уметноститe (МАНУ).

На денешен ден во 1944 година борците од 42. и 50. Народноослободителна дивизија на македонската војска и 16. Македонска бригада го ослободија Скопје од фашистичката окупација за време на Втората светска војна.

The post Скопје одбележува 80 години од ослободувањето appeared first on Република.

Во предвечерието на 13 ноември, ќе кажам дека тоа е печат на нашата историја, сведоштво на храброста и на решителноста на нашиот народ да се бори за слобода и достоинство. На овој ден, Скопје извојува своја победа и таа победа е наша колективна гордост, наша заедничка инспирација. Овој ден сведочи и за солидарноста која овој град ја носи, но и поривот, длабоката желба и стремежот за слобода. Слободата која денес ја живееме неодминливо беше платена со жртви и човечки страдања, и ние таа ја извојувавме со сопствени сили и наспроти тенденцијата за прекројување на историските читанки и читањето на историјата во зависност од поединечните интереси, вистината е само една, единствена и неделива.

Ова вечерва го истакна премиерот и лидер на ВМРО-ДПМНЕ, Христијан Мицкоски на настан по повод 80 години од ослободувањето на Скопје.

Неговиот говор го пренесуваме интегрално во продожение:

Немаше администратори, туку окупатори, и таа историска борба не беше против одредени народи, ниту против одредени држави туку против фашистички режим кој беше поразен од Европа и слободарските народи, меѓу кој беше и македонскиот.

И затоа Скопје не е само град; тоа е душата на Македонија, срцето на нашата историја и симбол на нашата издржливост.

Оваа метропола повеќе пати израснуваше од урнатини, ги минуваше своите нај темни ноќи и се издигна посилна од кога било.

И денес, со секој чекор што го правиме, го носиме тој дух на нашите предци, кој нè потсетува дека слободата никогаш не доаѓа лесно и дека за неа треба да се бориме. Нема откажување, нема невозможни работи силата е во вербата во идејата, и степенот на жртва кој може да се поднесе за нивно остварување.

Сигурно ниту на Методија Андонов Ченто, ниту пак Димитар Влахов или Михајло Апостолски не им било ниту малку лесно да се соочат со најголемата фашистичка сила дотогаш, но тие веруваа во отпорот, веруваа во идеалите и потоа чекореа гордо низ Слободното Скопје.

Таа победа беше на нашиот народ и ние сега и сите генерации потоа ,после нас имаат право да се повикуваат на придобивките од таа победа.

Денес, кога ја чествуваме слободата на Скопје, ја чествуваме и нашата одговорност кон иднината.

Овој празник е завет – завет дека ќе ја чуваме и унапредуваме оваа слобода, дека ќе се грижиме за нашиот град и за нашата татковина.

Скопје е нашиот град. Нашиот дом. Градот распослан на Вардар, со скопското кале, старата чаршија, Водно и уште стотици илјадници места од нашата младост, од нашите животи. Град со премногу проблеми, но и град со душа, на градски култни места, паркови, маалски клупи и дружби, на скопските урбани ликови кои ги нема многу но се паметат и чуваат во спомените на скопјани. Град кој не заборавајте дека повеќе пати изникнуваше од пепелта, историјата која покажува дека требаше да биде уништен, за да живее, кој го преживеа жарот на Пиколомини, земјотресот, поплавите, но и град кој го даде Јустинијан, Мајка Тереза, многу познати уметници, музичари. Градот на Леб и сол, Меморија, на Горан Стефановски, Златното Славејче и Александар Џамбазов, стотици други кои се големата приказна, парче душа на овој град. Има и такви кои цртаат замислени граници, подигаат завеси, робуваат на стереотипите, бараат лева и десна страна на градот, но вистинските луѓе во реката Вардар не гледаат граница, туку точка на поврзување. Во Камениот мост не гледаат поделеност, туку точка на заедништво. Затоа што Скопје е едно и единствено кое не познава граници, кои ги надживува стереотипите, поделбите, ја замира омразата, и ја подигнува солидарноста. Во таков град јас израснав и во такви вредности јас верувам. И знам дека душата на градот не зависи од десетина луѓе кои се на позиции и кои го водат градот, туку од стотиците илјади останати кои живеат во него и се дел од нашето Скопје.

Денес Скопје се соочува со бројни предизвици. Градот го води администрација далеку од можноста да одговори на потребите на граѓаните. Во моментите кога во дел од напредните градови во светот имаат подземни железници и метроа кои се движат со повеќе 200 километри на час, во нашето Скопје е привилегија и бинго да ви дојде автобус со задоцнување помало од еден час. Да не говорам за тоа колку се потфрли во воспоставувањето на ред во сообраќајот, или третирањето на отпадот, или проблемот со кучињата скитници, кои неретко на туристите им изгледаат како некоја егзотична епизода на афричка сафари оаза. Навистина не мислам овој мој говор да го претворам во полемика за тоа што му треба на Скопје, или колку им е тешко на скопските градоначалници кога имаат неразумна страна од градот за да одговорат на потребите, и колку многу дадоа за напредокот на општините во состојба кога од другата страна имаат противник, наместо партнер во градот, ниту пак пробувам да се амнестирам за грешката наречена актуелна градоначалничка на Скопје, и колку таа ме чинеше и колку политички куршуми примив и колку ме разочара лично и ги разочара скопјани.

Сократ рекол животот без спознание вистински не вреди. Очигледно оваа лекција е научена и сега знам дека на Скопје му треба човек кој ќе обединува и кој има визија. Кој ќе има емпатија и ќе пулсира со градот. Кој ќе умее да ја негува душата на градот и ќе решава проблеми. Не го знам името на нашиот иден кандидат за градоначалник на Скопје, затоа што тоа е прерано, но го знам карактерот на личноста која ќе ја избереме. На Скопје не му требаат експерименти туку докажани луѓе и Скопје е уморно од големи приказни кои најчесно завршуваат како големи разочарувања.

Време е за нова страница, за зафаќање за решавање на клучните проблеми на градот. Загадувањето, организирањето на јавниот превоз, ставањето на ред во урбанизмот, поврзувањето и сообраќајот. На Скопје му е потребно човек кој докажал дека умее да работи, не му треба кадар кој ќе го пробуваме допрва дали ќе му тргне, туку човек кој ќе даде се од себе да ги решава проблемите. Човек со искуство, и реализирана личност. Кој го знае градот, кој има успешен живот. Тука е централната власт да помогне како што и помагаме на многу други општини од различни политички ориентации, кои досега побараа поддршка. Скопје мора да заврти нов лист, и да имаме нов почеток. Мора да обезбедиме механизми идниот градоначалник да го вети и реализира ветеното и од тоа да нема отстапување. Со целата наша помош да изградиме сеопфатна програма која ќе ги реши горливите проблеми на скопјани- урбанизмот, сообраќајот, превозот, истото така и почист воздух. И верувам дека тоа заедно ќе го оствариме.

Свесен сум дека загадувањето на воздухот е еден од најголемите проблеми што секојдневно го чувствуваме.

Честопати се срамам кога гледам како нашиот главен град – градот на слободата, сега е меѓу најзагадените градови во светот.

И посебно сум разочаран од тоа што се дозволи децении и децении ништо да не се преземе на оваа тема. И ве молам да не ја политизираме оваа тема, затоа што тоа е колективен неуспех на сите политички елити досега кои управувале со државата и градот.

Ниту една акција, ниту една стратегија, ниту еден проект – само тишина и неодговорност гледаме од најодговорните во главниот град!

Години наназад ова прашање се третираше со незаинтересираност и игнорирање, додека граѓаните ги чувствуваат последиците на своја кожа. Таквата пасивност се плаќа со здравјето на луѓето. И предупредувам дека оваа тема уште се политизира и тоа од оние кои уште на локалните избори во 2017та година ветуваа живот и чист воздух и потоа со прст не мрднаа. И зошто толку многу е тешка состојбата со загадениот воздух? Затоа што не постои едноставно ниту пак брзо решение, а секој кој ќе ви вели дека може преку ноќ да се исчисти воздухот верувајте дека нема ништо да направи. Состојбата е таква затоа што тоа е последица од нефункционалниот систем и системските пропусти со заштитата на животната средина и жалам што ова морам да го кажам повеќе од три децении. За да денес сите креваат раменици и прават поени од тоа.

Клучот е во системското делување и во големите вложувања во заштита на животната средина кои ќе ги исклучат главните фактори на загадување.

Во Скопје доминира чадот и штетните гасови, затоа што на некој со децении му одговара овој начин на затоплување и енергетска зависност од одредени горива кој дебело профитираат поединци. Во таа насока во голема мера инвестициите во енергетиката треба да се насочат кон енергенси кои не загадуваат.

Затоа денес сакам да објавам дека како влада планираме големи системски мерки кои ќе придонесат за намалување на загаденоста на воздухот, спроведување на детален план чиј финиш ќе биде чист воздух и здрава животна средина но и зголемена енергетска ефикасност.

Стратешки инвестиции гасни когенеративни централи треба да обезбедат топлинска енергија со значително и драстично намалување на загадувањето, и тоа ќе обезбеди меѓу другото и зголемена енергија која ќе се користи за развој на македонската економија. Државата и владата за таа намена е даде значителни субвенции кои ја поттикнат изградбата.

Ветувам промени и активно работам тие да се случат што поскоро.

Дотогаш,

Воведуваме строги ограничувања за нај штетните извори на енергија и ќе ги контролираме најголемите индустриски загадувачи.

Обезбедиме субвенции за граѓаните и фирмите кои ќе користат чисти енергетски решенија.

Ќе започнеме програма за масовно пошумување и засилено чистење на јавните простори.

Ова се мерки се само почеток, бидејќи иднината на Скопје и на Македонија е во чистата и здрава околина.

За ваквите чекори потребно е разбирање и заеднички напор и само така ќе успееме.

И додека преземаме мерки за решавање на многубројните проблеми, вредно е да споменам она што го правиме на политички план за одблокирање на Македонија и споровите кои како Влада ги наследивме со нашиот источен сосед, а кои се пречка за нашиот европски пат. И навистина она што може да се забележи во опозицијата е тоа што се збунети и не знаат кој пат да го фатат. Па така додека беа на власт секој ден лиферуваа информации дека само што не сме попуштиле и ете сега некои наши пратеници ќе гласале за францускиот предлог. Денес кога во едни тешки услови, геополитички настани премрежја, каде светот со големо внимание посветено работи на крупните прашања како што е војната во Украина, проблемите на Европа со гасот и други прашања, со силна фокусираност и посветеност се трудам да го ставам македонското прашање и нашата европска иднина на маса и да разговараме за фер и достоинствено решение. И различни импулси на збунетост доаѓаат од опозицијата која еднаш вели дека прифаќаме француски предлог, а другиот пат велат дека сме против европската иднина, а всушност тие ја гледаат ненаучената лекција дека денес има Влада која ги штити македонските државни интереси и со цела сила се обидувам да издејствувам фер и достоинствено решение и барам шанса Европа да ги слушне нашите аргументи. И не велам дека со голема сигурност ќе го убедам светот, но ќе бидам чист и спокоен пред граѓаните, дека сум направил се за да изнајдам решение кое нема да подразбира газење на интересите и ќе овозможи заштита на позициите во кои веруваме и ќе обезбеди европска иднина.

Кога одам на настани се фокусирам на пораката која што треба да ја испратиме а која што треба да допре до светот не ми претставува предизвик да секое ракување го проследам со фотографија и потоа да го објавам на социјалните мрежи како искрена и пријателска средба со некој од светките лидери, сакам тие средби да имаат суштина, како што имаа суштина и во Вашингтон и во Оксфорд и во Берлин со канцеларот Шолц, и во Будимпешта со претседателот Макрон и со претседателката на Европската комисија Фон дер Лајен, и уште многу многу би рекол десетици такви слични средби.

Сигурно дека е тешко и дека е напорно, но ние тоа умееме да го правиме, без распродажба на државни интереси, без тајни коалиции, без бизниси под маса со Бугарија како што правеле претходниците. Не сум сигурен дали ќе успееме, иако даваме се од себе и имаме интензивна комуникација со нашите стратешки партнери, но сигурен сум, во тоа да бидете и вие сигурни дека нема ништо да прифатиме поради кое ќе ве засрамам вас народот и пред се и над се Македонија.

Јас крчма од државните и националните интереси нема да правам, и ќе направам се граѓаните да добијат европска иднина каква што заслужуваат.

И во меѓувреме, помеѓу две паузи на кои СДСМ ќе сака да ни соопшти некоја стратегија скувана на некое патување на претседателот на СДСМ во Дубаи, треба да остане забележано и денес дека СДСМ останува единствениот нереформиран дел од комунизмот во Македонија, упорно држејќи се до старите манири, без вистински погледи кон иднината.

Замислете – една група луѓе, вкоренети во корупција и криминал, се обидуваат да ви се продадат повторно како решенија.

Корупцијата е рак-рана која ја нагризува државата со децении, уништувајќи го потенцијалот на институциите и создавајќи недоверба кај народот.

Јас сум цврсто решен и можам да ви ветам – нема да има толеранција кон корупцијата!

Граѓаните имаат големи надежи и тие се нашата сила и со ништо нема да дозволам таа енергија и таа сила да згаснат затоа што некој се дрзнал да се вовлече себеси во коруптивни скандали.

Македонија премногу долго беше ограбувана од корумпирани поединци кои, под маската на политика ја злоупотребија довербата на народот.

Времето на таквите заврши!

Патот до правдата нема да биде лесен, но ние сме подготвени.

Жилави се оние малкумина кои се сеуште послушни слуги на коалицијата која седум години ја парчосуваше, ја делеше на парчиња правдата во Македонија. Жилави се и нема да се предадат лесно, се борат грчевито да ги заштитат своите стопани и затоа веќе со месеци мака мачиме пред секоја акција да убедиме некој од нив, но тие најчесто добиваат или стомачен вирус или наеднаш температура пропратена со жестоко потење и не се во состојба да постапат за нешто кое е толку очигледно и јасно, веќе другиот ден тоа е стара вест.

Но затоа нека биде сосема јасно. Нема да има компромиси и нема да има отстапки.

Корупцијата нема да биде дел од иднината на Македонија и сите оние кои го прекршиле законот, без разлика на функцијата, ќе одговараат за своите дела.

Ова е битка за секој граѓанин, за секој родител, за секое дете кое што сака да остане тука во Македонија.

Мојот тим и јас сме целосно посветени на оваа кауза.

Ова е моја лична и професионална одговорност пред вас.

Ќе го ослободиме системот од корупцијата, ќе изградиме држава во која владее правото и во која секој граѓанин ќе може да го оствари својот потенцијал.

Македонија ќе чекори кон Европа со гордост и со подигната глава.

Дојде време за достоинствена и просперитетна иднина за нашата татковина.

Денес, на овој посебен ден, кога се сеќаваме на ослободувањето на Скопје, стоиме обединети не само за да ја славиме нашата историја, туку и за да ја потврдиме нашата посветеност на иднината.

Ова е момент кога се подготвуваме за нови предизвици, со сила и верба дека ќе го направиме Скопје местото кое го заслужуваат сите наши граѓани, а Македонија место кое што сите ние го заслужуваме.

Ја преземаме оваа одговорност со срце и со посветеност.

Нашата цел е јасна – да изградиме стабилна, просперитетна и чесна држава во која секој граѓанин ќе има можност да напредува.

Се сеќаваме на зборовите на еден голем мислител кој ќе каже ‘Родниот крај е таму каде што љубовта и посветеноста се претвораат во дела’.

Оваа Влада, овој тим, се тука за да ја покаже својата љубов кон државата преку дела.

Нашата работа не е само политичка обврска – таа е израз на љубов и верност кон татковината.

Пред нас стојат многу предизвици, но јас силно верувам дека ќе продолжиме да чекориме напред со гордо подигната глава, со достоинство и со решителност.

Ги повикувам сите граѓани да ни се придружат на овој пат, бидејќи само заедно можеме да ја изградиме државата која сите ја сонуваме.

Победата не е недостижна работ, таа лежи во секој еден од нас.

Ова не е само борба за денес; ова е борба за иднината на нашите деца, за иднината на секоја генерација која што доаѓа.

Македонија е наша одговорност и наша гордост, и за ќе сториме ќе сè што е потребно.

Денес, со секој збор и секое дело, ја испраќаме пораката дека ние сме тука за да го изодиме патот до крајот.

Ќе го продолжиме патот што нашите предци го започнаа и ќе оставиме наследство на кое идните генерации ќе бидат горди.

Нека ни е честит Денот на ослободувањето на Скопје!

Градот убав повторно ќе никне.

Нека е вечно Скопје! Да живее и Бог да ја благослови Македонија, порача Мицкоски.

The post Мицкоски: Немаше администратори, туку окупатори – Скопје не е само град, тоа е душата на Македонија appeared first on Република.

Библиотеката „13 Ноември“, клон на Градската библиотека „Браќа Миладиновци“ – Скопје, после 11 години продолжува да работи во Домот на културата „Билјана Беличанец“ во Кисела Вода. Библиотеката се реотвора со книжен фонд од околу 8.000 книги: лектирни изданија, книги и сликовници за деца, белетристика и научна литература.

Градската библиотека годинава го слави својот 79.роденден и повеќе од кога и да е веруваме дека книгата не е привилегија, туку право на секој човек. Среќни сме што библиотеката се враќа на своето место во центарот на Општината. Се надеваме дека ќе се вратат и некогашните читатели, а ќе стекнеме и нови. За нив нудиме светски и домашни класици, голем избор популарни наслови и автори. Во моментов работиме на откуп на нови наслови (домашна и преводна литература), кои ќе се најдат токму на овие полици. Сакам да упатам огромна благодарност до Општина Кисела Вода и градоначалникот Ѓорѓиевски, кој за многу краток рок одговори на нашето барање што резултираше со повторното отворање на оваа библиотека. Се надевам дека неговиот пример ќе го следат и останатите општини – подвлече Снежана Стојчевска директорката на Ју Градска библиотека „Браќа Миладиновци“.

Обработката и заемот на книги се врши преку Кооперативниот онлајн библиографски систем и сервис (COBISS), а библиотеката ќе понуди и разновидни културни содржини.

Првата, почесна членска книшка му припадна на градоначалникот Ѓорѓиевски, кој го истакна значаењето на библиотеката за сите вљубеници во пишаниот збор, но и нејзиното место во културното живеење на сите граѓани:

Посебно сакам да нагласам дека на располагање има и многу литература за деца, бидејќи сме свесни дека љубовта кон читањето треба да се всади уште од најраните години. Дополнително, овој простор ќе биде искористен и за друга културна програма-креативни работилници, литературни читања, промоции на книги, средби со автори, со што очекувам дека библиотеката ќе биде честа дестинација на сите наши жители“ истакна градоначалникот на Кисела Вода, Орце Ѓорѓиевски.

Првите посетители на библиотеката „13 Ноември“ беа првачињата од ООУ „Круме Кепески“, а по нив и неколкумина повозрасни жители, кои не го криеја задовослтвото дека библиотеката е повторно близу до нив.

Обновата на библиотеката во Кисела Вода е продолжување на библиотечната дејност на територијата на општината, односно на традицијата долга повеќе од 50 години. Подружницата „13 Ноември“ била отворена во 1961 година токму во тогашниот Дом на културата.

The post По 11 години обновена библиотеката „13 Ноември“ во Кисела Вода appeared first on Република.

Градскиот комитет на ВМРО-ДПМНЕ во рамки на одбележувањето на Денот на ослободување на Скопје – 13 Ноември организираше мултимедијален настан во Јавна соба (Public Room).

Настанот се реализираше во соработка со нашите пријатели од Здружението на граѓани за унапредување на националната култура „Диверзиум“ од Скопје чија основна цел е подигнување на свеста и личниот потенцијал за развој на секоја личност од аспект на културата.

Во рамки на одбележувањето на еден од најзначајните денови во историјата на град Скопје беше поставена изложба на фотографии во кој го прикажавме историјатот на Скопје, се емитуваа видео материјали од животот во Скопје некогаш и сега, како и кратки сведоштва на неколку скопски урбани легенди.

Дополнително, организирана беше и панел дискусија со наслов „Скопски муабети“ на која панелисти беа:

⁃ Јасмина Намичева, кустос во Музејот на градСкопје,

⁃ Тошо Филиповски, музички новинар ихроничар на македонската популарна музика и

⁃ Калина Јовчевска Корчагин, внука намакедонскиот народен херој и учесник во НОВ, Раде Јовчевски Корчагин.

На панел дискусијата „Скопски муабети“, гостите од свој агол проговорија за амбиентот од домовите на старите семејства или секојдневниот животот во Скопје во различни историски периоди.

„Тука сме да ги споменеме луѓето кои што допринеле за нашата слобода. Музеите се места кои што се трезори на различни наративи, на историски случувања трезори на сето она што е исткаено во историјата на градовите и секако на семејните истории. Сакам да ве потсетам на неколку клучни работи кои што го ткаат го сочинуваат ткивото на овој град. Зад планината која што се наоѓа зад нас некои 8 илјади години наназад Скопјаните од Говрлево успеале од еден грст најобична глина да ја создадат заштитничката односно божицата мајка која што низ сите овие векови до денес бдее над жителите на градот“, Јасмина Намичева, кустос во Музејот на градСкопје.

Намичава посочи и неколку дела на луѓе кои што минувале низ Скопје и креирале многубројни дела кои го направиле градот што поубав за живеење.

150 години пред појавата на раната ренесанса нашите зуграфи, или зоографи како што ги нарекуваме успеале да направат врвни дела, успеале да ја искреираат повторно чувателката на градот односно Богородица, која што бдее врз одарот на својот син во манастирот Пантелејмон. Многу луѓе кои што низ своите крстопати тука минувале успеале да создадат многубројни различни дела. Хотелот „Јадран“ кој е изграден во 30-тите години од 20-тиот век кој е дело на руски архитект кој застанал во Скопје и за само 10 години успеал да направи повеќе од 500 објекти во Скопје. Понатаму во Скопје доаѓаат и светски урбанисти светски архитекти кои што се во тој момент најпопуларните урбанисти во светот, студиото на Кензо Танге, како и останатите 7 студија да искреираат еден нов лик на градот современ лик на Скопје. Полските урбанисти исто така создале еден проект за градот кој што понатаму е доразвиен. Вакви приказни имаме илјадници, посочи Намичева.

„Шест децениската врска помеѓу рок музиката и Скопје е навистина како класична љубовна врска која имала подеми и падови. Рок музиката навистина се инспирирала од тоа што значи Скопје, скопскиот живот, скопскиот мирис, скопските топоними, скопскиот зрак, Скопје како начин на живот. И самите музичари дале многу за Скопје споменувајќи ги сите овие приказни низ нивните дела“, истакна Тошо Филиповски, музички новинар и хроничар на македонската популарна музика.

Тој посочи дека во сите тие шест децении Скопје во различни декади имало силни експоненти на таа современа урбана култура.

Во текот на панел дискусијата се обрати и Калина Јовчевска Корчагин, внука на македонскиот народен херој и учесник во НОВ, Раде Јовчевски Корчагин која што го честита празникот 13 Ноември – Денот на ослободување на Скопје.

Јас сум внуката на Раде Јовчевски Корчагин кој што е роден 1919-та година во Скопје, во близина на Народната Банка каде што е сега и има спомен обележје. Тој е еден од основачите на двата скопски партизански одреди кои биле формирани со цел да ја ослободат Македонија од окупаторот. Поради неговите дела и борба за ослободување на Македонија, бугарскиот фашистички окупатор на двапати го има осудено со смртна казна без да биде присутен тој. И најмалку трипати е мачен до смрт, рече Јовчевска Корчагин.

Таа посочи дека дедо и Раде Јовчевски Корчагин бил убиен во 1943-тата година од бугарски агент по наредба на бугарската полиција.

Денес во негова чест една од можеби најпознатите гимназии го носи неговото име, во чест и да потсети за неговото дело и жртва која што ја дал за ослободување на Македонија. А, јас како негов потомок мојата должност е да не дозволам сега да не се прави политика со Македонија и да знаеме што значи слобода и кои се човековите права, укажа таа.

Скопските муабети беа заокружени со размислувањата на новата генерација скопјани, нивните мечти и соништа, предизвици и визии за тоа како треба да изгледа еден модерен град и што ни е потребно за да ги постигнеме нивните очекувања за да ги задржиме овде – во Скопје!

The post Да се почитува минатото на Скопје, бидејќи тоа е трезорот кој што го ткае и го сочинува ткивото на градот appeared first on Република.

На денешен ден пред 79 години Скопје е ослободено од фашистичката окупација. За Скопје да стане слободно 426 борци го дадоа својот живот. На вакви денови кога ги славиме славните битки и слободата, и кога им оддаваме почит на жртвите вреди да се потсетиме на оној славен аманет оставен на потомците за да си ја ценат слободата, бидејќи не знаат колку скапо ги чинело тоа претходните генерации, изјави Борис Шамбевски, претседател на Градскиот комитет на УМС на ВМРО-ДПМНЕ.

Па да видиме колку го почитуваме овој аманет. Ние како ГК на УМС на ВМРО-ДПМНЕ со овој симболичен марш сакаме да укажеме дека Скопје денес по 79 години повторно е окупиран, но не со оружје и странски војски, туку со неспособна администрација, тотално нефункционален градски превоз, валкан е, небезбеден, нема соодветна културна понуда, ноќниот живот е претворен во кичерајски натпревар помеѓу мафијашите кои се обидуваат да покажат кој има повеќе црни пари.

 

Скопје е универзитетски град со распаднати студентски домови и универзитети кои никаде не се рангирани, Скопје е за жал седиште на Владата која е најнеспособна во историјата на Македонија. Скопје за прв пат во 79-годишната историја на слободна Македонија гледа како сопствената Влада ја уништува државата што треба да ја раководи.

 

Скопје го окупираа мафијаши, Скопје го окупираа нивните слуги, Скопје го окупираа црни пари и белосветски криминал, Скопје има градоначалничка на која не и е гајле за Скопје, Скопје има градоначалничка која не знае што прави и каде се наоѓа.
Доста е!

 

Ние го сакаме Скопје, но не вакво, ние го сакаме Скопје слободно, го сакаме Скопје функционално, го сакаме Скопје со нови студентски домови, го сакаме Скопје чисто, го сакаме Скопје со јавен превоз кој е функционален, го сакаме Скопје во кое ноќниот живот ќе има понуда за сите вкусови, го сакаме Скопје кое ќе биде седиште на Влада која ќе се грижи за македонските интереси!

 

Затоа што ја сакаме Македонија,
затоа што го сакаме Скопје Слободно!

 

Важно е Македонија да ја ослободиме од неспособните власти, од нефункционалната и неефикасна јавна администрација, од корумпираните индивидуалци, од оние што го корумпираат здравството, од оние што ја корумпираат полицијата, од оние што ги корумпираат судовите, од оние што го корумпираа образованието, од оние што го корумпираа системот и од оние што слугуваат на туѓи интереси.

 

Важно е да се ослободиме од корумпираните и од оние коишто корумпираат. Само така ќе оддадеме почит на нашите предци кои го дадоа животот за нашата слобода.

 

Затоа што ја сакаме Македонија,
Затоа што го сакаме Скопје слободно!, порачува Шамбевски.

The post Шамбевски: Скопје по 79 години повторно е окупирано, овојпат од сопствената Влада и градоначалник кои ја уништуваат државата и градот appeared first on Република.

Денеска, Сојузот на спортови Скопје, по повод ослободувањето на градот Скопје организираше свеченост со доделување на награди 13 Ноември на спортисти, тренери, спортски новинари и организации кои изминатава година постигнале одлични резултати и придонеле за развој и унапредување на македонскиот спорт во различни категории.

На свеченоста што се одржа во Спортскиот центар Јане Сандански беа доделени 9 награди на предлог на Комисијата за награди и признанија и со одлука на Управниот одбор на Сојузот.

Наградата 13 Ноември - Спортист се додели на кик боксерот Бобан Илиоски за освоеното прво место во дисциплината лоу кик - 87кг на ВАКО Европското првенство за сениори во Анталија, Турција што се одржа од 11-ти до 20-ти ноември 2022 година. Илиоски е член на Кик бокс клубот Шампион од Скопје.

Наградата Тренер се додели на Игор Паскоски од Џудо клуб Миоки - Скопје и селектор на сите селекции на Џудо репрезентациите на Македонија во изминатите години. Паскоски е врвен натпреварувач, како тренер има 16 медали од Балканските првенства, 5 медали од кои 2 златни од Континенталните Купови и еден медал од Е.П на Хамза Јашари. Во моментов, Џудо Клуб Миоки е на прво место на ранг листите во Македонија.

Наградата за спортски презентер и новинар и беше доделена на Јана Серафимова Петровска од телевизија Телма. Петровска е автор на спортската емисија „Фер Плеј со Јана“, која има исклучителен придонес во известувањето на спортистите и нивните резултати, како и спортски настани што се одржуваат во Македонија.

Сојузот на спортови Скопје додели награда на организацијата Црвен Крст на Град Скопје за огромната поддршка и соработка во сите спортски настани во Скопје. Црвениот крст со подготвените екипи на терен имаат огромен придонес во развој на Виз Ер Скопскиот Маратон, Авицена Женска Трка, Халк Еко Скопје Трча и Дуатлон натпревари, Прв до врв и уште многу други.

За спортски работник - судија наградата 13 Ноември и беше доделена на Ивана Пројковска. Таа е меѓународна судијка во фудбал со 20 годишно искуство. Пројковска е дел од елитната група на судии од декември 2021 година и една од најдобрите 20 судијки во Европа, прва Македонка назначена да суди на финален натпревар од европското првенство - Европско првенство за жени до 19 години во 2019 година, две Европски првенства за жени до 17 и 19 години. Исто така, таа е и прва женска судијка што судела на натпревар од прва македонска фудбалска лига, но и на машки меѓународни фудбалски натпревари.

Наградата спортски работник за животно дело, Комисијата за награди и признанија ја додели на одбојкарот Владимир Богоевски. Својата кариера ја почнува како одбојкар во Студент, а потоа и во Вардар во седумдесетите години, освојувајќи двократна шампионска титула во СФРЈ. Најголемиот успех како тренер го освојува со Сон Амар од Палма де Мајорка каде стигнува до второ место на купт ЦЕВ. Две децении, Богоевски е спортски директор во Македонскиот Олимписки Комитет.

За спортски работник, исто така награден е и Зоран Карановиќ којшто е долгогодишен признат одбојкар со богата спортска кариера. Од 1991 година до денес, тој е генерален секретар на Одбојкарската Федерација на Македонија. Карановиќ има огромни заслуги како организатор на домашната лига, но и на врвни меѓународни натпревари одржани во Македонија.

Средното училиште на Град Скопје „Никола Карев“ доби награда 13 Ноември за освоени врвни резултати на Европските првенства за средни училишта. Оваа гимназија освои прво место во кошарка - мажи на европски првенства за средни училишта во изминатата сезона.

Професорот по физичко образование, спорт и здравје од ООУ 25 Мај од Скопје Јетон Муслиу доби награда за професор во основно училиште за придонес и развој на училишниот спорт во Скопје.

Наградите 13 Ноември се доделуваат повеќе од 50 години по повод ослободување на градот Скопје.

The post Сојузот на спортови на град Скопје ја додели наградата „13 Ноември“ на најдобрите appeared first on Република.

Во име на коалицијата предводена од ВМРО ДПМНЕ, За обнова на Македонија, денеска по повод ослободувањето на Градот Скопје, 13 Ноември, цвеќе положија претседателот на Советот на Град Скопје Трајко Славески и Петар Милетиќ како коалициски партнер од Српска напредна странка во Македонија.

Како што во 1944 година е ослободен градот Скопје, така и коалицијата За обнова на Македонија, ќе ја ослободи државата од модерниот фашизам, кој е под закрила на сегашната владеачка структура во Република Македонија, порача Милетиќ.

The post Милетиќ: Како што во 1944 година е ослободено Скопје, така ќе ја ослободиме државата од модерниот фашизам appeared first on Република.

Премиерот Димитар Ковачевски, денеска, по повод 13 Ноември, Денот на ослободување на Скопје упати честитка до граѓаните.

Денеска го одбележуваме 13 Ноември, Денот на ослободувањето на Скопје. Ден кога се сеќаваме на херојството, кога им се поклонуваме на жртвите и борците кои се бореа храбро за секоја улица на градот, и на овој ден пред 78 години, на граѓаните на Скопје им ја донесоа долгоочекуваната слобода. Од тој ден, Скопје, пулсира како слободен град, наведува Ковачевски.

Во негово и во име на Владата изразува длабока почит кон сите оние кои го дадоа својот живот за слободата на Скопје и кон сите борци кои сведочат за еден од најзначајните денови во историјата на главниот град.

Нека ни е честит и вековит 13 Ноември – Денот на ослободувањето на Скопје, наведува Ковачевски во чститката.

The post Ковачевски го честита Денот на ослободувањето на Скопје appeared first on Република.

Со положување цвеќе пред Споменикот на ослободителите на Скопје и на Партизанските гробишта во Бутел, на гробот на генерал Михајло Апостолски, како и со културни и спортски манифестации, денеска ќе се одбележи 13 Ноември – Денот на ослободувањето на Скопје.

Собраниска делегација, предводена од потпретседателот Горан Мисовски и од пратениците Даниела Марковска и Тони Јаревски и владина делегација во чиј состав се министите за правда НиколаТупанчески, и за локална самоуправа Ристо Пенов и заменик-министер за транспорт и врски Беким Реџепи, ќе положат цвеќе на Градските гробишта „Бутел” и на споменикот Ослободители на Скопје, на платото пред Владата.

Детскиот културен центар „Карпош” и година традиционално ја организира манифестацијата „Го градам мојот град 2022″, на која учествуваат децата од предучилишните установи.

Оваа манифестација има за цел да ги истакне детските творечки способности и креативност и да ги запознае децата колку големо значење има празникот 13 Ноември за Град Скопје.

Годинава манифестацијата ќе се одржи во виртуелно издание, од 12:00 часот на фејсбук страната и на You Tube каналот на центарот на следниот линк https://www.facebook.com/dkckarposhhttps://www.youtube.com/watch?v=4MgqgL6Oz1U

По повод празникот 13 Ноември е најавена улична трка поради што од 16:30 до 19 часот поголем дел од линиите од јавниот превоз ќе имаат изменет режим на сообраќање од вообичаениот. Трасите на движење се објавени на веб-страницата на ЈСП „Скопје” и на нивниот Фејсбук.

На 13 ноември 1944 година, борците од 42. и 50. Народнослободителна дивизија на македонската војска и 16. Македонска бригада го ослободија Скопје од фашистичка окупација.

По неколкудневните тешки борби со припадниците на 22-та Гренадиска германска дивизија, составена од 47-от и 65-от полк и делови од 11-та воздухопловна десантна дивизија, како и со германската тврдинска бригада „Ангермилер”, која беше распоредена пред Качаничката Клисура, борците со победоносен марш влегоа во градот.

The post Скопје го одбележува 13 Ноември – Денот на ослободувањето appeared first on Република.